ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

15 սեպտեմբերի 2000 թվականի N 633
քաղ. Երևան

ՍՓՅՈՒՌՔԻ ՀԵՏ ԿԱՊԵՐԻ ԳՈՐԾԱԴԻՐ ՔԱՐՏՈՒՂԱՐՈՒԹՅԱՆ ԿԱՆՈՆԱԴՐՈՒԹՅՈՒՆԸ ԵՎ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարության 2000 թվականի հունիսի 23-ի «Սփյուռքի հետ կապերի գործադիր քարտուղարություն ստեղծելու մասին» N 342 որոշման 2-րդ կետին համապատասխան`

1. Հաստատել Սփյուռքի հետ կապերի գործադիր քարտուղարության կանոնադրությունը և կենտրոնական ապարատի կառուցվածքը (կցվում են):

2. Հայաստանի Հանրապետության վարչապետի 1998 թվականի նոյեմբերի 6-ի «Պետական կառավարման մարմինների աշխատողների առավելագույն թվաքանակ և ղեկավարների տեղակալների թվաքանակ սահմանելու մասին» N 620 որոշման մեջ կատարել հետևյալ լրացումը`

որոշման հավելվածը լրացնել հետևյալ բովանդակությամբ 81-րդ կետով.

«81. Սփյուռքի հետ կապերի գործադիր քարտուղարություն

24

1

- »:

 

Հայաստանի Հանրապետության վարչապետ

Ա. Մարգարյան

Հաստատված է ՀՀ վարչապետի 2000 թ. սեպտեմբերի 15-ի N 633 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

Սփյուռքի հետ կապերի գործադիր քարտուղարության

I. Ընդհանուր դրույթներ

1. Սփյուռքի հետ կապերի գործադիր քարտուղարությունը (այսուհետև` քարտուղարություն) պետական կառավարման հանրապետական մարմին է, որն իրականացնում և համակարգում է Հայաստան-սփյուռք փոխհարաբերությունները` ենթարկվելով Հայաստանի Հանրապետության արտաքին գործերի նախարարությանը և Հայաստանի Հանրապետության կառավարությանը:

2. Քարտուղարությունն իր գործունեությունն իրականացնում է միջազգային իրավունքի սկզբունքներին և նորմերին համապատասխան` ղեկավարվելով Հայաստանի Հանրապետության օրենսդրությամբ և սույն կանոնադրությամբ:

3. Քարտուղարությունն իր իրավասության սահմաններում Հայաստանի Հանրապետության անունից իր գործողություններով կարող է ձեռք բերել և իրականացնել գույքային ու անձնական ոչ գույքային իրավունքներ և պարտականություններ, ինչպես նաև` հանդես գալ դատարանում:

4. Քարտուղարությունն ունի Հայաստանի Հանրապետության զինանշանի պատկերով և իր անվամբ կնիք, դրոշմակնիք ու ձևաթուղթ:

5. Քարտուղարության ֆինանսավորումն իրականացվում է Հայաստանի Հանրապետության պետական բյուջեի միջոցների հաշվին:

II. Քարտուղարության հիմնական խնդիրները եվ գործառույթները

6. Քարտուղարության հիմնական խնդիրներն են`

ա) Հայրենիք-սփյուռք փոխհարաբերությունների համակարգումը` նպաստելով Հայաստանի և սփյուռքի միջև բազմակողմանի կապերի հաստատմանը, համագործակցության զարգացմանն ու խորացմանը.

բ) սփյուռքի քաղաքական, բարեգործական, հայրենակցական, գիտական, կրոնական և այլ համայնքային կազմակերպությունների, ինչպես նաև անհատների հետ համագործակցությունը` անկախ նրանց գաղափարական համոզմունքներից և կրոնական դավանանքից.

գ) հայ եկեղեցու հետ համագործակցությունը.

դ) հայ ժողովրդի երկու հատվածի միջև համազգային փոխըմբռնման, փոխվստահության, միասնության և համախմբվածության մթնոլորտ ստեղծելու, համահայկական խնդիրների շուրջ բազմակողմանի համագործակցություն ապահովելու նպատակով աշխատանքների կատարումը, հայ համայնքների միջև միջհամայնքային կապերի հաստատմանն օժանդակությունը և սփյուռքի համայնքային կազմակերպական նախաձեռնություններին աջակցությունը.

ե) համահայկական քաղաքական, տնտեսական, մշակութային, կրթական խորհրդաժողովների, գիտաժողովների, հավաքների, ինչպես նաև այլ բնույթի միջոցառումների կազմակերպումը:

7. Իր հիմնական խնդիրներին համապատասխան քարտուղարությունը`

ա) նպաստում է Հայաստանի և սփյուռքի հասարակական-քաղաքական կազմակերպությունների սերտ համագործակցությանը` համազգային խնդիրների քննարկման և լուծման ասպարեզում.

բ) աջակցում է Հայաստանի և սփյուռքի կողմից Հայոց ցեղասպանության ճանաչման հարցի ուղղությամբ կատարվող աշխատանքներին, ամփոփում և վերլուծում է դրանք և նախապատրաստում անհրաժեշտ երաշխավորություններ: Այդ աշխատանքները համակարգելու նպատակով ստեղծում է աշխատանքային մասնագիտական խմբեր` Հայաստանի և սփյուռքի ներկայացուցիչների մասնակցությամբ.

գ) համագործակցում է սփյուռքի այն կազմակերպությունների և անհատների հետ, որոնք աշխատանքներ են իրականացնում Հայաստանի արտաքին քաղաքականության խնդիրների լուծման, միջազգային ասպարեզում Հայաստանի դիվանագիտական դիրքերի և հեղինակության ամրապնդման համար.

դ) նպաստում է քաղաքական քարոզչության ուղղությամբ սփյուռքի կողմից կատարվող աշխատանքների կազմակերպմանը` առավելագույնս օգտագործելով առկա հնարավորությունները.

ե) քաղաքական համագործակցության ակտիվացման և քաղաքական քարոզչության աշխատանքներն առավել արդյունավետ դարձնելու ու համակարգելու նպատակով պարբերաբար կազմակերպում է քննարկումներ, խորհրդատվական հանդիպումներ` Հայաստանի և սփյուռքի համապատասխան կազմակերպությունների ու անհատների մասնակցությամբ.

զ) համակողմանի աջակցություն է ցուցաբերում այն կազմակերպություններին և անհատներին, որոնք զբաղվում են օտարերկրյա պետությունների օրենսդիր ու գործադիր իշխանության ներկայացուցիչների հետ հայանպաստ աշխատանքների իրականացմամբ.

է) կապեր է հաստատում ու զարգացնում սփյուռքի մշակութային միությունների և այլ հաստատությունների` արվեստի, գիտության ու գրականության գործիչների հետ, անհրաժեշտ օգնություն ցույց տալիս սփյուռքի մշակութային նախաձեռնությունների իրականացմանը.

ը) սփյուռքում և Հայաստանում կազմակերպում է մշակութային հավաքներ, գիտաժողովներ, փառատոներ և այլ համատեղ միջոցառումներ: Սփյուռքահայ երիտասարդներին մասնակից է դարձնում Հայաստանի պատմամշակութային հուշարձանների վերանորոգման աշխատանքների և մշակութային այլ նախաձեռնությունների իրականացմանը.

թ) օժանդակում է սփյուռքի մշակութային կենտրոնների ու հաստատությունների ստեղծմանը, հայրենիքի և սփյուռքի համապատասխան հաստատությունների միջև երկարաժամկետ համագործակցության ծրագրերի մշակմանը.

ժ) կազմում է սփյուռքում գործող կրթական և մշակութային յուրաքանչյուր հաստատության վերաբերյալ համապատասխան տեղեկատվական փաթեթ.

ժա) նպաստում է սփյուռքի կրթական զարգացման ծրագրերի իրականացմանը, ինչպես նաև համահայկական կրթական միջավայրի ստեղծման ծրագրի մշակմանը.

ժբ) աջակցում է Հայաստանի և սփյուռքի գիտական կապերի զարգացման ու դրանց միջոցով` միջազգային գիտական կապերի զարգացմանը: Նպաստում է Հայաստանի և սփյուռքի գիտական կազմակերպությունների ու գիտնականների համագործակցությանը.

ժգ) նախատեսում է Հայաստանի համապատասխան կազմակերպությունների և սփյուռքի մասնագետների մասնակցությամբ արդի պահանջներին համապատասխան հայեցի դաստիարակության անհրաժեշտ ծրագրերի ու դասագրքերի պատրաստումը և հրատարակումը: Կազմակերպում է դասավանդողների վերապատրաստման դասընթացներ.

ժդ) աջակցում է Հայաստանի և սփյուռքի մասնագետների ընդգրկմամբ աշխատանքային խմբերի ստեղծմանը` կրթական համակարգի բարելավման, համագործակցության խորացման, արևելահայերենի և արևմտահայերենի մերձեցման հնարավորությունների քննարկման, դրանց միասնական ուղղագրության վերաբերյալ առաջարկությունների նախապատրաստման համար.

ժե) նպաստում է Հայաստանի և սփյուռքի միջև զբոսաշրջիկության զարգացման ուղղությամբ համապատասխան կազմակերպությունների կողմից իրականացվող աշխատանքներին.

ժզ) աջակցում է Հայաստանի և սփյուռքի տեղեկատվական միջոցների բազմակողմանի համագործակցության ծավալմանը, նպաստում համահայկական տեղեկատվական դաշտի ստեղծմանը: Աշխատանքներ է իրականացնում համահայկական հեռուստաալիքի ստեղծման համար.

ժէ) հայ գաղթօջախների մասին ստեղծում է համապարփակ բովանդակային տեղեկատվական բանկ` ունենալով յուրաքանչյուր երկրի հայ համայնքի լիարժեք, ամբողջական (պատմական, քանակական, քաղաքական, կրթամշակութային, հոգևոր, գիտական, տնտեսական և այլն) պատկերը.

ժը) նախապատրաստում և հրատարակում է սփյուռքի հայկական կազմակերպությունների համապարփակ տեղեկատու, աշխատանքներ է իրականացնում համանման մասնագիտական տեղեկատուների պատրաստման և հրատարակման համար.

ժթ) միջազգային ասպարեզում տեղեկատվական աշխատանքներն արդյունավետ կազմակերպելու, սփյուռքի տեղեկատվական հնարավորություններն առավել նպատակային օգտագործելու համար կազմակերպում է համապատասխան միջոցառումներ, սփյուռքի տեղեկատվական միջոցներին տրամադրում անհրաժեշտ երաշխավորական նյութեր, տեղեկանքներ.

ի) պարբերաբար ուսումնասիրում է սփյուռքի տեղեկատվական միջոցների հրապարակումները, պատրաստում վերլուծական տեղեկագրեր և դրանք տրամադրում համապատասխան կազմակերպություններին.

իա) հայ համայնքների միջոցով հավաքում և ուսումնասիրում է օտարերկրյա պետություններում հայերի ու Հայաստանի մասին հրապարակումները, ստեղծում արտասահմանյան երկրների հայագիտական հրապարակումների տեղեկատվական բանկ.

իբ) աջակցում է Հայաստանի տնտեսական վերականգնման գործին հայ համայնքների ակտիվ մասնակցությանը.

իգ) հայ համայնքներին է տրամադրում Հայաստանի տնտեսության վերաբերյալ անհրաժեշտ տեղեկություններ` տնտեսության վերականգնմանը նպաստող առանձին բիզնես-ծրագրերի իրականացմանը մասնակից դարձնելու, ինչպես նաև օտարերկրյա ներդրողներին ներկայացնելու և երաշխավորելու համար.

իդ) զբաղվում է Հայաստան-սփյուռք փոխհարաբերությունների, խնդիրների և զարգացման հեռանկարների ուսումնասիրությամբ.

իե) ուսումնասիրում և վերլուծում է սփյուռքում տեղի ունեցող քաղաքական ու տնտեսական, էթնիկամշակութային, ժողովրդագրական գործընթացների զարգացման ընթացքը, մշակում և իրականացնում դրանց համարժեք կոնկրետ ծրագրեր.

իզ) հաշվի առնելով հայ համայնքների առանձնահատկությունները` կազմում է սփյուռքի ազգագրական քարտեզը` ճշգրտելով յուրաքանչյուր գաղթօջախի ազգային ավանդույթների, նկարագրի, ինքնության պահպանման և զարգացման գործնական քայլերի առաջնահերթությունը, ստեղծելով ազգային ինքնության պահպանման անհրաժեշտ պայմաններ ու միջավայր.

իէ) աջակցում է սփյուռքի ինքնակազմակերպման, վերակազմակերպման նախաձեռնություններին:

III. Քարտուղարության աշխատանքների կազմակերպումը

8. Քարտուղարությունը`

ա) իր կանոնադրական խնդիրներն ու գործառույթներն իրականացնելիս համագործակցում է Հայաստանի Հանրապետության պետական և տեղական ինքնակառավարման մարմինների հետ.

բ) մասնակցում է իր իրավասության մեջ մտնող հարցերի վերաբերյալ միջազգային պայմանագրերի մշակմանն ու քննարկմանը.

գ) Հայաստանի Հանրապետության անունից իրականացնում է քարտուղարության պետական սեփականություն հանդիսացող գույքի տիրապետման, օգտագործման և տնօրինման լիազորությունները.

դ) կազմակերպում է քաղաքացիների և կազմակերպությունների առաջարկությունների, դիմումների, բողոքների ժամանակին քննարկումը, միջոցներ ձեռնարկում դրանցում հաղորդվող` քարտուղարության գործունեության մեջ տեղ գտած թերությունների վերացման համար.

ե) իրականացնում է Հայաստանի Հանրապետության օրենսդրությամբ նախատեսված այլ լիազորություններ:

9. Քարտուղարությունը ղեկավարում է գործադիր քարտուղարը, որին պաշտոնի նշանակում և պաշտոնից ազատում է Հայաստանի Հանրապետության վարչապետը` Հայաստանի Հանրապետության արտաքին գործերի նախարարի ներկայացմամբ:

10. Գործադիր քարտուղարի տեղակալին պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով Հայաստանի Հանրապետության արտաքին գործերի նախարարի և գործադիր քարտուղարի հետ:

11. Գործադիր քարտուղարը`

ա) կազմակերպում ու ղեկավարում է քարտուղարության գործունեությունը և պատասխանատու է քարտուղարության գործառույթների կատարման համար.

բ) սահմանում է գործադիր քարտուղարի տեղակալի և կառուցվածքային ստորաբաժանումների ղեկավարների իրավասությունների սահմանները.

գ) ներկայացնում է քարտուղարությունը Հայաստանի Հանրապետությունում, այլ պետություններում և միջազգային կազմակերպություններում.

դ) սահմանված կարգով խրախուսում է քարտուղարության աշխատողներին և կարգապահական ներգործության միջոցներ կիրառում նրանց նկատմամբ.

ե) իր իրավասության սահմաններում արձակում է հրամաններ և տալիս ցուցումներ.

զ) սույն կանոնադրությամբ սահմանված գործառույթներն իրականացնելու նպատակով անմիջականորեն համագործակցում է Հայաստանի Հանրապետության պետական և այլ մարմինների հետ.

է) իրականացնում է Հայաստան-սփյուռք փոխհարաբերությունների համակարգման աշխատանքները` համագործակցելով օտարերկրյա պետություններում Հայաստանի Հանրապետության դիվանագիտական և հյուպատոսական ներկայացուցչությունների հետ.

ը) Հայաստանի Հանրապետության վարչապետի հաստատմանն է ներկայացնում քարտուղարության կանոնադրությունը, կենտրոնական ապարատի կառուցվածքը և աշխատողների թիվը` համաձայնեցնելով Հայաստանի Հանրապետության արտաքին գործերի նախարարի հետ.

թ) իրականացնում է Հայաստանի Հանրապետության օրենսդրությամբ սահմանված այլ լիազորություններ:

12. Քարտուղարության աշխատողներին Հայաստանի Հանրապետության օրենսդրությամբ սահմանված կարգով շնորհվում են դիվանագիտական աստիճաններ:

13. Քարտուղարությունում գործավարությունն իրականացվում է Հայաստանի Հանրապետության օրենսդրությամբ սահմանված կարգով:

Հաստատված է ՀՀ վարչապետի 2000 թ. սեպտեմբերի 15-ի N 633 որոշմամբ

Կ Ա Ռ ՈՒ Ց Վ Ա Ծ Ք

Սփյուռքի հետ կապերի գործադիր քարտուղարության կենտրոնական ապարատի

Հյուսիսային և Հարավային Ամերիկայի պետությունների հայ համայնքների բաժին

Ռուսաստանի Դաշնության և ԱՊՀ անդամ մյուս պետությունների հայ համայնքների բաժին

Եվրոպայի պետությունների հայ համայնքների բաժին

Մերձավոր և Միջին Արևելքի պետությունների հայ համայնքների բաժին

Վերլուծական-տեղեկատվական, կրթության և մշակույթի բաժին

Գործերի կառավարչություն

Հաշվապահություն