«Վավերացնում եմ»
Հայաստանի Հանրապետության
Նախագահ Ռ. Քոչարյան
 4 հուլիսի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

4 հուլիսի 2000 թվականի N 361
քաղ. Երևան

«ՇՈՂԱԿՆ» ՊԵՏԱԿԱՆ ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԲԱԺՆԵՏՈՄՍԵՐԸ ՄԱՍՆԱՎՈՐԵՑՆԵԼՈՒ ՄԱՍԻՆ

«Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 14 հոդվածի 2-րդ կետին և Հայաստանի Հանրապետության կառավարության 2000 թվականի մայիսի 5-ի «Շողակն» պետական փակ բաժնետիրական ընկերության բաժնետոմսերի մասնավորեցման նախապատրաստական աշխատանքների մասին» N 225 որոշմանը համապատասխան` Հայաստանի Հանրապետության կառավարությունը որոշում է.

1. «Շողակն» պետական փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել Տավուշի արտադրամասը և դրա գույքի ներդրմամբ ստեղծել «Թագազարդ» փակ բաժնետիրական ընկերությունը:

2. «Թագազարդ» փակ բաժնետիրական ընկերության բաժնետոմսերի տնօրինման, ինչպես նաև «Բաժնետիրական ընկերությունների մասին» Հայաստանի Հանրապետության օրենքի 8 հոդվածի 5-րդ կետով սահմանված լիազորությունները վերապահել Հայաստանի Հանրապետության արդյունաբերության և առևտրի նախարարությանը:

3. «Թագազարդ» փակ բաժնետիրական ընկերության կանոնադրական կապիտալը սահմանել 310451200 (երեք հարյուր տասը միլիոն չորս հարյուր հիսունմեկ հազար երկու հարյուր) դրամի չափով:

«Թագազարդ» փակ բաժնետիրական ընկերության կանոնադրական կապիտալի համալրման նպատակով Հայաստանի Հանրապետության օրենսդրությամբ սահմանված կարգով «Շողակն» պետական փակ բաժնետիրական ընկերության գույքի կազմից առանձնացնել 80 հիմնական միջոց (սարքավորումներ)` 12242500 դրամ հաշվեկշռային արժեքով` համաձայն բաժանիչ հաշվեկշռի:

4. «Թագազարդ» փակ բաժնետիրական ընկերությունը հանդիսանում է «Շողակն» պետական փակ բաժնետիրական ընկերության իրավունքների և պարտականությունների իրավահաջորդը` համաձայն բաժանիչ հաշվեկշռի:

5. Հայաստանի Հանրապետության արդյունաբերության և առևտրի նախարարությանը`

ա) երկշաբաթյա ժամկետում Հայաստանի Հանրապետության օրենսդրությամբ սահմանված կարգով հաստատել «Շողակն» պետական փակ բաժնետիրական ընկերության և «Թագազարդ» փակ բաժնետիրական ընկերության բաժանիչ հաշվեկշիռներն ու կանոնադրությունները և վերջիններս սահմանված կարգով ներկայացնել պետական գրանցման.

բ) 10-օրյա ժամկետում Հայաստանի Հանրապետության օրենսդրությամբ սահմանված կարգով իրականացնել «Շողակն» պետական փակ բաժնետիրական ընկերության և «Սապֆիր» փակ բաժնետիրական ընկերության գույքի ու տարածքների տարանջատումը:

«Շողակն» պետական փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել «Սապֆիր» փակ բաժնետիրական ընկերության կողմից օգտագործվող գույքը և այն սահմանված կարգով հանձնել Հայաստանի Հանրապետության արդյունաբերության և առևտրի նախարարության տնօրինությանը.

գ) 10-օրյա ժամկետում «Շողակն» պետական փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել ավտոճանապարհը, կամուրջը, երկու բնակելի շենքերի անավարտ շինարարությունները և դրանք սեփականության իրավունքով, անհատույց հանձնել Նոր Հաճնի քաղաքային համայնքին:

6. Հայաստանի Հանրապետության ֆինանսների և էկոնոմիկայի նախարարությանը, Հայաստանի Հանրապետության արդյունաբերության և առևտրի նախարարությանը` 10-օրյա ժամկետում «Շողակն» պետական փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել «Ագրոբանկ» բաց բաժնետիրական ընկերության` 145757 հազ. դրամ հաշվեկշռային արժեքով 242928 բաժնետոմսը, արտահաշվեկշռային հաշիվներում առկա անհուսալի դեբիտորական պարտքերը և դրանք հանձնել (փոխանցել) Հայաստանի Հանրապետության ֆինանսների և էկոնոմիկայի նախարարության տնօրինությանը:

7. Հայաստանի Հանրապետության արդյունաբերության և առևտրի նախարարությանը, Հայաստանի Հանրապետության պետական գույքի կառավարման նախարարությանը` 10-օրյա ժամկետում ավարտել «Շողակն» պետական փակ բաժնետիրական ընկերության գույքագրման աշխատանքները:

8. Հաշվի առնելով սույն որոշման 1-7-րդ կետերի պահանջները` 1999 թվականի հոկտեմբերի 1-ի դրությամբ հաշվեկշռային մեթոդով 520900000 դրամ գնահատված արժեք ունեցող «Շողակն» պետական փակ բաժնետիրական ընկերության բաժնետոմսերն ուղղակի վաճառքի ձևով մասնավորեցնել «Լ.Լ.Դ. Դայմընդս Լթդ» («L.L.D. DIAMONDS Ltd») ընկերությանը (այսուհետև` գնորդ)` բաժնետոմսերի փաթեթի վաճառքի գինը սահմանելով 370000 ԱՄՆ-ի դոլար կամ դրան համարժեք դրամ:

Բաժնետոմսերի փաթեթի վաճառքի գումարը գնորդի կողմից ամբողջովին պետք է վճարվի մասնավորեցման պայմանագրի կնքման պահից 10-օրյա ժամկետում:

9. Հայաստանի Հանրապետության պետական գույքի կառավարման նախարարությանը` «Շողակն» պետական փակ բաժնետիրական ընկերության բաժնետոմսերի մասնավորեցման պայմանագրում նախատեսել հետևյալ պայմանները`

ա) ընկերության աշխատողների թիվը մասնավորեցումից`

9 ամիս հետո` 269 աշխատողից ոչ պակաս,

18 ամիս հետո` 538 աշխատողից ոչ պակաս,

30 ամիս հետո` 1330 աշխատողից ոչ պակաս.

բ) միջին ամսական աշխատավարձը մասնավորեցումից`

9 ամիս հետո` 150 ԱՄՆ-ի դոլարին համարժեք դրամ,

18 ամիս հետո` 200 ԱՄՆ-ի դոլարին համարժեք դրամ,

30 ամիս հետո` 300 ԱՄՆ-ի դոլարին համարժեք դրամ.

գ) վերամշակվող հումքի քանակը մասնավորեցումից`

9 ամիս հետո` 3000 կարատ/ամիս,

18 ամիս հետո`10000 կարատ/ ամիս,

30 ամիս հետո` 30000 կարատ/ամիս.

դ) ներդրումների չափը մասնավորեցումից հետո` 30 ամսվա ընթացքում` 2262630 ԱՄՆ-ի դոլարին համարժեք դրամ:

10. Վճարումները կատարել արտարժույթով կամ Հայաստանի Հանրապետության արժույթով:

11. Առաջարկել Նոր Հաճնի քաղաքային համայնքին 10-օրյա ժամկետում Հայաստանի Հանրապետության օրենսդրությամբ սահմանված կարգով «Շողակն» պետական փակ բաժնետիրական ընկերության հետ կնքել ընկերության կողմից զբաղեցված հողի օգտագործման մասին պայմանագիր` 99 տարի ժամկետով:

12. Հայաստանի Հանրապետության արդյունաբերության և առևտրի նախարարությանը, Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեին` երկշաբաթյա ժամկետում իրականացնել սույն որոշումից բխող գույքային իրավունքների պետական գրանցումը:

13. Հայաստանի Հանրապետության բնապահպանության նախարարությանը` Հայաստանի Հանրապետության օրենսդրությամբ սահմանված կարգով հաստատել «Շողակն» պետական փակ բաժնետիրական ընկերության ջրօգտագործման, ջրահեռացման ու արտանետումների սահմանաքանակները և նրա հետ կնքել համապատասխան պայմանագրեր:

14. Սույն որոշումն ուժի մեջ է մտնում 2000 թվականի հուլիսի 4-ից:

Հայաստանի Հանրապետության վարչապետ

Ա. Մարգարյան