603.0103.07.03.02

«Գրանցված է»
ՀՀ արդարադատության
նախարարության կողմից
4 ապրիլի 2002 թ.
Պետական գրանցման թիվ 60302060

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՎԻՃԱԿԱԳՐՈՒԹՅԱՆ ՊԵՏԱԿԱՆ ԽՈՐՀՈՒՐԴ

7 մարտի 2002 թ. ք. Երևան

N 103

Ո Ր Ո Շ ՈՒ Մ

ԱՊՐԱՆՔՆԵՐԻ ԱՐՏԱՀԱՆՄԱՄԲ ԵՎ ՆԵՐՄՈՒԾՄԱՄԲ ԶԲԱՂՎՈՂ ԿԱԶՄԱԿԵՐՊՈՒԹՅՈՒՆՆԵՐԻ ԸՆՏՐԱՆՔԱՅԻՆ ՀԵՏԱԶՈՏՈՒԹՅԱՆ ՀԱՐՑԱԹԵՐԹԸ (ՁԵՎ N 1-ԱՐՏԱՔԻՆ ԱՌԵՎՏՈՒՐ) ԵՎ ՄԵԹՈԴԱԿԱՆ ՑՈՒՑՈՒՄՆԵՐԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Պետական վիճակագրության մասին» ՀՀ օրենքի 10 հոդվածի երրորդ մասի ե/ կետով` Հայաստանի Հանրապետության վիճակագրության պետական խորհուրդը որոշում է.

Հաստատել Ապրանքների արտահանմամբ և ներմուծմամբ զբաղվող կազմակերպությունների ընտրանքային հետազոտության հարցաթերթը (Ձև N 1-Արտաքին առևտուր) և Մեթոդական ցուցումները:

Նախագահ`

Ս. Մնացականյան

* - Ծանոթություն -	Հարցաթերթ Ձև 1-ը չի բերվում

Մ Ե Թ Ո Դ Ա Կ Ա Ն  Ց ՈՒ Ց ՈՒ Մ Ն Ե Ր

Տեղեկատվության հավաքագրման նպատակը: Պահանջվող տեղեկությունները ՀՀ Ազգային վիճակագրական ծառայությանն անհրաժեշտ են հանրապետության արտաքին առևտրի բնագավառում տրանսպորտային և ապահովագրական ծառայությունների վերաբերյալ ամփոփ տեղեկատվություն ստանալու համար, որոնք օգտագործվելու են ՀՀ վճարային հաշվեկշռի կազմման համար: Միաժամանակ, ՀՀ վճարային հաշվեկշռի կազմման աշխատանքներն իրականացնելու համար անհրաժեշտ են նաև որոշ տեղեկություններ` մասնավորապես, ապրանքների դիմաց կատարված վճարումների ժամկետների և ապրանքների գործարքային (պայմանագրային) ու մաքսային արժեքների վերաբերյալ: Պահանջվող տեղեկությունները կիրառվելու են ՀՀ ԱՎԾ-ի կողմից կատարվող հաշվարկներում և անվանական հրապարակման ենթակա չեն:

Չափի միավորը: Տվյալները խնդրվում է ներկայացնել հազար ԱՄՆ դոլարով: ՀՀ դրամի կամ այլ երկրների արժույթների փոխարկումն ԱՄՆ դոլարի կատարվում է համաձայն ՀՀ Կենտրոնական բանկի կողմից սահմանված միջին փոխարժեքի:

Հարցաթերթի լրացման կարգը: Հարցաթերթի առաջին բաժնում լրացվում է կազմակերպության կողմից հաշվետու եռամսյակում արտահանված ապրանքների ընդհանուր ծավալի մասին տեղեկությունը: Ընդ որում` 1.Ա տողում լրացվում է ընդամենը եռամսյակի ընթացքում արտահանված ապրանքների ծավալը, իսկ 1.1-1.4 (կամ ավել) տողերում առավել մեծ տեսակարար կշիռ ունեցող ապրանքների ծավալը, որոնց հանրագումարը փոքր կամ հավասար պետք է լինի 1.Ա տողի հանրագումարից: Բ սյունակում նշվում է ապրանքների ծածկագիրն ըստ ԱՏԳԱԱ-ի երկնիշ մակարդակի, իսկ Գ սյունակում` այդ ապրանքների քանակը` արտահայտված տոննայով: 1-ին սյունակում լրացվում է ապրանքի արժեքը ՖՕԲ գնով, այսինքն, ապրանքի գործարքային (պայմանագրային) գինը և կատարված ծախսերը մինչև ՀՀ մաքսային սահման (օդանավակայան): 2-րդ սյունակում լրացվում է այն տրանսպորտային ծախսերի ծավալը, որը ուսումնասիրվող կազմակերպությունը կատարել է արտահանվող ապրանքը ՀՀ սահմանից (օդանավակայանից) մինչև ներմուծող երկիր հասցնելու համար: 3-րդ սյունակում լրացվում է այն ապահովագրական վճարների գումարը, որը վճարվել է արտահանող կազմակերպության կողմից ապրանքը ներմուծող երկիր հասցնելու համար:

Երկրորդ բաժնում լրացվում է կազմակերպության կողմից եռամսյակում ներմուծված ապրանքների ծավալը ՍԻՖ արժեքով, ընդ որում` ապրանքի ՖՕԲ արժեքը սյունակում լրացվում է ապրանքի արժեքը մինչև արտահանող երկրի սահմանը (գործարքային գինը), 3-րդ սյունակում` տրանսպորտային ծախսերը, որը վճարվել է տրանսպորտային ընկերություններին ապրանքը մինչև ՀՀ սահման (օդանավակայան) հասցնելու համար, իսկ 4-րդ սյունակում` փոխադրման համար կատարված ապահովագրական վճարների ծավալը:

Հարցաթերթի 1-ին և 2-րդ բաժինների 1.3 և 2.3 կետերի լրացման ժամանակ, առաջնորդվել հետևյալով` ապրանքի արժեքը վճարված համարել անմիջապես ներմուծման և արտահանման ժամանակ (կետ 1.31 և 2.31), եթե վճարումը կատարվել է պայմանագրի կնքման ժամանակ անկախ վճարման ձևից` կանխիկ, անկանխիկ, ակրեդիտիվային կամ բնեղեն (ապրանքափոխանակությամբ): Նույն սկզբունքով առաջնորդվել, եթե վճարումը իրականացվել է մինչև երեք ամսվա ընթացքում (կետ 1.32 և 2.3.2) կամ երեք ամիս և ավել ժամանակահատվածում (կետ 1.33 և 2.3.3):

Շնորհակալություն համագործակցության համար: Արժանահավատ վիճակագրությունը կախված է այնպիսի կազմակերպությունների համագործակցությունից, ինչպիսին Ձերն է:

Հարցաթերթը լրացվեց`	Ազգանուն, անուն	Հեռ. համար
Հաշվարար
Տնտեսվարող սուբյեկտի պատասխանատու անձ