«Գրանցված է»

ՀՀ արդարադատության

նախարարության կողմից

2 հոկտեմբերի 2002 թ.

Պետական գրանցման թիվ 60602225

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

18 սեպտեմբերի 2002 թ. ք. Երևան

N 13/2-Ն

Ո Ր Ո Շ ՈՒ Մ

ՏԵՂԱԿԱՆ ԻՆՔՆԱԿԱՌԱՎԱՐՄԱՆ ՄԱՐՄԻՆՆԵՐԻ ԸՆՏՐՈՒԹՅՈՒՆՆԵՐՈՒՄ ՆԱԽԸՆՏՐԱԿԱՆ ՔԱՐՈԶՉՈՒԹՅԱՆ ԻՐԱԿԱՆԱՑՄԱՆ ՀԱՄԱՐ ՊԵՏԱԿԱՆ ԵՎ ՏԵՂԱԿԱՆ ԻՆՔՆԱԿԱՌԱՎԱՐՄԱՆ ՄԱՐՄԻՆՆԵՐԻ ԿՈՂՄԻՑ ԱՆՎՃԱՐ ՏԱՐԱԾՔՆԵՐ ՏՐԱՄԱԴՐԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով Հայաստանի Հանրապետության ընտրական օրենսգրքի 18-րդ հոդվածի 1-ին կետով և 20-րդ հոդվածի 9-րդ կետով, ՀՀ կենտրոնական ընտրական հանձնաժողովը

ՈՐՈՇՈՒՄ Է.

Սահմանել տեղական ինքնակառավարման մարմինների ընտրություններում նախընտրական քարոզչության իրականացման համար պետական և տեղական ինքնակառավարման մարմինների կողմից անվճար տարածքներ տրամադրելու կարգը (կցվում է):

Հայաստանի Հանրապետության կենտրոնական ընտրական հանձնաժողովի նախագահ՝

Ա. Սահրադյան

Հավելված ՀՀ ԿԸՀ-ի 2002 թ. սեպտեմբերի 18-ի թիվ 13/2-Ն որոշման

Կ Ա Ր Գ

Տեղական ինքնակառավարման մարմինների ընտրություններում նախընտրական քարոզչության իրականացման համար պետական ԵՎ տեղական ինքնակառավարման մարմինների կողմից անվճար տարածքներ տրամադրելու

1. Սույն կարգը սահմանում է Հայաստանի Հանրապետությունում տեղական ինքնակառավարման մարմինների ընտրությունների ժամանակ թեկնածուների կողմից նախընտրական քարոզչությունն իրականացնելու նպատակով պետական և տեղական ինքնակառավարման մարմինների կողմից անվճար տարածքներ տրամադրելու պայմանները:

2. Պետական և տեղական ինքնակառավարման մարմինների ղեկավարները՝ թեկնածուների գրանցման վերջին օրվանից ոչ ուշ, քան 3 օրվա ընթացքում, համապատասխան ընտրատարածքային ընտրական հանձնաժողովի պահանջով ընտրողների հետ թեկնածուների համատեղ հանդիպումների անցկացման համար, թեկնածուներին անվճար տրամադրում են իրենց կողմից տնօրինվող տարածքները:

3. Թեկնածուները իրենց կողմից կազմակերպվող միջոցառումների անցկացման նպատակով պետական և տեղական ինքնակառավարման մարմինների ղեկավարներին ներկայացնում են հայտ (գրավոր) համապատասխան տարածք տրամադրելու համար:

4. Հայտում պետք է նշվեն՝

ա) կազմակերպվող միջոցառման ձևը և վայրը.

բ) միջոցառումը սկսելու և ավարտելու ժամը.

գ) կազմակերպիչների տվյալները.

դ) հայտը ներկայացնելու տարին, ամիսը ամսաթիվը և ժամը:

Հայտերը պետք է ներկայացվեն կազմակերպվող միջոցառման օրվանից ոչ ուշ, քան 5 օր առաջ:

5. Պետական և տեղական ինքնակառավարման մարմինների ղեկավարները 2 օրվա ընթացքում քննարկում են ներկայացված հայտերը և կազմակերպիչներին ու համապատասխան ընտրատարածքային ընտրական հանձնաժողովներին են ուղարկում իրենց որոշումները՝ համապատասխան տարածք տրամադրելու մասին:

6. Եթե հայտում նշված տարածքը այդ ժամանակահատվածի համար արդեն հատկացվել է այլ թեկնածուի, ապա պետական և տեղական ինքնակառավարման մարմինների ղեկավարները պետք է հայտատուին առաջարկեն նմանատիպ այլ տարածք կամ նշված տարածքը՝ այլ ժամի:

Տարբեր հայտերով միջոցառումների անցկացման ժամերը համընկնելու դեպքում, նախապատվությունը տրվում է ավելի վաղ հայտ ներկայացրած թեկնածուին: