«Վավերացնում եմ»

Հայաստանի Հանրապետության

Նախագահ Ռ. Քոչարյան

3 հունիսի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 մայիսի 2004 թվականի N 771-Ն

ՀԱՆՐԱԿՐԹՈՒԹՅԱՆ ՊԵՏԱԿԱՆ ԿՐԹԱԿԱՆ ՉԱՓՈՐՈՇԻՉՆԵՐԻ ՁԵՎԱՎՈՐՄԱՆ ԵՎ ՀԱՍՏԱՏՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Կրթության մասին» Հայաստանի Հանրապետության օրենքի 36-րդ հոդվածի 2-րդ կետին համապատասխան` Հայաստանի Հանրապետության կառավարությունը որոշում է.

1. Հաստատել հանրակրթության պետական կրթական չափորոշիչների ձևավորման և հաստատման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2004 թ. հունիսի 2 Երևան

Հավելված ՀՀ կառավարության 2004 թվականի մայիսի 27-ի N 771-Ն որոշման

Կ Ա Ր Գ

ՀԱՆՐԱԿՐԹՈՒԹՅԱՆ ՊԵՏԱԿԱՆ ԿՐԹԱԿԱՆ ՉԱՓՈՐՈՇԻՉՆԵՐԻ ՁԵՎԱՎՈՐՄԱՆ ԵՎ ՀԱՍՏԱՏՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգը հաստատվում է «Կրթության մասին» Հայաստանի Հանրապետության օրենքի 36-րդ հոդվածի 2-րդ կետի համաձայն:

2. Սույն կարգով կանոնակարգվում են հանրակրթության պետական կրթական չափորոշիչների և հանրակրթական առարկայական չափորոշիչների ձևավորման ու հաստատման գործընթացները և Հայաստանի Հանրապետության հանրակրթության համակարգում դրանց ներդրման հետ կապված հարաբերությունները:

II. ՀԱՆՐԱԿՐԹՈՒԹՅԱՆ ՊԵՏԱԿԱՆ ԿՐԹԱԿԱՆ ՉԱՓՈՐՈՇԻՉՆԵՐԻ ՁԵՎԱՎՈՐՈՒՄԸ

3. Համաձայն «Կրթության մասին» Հայաստանի Հանրապետության օրենքի 37-րդ հոդվածի 1-ին կետի` սույն կարգը մշակում և Հայաստանի Հանրապետության կառավարության հաստատմանն է ներկայացնում Հայաստանի Հանրապետության կրթության և գիտության նախարարությունը:

4. Հանրակրթության պետական կրթական չափորոշիչները ներառում են միջնակարգ կրթության պետական չափորոշիչը, հատուկ կրթության պետական չափորոշիչը, նախադպրոցական կրթության պետական չափորոշիչը և հանրակրթական առարկայական չափորոշիչները:

5. Սահմանվում է միջնակարգ կրթության պետական չափորոշչի հետևյալ կառուցվածքը`

ա) բացատրագիր,

բ) կրթության բովանդակությունը (ուսումնական բնագավառները և բաղադրիչները),

գ) սովորողին ներկայացվող ընդհանրական որակական պահանջները` ըստ ուսումնական բնագավառների և դպրոցի աստիճանների,

դ) հենքային ուսումնական պլանը (աղյուսակներով և պարզաբանումներով), դրա ձևավորումը, օրինակելի ուսումնական պլանները,

ե) գնահատման ձևերը, սանդղակը և գնահատականների գրանցման ու հաշվառման կարգը:

6. Հատուկ կրթության պետական չափորոշիչը ձևավորվում է միջնակարգ կրթության չափորոշչի հիման վրա` հաշվի առնելով յուրաքանչյուր հատուկ ուսումնական հաստատության առանձնահատկությունները և կրթության առանձնահատուկ պայմանների կարիք ունեցող երեխաների ընդունակություններն ու կարողությունները:

7. Նախադպրոցական կրթության պետական չափորոշիչը ձևավորելիս հաշվի են առնվում երեխաների դաստիարակության և խնամքն ապահովող անհրաժեշտ պայմանների ստեղծումը, ինչպես նաև ուսումնական բեռնվածության ծավալը:

III. ՀԱՆՐԱԿՐԹՈՒԹՅԱՆ ՊԵՏԱԿԱՆ ԿՐԹԱԿԱՆ ՉԱՓՈՐՈՇԻՉՆԵՐԻ ՀԱՍՏԱՏՈՒՄԸ

8. Միջնակարգ կրթության պետական չափորոշիչը հաստատվում է Հայաստանի Հանրապետության կառավարության կողմից:

9. Հատուկ կրթության պետական չափորոշիչը, հանրակրթական առարկայական չափորոշիչները և նախադպրոցական կրթության պետական կրթական չափորոշիչը մշակվում ու հաստատվում են Հայաստանի Հանրապետության կրթության և գիտության նախարարության կողմից:

10. Սույն կարգի համաձայն մշակված և հաստատված հանրակրթության պետական կրթական չափորոշիչները Հայաստանի Հանրապետության կրթության և գիտության նախարարի կողմից գործածության են երաշխավորվում դրանց հիման վրա մշակված առարկայական ծրագրերի` մեկ տարի փորձարկումից և արդյունքների ամփոփումից հետո:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան