«Վավերացնում եմ»
Հայաստանի Հանրապետության
Նախագահ Ռ. Քոչարյան
 31 հոկտեմբերի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 սեպտեմբերի 2005 թվականի N 1729-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԻՆՈՎԱՑԻՈՆ ՀԱՄԱԿԱՐԳԻ ՁԵՎԱՎՈՐՄԱՆ 
2005-2010 ԹՎԱԿԱՆՆԵՐԻ ԾՐԱԳՐԻ ՄԱՍԻՆ

Հիմք ընդունելով Հայաստանի Հանրապետության կառավարության 2005 թվականի հունվարի 20-ի N 2 նիստի «Հայաստանի Հանրապետությունում ինովացիոն գործունեության հայեցակարգի մասին» արձանագրային որոշման 2-րդ կետը` Հայաստանի Հանրապետության կառավարությունը որոշում է.

1. Հաստատել`

ա) Հայաստանի Հանրապետությունում ինովացիոն համակարգի ձևավորման 2005-2010 թվականների ծրագիրը` համաձայն N 1 հավելվածի.

բ) Հայաստանի Հանրապետությունում ինովացիոն համակարգի ձևավորման 2005-2010 թվականների ծրագրի իրականացման միջոցառումների ցանկը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության   վարչապետ	Ա. Մարգարյան
2005 թ. հոկտեմբերի 20     Երևան

  

Հավելված N 1 ՀՀ կառավարության 2005 թվականի սեպտեմբերի 28-ի N 1729-Ն որոշման

Հայաստանի Հանրապետության կառավարության 2005 թվականի հունվարի 20-ի N 2 նիստի արձանագրային որոշմամբ հավանություն է տրվել Հայաստանի Հանրապետությունում ինովացիոն գործունեության հայեցակարգին, որտեղ ամրագրված են գիտելիքի վրա  հիմնված տնտեսության ձևավորման սկզբունքներն ու մոտեցումները: Այդ սկզբունքների հիման վրա մշակվել է սույն ծրագիրը, որտեղ ներկայացված են 2005 - 2010 թվականներին իրականացվելիք միջոցառումները  և դրանց ֆինանսավորման հնարավոր աղբյուրները:

Տնտեսության կայուն զարգացման ուղուն անցումը պայմանավորված է նաև  երկրում ինովացիոն համակարգի ձևավորմամբ, որը գիտահետազոտական, փորձակոնստրուկտորական և արտադրական փոխկապակցված կազմակերպությունների ու դրանք սպասարկող ենթակառուցվածքների ամբողջություն է: Այն ստեղծվելու է ռեսուրսներով, կատարողներով ու իրականացման ժամկետներով համաձայնեցված կազմակերպական-տնտեսական  միջոցառումների իրականացման արդյունքում:

Ինովացիոն հիմքի վրա կարող է կայուն տնտեսական աճ ապահովվել` հիմնարար հետազոտությունների և կիրառական մշակումների, գիտության և արտադրության  զարգացման, դրանց միջև գործնական կապերի խորացման միջոցով: Ինովացիոն համակարգի ձևավորման համար գերակա խնդիրներ են մտավոր և արդյունաբերական սեփականության քաղաքակիրթ շուկայի զարգացման մեխանիզմների գործարկումը,  ինովացիոն կազմակերպությունների գործունեության համար անհրաժեշտ իրավական  դաշտի ստեղծումն ու ֆինանսական աղբյուրների ապահովումը, ինովացիաների տեղեկատվական բազայի ստեղծումը:

Սույն ծրագիրը նախատեսում է ազգային ինովացիոն համակարգի ձևավորում` գիտատեխնիկական և արտադրական-տեխնոլոգիական ոլորտներում փոխկապակցված կառույցների, ինչպես նաև տեխնոլոգիաների փոխանցմամբ և մտավոր սեփականության գնահատմամբ զբաղվող միջնորդ կազմակերպությունների, վենչուրային, ինովացիոն հիմնադրամների, տեխնոպարկերի, բիզնեսի ինկուբատորների, գիտակրթական հաստատությունների ստեղծման և զարգացման միջոցով:

I. ԾՐԱԳՐԻ ՆՊԱՏԱԿՆ ՈՒ ԽՆԴԻՐՆԵՐԸ

Ծրագրի հիմնական նպատակը երկրի տնտեսության տեխնոլոգիական մակարդակի հագեցվածության բարձրացմանը, ինովացիոն արդյունքի ներքին ու արտաքին շուկաներում մրցունակության և այդ հիմքի վրա կայուն տնտեսական զարգացման փուլին անցնելուն նպաստելն է, ինչին կարելի է հասնել հետևյալ խնդիրների համակարգված լուծման միջոցով`

ա) ինովացիոն ոլորտի զարգացման գերակա ուղղությունների սահմանում,

բ) ինովացիոն ոլորտի իրավական դաշտի ստեղծում, այդ ոլորտի ստեղծման և զարգացման նպատակով հարկաբյուջետային, վարկային, մաքսային քաղաքականության մշակում և կատարելագործում,

գ) ինովացիոն ռեսուրսների առաջարկի և պահանջարկի տեղեկատվական-վերլուծական համակարգի ձևավորում,

դ) տնտեսության գիտատար ճյուղերի զարգացման համար գիտատեխնիկական և տեխնոլոգիական բազայի ապահովում,

ե) մասնավոր կապիտալի ներգրավում ինովացիոն ծրագրերի ֆինանսավորման, արտադրության տեխնոլոգիական վերազինման գործում` կիրառելով նաև համաֆինանսավորման սկզբունքը:

II. ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԻՆՈՎԱՑԻՈՆ ՀԱՄԱԿԱՐԳԻ ՍՏԵՂԾՄԱՆ ՄԻՋՈՑԱՌՈՒՄՆԵՐԻ ՈՒՂՂՎԱԾՈՒԹՅՈՒՆԸ

Հայաստանի Հանրապետությունում ինովացիոն համակարգի ձևավորման և զարգացման ծրագրի սկզբնական  (նախապատրաստական և կազմակերպական) փուլն ընդգրկում է 2005-2008 թվականները և ներառում այն միջոցառումները, որոնք ուղղված են համակարգի իրավական  ու կառուցվածքային հիմքերի ստեղծմանը։ Դրանք են`

ա) ինովացիոն համակարգի գործունեությունը կարգավորող օրենսդրական և իրավական ակտերի ընդունում, տնտեսության մեջ ինովացիոն գործընթացների խթանմանն ուղղված օրենսդրական փոփոխությունների և լրացումների կատարում, ենթակառուցվածքային-ինովացիոն նախագծերի իրականացմանը պետական աջակցության մեխանիզմների մշակում, ինովացիոն գործունեության արդյունավետությունը գնահատող և ինովացիոն արդյունքի չափանիշների սահմանում.

բ) գերակա ուղղություններին համապատասխան ինովացիոն նախագծերի ֆինանսավորման նպատակով մրցույթի հայտարարման, հայտերի ընդունման և ընտրության, փորձաքննության կազմակերպման կարգերի մշակում.

գ) հանրապետությունում առկա հիմնարար ու կիրառական գիտական հետազոտություններ իրականացնող կառույցների հիման վրա գործող և նոր ձևավորվող գիտական-ինովացիոն կենտրոնների, ինովացիոն-արտադրական համալիրների, տեխնոպարկերի զարգացում.

դ) տեղեկություններ հավաքագրող, վերլուծող և տրամադրող կենտրոնի կազմակերպում` ինովացիոն գործունեության հետևյալ ուղղություններով`

համապատասխան օրենսդրական բազայի, ինովացիոն ռիսկերի նվազեցման ապահովագրական մեխանիզմների, ինովացիոն արդյունքի, կադրային ռեսուրսների (առաջարկի բանկ) և ինովացիաների սպառողների (պահանջարկի բանկ),

մշակման տարբեր փուլերում գտնվող ինովացիոն նախագծերի և դրանց առևտրայնացմանն աջակցող մարքեթինգային և իրավաբանական  խորհրդատվություն տրամադրող կազմակերպությունների,

տեխնիկական բազայի, արտադրական հզորությունների և դրանց տեխնոլոգիական մակարդակի, ինովացիոն գործունեության ֆինանսավորման աղբյուրների և մեխանիզմների.

ե) մասնագետների պատրաստման, վերապատրաստման և մասնագիտական որակավորման բարձրացման համակարգի ներմուծում, որի շրջանակներում կիրականացվեն`

ինովացիոն ոլորտում ուսումնական ծրագրերի աուդիտ,

մասնագետների պատրաստում` «Տեխնոլոգիական մենեջմենթ», «Ինովացիոն մենեջմենթ», «Նախագծերի կառավարում», «Մտավոր սեփականության գնահատում և պաշտպանություն» մասնագիտացված ծրագրերով,

որոշակի ինովացիոն նախագծերի իրականացման համար մասնագետների նպատակային պատրաստում և վերապատրաստում.

զ) ինովացիոն գործարարության ակտիվացում`

ինովացիոն ոլորտ մասնավոր ներդրումներ գրավելու մեխանիզմների ստեղծում, այդ թվում՝ օգտագործելով պետության կողմից երաշխիքներ տրամադրելու հնարավորությունները, վենչուրային ֆինանսավորման և այլ ֆինանսավորման աղբյուրներ,

առևտրային բանկերի կողմից գերակա ուղղություններին համապատասխան ինովացիոն նախագծերի վարկավորում՝ պետական երաշխիքների առկայությամբ,

ծրագրի միջոցառումների շրջանակներում նախատեսված ինովացիոն գործունեության ակտիվացման տնտեսական, իրավական, կազմակերպական այլ միջոցառումներ:

III. ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԻՆՈՎԱՑԻՈՆ ՀԱՄԱԿԱՐԳԻ ՍՏԵՂԾՄԱՆ ՆԵՐԴՐՈՒՄԱՅԻՆ ՓՈՒԼԸ

Ծրագրի իրականացման հաջորդ փուլն ընդգրկում է 2009-2010 թվականները: Տվյալ էտապի կարևորագույն սկզբունքն ինովացիոն համակարգի տարրերի ինքնակազմակերպման ապահովումն է` իրավական դաշտի լիարժեքության և շուկայական մեխանիզմների  գործողության  պայմաններում:

Ծրագրի իրականացման այս փուլում նախատեսվում են`

ա) տնտեսավարման մեջ մտավոր սեփականության իրավունքների քաղաքակիրթ շրջանառություն և տեխնոլոգիաների փոխանցում ապահովելու ընդունակ փոքր և միջին բիզնեսի սուբյեկտների ներգրավումն ինովացիոն համակարգում,

բ) ինովացիոն արտադրությունների համակողմանի ներգրավումը հանրապետության տնտեսության իրական հատվածում:

IV. ԾՐԱԳՐԻ ՖԻՆԱՆՍԱՎՈՐՄԱՆ ԱՂԲՅՈՒՐՆԵՐԸ

Ծրագրի ֆինանսավորումն  իրականացվում է`

ա) Հայաստանի Հանրապետության պետական բյուջեի միջոցների հաշվին, այդ թվում`

ինովացիոն ենթակառուցվածքների ստեղծման և զարգացման ծրագրերի,

պետության կարիքների համար ինովացիոն ծառայությունների և արտադրանքի թողարկման պետական պատվերի,

ինովացիոն նախագծերի իրականացման գործում ներգրավված բանկային վարկերի տոկոսադրույքների փոխհատուցման և վարկային երաշխիքների տրամադրման,

առանձին համաձայնագրերով, պայմանագրերով կատարվող` ծրագրի իրականացմանն ուղղված ինովացիոն նախագծերի համաֆինանսավորման,

պետական նպատակային ծրագրերի շրջանակներում հատկացվող միջոցների,

գործող օրենսդրությանը համապատասխան նախատեսվող այլ բյուջետային միջոցների.

բ) արտաբյուջետային միջոցների հաշվին, այդ թվում`

ինովացիոն ուղղվածություն ունեցող կազմակերպությունների սեփական միջոցների,

առևտրային բանկերի վարկերի,

վենչուրային և այլ հիմնադրամների միջոցների, սեփական արտադրանքի և ծառայությունների մրցունակության բարձրացման հարցում  շահագրգիռ ներդրողների միջոցների,

ապահովագրական հիմնադրամների միջոցների,

Հայաստանի Հանրապետության օրենսդրությամբ չարգելված այլ աղբյուրների:

V. ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԻ ՀԱՄԱԿԱՐԳՈՒՄԸ

Ծրագրի իրականացման աշխատանքները համակարգվում են Հայաստանի Հանրապետության առևտրի և տնտեսական զարգացման նախարարության կողմից:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ց Ա Ն Կ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԻՆՈՎԱՑԻՈՆ ՀԱՄԱԿԱՐԳԻ ՁԵՎԱՎՈՐՄԱՆ 2005-2010 ԹՎԱԿԱՆՆԵՐԻ ԾՐԱԳՐԻ ԻՐԱԿԱՆԱՑՄԱՆ ՄԻՋՈՑԱՌՈՒՄՆԵՐԻ