«Վավերացնում եմ»
Հայաստանի Հանրապետության
Նախագահ Ռ. Քոչարյան
30 դեկտեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 դեկտեմբերի 2002 թվականի N 2099-Ն

ՄԱՔՍԱՅԻՆ ԾԱՌԱՅՈՂԻՆ ԳՈՐԾՈՒՂԵԼՈՒ ՊԱՅՄԱՆՆԵՐՆ ՈՒ ԿԱՐԳԸ, ԻՆՉՊԵՍ ՆԱԵՎ ԳՈՐԾՈՒՂՄԱՆ ԸՆԹԱՑՔՈՒՄ ՄԱՔՍԱՅԻՆ ԾԱՌԱՅՈՂԻ ԾԱՌԱՅՈՒԹՅԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ ՀԱՍՏԱՏԵԼՈՒ ՄԱՍԻՆ

«Մաքսային ծառայության մասին» Հայաստանի Հանրապետության օրենքի 40-րդ հոդվածի 2-րդ կետին համապատասխան՝ Հայաստանի Հանրապետության կառավարությունը որոշում է.

1. Հաստատել մաքսային ծառայողին գործուղելու պայմաններն ու կարգը, ինչպես նաև գործուղման ընթացքում մաքսային ծառայողի ծառայության առանձնահատկությունները՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2002 թ. դեկտեմբերի 27 Երևան

Հավելված ՀՀ կառավարության 2002 թվականի դեկտեմբերի 13-ի N 2099-Ն որոշման

ՄԱՔՍԱՅԻՆ ԾԱՌԱՅՈՂԻՆ ԳՈՐԾՈՒՂԵԼՈՒ ՊԱՅՄԱՆՆԵՐՆ ՈՒ ԿԱՐԳԸ, ԻՆՉՊԵՍ ՆԱԵՎ ԳՈՐԾՈՒՂՄԱՆ ԸՆԹԱՑՔՈՒՄ ՄԱՔՍԱՅԻՆ ԾԱՌԱՅՈՂԻ ԾԱՌԱՅՈՒԹՅԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ

1. Մաքսային ծառայողի գործուղում է համարվում վերադաս մաքսային մարմնի, մաքսատան, մաքսային կետի ղեկավարի հրամանով մաքսային ծառայողի մշտական ծառայողական վայրից որոշակի ժամկետով այլ վայր մեկնելը՝ ծառայողական (պաշտոնեական) հանձնարարություն կատարելու (այդ թվում` ապրանքների մաքսային ուղեկցման) համար:

2. Մաքսային ծառայողի գործուղումը ձևակերպվում է գործուղման վկայական տալու միջոցով՝ հրամանի հիման վրա: Եթե ծառայողը գործուղումից հիմնական ծառայության վայր է վերադառնում գործուղման օրը, ապա գործուղման վկայական կարող է չլրացվել:

3. Ըստ ենթակայության՝ վերադաս մաքսային մարմին մաքսային ծառայողների գործուղումներն իրականացվում են վերադաս մաքսային մարմնի ղեկավարի, ղեկավարի տեղակալների հանձնարարությամբ կամ համաձայնությամբ:

4. Մաքսային ծառայողի՝ մինչև 10 օր տևողությամբ գործուղման ժամկետը որոշվում է գործուղող մաքսային մարմնի ղեկավարի կողմից, իսկ 10 օրից ավելի գործուղման ժամկետը՝ վերադաս մաքսային մարմնի ղեկավարի կողմից:

5. Գործուղման մեջ գտնվելու փաստացի ժամանակը որոշվում է գործուղման վկայականում գործուղման վայր մեկնելու և գործուղման վայրից վերադառնալու օրերի մասին կատարված նշումներով: Եթե մաքսային ծառայողը գործուղվել է տարբեր բնակավայրեր, մաքսատներ, մաքսային կետեր, ապա մեկնելու և վերադառնալու օրերի մասին նշումներ կատարվում են յուրաքանչյուր վայրում:

Գործուղման վկայականում մաքսային ծառայողների գործուղման մեկնելու և վերադառնալու մասին նշումները հաստատվում են այն կնիքով, որն օգտագործում է մաքսային մարմինը կամ կազմակերպությունն իր տնտեսական գործունեության ժամանակ՝ համապատասխան պաշտոնական անձի ստորագրությունը հավաստիացնելու համար: Գործուղման մեկնող և տվյալ մաքսային մարմին գործուղվող անձանց գրանցումները վերադաս մաքսային մարմնում, մաքսատներում, մաքսային կետերում կատարվում են հատուկ մատյաններում:

6. Գործուղման մեջ գտնվող մաքսային ծառայողների վրա տարածվում է այն մաքսային մարմնի, հիմնարկի, կազմակերպության աշխատանքային ժամանակի և հանգստի ժամանակի ռեժիմը, ուր նրանք գործուղվել են: Գործուղման ընթացքում չօգտագործված հանգստի օրերի փոխարեն գործուղումից վերադառնալուց հետո այլ հանգստյան օրեր չեն տրամադրվում:

Եթե ծառայողը գործուղվել է հանգստյան և տոն օրերին աշխատելու համար, ապա այդ օրերի վարձատրումը կատարվում է Հայաստանի Հանրապետության օրենսդրությանը համապատասխան:

7. Գործուղման ժամանակ պահպանվում է գործուղվող մաքսային ծառայողի ծառայության պաշտոնը և դրամական բավարարումը՝ հիմնական ծառայության վայրում:

8. Գործուղված մաքսային ծառայողին հատկացվում է բնակարան վարձելու ծախսերը, գործուղման վայր մեկնելու և գործուղումից հիմնական ծառայության վայր վերադառնալու ճանապարհածախսը, գործուղման հետ կապված ապահովագրական, այլ պետություններում գրանցման հետ կապված ծախսերը, օդային ելքի տուրքերի վճարները, ինչպես նաև վճարվում է օրապահիկ:

9. Գործուղվող մաքսային ծառայողին գործուղման վայրում բնակարան վարձելու ծախսերը հատուցվում են ժամանման օրվանից մինչև մեկնելու օրը:

10. Գործուղման մեջ գտնվող մաքսային ծառայողներին տրվող փոխհատուցումները (գիշերավարձ, օրապահիկ) կատարվում են Հայաստանի Հանրապետության օրենսդրությանը համապատասխան:

11. Գործուղվող մաքսային ծառայողին հատուցվում են գործուղման վայր մեկնելու և վերադառնալու ճանապարհածախսերը՝ ներառյալ ընդհանուր օգտագործման ավտոմոբիլային տրանսպորտի (բացի տաքսիներից) երթևեկության արժեքի գումարները:

12. Եթե գործուղվող մաքսային ծառայողը գործուղման վայրից հնարավորություն ունի ամեն օր վերադառնալու իր մշտական բնակավայրը, ապա օրապահիկ չի վճարվում, իսկ եթե գործուղվողը աշխատանքային օրն ավարտելուց հետո մնում է գործուղման վայրում, ապա բնակարան վարձելու մասին փաստաթղթերը ներկայացնելու դեպքում նրան հատուցվում են ծախսերը՝ սահմանված նորմերի չափով:

13. Գործուղվող մաքսային ծառայողի ամենօրյա վերադարձը գործուղման վայրից բնակության մշտական վայր յուրաքանչյուր կոնկրետ դեպքում որոշվում է այն մաքսային մարմնի ղեկավարի կողմից, որտեղ ծառայում է գործուղվողը` հաշվի առնելով հեռավորությունը, տրանսպորտային հաղորդակցության պայմանները, կատարվելիք առաջադրանքների բնույթը, ինչպես նաև ծառայողի հանգստի համար անհրաժեշտ պայմանների ստեղծումը:

14. Գործուղված մաքսային ծառայողի ժամանակավոր անաշխատունակության դեպքում նրան ընդհանուր հիմունքներով հատուցվում է բնակարանի վարձի գումարը (բացի այն դեպքերից, երբ գործուղվող ծառայողը գտնվում է ստացիոնար բուժման մեջ) և վճարվում է օրապահիկ ամբողջ ժամանակի ընթացքում, քանի դեռ նա, առողջական վիճակից ելնելով, հնարավորություն չունի անցնելու իր պաշտոնեական հանձնարարությունների կատարմանը կամ վերադառնալու իր մշտական բնակության վայրը, բայց ոչ ավելի, քան 2 ամսվա համար:

Գործուղված մաքսային ծառայողի ժամանակավոր անաշխատունակությունը, ինչպես նաև առողջական վիճակի պատճառով մշտական բնակության վայր վերադառնալու անհնարինությունը պետք է հաստատվի պետական առողջապահական հիմնարկի կողմից:

Գործուղված մաքսային ծառայողին ժամանակավոր անաշխատունակության ընթացքում Հայաստանի Հանրապետության օրենսդրությամբ սահմանված կարգով վճարվում է ժամանակավոր անաշխատունակության նպաստ:

Ժամանակավոր անաշխատունակության օրերը չեն մտնում գործուղման ժամկետի մեջ (չի վճարվում դրամական բավարարում):

15. Գործուղվող մաքսային ծառայողին ծառայողական գործուղման մեկնելուց առաջ կարող է տրվել դրամական կանխավճար՝ օրապահիկի, բնակելի տեղի վարձի և ճանապարհածախսի գումարի սահմաններում:

Մաքսային ծառայողը գործուղումից վերադառնալուց հետո 3 օրվա ընթացքում պարտավոր է ներկայացնել հաշվետվություն գործուղման հետ կապված ծախսերի վերաբերյալ՝ կցելով գործուղման վկայականը և ծախսերը հիմնավորող փաստաթղթերը:

16. Օպերատիվ և հետախուզական, հսկողական ու այլ հատուկ հանձնարարությունների կատարման առանձին դեպքերում մաքսային ծառայողը գործուղվում է վերադաս մաքսային մարմնի ղեկավարի հրամանի հիման վրա` առանց գործուղման թերթիկի ստացման և մատյանում գրանցման: Գործուղման ծախսերի հատուցումը մաքսային ծառայողին կատարվում է նրա գործուղումից վերադառնալուց հետո վերադաս մաքսային մարմնի ղեկավարի գրավոր հանձնարարականի հիման վրա` հիմք ընդունելով ծախսերի մասին հաշվետվությունը:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան