«Գրանցված է»
ՀՀ արդարադատության
նախարարության կողմից
11 սեպտեմբերի 2002 թ.
Պետական գրանցման թիվ 05002169

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

28 օգոստոսի 2002 թ. ք. Երևան

N 10/7-Ն

Ո Ր Ո Շ ՈՒ Մ

ՏԵՂԱՄԱՍԱՅԻՆ ԸՆՏՐԱԿԱՆ ՀԱՆՁՆԱԺՈՂՈՎՆԵՐՈՒՄ ՎԻՃԱԿԱՀԱՆՈՒԹՅՈՒՆՆԵՐ ԱՆՑԿԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով Հայաստանի Հանրապետության ընտրական օրենսգրքի 41-րդ հոդվածի 27-րդ ենթակետով և 53-րդ հոդվածով, ՀՀ կենտրոնական ընտրական հանձնաժողովը

ՈՐՈՇՈՒՄ Է.

1. Սահմանել տեղամասային ընտրական հանձնաժողովներում վիճակահանություններ անցկացնելու կարգը (կցվում է):

2. Սույն որոշումն ուժի մեջ մտնելու պահից ուժը կորցրած ճանաչել ԿԸՀ-ի 26.05.1999 թ. թիվ արձ. 26 կետ 4 «Տեղամասային ընտրական հանձնաժողովներում վիճակահանություններ անցկացնելու կարգի մասին» որոշումը:

Հայաստանի Հանրապետության կենտրոնական ընտրական հանձնաժողովի նախագահ`

Ա. Սահրադյան

Հավելված ՀՀ ԿԸՀ-ի 2002 թ. օգոստոսի 28-ի թիվ 10/7-Ն որոշման

Կ Ա Ր Գ

Տեղամասային ընտրական հանձնաժողովներում վիճակահանություններ անցկացնելու

1. Քվեարկության նախորդ օրը տեղամասային ընտրական հանձնաժողովն իր նիստում կատարում է վիճակահանություն և որոշում քվեաթերթիկներն ստորագրող հանձնաժողովի 3 անդամներին։ Հանձնաժողովի նախագահը վիճակահանությանը մասնակցող հանձնաժողովի անդամների թվին համապատասխան պատրաստում է վիճակահանության թերթիկներ՝ 3-ի վրա կատարելով որևիցե նշում, դրանք քառապատիկ ծալում և գցում է վիճակահանության համար նախատեսված արկղի մեջ։ Հանձնաժողովի անդամների կողմից թերթիկները հանելուց հետո վիճակահանության արդյունքների մասին գործավարության մատյանում կազմվում է արձանագրություն։

2. Քվեարկության օրը ժամը 7⁰⁰-ին տեղամասային ընտրական հանձնաժողովի նիստում կատարվում է վիճակահանություններ և որոշվում են՝ քաղաքացիների գրանցումն իրականացնող (յուրաքանչյուր 1000 ընտրողին մեկական անդամ), քվեաթերթիկներ հատկացնող (յուրաքանչյուր 1000 ընտրողին մեկական անդամ), քվեաթերթիկները կնքող և քվեատուփի համար պատասխանատու հանձնաժողովի անդամներին:

Հանձնաժողովի նախագահը վիճակահանությանը մասնակցող հանձնաժողովի անդամների թվին համապատասխան պատրաստում է վիճակահանության թերթիկներ, որոնցում նշվում է՝

ա) «քաղաքացիների գրանցումը իրականացնող» 2 (հատ)

բ) «քվեաթերթիկներ հատկացնող» (2 հատ)

գ) «քվերաթերթիկներ կնքող» (1 հատ)

դ) «քվեատուփի համար պատասխանատու» (1 հատ):

Վիճակահանության թերթիկները քառապատիկ ծալվում և գցվում են վիճակահանության համար նախատեսված արկղի մեջ: Հանձնաժողովի անդամների կողմից թերթիկները հանելուց հետո վիճակահանության արդյունքների մասին գործավարության մատյանում կազմվում է արձանագրություն։

3. Քվեարկության օրը տեղամասային ընտրական հանձնաժողովների անդամների աշխատանքային հերթափոխը կատարվում է 3-ժամյա հաճախականությամբ՝ հանձնաժողովի նախագահի կողմից:

4. Հանձնաժողովի նախագահը, նախագահի տեղակալը և քարտուղարը վիճակահանության չեն մասնակցում: Նրանք կարող են փոխարինել հանձնաժողովի մյուս անդամներին նրանց ժամանակավոր բացակայության ընթացքում։