«Վավերացնում եմ»
Հայաստանի Հանրապետության
Նախագահ Ռ. Քոչարյան
26 դեկտեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

5 դեկտեմբերի 2002 թվականի N 2050-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՏԻԵԶԵՐԱԿԱՆ ՀԱՆՈՒԹԱԳՐՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՄԱՆ ՏԵԽՆԻԿԱԿԱՆ ԱՌԱՋԱԴՐԱՆՔԸ ՀԱՍՏԱՏԵԼՈՒ ՄԱՍԻՆ

«Գեոդեզիայի և քարտեզագրության մասին» Հայաստանի Հանրապետության օրենքին և Հայաստանի Հանրապետության կառավարության 2002 թվականի սեպտեմբերի 19-ի «Հայաստանի Հանրապետության պետական մասշտաբային շարքի բազային քարտեզների ստեղծման և օդալուսանկարահանման աշխատանքների իրականացման ծրագիրը հաստատելու մասին» N 1565-Ն որոշմանը համապատասխան՝ Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության տարածքում տիեզերական հանութագրման աշխատանքների իրականացման տեխնիկական առաջադրանքը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2002 թ. դեկտեմբերի 20 Երևան

Հավելված ՀՀ կառավարության 2002 թվականի դեկտեմբերի 5-ի N 2050-Ն որոշման

Տ Ե Խ Ն Ի Կ Ա Կ Ա Ն  Ա Ռ Ա Ջ Ա Դ Ր Ա Ն Ք

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՏԻԵԶԵՐԱԿԱՆ ՀԱՆՈՒԹԱԳՐՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՄԱՆ

1. Հիմք՝ Հայաստանի Հանրապետության կառավարության 2002 թվականի սեպտեմբերի 19-ի N 1565-Ն որոշմամբ հաստատված՝ Հայաստանի Հանրապետության պետական մասշտաբային շարքի բազային քարտեզների ստեղծման և օդալուսանկարահանման աշխատանքների իրականացման ծրագիրը:

2. Պատվիրատու՝ Հայաստանի Հանրապետության կառավարությանն առընթեր անշարժ գույքի կադաստրի պետական կոմիտե:

3. Աշխատանքների նպատակները՝ Հայաստանի Հանրապետության Շիրակի, Արագածոտնի, Արմավիրի և Կոտայքի մարզերի որոշ տարածաշրջանների, հիմնականում սահմանամերձ և բարձր լեռնային գոտում գտնվող մոտավորապես 2,4 հազ. քառ. կմ տարածքի տիեզերական հանութագրման աշխատանքների իրականացումը, դրանց հիման վրա 1:10000 մասշտաբի տեղագրական բազային քարտեզների ստեղծումը, ինչպես նաև կադաստրի համակարգի գործունեության հետագա զարգացման ու տեղագրական բազային քարտեզների ինքնուրույն արտադրության համար տիեզերական հանութագրման ժամանակակից տեխնոլոգիաների, սարքավորումների, ուսուցման և փորձի ձեռքբերումը:

Տիեզերական հանութագրման աշխատանքների իրականացման անհրաժեշտությունը պայմանավորված է այն հանգամանքով, որ, ի տարբերություն օդալուսանկարահանման աշխատանքների, անհրաժեշտություն չկա սահմանամերձ պետությունների հետ պետական սահմանի երկայնքով, միջազգային նորմերին համապատասխան, նվազագույնը 5-6 կմ ոչ թռիչքային գոտու ապահովումը համապատասխան սահմանների երկայնքով:

4. Նախատեսվող աշխատանքներ՝ աշխատանքները բաժանվում են 2 բաղադրիչի՝

ա) տեխնիկական բաղադրիչ, որը վերաբերում է տիեզերական լուսանկարահանման իրականացմանը, ինչպես նաև համապատասխան համակարգչային սարքավորումների ու ծրագրային փաթեթների ձեռքբերմանը.

բ) ուսումնական բաղադրիչ, որը վերաբերում է կադաստրային և բազային քարտեզագրման ոլորտում համապատասխան գիտելիքների ու փորձի ձեռքբերմանը:

Կատարողը պետք է ապահովի տիեզերական լուսանկարահանումը նախատեսված տարածքներում, 2 լիցենզավորված ծրագրային փաթեթի և 2 համակարգչի տրամադրումը՝ անհրաժեշտ պիտույքներով (աքսեսուարներ), որոնք պետք է հարմարեցված լինեն այդ ծրագրային փաթեթները շահագործելու համար: Ուսուցումն իրականացվելու է 3 ամիս ժամկետով՝ կադաստրի համակարգի 8 մասնագետ պատրաստելու համար:

5. Տիեզերական լուսանկարահանման տարածք՝ ընդգրկում է Հայաստանի Հանրապետության Շիրակի ու Արմավիրի մարզերի սահմանամերձ գոտիները և Արագածոտնի ու Կոտայքի մարզերի որոշ տարածքներ՝ մոտավորապես 2,4 հազ. քառ. կմ ընդհանուր մակերեսով: Այն բաղկացած է 2 հատվածից, որոնց աշխարհագրական կոորդինատներն են՝

հատված 1. երկայնությունը՝ L - 44⁰ 37'30'' և 44⁰ 52'30''

 լայնությունը՝ B - 40⁰ 25'00'' և 40⁰ 37'30''

հատված 2. երկայնությունը՝ L - 43⁰ 37'30'' և 44⁰ 00'30''

 լայնությունը՝ B - 40⁰ 00'00'' և 40⁰ 32'30''

6. Տեխնիկական առանձնահատկությունները՝ Իկոնոսի 1.0 մ ճշտությամբ (reference product suite @ < 50 m CE90, 25m RMS) ստերեո պանկրոմատիկ արբանյակային լուսանկարները պետք է ձեռք բերվեն Երևանից դեպի արևմուտք և հյուսիս տեղաբաշխված 2 հատվածի համար: Լիցենզավորումը պետք է հիմնված լինի CAG (Company/Agency License) տիպի վրա: Նկարահանումը պետք է լինի 95 տոկոսով ամպազերծ և 100 տոկոսով ձյունազերծ տարածքի համար: Որտեղ որ հնարավոր է, արխիվացված լուսանկարները պետք է ձեռք բերվեն ծրագրի սկզբից ոչ ուշ, քան 12 ամսվա ընթացքում, եթե ընդհանուր արժեքը նվազել է, և թվարկված պայմանները բավարարված են: Լուսանկարների տեսակի վերջնական հաստատումը (լինի դա արխիվացված, թե չարխիվացված) կատարվում է Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի (այսուհետ՝ ԿՊԿ) հայեցողությամբ: Եթե նշված պայմանները չեն կարող բավարարվել չնախատեսված հանգամանքների պատճառով (ներառյալ եղանակի պատճառով չափից ավելի ուշացումները), ապա վերանայման ենթակա յուրաքանչյուր պայման պետք է հաստատվի ԿՊԿ-ի կողմից՝ մինչև դրանց հանձնումը:

7. Ծրագրերի և սարքավորումների առանձնահատկությունները՝ լուսանկարահանման համար անհրաժեշտ սարքավորումների առանձնահատկություններն են.

Բաղադրիչը	Պահանջվող սարքավորումը	Միա- վորը	Հնարավորությունը (առանձնահատկությունը)
Արբանյակային լուսանկարահանում	PCI OrthoEngine Satellite Edition (կամ համարժեքը)	2	- օրթոռեկտիֆիկացված արբանյակային լուսանկարների արտադրություն - տեղագրական-քարտեզագրական արտադրանքի գեներացիա - ռադիոմետրիկ ուժեղացում - նկարների դասակարգում - անգլերեն և ռուսերեն ձեռնարկներ
Սարքավորում	անհատական համակարգիչ	2	Intel Pentium PIV-1.3GHz/ 1.0Gb RAM/100Gb HDD / CD-ROM/ Lan10/100/FDD/ Keyboard (with Armenian, English and Russian keys and fonts) Mouse/ 19’Monitor / Preinstalled Win2k or XP (license) +Office2000(license) + virus protection.
	տպիչ	2	Laser ● A3, Color, ●>600 dpi ● >6 ppm ● RAM 16Mb● parallel interface● 5 spare cartridges
	UPS	2	Suitable for above.

8. Ուսումնական բաղադրիչ՝ ուսուցումը պետք է ներառի հետևյալ հիմնական ուղղությունները՝

ա) ժամանակակից համակարգչային տեխնիկայի ու ծրագրերի վրա հիմնված տեղագրական քարտեզագրման հայեցակարգերի և մեթոդիկայի մշակումը՝ ներառյալ նորմատիվ-տեխնիկական ստանդարտներն ու քարտեզների հատկորոշումը և դասակարգումը, աշխատանքների իրականացումը, գնահատումն ու պահպանումը.

բ) թվային պատկերների ստացման և համակարգչային քարտեզագրման հայեցակարգերի մշակումը (ներառյալ լուսանցագիրը, մասշտաբը, ճշտությունը և այլն).

գ) թվային ֆոտոգրամետրիայի հայեցակարգերի և մեթոդիկայի մշակումը՝ ներառյալ օրթոֆոտոյի ստեղծումը, բարձրությունների (հորիզոնականների) ընտրությունը, կադաստրային քարտեզների թարմացումը և բազային քարտեզների արտադրությունը՝ օգտագործելով ձեռք բերված ծրագրային փաթեթը.

դ) արբանյակային հեռահար զոնդավորման հայեցակարգի և մեթոդիկայի մշակումը՝ ներառյալ օրթոպատկերների գեներացիայի, բարձրությունների (հորիզոնականների) ընտրությունը, բազային քարտեզների արտադրությունը, ռադիոմետրիկ ուժեղացումը և պատկերների դասակարգման մեթոդիկան՝ օգտագործելով ձեռք բերված ծրագրային փաթեթը.

ե) կիսաավտոմատացված թվայնացման հայեցակարգ և մեթոդիկա՝ ներառյալ վեկտորիզացիան և ալգորիթմի մշակումն ու ուժեղացումը:

Իրականացվող ուսուցումը պետք է կենտրոնանա արբանյակային պատկերներից տեղագրական քարտեզների ստացման գործընթացի ուսուցման վրա: Աշխատանքների ինքնուրույն իրականացման կարողությունը պետք է հանդիսանա ուսուցման նպատակակետը: Ուսուցման ամբողջական ձեռնարկը, որն ուսուցումն ավարտվելուց հետո կարող է օգտագործվել որպես տեղեկատու ուղեցույց, պետք է ներկայացվի ինչպես թղթային, այնպես էլ էլեկտրոնային տարբերակներով՝ ի լրումն ուսումնական ծրագրի:

Հարկ է նշել, որ սովորողներից քչերն են ի վիճակի հաղորդակցվել անգլերենով, բայց ռուսերենը նրանց համար երկրորդ լեզու է: Նյութերը և ինտերֆեյսը պետք է լինեն անգլերենով, եթե հայերենով հնարավոր չէ:

9. Իրականացման ապահովում՝ ակնկալվում է, որ խորհրդատուն, որպես ներկայացվող փաստաթղթերի մաս, տրամադրի սարքավորումների, ծրագրային փաթեթների ու պատկերների լրիվ ցանկը և իրականացվելիք ուսուցման ամբողջական ծրագիրը: Ակնկալվում է, որ միայն մեկ միջազգային խորհրդատու է պահանջվելու ուսուցումն իրականացնելու համար, սակայն կարող են առաջարկվել նաև այլընտրանքային լուծումներ: Պայմանագիրը կնքվելուց հետո մեկ շաբաթվա ընթացքում պատվիրատուի հետ համաձայնեցվելու է աշխատանքային պլանը:

Ուսուցումն սկսվելու է սարքավորումները, ծրագրերը և պատկերները ԿՊԿ հանձնելուց հետո: Խորհրդատուն պատասխանատու է սարքավորումների, ծրագրային փաթեթների ու պատկերների ձեռքբերման և տեղադրման համար, որպես պայմանագրի մաս: Պայմանագրի ավարտից հետո սարքավորումները կմնան ԿՊԿ-ում: Ուսուցումը պետք է սկսվի սարքավորումների տեղակայումից հետո ոչ ուշ, քան պայմանագրի կնքումից 3 ամիս հետո և պետք է տևի 3 ամիս:

Շվեյցարիայի տոպոգրաֆիայի դաշնային գրասենյակի (ՏԴԳ) ծրագրից, որը մատուցում է օդային լուսանկարահանման ծառայություններ, ակնկալվում է, որ այն կգործի մինչև 2002 թվականի վերջին եռամսյակը, և պետք է համատեղ ջանքեր գործադրվեն տեխնոլոգիական իրականացման ու գիտելիքների փոխանցման ոլորտներում:

10. Պատվիրատուի կողմից տրամադրվող ռեսուրսներ՝ ԿՊԿ-ն կտրամադրի հարմարավետ գրասենյակային տարածք՝ սարքավորումների տեղակայման և ուսուցման կազմակերպման համար: Ծրագրի իրականացման գրասենյակը (ԾԻԳ) կտրամադրի ամբողջ անհրաժեշտ նյութատեխնիկական օժանդակությունը՝ ներառյալ մաքսազերծումը և օդանավակայանից գրասենյակ տեղափոխումը: ԿՊԿ-ն կտրամադրի 8 հարմար թեկնածուի ուսուցման համար:

11. Խորհրդատուի կողմից տրամադրվող ռեսուրսներ՝ խորհրդատուն ուղղակիորեն ԿՊԿ-ին պետք է տրամադրի՝

ա) նոր բարձր ճշգրտությամբ արբանյակային լուսանկարներ, որոնք անհրաժեշտաբար կծածկեն համապատասխան տարածքը.

բ) արբանյակային լուսանկարներից բազային քարտեզների ստեղծման և պահպանման, օրթոֆոտո արտադրության, նկարների ռեկտիֆիկացիայի ու ռադիոմետրիկ ուժեղացման նպատակով տեղեկատվության մշակման և ստացման համար անհրաժեշտ տեխնոլոգիա և փորձ.

գ) ԿՊԿ-ի խնդրանքով ընտրված հողօգտագործման պլանավորման, գյուղատնտեսության, շրջակա միջավայրի և այլ անհրաժեշտ գործառույթների իրականացման համար անհրաժեշտ գիտելիքներ և փորձ:

Խորհրդատուն պետք է պատասխանատու լինի սարքավորումների և ծրագրային փաթեթների ձեռքբերման, Երևան առաքելու ու անհրաժեշտ պաշտոնական թույլտվություններ ստանալու, ուսուցումը կազմակերպելու նպատակով անհրաժեշտ ձեռնարկների կամ տեղեկատուների արտադրության, անհրաժեշտ՝ գրավոր և բանավոր թարգմանությունների համար:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան