«Վավերացնում եմ»
Հայաստանի Հանրապետության
Նախագահ Ռ. Քոչարյան
 22 փետրվարի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 3 փետրվարի 2005 թվականի N 124-Ն

ԴԵՆԴՐՈՊԱՐԿԵՐԻ ՏԻՊԱՅԻՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Համաձայն Հայաստանի Հանրապետության կառավարության 2002 թվականի դեկտեմբերի 26-ի N 54 արձանագրային որոշմամբ հավանության արժանացած Հայաստանի բնության հատուկ պահպանվող տարածքների զարգացման 2003-2010 թթ. գործողությունների ազգային ծրագրի 1.3.4-րդ կետի` Հայաստանի Հանրապետության կառավարությունը որոշում է.

1. Հաստատել դենդրոպարկերի տիպային կանոնադրությունը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2005 թ. փետրվարի 17 Երևան

Հավելված  ՀՀ կառավարության 2005 թվականի փետրվարի 3-ի N 124-Ն որոշման

Տ Ի Պ Ա Յ Ի Ն  Կ Ա Ն Ո Ն Ա Դ Ր Ո Ւ Թ Յ Ո Ւ Ն
Դ Ե Ն Դ Ր Ո Պ Ա Ր Կ Ե Ր Ի

1. Դենդրոպարկի կանոնադրությամբ սահմանվում են Հայաստանի Հանրապետության դենդրոպարկերի ստեղծման նպատակը, հիմնական խնդիրները, ռեժիմը, պահպանությունը և կառավարման մարմնի գործառույթները:

2. Դենդրոպարկը բուսական աշխարհի պահպանության օբյեկտ է, որն ստեղծվում է արհեստական պայմաններում տեղական և ներմուծված ծառաթփային բույսերի կենդանի հավաքածուների պահպանությունը, վերարտադրությունը և օրենքով սահմանված կարգով օգտագործումն ապահովելու նպատակով:

3. Դենդրոպարկն ստեղծվում է, և դրա սահմանները հաստատվում են Հայաստանի Հանրապետության կառավարության որոշմամբ` պետական կառավարման լիազորված մարմնի  (այսուհետ` լիազորված մարմին) ներկայացմամբ։

4. Յուրաքանչյուր դենդրոպարկի խնդիրները, առանձնահատկությունները, ուղղվածությունը, պահպանությունը և ռեժիմը սահմանվում են տվյալ դենդրոպարկը կառավարող մարմնի կանոնադրությամբ` օրենքներով, այլ իրավական ակտերով, միջազգային պայմանագրերով և սույն կանոնադրությամբ սահմանված պահանջներին համապատասխան:

5. Դենդրոպարկի հիմնական խնդիրներն են`

ա) արհեստական պայմաններում աճեցված տնտեսական, գեղազարդային և գիտական նշանակություն ունեցող տեղական ու ներմուծված ծառաթփային բույսերի (հատկապես` հազվագյուտ և անհետացող) կենդանի հավաքածուների պահպանության և վերարտադրության ապահովումը,

բ) բուսաբանության, բուսաբուծության, սելեկցիայի, գեղազարդային այգեգործության և լանդշաֆտային ճարտարապետության բնագավառներում գիտակրթական և լուսավորչական աշխատանքների իրականացման համար նախադրյալների ապահովումը,

գ) գիտահետազոտական, գիտափորձարարական և ներդրումային աշխատանքների իրականացումը։

6. Դենդրոպարկի կառավարման մարմնի գործառույթներն են`

ա) հատուկ էքսպոզիցիաների, հավաքածուների, փորձարարական  տեղամասերի, տնկարանների, հերբարիումների և օժանդակող լաբորատորիաների ստեղծումը,

բ) սերմնային ֆոնդի ստեղծման, սերմերի փոխանակման և իրացման աշխատանքների կազմակերպումը,

գ) բնական ֆլորայի և ներմուծված բուսատեսակների, այդ թվում` մշակաբույսերի տնտեսապես արժեքավոր նոր տեսակների աճեցման, սելեկցիայի, վերարտադրման և իրացման աշխատանքների կազմակերպումը,

դ) դենդրոպարկերում գտնվող բուսական հավաքածուների հաշվառման, գույքագրման, կադաստրի և մոնիտորինգի իրականացումն ու տվյալների բանկի ստեղծումը,

ե) զբոսաշրջության, այդ թվում` էկոզբոսաշրջության կազմակերպումը,

զ) գիտաժողովների և խորհրդակցությունների կազմակերպումը,

է) գիտական և գիտաճանաչողական գրականության  հրատարակումը:

III. ԴԵՆԴՐՈՊԱՐԿԻ ՌԵԺԻՄԸ ԵՎ ՊԱՀՊԱՆՈՒԹՅՈՒՆԸ

7. Թույլատրվում է լիազորված մարմնի հետ համաձայնեցված` դենդրոպարկի տարածքում իրականացնել՝

ա) մարդու, կենդանիների և բույսերի համար առանձնահատուկ վտանգ ներկայացնող  հիվանդությունների, վնասատուների և վարակի օջախների վերացման աշխատանքներ,

բ) ծառաթփային բույսերի նոր տեսակների ներմուծում և կլիմայավարժեցում,

գ) տեղական և ներմուծված բուսատեսակների վերարտադրությանը նպատակաուղղված միջոցառումներ,

դ) գիտահետազոտական  ուսումնասիրություններ,

ե)  էկոլոգիական, գիտաճանաչողական էքսկուրսիաներ, զբոսաշրջություն և դրանց հետ կապված սպասարկման ծառայությունների կազմակերպում,

զ) սահմանված կարգով հողերի վարձակալություն,

է) կողմնակի անտառօգտագործում (խոտհունձ, փեթակների և մեղվանոցների տեղադրում, պտղի, ընկույզի, սնկի, հատապտղի, դեղաբույսերի ու տեխնիկական հումքի հավաքում և մթերում):

 8. Արգելվում է դենդրոպարկի տարածքում դենդրոպարկի նպատակին և խնդիրներին հակասող ցանկացած տնտեսական գործունեություն:

9. Դենդրոպարկերի պահպանությունն իրականացնում են դենդրոպարկի աշխատողները` համապատասխան պետական կառավարման տարածքային մարմնի աջակցությամբ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան