ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

30 ապրիլի 2002 թվականի

թիվ 127

Ո Ր Ո Շ ՈՒ Մ

«ԼՈՒԾԱՐՄԱՆ ԸՆԹԱՑԱԿԱՐԳՈՒՄ ԳՏՆՎՈՂ ԲԱՆԿԵՐԻ ԼՈՒԾԱՐԱՅԻՆ ԿԱՌԱՎԱՐԻՉՆԵՐԻ ԿՈՂՄԻՑ ԻՐԵՆՑ ԳՈՐԾՈՒՆԵՈՒԹՅԱՆ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

Հիմք ընդունելով «Բանկերի սնանկության մասին» ՀՀ օրենքի 30-րդ և 33-րդ հոդվածները, ղեկավարվելով «Հայաստանի Հանրապետության կենտրոնական բանկի մասին» ՀՀ օրենքի 20-րդ հոդվածի դրույթներով` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Լուծարման ընթացակարգում գտնվող բանկերի լուծարային կառավարիչների կողմից իրենց գործունեության վերաբերյալ տեղեկությունների հրապարակման կարգը» (կցվում է):

2. Սույն որոշումն ուժի մեջ է հրապարակման պահից:

Հաստատված է Հայաստանի Հանրապետության կենտրոնական բանկի խորհրդի 2002 թվականի ապրիլի 30-ի թիվ 127 որոշմամբ

ԿԱՐԳ

ԼՈՒԾԱՐՄԱՆ ԸՆԹԱՑԱԿԱՐԳՈՒՄ ԳՏՆՎՈՂ ԲԱՆԿԵՐԻ ԼՈՒԾԱՐԱՅԻՆ ԿԱՌԱՎԱՐԻՉՆԵՐԻ ԿՈՂՄԻՑ ԻՐԵՆՑ ԳՈՐԾՈՒՆԵՈՒԹՅԱՆ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՄԱՆ

Սույն կարգի նպատակն է` կանոնակարգել լուծարման գործընթացում գտնվող բանկերի լուծարային կառավարիչների կողմից իրենց գործունեության վերաբերյալ մամուլում տեղեկությունների հրապարակման կարգն ու պայմանները:

ԿԱՆՈՆ 1. ԿԱՐԳԻ ԿԱՐԳԱՎՈՐՄԱՆ ԱՌԱՐԿԱՆ

Սույն կարգը սահմանված է համաձայն «Բանկերի սնանկության մասին» ՀՀ օրենքի 30-րդ և 33-րդ հոդվածների պահանջների և կարգավորում է լուծարման ընթացակարգում գտնվող բանկերի (այսուհետև` լուծարվող բանկ) լուծարային կառավարիչների կողմից իրենց գործունեության վերաբերյալ մամուլում տեղեկությունների հրապարակման կարգը և պայմանները:

ԿԱՆՈՆ 2. ԼՈՒԾԱՐԱՅԻՆ ԿԱՌԱՎԱՐՉԻ` ԻՐ ԳՈՐԾՈՒՆԵՈՒԹՅԱՆ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՄԱՆ ՊԱՐՏԱԿԱՆՈՒԹՅՈՒՆԸ

1. Լուծարային կառավարիչը պարտավոր է սույն կարգով սահմանված կարգով, ամիսը մեկ անգամ, իսկ իր հայեցողությամբ նաև ավելի հաճախ, Հայաստանի Հանրապետությունում հրատարակվող և առնվազն 2000 տպաքանակ ունեցող հանրապետական մամուլում հրապարակել իր գործունեության վերաբերյալ «Բանկերի սնանկության մասին» ՀՀ օրենքով և սույն կարգով սահմանված տեղեկություններ (այսուհետև` տեղեկություններ):

2. Լուծարային կառավարիչը տեղեկությունները հրապարակում է սույն կարգով հաստատված ձևերին համապատասխան, եթե սույն կարգով տեղեկությունների հրապարակման ազատ ոճը թույլատրված չէ:

ԿԱՆՈՆ 3. ՄԻՋԱՆԿՅԱԼ ԼՈՒԾԱՐԱՅԻՆ ՀԱՇՎԵԿՇՌԻ ՀՐԱՊԱՐԱԿՈՒՄԸ

1. Լուծարային կառավարիչը «Բանկերի սնանկության մասին» ՀՀ օրենքի 30-րդ հոդվածի 6-րդ կետով նախատեսված միջանկյալ հաշվեկշիռը հրապարակում է սույն կարգի հավելված 1-ով սահմանված ձևին համապատասխան:

2. Միջանկյալ լուծարային հաշվեկշիռն առանձնակի ծավալուն լինելու դեպքում լուծարային կառավարիչը կարող է այն մամուլում հրապարակել առանձին մասերով` պահպանելով հրապարակումների հաջորդականությունը օրական հաճախականությամբ:

3. Միջանկյալ լուծարային հաշվեկշիռը պետք է պարունակի նաև լուծարվող բանկին սեփականության իրավունքով պատկանող` այլ անձանց մոտ գրավադրված գույքի մասին տեղեկություններ:

4. Միջանկյալ հաշվեկշիռը մամուլում հրապարակելու օրվան հաջորդող աշխատանքային օրը լուծարային կառավարիչը պարտավոր է թերթի 1 օրինակը ներկայացնել Կենտրոնական բանկի իրավաբանական վարչությանը:

ԿԱՆՈՆ 4. ԸՆԹԱՑԻԿ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՈՒՄԸ

1. Լուծարային կառավարիչը հրապարակում է հետևյալ ընթացիկ տեղեկատվությունը.

ա) լուծարվող բանկի գտնվելու վայրը (փոփոխության դեպքում).

բ) ՀՀ կենտրոնական բանկի խորհրդի կողմից հաստատված «Լուծարման ընթացակարգում գտնվող բանկերի լուծարային կառավարիչների կողմից բանկի գույքի իրացման կարգի» կանոն 3-ի 3-րդ կետով նախատեսված հայտարարությունը (եթե կազմակերպվելու է սակարկություն), ինչպես նաև նշված կարգով (իսկ հրապարակային սակարկությունները կանոնակարգող օրենքի ընդունման և ուժի մեջ մտնելու դեպքում` այդ օրենքով սահմանված կարգով) կազմակերպված սակարկությունների արդյունքների մասին տեղեկություններ.

գ) տեղեկություններ լուծարվող բանկի պարտատերերի պահանջների բավարարման օրենքով սահմանված հերթի պահանջների բավարարման մասին, որտեղ նշվում է այն հերթը, որում ընդգրկված պահանջները տվյալ ժամանակահատվածի ընթացքում բավարարվում են կամ ենթակա են բավարարման.

դ) լուծարվող բանկի ամփոփ հաշվեկշիռը, որը պետք է պարունակի ՀՀ տարածքում գործող բանկերի` մամուլում հրապարակվող հաշվեկշիռների համար սահմանված նվազագույն տեղեկությունները (հրապարակվում է կիսամյակը մեկ).

ե) լուծարային կառավարչի հայեցողությամբ` այլ տեղեկություններ:

2. Սույն կանոնով սահմանված տեղեկությունները հրապարակվում են ազատ ոճով (բացառությամբ` լուծարվող բանկի ամփոփ հաշվեկշռի):

3. Սույն կանոնով նախատեսված տեղեկություններն առանձնակի ծավալուն լինելու դեպքում լուծարային կառավարիչը կարող է դրանք մամուլում հրապարակել առանձին մասերով` պահպանելով հրապարակումների հաջորդականությունը` օրական հաճախականությամբ:

4. Սույն կանոնով նախատեսված տեղեկությունները մամուլում հրապարակելու օրվան հաջորդող աշխատանքային օրը լուծարային կառավարիչը պարտավոր է թերթի 1 օրինակը ներկայացնել Կենտրոնական բանկի իրավաբանական վարչությանը:

ԿԱՆՈՆ 5. ԱՆՑՈՒՄԱՅԻՆ ԴՐՈՒՅԹՆԵՐ

Մինչև «Բանկերի սնանկության մասին» ՀՀ օրենքն ուժի մեջ մտնելը նշանակված լուծարային կառավարիչները պետք է առաջնորդվեն սույն կարգով:

ՀԱՎԵԼՎԱԾ

__________

«____________» լուծարվող բանկի միջանկյալ հաշվեկշիռ

ԼՈՒԾԱՐՎՈՂ ԲԱՆԿԻ ԳՈՒՅՔԻ ԿԱԶՄԸ (ՁԵՎ 1)

ԲԱՆԿԻ ՀԱՇՎԵԿՇՌՈՒՄ ԱՐՏԱՑՈԼՎԱԾ ՊԱՀԱՆՋՆԵՐԻ ՑԱՆԿԸ * (ՁԵՎ 2)

* Պարտավորությունների ցանկում հրապարակվում է յուրաքանչյուր ավանդատուի, վարկատուի և այլ պարտատիրոջ անունը կամ անվանումը, ինչպես նաև յուրաքանչյուրին հասանելիք գումարի չափը:

ԲԱՆԿԻՆ ՆԵՐԿԱՅԱՑՎԱԾ ՊԱՀԱՆՋՆԵՐԻ ՑԱՆԿԸ** (ՁԵՎ 3)

** Պարտավորությունների ցանկում հրապարակվում է բանկին պահանջ ներկայացրած յուրաքանչյուր ավանդատուի, վարկատուի և այլ պարտատիրոջ անունը կամ անվանումը, ինչպես նաև յուրաքանչյուրին հասանելիք գումարի չափը:

ԼՈՒԾԱՐՎՈՂ ԲԱՆԿԻՆ ՆԵՐԿԱՅԱՑՎԱԾ ԵՎ ԼՈՒԾԱՐԱՅԻՆ ԿԱՌԱՎԱՐՉԻ ԿՈՂՄԻՑ ՄԵՐԺՎԱԾ ՊԱՀԱՆՋՆԵՐԻ ՑԱՆԿԸ *** (ՁԵՎ 4)

*** Լուծարվող բանկին ներկայացված և լուծարային կառավարչի կողմից մերժված պահանջների ցանկում հրապարակվում է բանկին պահանջ ներկայացրած յուրաքանչյուր ավանդատուի, վարկատուի և այլ պարտատիրոջ անունը կամ անվանումը:

ԼՈՒԾԱՐՎՈՂ ԲԱՆԿԻՆ ՍԵՓԱԿԱՆՈՒԹՅԱՆ ԻՐԱՎՈՒՆՔՈՎ ՊԱՏԿԱՆՈՂ ԱՅԼ ԱՆՁԱՆՑ ՄՈՏ ԳՐԱՎԱԴՐՎԱԾ ԳՈՒՅՔԻ ՑԱՆԿԸ (ՁԵՎ 5)