«Վավերացնում եմ»
Հայաստանի Հանրապետության
Նախագահ Ռ. Քոչարյան
15 հունվարի 2004 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
11 դեկտեմբերի 2003 թվականի N 1788-Ն
ՍԵՎԱՆԱ ԼՃԻ ԱՌԱՓՆՅԱ` ԱՌԱՋՆԱՀԵՐԹ ԿԱՌՈՒՑԱՊԱՏՄԱՆ ԵՆԹԱԿԱ ՏԱՐԱԾՔՆԵՐԻ ԳՈՏԻԱՎՈՐՄԱՆ ՓԱՍՏԱԹՂԹԵՐԸ ՀԱՍՏԱՏԵԼՈՒ ՄԱՍԻՆ
«Քաղաքաշինության մասին» Հայաստանի Հանրապետության օրենքի 17-րդ և 19-րդ հոդվածներին համապատասխան` Հայաստանի Հանրապետության կառավարությունը որոշում է.
1. Հաստատել Սևանա լճի առափնյա` առաջնահերթ կառուցապատման ենթակա տարածքների գոտիավորման փաստաթղթերը:
2. Սահմանել, որ, համաձայն «Քաղաքաշինության մասին» Հայաստանի Հանրապետության օրենքի 19-րդ հոդվածի «բ» կետի և «Սևանա լճի մասին» Հայաստանի Հանրապետության օրենքի 7-րդ հոդվածի 2-րդ կետի, Սևանա լճի կենտրոնական գոտին առանձնացվում է որպես քաղաքաշինական գործունեության հատուկ կարգավորման օբյեկտ:
3. Սևանա լճի կենտրոնական գոտում կառուցապատումն իրականացվում է միայն Սևանա լճի առափնյա` առաջնահերթ կառուցապատման ենթակա տարածքներում` սույն որոշմամբ հաստատված փաստաթղթերով ամրագրված դրույթներին համապատասխան` Հայաստանի Հանրապետության օրենսդրությամբ սահմանված կարգով:
4. Սևանա լճի կենտրոնական գոտում` սույն որոշմամբ հաստատված փաստաթղթերով առանձնացված տարածքներից դուրս, մինչև նշված տարածքների գոտիավորման փաստաթղթերի կազմումը, քաղաքաշինական գործունեության նպատակով կատարվող հողամասերի տրամադրումը և կառուցապատման գործընթացն իրականացվում են բացառապես Հայաստանի Հանրապետության օրենսդրությամբ սահմանված կարգով փորձաքննություն անցած և Հայաստանի Հանրապետության կառավարության կողմից հաստատված ծրագրերի հիման վրա:
5. Հայաստանի Հանրապետության նախարարներին, Հայաստանի Հանրապետության Գեղարքունիքի մարզպետին և Հայաստանի Հանրապետության պետական կառավարման իրավասու մարմինների ղեկավարներին` քաղաքաշինական փաստաթղթերի մշակման, համաձայնեցման ընթացքում, ինչպես նաև Հայաստանի Հանրապետության կառավարության 2002 թվականի մայիսի 30-ի «Սևան» ազգային պարկ» պետական հիմնարկը վերակազմակերպելու, «Սևան» ազգային պարկի և «Սևան» ազգային պարկ» պետական ոչ առևտրային կազմակերպության կանոնադրությունները հաստատելու մասին» N 927-Ն որոշմամբ սահմանված «Սևան» ազգային պարկի և դրա պահպանական գոտու սահմանների ճշտման աշխատանքներում հիմք ընդունել Սևանա լճի առափնյա` առաջնահերթ կառուցապատման ենթակա տարածքների գոտիավորման փաստաթղթերով ամրագրված դրույթները:
6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
|
Հայաստանի Հանրապետության |
Ա. Մարգարյան |
|
|