041.0399.08.07.98

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

8 հուլիսի 1998 թվականի N 399
քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆՆ ՈՒ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

1. Հաստատել Հայաստանի Հանրապետության տրանսպորտի նախարարության կանոնադրությունն ու կենտրոնական ապարատի կառուցվածքը (կցվում է):

2. Ուժը կորցրած ճանաչել Հայաստանի Հանրապետության վարչապետի 1998 թվականի հունվարի 19-ի «Հայաստանի Հանրապետության տրանսպորտի նախարարության կանոնադրությունն ու կենտրոնական ապարատի կառուցվածքը հաստատելու մասին» N 31 որոշման առաջին կետը:

Հայաստանի Հանրապետության վարչապետ

Ա. Դարբինյան

ՀԱՍՏԱՏՎԱԾ Է ՀՀ վԱրչապետի 1998 Թ. ՀՈՒԼԻՍԻ 8-Ի N 399 ՈՐՈՇՄԱՄԲ

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ՆԱԽԱՐԱՐՈՒԹՅԱՆ

I. Ընդհանուր դրույթներ

1. Հայաստանի Հանրապետության տրանսպորտի նախարարությունը (այսուհետև` նախարարություն), Հայաստանի Հանրապետության գործադիր իշխանության հանրապետական մարմին է, որն իրականացնում է տնտեսության, բնակչության տրանսպորտային կարիքների բավարարման նպատակով ավտոմոբիլային, երկաթուղային, օդային, ջրային, վերգետնյա էլեկտրատրանսպորտի, մետրոպոլիտենի և հաղորդակցության ուղիների փոխկապակցված զարգացման ապահովումը, ինչպես նաև համակարգի պետական կառավարումը` ենթարկելով Հայաստանի Հանրապետության կառավարությանը:

2. Նախարարությունը պատասխանատվություն է կրում իր առջև դրված խնդիրների և գործառույթների կատարման համար:

3. Նախարարությունն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենսդրությամբ և սույն կանոնադրությամբ:

4. Նախարարությունն իրավաբանական անձ է, ունի Հայաստանի Հանրապետության պետական զինանշանի պատկերով ու իր անվամբ կնիք ու դրոշմակնիք:

II. Նախարարության խնդիրներն ու գործառույթները

5. Նախարարության խնդիրներն ու գործառույթներն են`

ա) իր իրավասության սահմաններում տրանսպորտի ոլորտում պետական քաղաքականության մշակումն ու իրականացումը.

բ) տրանսպորտի շարժական կազմի տեխնիկական շահագործման և այլ կանոնների, տեխնիկական նորմերի մշակումը և հաստատումը, որոնց պահանջների կատարումը պարտադիր է բոլոր իրավաբանական և ֆիզիկական անձանց համար.

գ) պետական պատվերի կատարման ապահովումը.

դ) երթևեկության կազմակերպման բարելավումը, երթևեկության մասնակիցների անվտանգության ապահովումը և կենսոլորտի վրա տրանսպորտի վնասակար ազդեցության նվազեցումը.

ե) բեռների փոխադրումների և օբյեկտների անվտանգության ու պահպանության կազմակերպման ապահովումը.

զ) մասնավորեցման գործընթացի ապահովման համար անհրաժեշտ միջոցառումների իրականացումը.

է) Հայաստանի Հանրապետության պետական բյուջեից և այլ աղբյուրներից նախարարության համակարգի ձեռնարկություններին սահմանված կարգով հատկացված միջոցների նպատակային ու արդյունավետ ծախսման նկատմամբ վերահսկողության իրականացումը.

ը) Հայաստանի Հանրապետության տրանսպորտի համակարգում զարգացման և ներդրումների ծրագրերի, ձեռնարկատիրական գործունեության զարգացման, տարածքային տրանսպորտային, սակագնային քաղաքականության մշակումն ու իրականացումը.

թ) համակարգում աշխատողների սոցիալական պաշտպանվածության և աշխատանքի անվտանգ պայմանների ապահովման իրավական կարգավորումը.

ժ) նախարարության համակարգում կառուցվածքային բարեփոխումների իրականացումը, աշխատանքի և կառավարման արդյունավետ համակարգերի ներդրումը.

ժա) Հայաստանի Հանրապետության օրենսդրությամբ սահմանված կարգով տրանսպորտի ոլորտում անառողջ մրցակցությունը դադարեցնելու համար անհրաժեշտ միջոցառումների իրականացումը.

ժբ) տրանսպորտի ոլորտում քաղաքացիական պաշտպանության առաջադրած պահանջներին համապատասխան նպատակային և երկարաժամկետ ծրագրերի կազմումն ու դրանց իրականացումը.

ժգ) նախարարության ենթակայության ձեռնարկությունների արտաքին տնտեսական գործունեության համակարգումը` Հայաստանի Հանրապետության օրենսդրությամբ սահմանված կարգով.

ժդ) միջազգային կազմակերպությունների և օտարերկրյա պետությունների կողմից ֆինանսավորող ծրագրերն իրականացնող կազմակերպությունների գործունեությանն աջակցելը.

ժե) Հայաստանի Հանրապետությունում տրանսպորտային ծառայությունների շուկայի գործունեությանն առնչվող` Հայաստանի Հանրապետության նախարարությունների, գերատեսչությունների, տարածքային կառավարման մարմինների կողմից իրավական ակտերի նախագծերի մշակմանը մասնակցելը.

ժզ) Հայաստանի Հանրապետության օրենսդրությամբ սահմանված կարգով լիցենզիաներ տալը.

ժէ) անհատ ձեռներեցների, ձեռնարկությունների ու դրանց միավորումների և այլ կազմակերպությունների հետ համագործակցելը.

ժը) Հայաստանի Հանրապետության օրենսդրությամբ սահմանված այլ խնդիրների և գործառույթների իրականացումը:

III. Նախարարության աշխատանքի կազմակերպումը

6. Նախարարության համակարգն ընդգրկում է Հայաստանի Հանրապետության ավտոմոբիլային, ջրային, երկաթուղային ու վերգետնյա էլեկտրատրանսպորտի, մետրոպոլիտենի և ավտոմոբիլային ճանապարհների շինարարության ու շահագործման ձեռնարկությունները և քաղաքացիական ավիացիայի գլխավոր վարչությունը (այսուհետև` վարչություն) ինչպես նաև նրան ենթակա ձեռնարկությունների ամբողջությունը:

7. Նախարարությունը`

ա) իր իրավասության սահմաններում լուծում է ոլորտին վերաբերող հարցերը` չխախտելով ենթակա ձեռնարկությունների` Հայաստանի Հանրապետության օրենսդրությամբ նախատեսված ինքնուրույնությունը.

բ) համագործակցում է Հայաստանի Հանրապետության նախարարությունների և պետական կառավարման այլ մարմինների հետ` միջգերատեսչական հարցերի կառավարման ու լուծման համար.

գ) Հայաստանի Հանրապետության օրենսդրությամբ սահմանված կարգով իրականացնում է համակարգի պետական գույքի տիրապետման և օգտագործման գործառույթները.

դ) ընդհանրացնում է ոլորտում օրենսդրական ակտերի կիրառման պրակտիկան, Հայաստանի Հանրապետության կառավարություն է ներկայացնում Հայաստանի Հանրապետության օրենքների և այլ իրավական ակտերի նախագծեր, իր իրավասության սահմաններում ընդունում գերատեսչական նորմատիվ ակտեր և իրականացնում դրանց կատարման նկատմամբ վերահսկողությունը.

ե) սահմանված կարգով մասնակցում է նախարարության իրավասության մեջ մտնող հարցերի վերաբերյալ միջազգային պայմանագրերի նախագծերի մշակմանն ու քննարկմանը, կնքում միջազգային պայմանագրեր.

զ) անհրաժեշտության դեպքում Հայաստանի Հանրապետության նախարարությունների և գերատեսչությունների հետ համատեղ արձակում է հրամաններ, համագործակցում պետական կառավարման տարածքային մարմինների հետ.

է) կազմակերպում է նախարարության համակարգի աշխատողների սոցիալ-կենցաղային պայմանների բարելավման աշխատանքները.

ը) Հայաստանի Հանրապետության օրենսդրությամբ սահմանված կարգով ստեղծում, վերակազմակերպում և լուծարում է համակարգի ձեռնարկությունները.

թ) մշակում և իրականացնում է նախարարության կենտրոնական ապարատի, նախարարության համակարգի ձեռնարկությունների աշխատողների մասնագիտական պիտանիության ու որակավորման վերաբերյալ պահանջները, Հայաստանի Հանրապետության օրենսդրությամբ սահմանված կարգով պարբերաբար ստուգում աշխատողների համապատասխանությունը զբաղեցրած պաշտոններին.

ժ) թույլտվություն է տալիս համակարգի ձեռնարկություններին` տնտեսական միավորումներին անդամակցելու համար.

ժա) վերահսկում է համակարգի ձեռնարկությունների և վարչության պետական գույքի օգտագործումը, դրանց օտարումն ու վարձակալության հանձնումը` Հայաստանի Հանրապետության օրենսդրությամբ սահմանված կարգով.

ժբ) իրականացնում է վարչության և ձեռնարկությունների գործունեության, ներառյալ նրանց կողմից կնքված պայմանագրերի օրինականության նկատմամբ վերահսկողությունը.

ժգ) կազմակերպում է քաղաքացիների նամակների (դիմումների ու գանգատների) ժամանակին քննարկումը, հասնելով այդ նամակներում բարձրացված հարցերի ճիշտ լուծմանը, ինչպես նաև միջոցներ է ձեռնարկում քաղաքացիների նամակներում հաղորդվող` նախարարության համակարգի ձեռնարկությունների գործունեության մեջ տեղ գտած թերությունների վերացման համար:

8. Նախարարությունը գլխավորում է նախարարը, որին պաշտոնի նշանակում և պաշտոնից ազատում է Հայաստանի Հանրապետության Նախագահը` Հայաստանի Հանրապետության վարչապետի առաջարկությամբ:

9. Նախարարը`

ա) պատասխանատվություն է կրում նախարարության առջև դրված խնդիրների ու գործառույթների կատարման համար.

բ) կատարում է նախարարի տեղակալների պարտականությունների բաշխում, սահմանում նախարարության կենտրոնական ապարատի կառուցվածքային ստորաբաժանումների ղեկավարների իրավասության շրջանակները.

գ) արձակում է հրամաններ, որոնց կատարումը պարտադիր է նախարարության համակարգի ձեռնարկությունների համար.

դ) կասեցնում կամ ուժը կորցրած է ճանաչում վարչության և ձեռնարկությունների` Հայաստանի Հանրապետության օրենսդրությանը հակասող հրամաններն ու կարգադրությունները.

ե) հաստատում է նախարարության համակարգի ձեռնարկությունների, կենտրոնական ապարատի կառուցվածքային ստորաբաժանումների կանոնադրությունները.

զ) Հայաստանի Հանրապետության վարչապետի հաստատմանն է ներկայացնում նախարարության կանոնադրությունը, կենտրոնական ապարատի կառուցվածքը, աշխատողների թիվը և կոլեգիայի կազմը.

է) ղեկավարվում է նախարարության կոլեգիայի նիստերը.

ը) աշխատանքի նշանակում և աշխատանքից ազատում է նախարարության կենտրոնական ապարատի աշխատողներին.

թ) Հայաստանի Հանրապետության օրենսդրությամբ սահմանված կարգով տալիս է լիազորագրեր.

ժ) կազմակերպում է կադրերի պատրաստման, վերապատրաստման ու որակավորման բարձրացման գործը, սահմանված կարգով խրախուսում կամ կարգապահական պատասխանատվության է ենթարկում նախարարության աշխատողներին.

ժա) նախարարությանը ենթակա գերատեսչության ղեկավարի ներկայացմամբ պաշտոնի նշանակում և պաշտոնից ազատում է գերատեսչության համակարգի ձեռնարկությունների տնօրեններին` համաձայնեցնելով Հայաստանի Հանրապետության վարչապետի հետ.

ժբ) անհրաժեշտության դեպքում վարում է վարչության խորհրդի հերթական նիստը և հրավիրում արտահերթ նիստեր.

ժգ) իրականացնում է Հայաստանի Հանրապետության օրենսդրությամբ սահմանված այլ լիազորություններ:

10. Նախարարի բացակայության ժամանակ, նրա հանձնարարությամբ, նախարարի պատասխանատվությունները կատարում է նախարարի առաջին տեղակալը կամ տեղակալներից մեկը:

11. Նախարարությունում ստեղծվում է կոլեգիա, որի կազմի մեջ մտնում են նախարարը (նախագահ), նախարարի տեղակալները` ի պաշտոնե, նախարարությանը ենթակա գերատեսչությունների ղեկավարները, նախարարության կենտրոնական ապարատի և համակարգի այլ ղեկավար աշխատողներ:

12. Նախարարության կոլեգիան իր նիստերում, որոնք հրավիրվում են ոչ պակաս, քան ամիսը մեկ անգամ, քննության է առնում ոլորտի գործունեության և զարգացման հիմնական հարցերը, քննարկում նախարարությանը ենթակա գերատեսչությունների, համակարգի ձեռնարկությունների գործնական ղեկավարման, կատարման ստուգման, ղեկավար կադրերի ընտրության և տեղաբաշխման հարցեր, կարևորագույն հրամանների ու հրահանգների նախագծերը, լսում նախարարության վարչության և բաժինների, վարչության, ձեռնարկությունների հաշվետվությունները:

Կոլեգիայի որոշումները կենսագործվում են, որպես կանոն, նախարարի հրամաններով: Նախարարի և կոլեգիայի անդամների միջև ծագած տարաձայնությունների դեպքում նախարարը կենսագործում է իր որոշումը ` այդ տարաձայնությունների մասին զեկուցելով Հայաստանի Հանրապետության կառավարությանը կամ Հայաստանի Հանրապետության վարչապետին, իսկ կոլեգիայի անդամները, իրենց հերթին, կարող են իրենց կարծիքը հայտնել Հայաստանի Հանրապետության կառավարությանը կամ Հայաստանի Հանրապետության վարչապետին:

13. Կոլեգիայի նիստերին կարող են հրավիրվել Հայաստանի Հանրապետության կառավարության աշխատակազմի համապատասխան ստորաբաժանման աշխատողը, ինչպես նաև Հայաստանի Հանրապետության նախարարությունների, գերատեսչությունների, պետական կառավարման տարածքային մարմինների, պետական ու ոչ պետական ձեռնարկությունների, մամուլի և զանգվածային լրատվության միջոցների ու այլ կազմակերպությունների ներկայացուցիչներ:

14. Նախարարության կենտրոնական ապարատի ֆինանսավորումը կատարվում է Հայաստանի Հանրապետության պետական բյուջեի միջոցների հաշվին:

ՀԱՍՏԱՏՎԱԾ Է ՀՀ վԱրչապետի 1998 Թ. ՀՈՒԼԻՍԻ 8-Ի N 399 ՈՐՈՇՄԱՄԲ

Կ Ա Ռ ՈՒ Ց Վ Ա Ծ Ք

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ՆԱԽԱՐԱՐՈՒԹՅԱՆ ԿԵՆՏՐՈՆԱԿԱՆ ԱՊԱՐԱՏԻ

Նախարարության աշխատակազմ

Ֆինանսատնտեսագիտական վարչություն

Փոխադրումների վարչություն

Տեխնիկական քաղաքականության և մասնավորեցման վարչություն

Ներդրումների և շինարարական ծրագրերի վարչություն

Իրավաբանական վարչություն

Որոշումների կատարման վերահսկողության վարչություն

Արտաքին կապերի վարչություն

Օդային փոխադրումների քաղաքականության բաժին

Ծովային փոխադրումների քաղաքականության բաժին

Տրանսպորտի անվտանգության և գծային հսկողության բաժին

Լիցենզավորման բաժին

Հաշվապահություն

Կադրերի և սոցիալական հարցերի բաժին

Հատուկ բաժին

Տնտեսական բաժին