040.0871.18.09.01

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

18 սեպտեմբերի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 սեպտեմբերի 2001 թվականի N 871
քաղ. Երևան 

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 2001 ԹՎԱԿԱՆԻ ՊԵՏԱԿԱՆ ԲՅՈՒՋԵԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՎԵՐԱԲԱՇԽՈՒՄ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2001 ԹՎԱԿԱՆԻ ՀՈՒՆՎԱՐԻ 30-Ի N 68 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Հաշվի առնելով Սևանա լճի բնապահպանական և հանրապետության ոռոգման խնդիրների լուծման հարցում «Հիդրոտեխնիկական կառուցվածքներ Որոտան գետի վրա» օբյեկտի «Որոտան-Արփա թունելի գլխամասային ջրընդունիչ կառուցվածքի վերականգնում» ենթաօբյեկտի խիստ կարևորությունը, ու ելնելով ջրատարի 1-ին և 2-րդ թունելախորշերի փորվածքամիացումը 2002 թվականի հունիս-հուլիս ամիսներին ապահովելու անհրաժեշտությունից, ինչպես նաև հիմք ընդունելով «Հայաստանի Հանրապետության 2001 թվականի պետական բյուջեի մասին» Հայաստանի Հանրապետության օրենքի 12-րդ հոդվածի «ա» կետը` Հայաստանի Հանրապետության կառավարությունը որոշում է.

1. «Հիդրոտեխնիկական կառուցվածքներ Որոտան գետի վրա» օբյեկտի «Որոտան-Արփա թունելի գլխամասային ջրընդունիչ կառուցվածքի վերականգնում» ենթաօբյեկտի վերգետնյա կառույցի վերականգնման աշխատանքների ավարտման ժամկետ սահմանել 2001 թվականի դեկտեմբերի 1-ը, իսկ ստորջրյա կառույցինը` 2002 թվականի ապրիլի 1-ը:

2. «Հիդրոտեխնիկական կառուցվածքներ Որոտան գետի վրա» օբյեկտի «Որոտան-Արփա թունելի գլխամասային ջրընդունիչ կառուցվածքի վերականգնում» ենթաօբյեկտի շինարարական աշխատանքների պատվիրատու ճանաչել Հայաստանի Հանրապետության քաղաքաշինության նախարարության «Հիդրոտեխնիկական կառուցվածքներ» պետական հիմնարկը:

3. «Հայաստանի Հանրապետության 2001 թվականի պետական բյուջեի մասին» Հայաստանի Հանրապետության օրենքի N 1 հավելվածում ու նույն հավելվածի N 16 աղյուսակում և Հայաստանի Հանրապետության կառավարության 2001 թվականի հունվարի 30-ի «Հայաստանի Հանրապետության 2001 թվականի պետական բյուջեի կատարումն ապահովող միջոցառումների մասին» N 68 որոշման N 5 հավելվածում համապատասխանաբար կատարել վերաբաշխում և փոփոխություններ` համաձայն հավելվածի:

4. Հայաստանի Հանրապետության քաղաքաշինության նախարարությանը`

ա) Հայաստանի Հանրապետության կառավարությանն առընթեր պետական գնումների գործակալության հետ համատեղ միջոցներ ձեռնարկել մինչև 2001 թվականի հոկտեմբերի 15-ը «Որոտան-Արփա թունելի գլխամասային ջրընդունիչ կառուցվածքի վերականգնում» ենթաօբյեկտի շինարարական աշխատանքներն իրականացնելու նպատակով շինարարական կապալի պայմանագիր կնքելու ուղղությամբ.

բ) «Որոտան-Արփա թունելի գլխամասային ջրընդունիչ կառուցվածքի վերականգնում» ենթաօբյեկտի վերականգնման աշխատանքներն ավարտելուց հետո դրանց արժեքն ավելացնել «Հիդրոտեխնիկական կառուցվածքներ Որոտան գետի վրա» օբյեկտի ընդհանուր հաշվեկշռային արժեքին, այն շահագործողին` Հայաստանի Հանրապետության կառավարությանն առընթեր ջրային տնտեսության պետական կոմիտեին հանձնելու համար:

5. Սույն որոշումն ուժի մեջ է մտնում 2001 թվականի սեպտեմբերի 18-ից:

Հայաստանի Հանրապետության վարչապետ

Ա. Մարգարյան