041.0005.04.01.99

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

4 հունվարի 1999 թվականի N 5

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԺԵԹՂԹԵՐԻ ՇՈՒԿԱՅԻ ՏԵՍՉՈՒԹՅԱՆ ԿԱՆՈՆԱԴՐՈՒԹՅՈՒՆԸ ԵՎ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

1. Հաստատել Հայաստանի Հանրապետության արժեթղթերի շուկայի տեսչության կանոնադրությունը և կենտրոնական ապարատի կառուցվածքը (կցվում են):

2. Հայաստանի Հանրապետության վարչապետի 1998 թվականի նոյեմբերի 6-ի «Պետական կառավարման մարմինների աշխատողների առավելագույն թվաքանակ և ղեկավարների տեղակալների թվաքանակ սահմանելու մասին» N 620 որոշման մեջ կատարել հետևյալ լրացումը`

որոշման հավելվածը «37. ՀՀ մաքսային վարչության մաքսատներ և մաքսային կետեր 651---» տողից հետո լրացնել նոր տողով`

«38. ՀՀ արժեթղթերի շուկայի տեսչություն

57

2

-»:

Այս կապակցությամբ որոշման 38-77-րդ կետերը համարել համապատասխանաբար 39-78-րդ կետեր:

Հայաստանի Հանրապետության վարչապետ

Ա. Դարբինյան

Հաստատված է ՀՀ վարչապետի 1999 թ. հունվարի 4-ի N 5 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

Հայաստանի Հանրապետության արժեթղթերի շուկայի տեսչության

I. Ընդհանուր դրույթներ

1. Հայաստանի Հանրապետության արժեթղթերի շուկայի տեսչությունը (այսուհետև` տեսչություն) պետական կառավարման հանրապետական մարմին է, որն իրականացնում է Հայաստանի Հանրապետության արժեթղթերի շուկային (այսուհետև` արժեթղթերի շուկա) կարգավորումն ու վերահսկումը ենթարկվելով Հայաստանի Հանրապետության ֆինանսների և էկոնոմիկայի նախարարությանն ու Հայաստանի Հանրապետության կառավարությանը:

2. Տեսչությունը գործում է Հայաստանի Հանրապետության օրենսդրությանը և սույն կանոնադրությանը համապատասխան:

3. Տեսչությունը Հայաստանի Հանրապետության օրենսդրությամբ սահմանված կարգով ընդունում է գերատեսչական նորմատիվ ակտեր:

4. Տեսչությունն իրավաբանական անձ է, որն ունի Հայաստանի Հանրապետության զինանշանի պատկերով և իր անվամբ կնիք, դրոշմակնիք ու ձևաթուղթ:

II. Տեսչության խնդիրներն ու գործառույթները

5. Տեսչության խնդիրներն են`

ա) արժեթղթերի շուկայի կարգավորման քաղաքականության մշակումը.

բ) արժեթղթերի շուկայում ներդրողների իրավունքների և օրինական շահերի պաշտպանությունը, արժեթղթերի շուկայի մասնակիցների գործունեության կարգավորման ու վերահսկման բնագավառում Հայաստանի Հանրապետության օրենսդրությամբ իրեն վերապահված լիազորությունների իրականացումը:

6. Իր առջև դրված խնդիրներին համապատասխան տեսչությունը`

ա) մշակում է արժեթղթերի շուկայի գործունեությունը կարգավորող նորմատիվային փաստաթղթերի նախագծերը.

բ) Հայաստանի Հանրապետության օրենսդրությանը համապատասխան գրանցում է շրջանառության ենթակա արժեթղթերի թողարկման ազդագրերը և Հայաստանի Հանրապետությունում շրջանառող ու Հայաստանի Հանրապետության օրենսդրությամբ սահմանված արժեթղթերը.

գ) Հայաստանի Հանրապետության օրենսդրությամբ սահմանված դեպքերում և կարգով լիցենզավորում է արժեթղթերի շուկայում իրականացվող գործունեությունը.

դ) վերահսկում է Հայաստանի Հանրապետությունում արժեթղթերով կատարվող գործառնությունների օրինականությունը, այդ թվում` արժեթղթեր թողարկողների կամ նրանց լիազորած անձանց կողմից շրջանառության մեջ արժեթղթեր բաց թողնելու գործառնությունների ու արժեթղթերի շուկայի մասնակիցների կողմից արժեթղթերով իրականացվող գործառնությունները.

ե) Հայաստանի Հանրապետության օրենսդրությամբ սահմանված դեպքերում և կարգով վերահսկողություն է իրականացնում արժեթղթեր թողարկողների, արժեթղթերում ներդրում կատարող անձանց կողմից պարտադիր հրապարակման ենթակա տեղեկությունների հրապարակման նկատմամբ.

զ) հակամենաշնորհային օրենսդրությանը համապատասխան հաշվառում է խոշոր ներդրում հանդիսացող գործարքները.

է) Հայաստանի Հանրապետության օրենսդրությամբ սահմանված կարգով պատժամիջոցներ է կիրառում արժեթղթերի շուկայի վերաբերյալ օրենսդրությունը խախտող սուբյեկտների նկատմամբ.

ը) իրականացնում է Հայաստանի Հանրապետության օրենսդրությամբ սահմանված այլ գործառույթներ:

7. Տեսչությունը վարում է Հայաստանի Հանրապետությունում շրջանառող արժեթղթերի միասնական պետական գրանցամատյանը, Հայաստանի Հանրապետության օրենսդրությամբ սահմանված կարգով հրապարակում է արժեթղթեր թողարկողների, արժեթղթերի շուկայում մասնագիտացված գործունեություն իրականացնող անձանց վերաբերյալ տվյալներ:

III. Տեսչության աշխատանքի կազմակերպումը

8. Տեսչությունն իր աշխատանքային գործունեությունն արդյունավետ կազմակերպելու և իրականացնելու նպատակով կազմում է տեսչության աշխատանքային ծրագրեր: Տեսչության աշխատանքային ծրագրերը կազմվում են յուրաքանչյուր տարվա համար: Տեսչության աշխատանքային ծրագրերը հաստատում է Հայաստանի Հանրապետության ֆինանսների և էկոնոմիկայի նախարարը` տեսչության պետի ներկայացմամբ:

9. Տեսչությունը Հայաստանի Հանրապետության նախարարությունների և պետական կառավարման այլ մարմինների հետ համատեղ իրականացնում է գործարար կապեր ու համագործակցություն միջճյուղային հարցերի մշակման և լուծման համար:

10. Տեսչությունը գլխավորում է տեսչության պետը, որին պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով Հայաստանի Հանրապետության ֆինանսների և էկոնոմիկայի նախարարի հետ:

11. Տեսչության պետն ունի տեղակալներ, որոնց պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով Հայաստանի Հանրապետության ֆինանսների և էկոնոմիկայի նախարարի հետ:

12. Տեսչության պետը`

ա) պատասխանատվություն է կրում տեսչության առջև դրված խնդիրների և գործառույթների իրականացման համար.

բ) խորհրդակցական ձայնի իրավունքով կարող է մասնակցել Հայաստանի Հանրապետության կառավարության նիստերին.

գ) իր իրավասության սահմաններում արձակում է հրամաններ և հրահանգներ.

դ) Հայաստանի Հանրապետության նախարարությունների, պետական կառավարման այլ մարմինների հետ համատեղ անհրաժեշտության դեպքում արձակում է հրամաններ և հրահանգներ.

ե) սահմանում է տեսչության պետի տեղակալների, բաժնի պետերի և տեսչության մյուս կառուցվածքային ստորաբաժանումների ղեկավարների իրավասությունների շրջանակն ու կատարում տեսչության պետի տեղակալների միջև պարտականությունների բաշխում.

զ) հաստատում է տեսչության վարչությունների և բաժինների կանոնադրությունները.

է) Հայաստանի Հանրապետության ֆինանսների և էկոնոմիկայի նախարարի համաձայնությամբ Հայաստանի Հանրապետության վարչապետի հաստատմանն է ներկայացնում տեսչության խորհրդի անդամների թիվն ու անհատական կազմը.

ը) կազմակերպում և ղեկավարում է տեսչության խորհրդի նիստերը.

թ) իրականացնում է Հայաստանի Հանրապետության օրենսդրությամբ և սույն կանոնադրությամբ սահմանված այլ լիազորություններ:

13. Տեսչության պետի բացակայության դեպքում, նրա հանձնարարությամբ, տեսչության պետի պարտականությունները կատարում է տեղակալներից մեկը:

14. Տեսչությունում ստեղծվում է խորհուրդ, որի կազմի մեջ մտնում են տեսչության պետը, պետի տեղակալները` ի պաշտոնե, և տեսչության այլ ղեկավար աշխատողներ:

15. Տեսչության խորհուրդն իր պարբերաբար անցկացվող նիստերում քննության է առնում բնագավառի զարգացման հիմնական հարցերը և տեսչության գործունեության հետ կապված այլ հարցեր, քննարկում է կարևորագույն հրամանների և հրահանգների նախագծերը, լսում տեսչության վարչությունների հաշվետվությունները:

16. Տեսչության պետի և տեսչության խորհրդի անդամների միջև ծագած տարաձայնությունների դեպքում տեսչության պետը կենսագործում է իր որոշումը` այդ տարաձայնությունների մասին զեկուցելով Հայաստանի Հանրապետության ֆինանսների և էկոնոմիկայի նախարարին կամ Հայաստանի Հանրապետության վարչապետին: Տեսչության խորհրդի անդամներն իրենց հերթին կարող են իրենց կարծիքը հայտնել Հայաստանի Հանրապետության ֆինանսների և էկոնոմիկայի նախարարին կամ Հայաստանի Հանրապետության վարչապետին:

17. Տեսչության պետը տեսչության խորհրդի նիստի անցկացման ժամանակի և օրակարգի մասին նախապես տեղեկացնում է Հայաստանի Հանրապետության ֆինանսների և էկոնոմիկայի նախարարին:

18. Տեսչության պետը Հայաստանի Հանրապետության ֆինանսների և էկոնոմիկայի նախարարի պահանջով հրավիրում է արտահերթ նիստ կամ նիստի օրակարգ է մտցնում լրացուցիչ հարց:

19. Տեսչության խորհրդի որոշումները, որպես կանոն, կենսագործվում են տեսչության պետի որոշումներով:

20. Տեսչությունը կազմակերպում է քաղաքացիների նամակների (դիմումների ու գանգատների) ժամանակին քննարկումը` հասնելով այդ նամակներում բարձրացված հարցերի ճիշտ լուծմանը, ինչպես նաև ձեռնարկում է միջոցներ արժեթղթերի շուկայի վերաբերյալ օրենսդրությունը խախտող անձանց պատասխանատվության ենթարկելու համար:

21. Տեսչությունում գործավարությունն իրականացվում է Հայաստանի Հանրապետության օրենսդրությամբ սահմանված կարգով:

Հաստատված է ՀՀ վարչապետի 1999 թ. հունվարի 4-ի N 5 որոշմամբ

Կ Ա Ռ ՈՒ Ց Վ Ա Ծ Ք

Հայաստանի Հանրապետության արժեթղթերի շուկայի տեսչության կենտրոնական ապարատի

Տեսչության աշխատակազմ

Կորպորատիվ ֆինանսների վարչություն

Վերահսկման վարչություն

Արժեթղթերի շուկայի կարգավորման վարչություն

Ֆինանսատնտեսական վերլուծությունների և շուկայի հետազոտման վարչություն

Իրավաբանական վարչություն

Գործերի կառավարչություն

Ազդագրերի գրանցման բաժին

Թողարկողների հաշվետվությունների ընդունման բաժին

Արժեթղթերի շուկայում գործունեություն իրականացնող անձանց վերահսկման բաժին

Թողարկողների վերահսկման և ներդրողների իրավունքների պաշտպանության բաժին

Արժեթղթերի շուկայում գործունեություն իրականացնող անձանց լիցենզավորման բաժին

Արժեթղթերի շուկայում գործունեություն իրականացնող անձանց հաշվետվությունների ընդունման բաժին

Ֆինանսատնտեսական վերլուծությունների բաժին

Մեթոդաբանության բաժին