ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՐԱՄԱՇՐՋԱՆԱՌՈՒԹՅԱՆ ԿԱՐԳԱՎՈՐՄԱՆ ՊԵՏԱԿԱՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

 ՕՏԱՐԵՐԿՐՅԱ ԱՐԺՈՒՅԹԻ ՓՈԽԱՆԱԿՄԱՆ ԿԵՏԵՐԻ ԳՈՐԾՈՒՆԵՈՒԹՅԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

Հայաստանի Հանրապետության դրամաշրջանառության կարգավորման պետական հանձնաժողովը որոշում է.

1. Հաստատել Հայաստանի Հանրապետությունում օտարերկրյա արժույթի փոխանակման կետերի գործունեության կարգը (կցվում է):

2. Սահմանել, որ 1993թ. նոյեմբերի 1-ից Հայաստանի Հանրապետությունում գործող օտարերկրյա արժույթի փոխանակման կետերը ղեկավարվում են սույն որոշմամբ հաստատված կարգով:

3. Հայաստանի Հանրապետության կենտրոնական բանկին և Հայաստանի Հանրապետության պետական հարկային տեսչությանը`

ա) վերահսկողություն իրականացնել օտարերկրյա արժույթի փոխանակման կետերի կողմից սույն որոշմամբ հաստատված կարգի պահպանման նկատմամբ.

բ) յուրաքանչյուր ամսվա 5-ին և 20-ին Հայաստանի Հանրապետության դրամաշրջանառության կարգավորման պետական հանձնաժողովին հաշվետվություն ներկայացնել կատարված ստուգումների արդյունքների վերաբերյալ:

	ՀՀ ԳԵՐԱԳՈՒՅՆ ԽՈՐՀՐԴԻ ՖԻՆԱՆՍԱՎԱՐԿԱՅԻՆ և ԲՅՈՒՋԵՏԱՅԻՆ ՀԱՐՑԵՐԻ ՄՇՏԱԿԱՆ ՀԱՆՁՆԱԺՈՂՈՎԻ ՆԱԽԱԳԱՀ`	Տ. ՍԱՐԳՍՅԱՆ
	ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՖԻՆԱՆՍՆԵՐԻ ՆԱԽԱՐԱՐ`	Լ. ԲԱՐԽՈՒԴԱՐՅԱՆ
	ՀՀ ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀ`	Ի. ԻՍԱՀԱԿՅԱՆ
	25 հոկտեմբերի 1993 թ.

ՕՏԱՐԵՐԿՐՅԱ ԱՐԺՈՒՅԹԻ ՓՈԽԱՆԱԿՄԱՆ ԿԵՏԵՐԻ ԳՈՐԾՈՒՆԵՈՒԹՅԱՆ ԿԱՐԳԸ

1. Հայաստանի Հանրապետությունում օտարերկրյա արժույթի փոխանակման կետերը (այսուհետև` փոխանակման կետեր) պարտավոր են ապահովել աշխատանքային ամենօրյա ռեժիմ, աշխատանքային օրը սկսելով ոչ ուշ, քան ժամը 9.00 և ավարտել ոչ շուտ, քան ժամը 18.00:

Օտարերկրյա արժույթի փոխանակման գործառնություններ իրականացնող բանկերը և դրանց բաժանմունքները իրենք են սահմանում այդ գործառնությունների իրականացման ժամկետները:

2. Փոխանակման կետեր սպասարկող բանկերը պարտավոր են ապահովել դրանց անխափան աշխատանքը:

3. Փոխանակման կետերը պարտավոր են հաճախորդների համար երևացող մասում ցուցատախտակի վրա նշել սպասարկող կազմակերպության կամ բանկի անվանումը, տվյալ պահին օտարերկրյա արժույթի առքուվաճառքի կուրսերը:

4. Փոխանակման կետերի համար սահմանվում են հետևյալ նվազագույն արժութային ռեզերվները.

ա) 200 ԱՄՆ-ի դոլար.

բ) ՀՀ կենտրոնական բանկի կողմից սահմանված կուրսով 200 ԱՄՆ-ի դոլարին համարժեք Ռուսաստանի Դաշնության կենտրոնական բանկի 1993թ. նմուշի բանկային տոմսեր.

գ) ՀՀ կենտրոնական բանկի կողմից սահմանված կուրսով 200 ԱՄՆ-ի դոլարին համարժեք Հայաստանի Հանրապետության արժույթ:

5. Նշված նվազագույն արժութային ռեզերվը չապահովելու դեպքում փոխանակման կետը պարտավոր է անմիջապես դադարեցնել բոլոր գործառնությունները:

Այն դեպքում, երբ փոխանակման կետը 24 ժամ անընդմեջ գործառնություններ չի կատարում, ապա ՀՀ կենտրոնական բանկը պարտավոր է հետ վերցնել օտարերկրյա արժույթով գործառնություններ իրականացնելու համար տրված լիցենզիան:

6. Փոխանակման կետը իրավունք չունի հաճախորդին մերժել ԱՄՆ-ի դոլարի, ՌԴ ռուբլու, ինչպես գնումը, այնպես էլ վաճառքը, եթե գործարքի գումարը չի գերազանցում նվազագույն ռեզերվների մեծությունը:

7. Փոխանակման կետերում կատարվող բոլոր գործարքները ենթակա են խիստ հաշվառման և հատուկ մատյանում գրանցման ըստ ժամանակային հերթականության` նշելով վաճառված և գնված արժույթի քանակը և կուրսը: Գրանցման մատյանները պետք է նախապես համարակալվեն և կնքվեն տվյալ կազմակերպության և հարկային պետական տեսչության կողմից:

8. Փոխանակման կետերը պարտավոր են հաճախորդներին տրամադրել կատարված գործարքը հաստատող տեղեկանք-անդորրագիր:

9. Փոխանակման կետերում օտարերկրյա արժույթի առքուվաճառքի կուրսերի շեղման սահմանը չպետք է գերազանցի 7 օ/օ-ը:

10. Սույն կարգով նախատեսված պահանջների խախտման դեպքում փոխանակման կետի օրական հասույթները ենթակա են ՀՀ կենտրոնական բանկի կամ ՀՀ պետական հարկային տեսչության կողմից գանձման ՀՀ պետական բյուջե:

		Տ. ՍԱՐԳՍՅԱՆ
		Լ. ԲԱՐԽՈՒԴԱՐՅԱՆ
		Ի. ԻՍԱՀԱԿՅԱՆ