«Վավերացնում եմ»
Հայաստանի Հանրապետության
Նախագահ Ռ. Քոչարյան
 11 հոկտեմբերի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 4 օգոստոսի 2005 թվականի N 1596-Ն

ԷԼԵԿՏՐՈՆԱՅԻՆ ԹՎԱՅԻՆ ՍՏՈՐԱԳՐՈՒԹՅԱՆ ՀԱՎԱՍՏԱԳՐՄԱՆ ԿԵՆՏՐՈՆՆԵՐԻ ՀԱՎԱՏԱՐՄԱԳՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Էլեկտրոնային փաստաթղթի և էլեկտրոնային թվային ստորագրության մասին» Հայաստանի Հանրապետության օրենքի 15-րդ հոդվածի 2-րդ մասի «ա» կետի` Հայաստանի Հանրապետության կառավարությունը որոշում է.

1. Հաստատել էլեկտրոնային թվային ստորագրության հավաստագրման կենտրոնների հավատարմագրման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2005 թ. սեպտեմբերի 24 Երևան

Հավելված ՀՀ կառավարության 2005 թվականի օգոստոսի 4-ի N 1596-Ն որոշման

Կ Ա Ր Գ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է էլեկտրոնային թվային ստորագրության հավաստագրման կենտրոնների (այսուհետ՝ հավաստագրման կենտրոն) հավատարմագրման կարգը:

2. Հավատարմագրումն իրականացնում է Հայաստանի Հանրապետության կառավարության լիազորած մարմինը (այսուհետ` լիազոր մարմին):

II. ՀԱՎԱՍՏԱԳՐՄԱՆ ԿԵՆՏՐՈՆՆԵՐԻ ՀԱՎԱՏԱՐՄԱԳՐՄԱՆ ԸՆԹԱՑԱԿԱՐԳԸ

 3. Հավաստագրման կենտրոնը հավատարմագրման նպատակով դիմում է Հայաստանի Հանրապետության կառավարության կողմից սահմանված կարգով ընտրված կազմակերպություններից մեկին (այսուհետ` լաբորատորիա)՝ իր տրամադրած էլեկտրոնային թվային ստորագրության հավաստագրերի, այդ հավաստագրերին համապատասխանող էլեկտրոնային թվային ստորագրությունների ստեղծման ապարատային և (կամ) ծրագրային միջոցների և իր կողմից մատուցվող էլեկտրոնային թվային ստորագրությունների հետ կապված այլ ծառայությունների փորձաքննություն անցկացնելու համար:

4. Լիազոր մարմնի կողմից մշակված և Հայաստանի Հանրապետության կառավարության կողմից հաստատված տեխնիկական չափանիշներին հավաստագրման կենտրոնի կողմից մատուցվող ծառայությունների համապատասխանության մասին լաբորատորիայի կողմից դրական փորձագիտական եզրակացություն ստանալու դեպքում հավաստագրման կենտրոնը 60-օրյա ժամկետում դիմում է լիազոր մարմին` համապատասխան հավատարմագրում ստանալու համար: Նշված ժամկետն անցնելու դեպքում հավաստագրման կենտրոնը հավատարմագրում ստանալու նպատակով կարող է դիմել լիազոր մարմին` միայն այն դեպքում, եթե դիմելու պահի դրությամբ լաբորատորիայի փորձագիտական եզրակացության մեջ նշված տեխնիկական չափանիշները չեն փոփոխվել:

5. Հավատարմագրում ստանալու համար լիազոր մարմին ներկայացվում են հետևյալ փաստաթղթերը`

ա) հավաստագրման կենտրոնի հավատարմագրման մասին հայտ (N 1 ձև),

բ) լաբորատորիայի դրական փորձագիտական եզրակացություն,

գ) իրավաբանական անձի պետական գրանցման վկայականի պատճենը,

դ) հավաստագրման կենտրոնի կանոնադրության պատճենը:

6. Լիազոր մարմինն անհրաժեշտ փաստաթղթերն ստանալուց հետո մեկշաբաթյա ժամկետում հավաստագրման կենտրոնին տրամադրում է հավատարմագրման վկայականը` համաձայն N 2 ձևի, և կատարում համապատասխան գրառում էլեկտրոնային թվային ստորագրության հավատարմագրված հավաստագրման կենտրոնների մատյանում (ռեգիստրում):

7. Հավատարմագրում տալը մերժելու հիմք կարող է լինել կեղծ փաստաթղթեր ներկայացնելը, որի մասին լիազոր մարմինը գրավոր տեղեկացնում է հավաստագրման կենտրոնին` համապատասխան հիմնավորմամբ:

8. Հավատարմագրման վկայականի ձևաթղթերը համարվում են խիստ հաշվառման փաստաթղթեր:

9. Չի թույլատրվում հավատարմագրման վկայականի օտարումը կամ փոխանցումը այլ կազմակերպության:

III. ՀԱՎԱՏԱՐՄԱԳՐՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼԸ

10. Լիազոր մարմինը կարող է դիմել դատարան` հավաստագրման կենտրոնին հավատարմագրումից զրկելու հայցով, եթե լիազոր մարմնի կողմից վերահսկման ընթացքում բացահայտվել են հավաստագրման կենտրոնի տրամադրած էլեկտրոնային թվային ստորագրությունների հավաստագրերի, դրանց համապատասխանող էլեկտրոնային թվային ստորագրությունների ստեղծման ապարատային և (կամ) ծրագրային միջոցների և էլեկտրոնային թվային ստորագրությունների հետ կապված` մատուցվող այլ ծառայությունների անհամապատասխանություններ Հայաստանի Հանրապետության օրենսդրությանը և (կամ) փորձագիտական եզրակացության մեջ նշված չափանիշներին:

11. Հավատարմագրման վկայականի կորստի դեպքում հավաստագրման կենտրոնը դիմում է լիազոր մարմին, որը երկշաբաթյա ժամկետում տալիս է հավատարմագրման նոր վկայական` «Կրկնօրինակ» նշագրմամբ:

Հայաստանի Հանրապետության կառավարության աշխատակազմի ղեկավար-նախարար	Մ. Թոփուզյան

Ձև N 1   __________________________ (հավաստագրման կենտրոնի անվանումը) Գտնվելու վայրը ________________ Հեռախոսահամարը ______________ ______________________ (լիազոր մարմնի անվանումը)       Հ Ա Յ Տ   ՀԱՎԱՍՏԱԳՐՄԱՆ ԿԵՆՏՐՈՆԻ ՀԱՎԱՏԱՐՄԱԳՐՄԱՆ ՄԱՍԻՆ   Խնդրում եմ Ձեզ ________________________ հավաստագրման կենտրոնին տալ հավատարմագրում:   Կից ներկայացնում եմ հետևյալ փաստաթղթերը՝ 1. 2. 3.   Տնօրեն ____________________ _____________________ (ստորագրությունը)  (անունը, ազգանունը)    _____ __________________ 200 թ.   Կ. Տ.

Ձև N 2

ՀՀ առևտրի և տնտեսական զարգացման նախարարություն 375010, քաղ. Երևան, Մ. Մկրտչյան 5, հեռ.` 56-68-61, ֆաքս` 52-65-77     ՀԱՎԱՏԱՐՄԱԳՐՄԱՆ ՎԿԱՅԱԿԱՆ   N______________   Տալու ամսաթիվը _________________________   Հավաստագրման կենտրոնի անվանումը և գտնվելու վայրը______________________ _________________________________________________________ _________________________________________________________   Պետական գրանցման վկայականի համարը _______________________________   Մատուցվող ծառայությունների տեսակները ______________________________ _________________________________________________________ _________________________________________________________ _________________________________________________________   Փորձաքննություն անցկացնող լաբորատորիայի անվանումը, փորձագիտական եզրակացության համարը, տալու ամսաթիվը _____________________________ _________________________________________________________ _________________________________________________________ Հատուկ պայմաններ ____________________________________________ _________________________________________________________       ՀՀ առևտրի և տնտեսական զարգացման նախարար ______________________ (ստորագրությունը)     Կ. Տ.