«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ Ռ. ՔՈՉԱՐՅԱՆ

9 հուլիսի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 հունիսի 2004 թվականի N 940-Ն

ԱՅԼԸՆՏՐԱՆՔԱՅԻՆ ԾԱՌԱՅՈՒԹՅՈՒՆ ԱՆՑՆԵԼՈՒ ՎԱՅՐԵՐԻ ՑԱՆԿԸ ԵՎ ԱՅԼԸՆՏՐԱՆՔԱՅԻՆ ԾԱՌԱՅՈՂԻ ՀԱՄԱԶԳԵՍՏԻ ՁԵՎՆ ՈՒ ԿՐԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Այլընտրանքային ծառայության մասին» Հայաստանի Հանրապետության օրենքի 14-րդ հոդվածի 2-րդ և 16-րդ հոդվածի 3-րդ մասերով` Հայաստանի Հանրապետության կառավարությունը որոշում է.

1. Հաստատել`

ա) այլընտրանքային ծառայություն անցնելու վայրերի ցանկը` համաձայն N 1 հավելվածի.

բ) այլընտրանքային ծառայողների համազգեստի ձևը և կրելու կարգը` համաձայն N 2 հավելվածի:

2. Սահմանել, որ`

ա) այլընտրանքային զինվորական ծառայողներն իրենց ծառայությունն անցնում են Հայաստանի Հանրապետության զինված ուժերի զորամիավորումների առանձնացված ստորաբաժանումներում.

բ) այլընտրանքային աշխատանքային ծառայողներն իրենց ծառայությունն անցնում են Հայաստանի Հանրապետության առողջապահության նախարարության ու Հայաստանի Հանրապետության աշխատանքի և սոցիալական հարցերի նախարարության համակարգերի կազմակերպություններում:

3. Հայաստանի Հանրապետության պաշտպանության նախարարին, Հայաստանի Հանրապետության աշխատանքի և սոցիալական հարցերի նախարարին ու Հայաստանի Հանրապետության առողջապահության նախարարին`

ա) այլընտրանքային ծառայողների` հանդերձանքով, դրամական միջոցներով և սննդով ապահովումն իրականացնել պարտադիր զինվորական ծառայության շարքային կազմի համար սահմանված կարգով.

բ) մեկամսյա ժամկետում` համաձայնեցնելով Հայաստանի Հանրապետության ֆինանսների և էկոնոմիկայի նախարարի հետ, Հայաստանի Հանրապետության կառավարություն ներկայացնել առաջարկություն համապատասխան ստորաբաժանումներ ստեղծելու և ծառայության պայմաններ ապահովելու համար անհրաժեշտ ծախսերի վերաբերյալ.

գ) յուրաքանչյուր հերթական զորակոչի ժամանակ Հայաստանի Հանրապետության կառավարություն ներկայացնել առաջարկություն այլընտրանքային աշխատանքային ծառայողների ծառայության կոնկրետ վայրերի և թվի վերաբերյալ:

Հայաստանի Հանրապետության վարչապետ	Ա. Մարգարյան
2004 թ. հուլիսի 1 Երևան

Հավելված N 1 ՀՀ կառավարության 2004 թվականի հունիսի 25-ի N 940-Ն որոշման

Ց Ա Ն Կ

ԱՅԼԸՆՏՐԱՆՔԱՅԻՆ ԾԱՌԱՅՈՒԹՅՈՒՆ ԱՆՑՆԵԼՈՒ ՎԱՅՐԵՐԻ

NN ը/կ	Ծառայության վայրի անվանումը	Թիվը	Պաշտոնը	Լիազոր մարմինը
1.	Սյունիքի մարզ	100	զինվոր	ՀՀ պաշտպանության նախարարություն
2.	Գեղարքունիքի մարզ	100	զինվոր	ՀՀ պաշտպանության նախարարություն
3.	Տավուշի մարզ	100	զինվոր	ՀՀ պաշտպանության նախարարություն
4.	N 1 տուն-ինտերնատ	6	սանիտար	ՀՀ աշխատանքի և սոցիալական հարցերի նախարարություն
5.	Նորքի տուն-ինտերնատ	2	սանիտար	ՀՀ աշխատանքի և սոցիալական հարցերի նախարարություն
6.	Վարդենիսի հոգեբուժական տուն-ինտերնատ	8	սանիտար	ՀՀ աշխատանքի և սոցիալական հարցերի նախարարություն
7.	Գյումրու ծերերի և հաշմանդամների տուն-ինտերնատ	4	սանիտար	ՀՀ աշխատանքի և սոցիալական հարցերի նախարարություն
8.	Հայաստանի Հանրապետության առողջապահության նախարարության պետական առողջապահական գործակալություն	3	սանիտար	ՀՀ առողջապահության նախարարություն
9.	«Հայաստանի Հանրապետության առողջապահության նախարարության հոգեբուժական կենտրոն» փակ բաժնետիրական ընկերություն	5	սանիտար	ՀՀ առողջապահության նախարարություն
10.	«Նորք» ինֆեկցիոն հիվանդանոց	4	սանիտար	ՀՀ առողջապահության նախարարություն
11.	Սևանի հանրապետական հոգեբուժական հիվանդանոց	10	սանիտար	ՀՀ առողջապահության նախարարություն
12.	Կապանի նյարդահոգեբուժական դիսպանսեր	2	սանիտար	ՀՀ առողջապահության նախարարություն
13.	Վանաձորի նյարդահոգեբուժական դիսպանսեր	2	սանիտար	ՀՀ առողջապահության նախարարություն
14.	Գյումրու նյարդահոգեբուժական դիսպանսեր	3	սանիտար	ՀՀ առողջապահության նախարարություն

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ կառավարության 2004 թվականի հունիսի 25-ի N 940-Ն որոշման

ԱՅԼԸՆՏՐԱՆՔԱՅԻՆ ԾԱՌԱՅՈՂՆԵՐԻ ՀԱՄԱԶԳԵՍՏԻ ՁԵՎԸ ԵՎ ԿՐԵԼՈՒ ԿԱՐԳԸ

1. Այլընտրանքային զինվորական ծառայողները կրում են Հայաստանի Հանրապետության զինված ուժերի պարտադիր զինվորական ծառայության շարքային կազմի համար նախատեսված համազգեստ (ձև NN 1 և 2):

Հայաստանի Հանրապետության զինված ուժերի պարտադիր զինվորական ծառայության շարքային կազմի համազգեստ կրելու կանոնները տարածվում են այլընտրանքային զինվորական ծառայողների վրա:

2. Այլընտրանքային աշխատանքային ծառայողները կրում են հաստատված նմուշի ամենօրյա համազգեստ, որը, ըստ տարվա եղանակների, դասակարգվում է ձմեռային և ամառային տեսակների (ձև NN 3 և 4):

3. Այլընտրանքային աշխատանքային ծառայողների`

ա) ամառային համազգեստը ներառում է`

բերետ` բամբակե, մուգ կապույտ գույնի,

բաճկոն` բամբակե, մուգ կապույտ գույնի,

տաբատ` բամբակե, մուգ կապույտ գույնի,

շապիկ և վարտիք,

ճտքավոր կամ երկարաճիտ կոշիկներ.

բ) ձմեռային համազգեստը ներառում է`

գլխարկ` մորթե, ականջակալներով, մոխրագույն,

բաճկոն` ձմեռային, մուգ կապույտ գույնի,

տաբատ` ձմեռային, մուգ կապույտ գույնի,

տաբատ` բամբակե, մուգ կապույտ գույնի,

բաճկոն` բամբակե, մուգ կապույտ գույնի,

շապիկ և վարտիք,

ճտքավոր կամ երկարաճիտ կոշիկներ:

4. Այլընտրանքային ծառայողների բաճկոնների թիկունքի կենտրոնում, համազգեստի օձիքից 10 սմ ներքև, տեղադրվում են կտորից կարված «ԱՅԼԸՆՏՐԱՆՔԱՅԻՆ ԶԻՆՎՈՐԱԿԱՆ ԾԱՌԱՅՈՒԹՅՈՒՆ» և «ԱՅԼԸՆՏՐԱՆՔԱՅԻՆ ԱՇԽԱՏԱՆՔԱՅԻՆ ԾԱՌԱՅՈՒԹՅՈՒՆ» 6 x 18 սմ չափսերի մակագրություն (ձև N 5), իսկ բաճկոնների աջ թևքին` ուսից 9 սմ ներքև` շրջանաձև թևքանշաններ:

Ամառային բերետների և ականջակալներով գլխարկների վրա գլխարկանշաններ չեն տեղադրվում:

Ամառային և ձմեռային բաճկոնները թույլատրվում է կրել ներքևի երեք կոճակները կոճկված (լանջափեշը` դարձածալի տեսքով), իսկ ամպամած եղանակին` մինչև վերջ կոճկված:

Ձմեռային բաճկոնն ամպամած, անձրևոտ եղանակին կրում են բարձրացված օձիքով: Թույլատրվում է բաճկոնը կրել վերևի կոճակն արձակած:

Ձմեռային համազգեստի դեպքում թույլատրվում է կրել մուգ կապույտ գույնի ձմեռային ձեռնոցներ:

Տաբատը կրում են ճտքավոր (երկարաճիտ) կոշիկների վրա: Ճտքավոր կոշիկների հետ կրում են սև գույնի երկարավուն գուլպաներ, իսկ երկարաճիտ կոշիկների հետ` ամառային կամ ձմեռային ոտքի փաթաթաններ:

5. Այլընտրանքային աշխատանքային ծառայողներին արգելվում է`

ա) համազգեստի և տարբերանշանների չհաստատված նմուշներ և այլ տարրեր կրելը.

բ) կեղտոտված կամ վնասված (պատռված) համազգեստ և կոշիկներ կրելը.

գ) այլընտրանքային աշխատանքային ծառայության համազգեստը կրել քաղաքացիական հագուստի հետ միասին:

6. Այլընտրանքային աշխատանքային ծառայողների համազգեստի անցումն ամառայինի կամ ձմեռայինի սահմանվում է Հայաստանի Հանրապետության զինված ուժերի զինծառայողների համար Հայաստանի Հանրապետության պաշտպանության նախարարի հրամանով սահմանված ժամկետներում և կարգով: Ամառային համազգեստից ձմեռայինի կամ հակառակն անցնելու ժամանակ համապատասխան կազմակերպության ղեկավարի կողմից ստուգվում է այլընտրանքային աշխատանքային ծառայողի տեսքն ու համազգեստի վիճակը:

7. Այլընտրանքային աշխատանքային ծառայության վայրի կազմակերպության ղեկավարն ամենօրյա հսկողություն է իրականացնում այլընտրանքային աշխատանքային ծառայողների կողմից համազգեստ կրելու կանոնների պահպանման նկատմամբ:

8. Արձակուրդի ժամանակ այլընտրանքային աշխատանքային ծառայողներին թույլատրվում է կրել քաղաքացիական հագուստ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև 1

Ձև 2

ԱՅԼԸՆՏՐԱՆՔԱՅԻՆ ԶԻՆԾԱՌԱՅՈՂԻ ԱՄԱՌԱՅԻՆ ՀԱՄԱԶԳԵՍՏ

ԱՅԼԸՆՏՐԱՆՔԱՅԻՆ ԶԻՆԾԱՌԱՅՈՂԻ ՁՄԵՌԱՅԻՆ ՀԱՄԱԶԳԵՍՏ

Ձև 3

Ձև 4

Ձև 5

Ա Յ Լ Ը Ն Տ Ր Ա Ն Ք Ա Յ Ի Ն   Զ Ի Ն Վ Ո Ր Ա Կ Ա Ն

Ծ Ա Ռ Ա Յ ՈՒ Թ Յ ՈՒ Ն

Ամրացվում է ամառային և ձմեռային համազգեստի թիկունքի կենտրոնական մասում` համազգեստի օձիքից 10 սմ ներքև` 6 x 18 սմ չափսի:

Ա Յ Լ Ը Ն Տ Ր Ա Ն Ք Ա Յ Ի Ն   Ա Շ Խ Ա Տ Ա Ն Ք Ա Յ Ի Ն

Ծ Ա Ռ Ա Յ ՈՒ Թ Յ ՈՒ Ն

Ամրացվում է ամառային և ձմեռային աշխատանքային համազգեստի թիկունքին` կենտրոնական մասում` համազգեստի օձիքից 10 սմ ներքև` 6 x 18 սմ չափսի: