«Վավերացնում եմ»
Հայաստանի Հանրապետության
Նախագահ Ռ. Քոչարյան
16 նոյեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 հոկտեմբերի 2002 թվականի N 1740-Ն

ՈՍՏԻԿԱՆՈՒԹՅՈՒՆՈՒՄ ԾԱՌԱՅՈՂԻ ԶԻՆՎՈՐԱԿԱՆ ՀԱՇՎԱՌՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Ոստիկանությունում ծառայության մասին» Հայաստանի Հանրապետության օրենքի 2-րդ հոդվածի չորրորդ մասի՝ Հայաստանի Հանրապետության կառավարությունը որոշում է.

1. Սահմանել ոստիկանությունում ծառայողի զինվորական հաշվառման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2002 թ. նոյեմբերի 11 Երևան

Հավելված ՀՀ կառավարության 2002 թվականի հոկտեմբերի 31-ի N 1740-Ն որոշման

Կ Ա Ր Գ

ՈՍՏԻԿԱՆՈՒԹՅՈՒՆՈՒՄ ԾԱՌԱՅՈՂԻ ԶԻՆՎՈՐԱԿԱՆ ՀԱՇՎԱՌՄԱՆ

1. Սույն կարգով սահմանվում է ոստիկանության ծառայողին զինված ուժերի հաշվառումից հանելու և ոստիկանությունում զինվորական հաշվառման վերցնելու կարգը:

2. Ոստիկանությունում ծառայության անցած (ուսանելու համար ոստիկանության ուսումնական հաստատություն ընդունված) և ոստիկանության գլխավոր, ավագ ու կրտսեր խմբերի պաշտոններում նշանակված Հայաստանի Հանրապետության քաղաքացիները հանվում են զինված ուժերի զինվորական հաշվառումից և վերցվում ոստիկանությունում զինվորական հաշվառման:

3. Ոստիկանության գլխավոր և ավագ խմբերի պաշտոններում նշանակված, ուսանելու համար ոստիկանության ուսումնական հաստատություն ընդունված ոստիկանության ծառայողին զինված ուժերի զինվորական հաշվառումից հանելու և ոստիկանությունում զինվորական հաշվառման վերցնելու համար հիմք է հանդիսանում պետական կառավարման մարմնի ղեկավարի հրամանը, իսկ կրտսեր խմբի պաշտոնում նշանակված ոստիկանության ծառայողին՝ համապատասխան պաշտոնի նշանակելու իրավասություն ունեցող ղեկավարի հրամանը:

4. Ոստիկանության համապատասխան կադրային մարմինները քաղաքացուն ոստիկանությունում պաշտոնի նշանակվելու, ուսանելու համար ոստիկանության ուսումնական հաստատություն ընդունվելու մասին հրամանների արձակման օրվանից 7-օրյա ժամկետում ծառայողի զինվորական հաշվառման վայրի զինվորական կոմիսարիատ են ներկայացնում միջնորդություն՝ նրան զինված ուժերի զինվորական հաշվառումից հանելու և ոստիկանությունում զինվորական հաշվառման վերցնելու համար:

Միջնորդության հետ ներկայացվում են՝

ա) ծառայության նշանակվելու կամ ուսանելու համար ոստիկանության ուսումնական հաստատություն ընդունվելու մասին հրամանից քաղվածք.

բ) գլխավոր, ավագ և կրտսեր խմբերի պաշտոններում նշանակված, ուսանելու համար ոստիկանության ուսումնական հաստատություն ընդունված ծառայողների համար՝ անվանական ցուցակ (N 1 ձևը կցվում է).

գ) զինվորական գրքույկ.

դ) ոստիկանության ուսումնական հաստատությունում սովորողի համար՝ զորակոչային կցագրման վկայական:

5. Զինվորական կոմիսարիատն անվանական ցուցակների հիմնավորվածությունը ճշտելուց հետո զինվորական հաշվառման փաստաթղթերում կատարում է համապատասխան նշումներ զինված ուժերի հաշվառումից հանելու վերաբերյալ: Հաշվառման քարտը պահպանվում է զինվորական կոմիսարիատում՝ հատուկ հաշվառման վերցված զինապարտների քարտադարանում, իսկ զինվորական գրքույկը փոխանցվում է ոստիկանության համապատասխան կադրային մարմին, որտեղ այն պահվում է ծառայողի անձնական գործում՝ ոստիկանությունում ծառայության ամբողջ ընթացքում:

6. Ոստիկանությունում ծառայությունից և ոստիկանության ուսումնական հաստատությունից ազատված անձի զինվորական գրքույկը (զորակոչային կցագրման վկայականը), զինված ուժերում զինվորական հաշվառման վերցնելու համար ազատման հրամանի արձակման օրվանից հետո 7-օրյա ժամկետում կադրային մարմնի կողմից համապատասխան տեղեկանքով (N 2 ձևը կցվում է) ուղարկվում է այն զինվորական կոմիսարիատը, որտեղից ծառայողը հանվել է հաշվառումից: Ծառայության ընթացքում ծառայողի բնակության վայրը փոխվելու դեպքում նշված նյութերն ուղարկվում են նրա բնակության վայրի զինվորական կոմիսարիատ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև N 1

Ա Ն Վ Ա Ն Ա Կ Ա Ն  Ց ՈՒ Ց Ա Կ

_______________ զինվորական կոմիսարիատում զինվորական հաշվառումից հանվելու ենթակա՝ ոստիկանությունում ծառայության ընդունված պահեստազորի զինծառայողների

NN ը/կ	Ազգանունը, անունը, հայրանունը	Ծննդյան տարեթիվը	Պահեստազորի զինվորական կոչումը	Զինվորա- հրամանատարական մասնագիտությունը, թիվը	Ում հրամանով և ինչ պաշտոնի է նշանակվել, հրամանի համարը, տարեթիվը և ամսաթիվը	Երբ, ում և ինչ ելքի համարով են ուղարկվել հաշվառման փաստաթղթերը

Ձև N 2   _________________ (ելքի համարը)   _________________ (ուր է ուղարկվում)   Տ Ե Ղ Ե Կ Ա Ն Ք   ոստիկանությունում ծառայությունից ազատված զինապարտի մասին   Տրվում է _________________________________________________________ (կոչումը) _______________________________________________________________, (անունը, հայրանունը, ազգանունը)   ծնված՝ 19 _____ թ., առ այն, որ նա հաշվառման մեջ է գտնվել   ՀՀ ոստիկանությունում___ ____19___թվականից մինչև___ _____ 20___թվականը:   Ազատված է _____ _______ 20_____թվականի N ________ հրամանով:   Բնակության վայրը ___________________________________________________   Առդիր՝ զինգրքույկ___________________________________________________   Ստորաբաժանման ղեկավար __________________  __________________________                            (ստորագրությունը)                            (անունը, ազգանունը)