040.0017.14.01.99
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
14 հունվարի 1999 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
14 հունվարի 1999 թվականի N 17
քաղ. Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՅՈՒՋԵՏԱՅԻՆ ՀԻՄՆԱՐԿՆԵՐԻ ՆՎԻՐԱՏՎՈՒԹՅՈՒՆՆԵՐԻՑ ԿԱՄ ԲԱՐԵԳՈՐԾԱԿԱՆ ԱՅԼ ԾՐԱԳՐԵՐԻՑ ԳՈՅԱՑՈՂ ԱՐՏԱԲՅՈՒՋԵՏԱՅԻՆ ՄԻՋՈՑՆԵՐԻ ՍՊԱՍԱՐԿՄԱՆ ՀԱՇՎԱՌՄԱՆ ՈՒ ՎԵՐԱՀՍԿՈՂՈՒԹՅԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 1998 ԹՎԱԿԱՆԻ ՍԵՊՏԵՄԲԵՐԻ 12-Ի N 565 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարության 1998 թվականի սեպտեմբերի 12-ի «Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցների հաշվառման և վերահսկողության մասին» N 565 որոշմանը համապատասխան Հայաստանի Հանրապետության կառավարությունը որոշում է.
1. Հաստատել Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցների սպասարկման, հաշվառման ու վերահսկողության կարգը (կցվում է):
2. Հայաստանի Հանրապետության կառավարության 1998 թվականի սեպտեմբերի 12-ի «Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցների հաշվառման և վերահսկողության մասին» N 565 որոշման մեջ կատարել հետևյալ փոփոխությունը`
որոշման 2-րդ կետի «բ» ենթակետը շարադրել հետևյալ խմբագրությամբ.
«բ) Հայաստանի Հանրապետության կառավարություն ներկայացնել առաջարկություն Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցների սպասարկման, հաշվառման ու վերահսկողության կարգի վերաբերյալ»:
3. Սույն որոշումն ուժի մեջ է մտնում 1999 թվականի հունվարի 14-ից:
|
Հայաստանի Հանրապետության |
Ա. Դարբինյան |
|
Հաստատված է ՀՀ կառավարության 1999 թվականի հունվարի 14-ի N 17 որոշմամբ |
Կ Ա Ր Գ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՅՈՒՋԵՏԱՅԻՆ ՀԻՄՆԱՐԿՆԵՐԻ ՆՎԻՐԱՏՎՈՒԹՅՈՒՆՆԵՐԻՑ ԿԱՄ ԲԱՐԵԳՈՐԾԱԿԱՆ ԱՅԼ ԾՐԱԳՐԵՐԻՑ ԳՈՅԱՑՈՂ ԱՐՏԱԲՅՈՒՋԵՏԱՅԻՆ ՄԻՋՈՑՆԵՐԻ ՍՊԱՍԱՐԿՄԱՆ, ՀԱՇՎԱՌՄԱՆ ՈՒ ՎԵՐԱՀՍԿՈՂՈՒԹՅԱՆ
1. Սույն կարգով կանոնակարգվում է Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցների սպասարկման, հաշվառման և վերահսկողության գործընթացը:
2. Հայաստանի Հանրապետության բյուջետային հիմնարկների նվիրատվություններից կամ բարեգործական այլ ծրագրերից գոյացող արտաբյուջետային միջոցները (այսուհետև` արտաբյուջետային միջոցներ) ներառում են տվյալ բյուջետային հիմնարկին ոչ պետական աղբյուրներից անվերադարձ, չփոխհատուցվող արտաբյուջետային վճարումները և բնաիրային ձևով կատարվող արտաբյուջետային հատկացումները, որոնք կատարում են ռեզիդենտ ու ոչ ռեզիդենտ ֆիզիկական և իրավաբանական անձինք:
3. Հայաստանի Հանրապետության բյուջետային հիմնարկների (այսուհետև` հիմնարկ) արտաբյուջետային միջոցները (ոչ բնաիրային) մուտքագրվում են տվյալ հիմնարկն սպասարկող տեղական գանձապետական բաժանմունքի (այսուհետև` ՏԳԲ) առևտրային բանկում բացված նվիրատվություններից կամ բարեգործական այլ ծրագրերից գոյացող արտաբյուջետային միջոցների հաշվում (այսուհետև` բանկային հաշիվ):
Այն դեպքում, երբ ՏԳԲ-ն հիմնարկները չի սպասարկում առևտրային բանկի միջոցով, բանկային հաշիվը բացվում է Հայաստանի Հանրապետության կենտրոնական բանկում:
4. Բանկային հաշիվներում գոյացող միջոցները կարող է տնօրինել տվյալ հիմնարկը, եթե միջոցների տնօրինման նախահաշիվը (ըստ Հայաստանի Հանրապետության պետական բյուջեի տնտեսագիտական և գործառնական դասակարգման) կամ հատկացնողի և հիմնարկների միջև կնքված տվյալ գումարի տնօրինման մասին պայմանագիրը հաստատված են հիմնարկի վերադաս պետական մարմնի կողմից:
5. ՏԳԲ-ում հիմնարկների արտաբյուջետային միջոցների (ոչ բնաիրային) սպասարկումը և հաշվառումը կատարվում են յուրաքանչյուր հիմնարկի համար առանձին:
6. Հիմնարկի կողմից բանկային հաշիվներից գումարներն ստացվում են բյուջեի դրամարկղային կատարման` սահմանված ընթացակարգով, եթե ապահովված է սույն կարգի 4-րդ կետի պահանջի կատարումը:
7. Հիմնարկն իր արտաբյուջետային միջոցների գոյացման և տնօրինման վերաբերյալ, ըստ Հայաստանի Հանրապետության պետական բյուջեի տնտեսագիտական և գործառնական դասակարգման, հաշվետվություն է ներկայացնում իր վերադաս պետական մարմնին և սպասարկող ՏԳԲ: Արտաբյուջետային միջոցների տնօրինման վերաբերյալ հաշվետվությունը ներկայացվում է հաստատված նախահաշվին համապատասխան, ըստ Հայաստանի Հանրապետության պետական բյուջեի տնտեսագիտական և գործառնական դասակարգման, իսկ արտաբյուջետային միջոցների գոյացման վերաբերյալ հաշվետվությունը, որպես պարտադիր պայման, պետք է ներառի տեղեկատվություն վճարումը կատարողի վերաբերյալ (ֆիզիկական անձանց համար անունը, ազգանունը, հայրանունը, Հայաստանի Հանրապետության ռեզիդենտ իրավաբանական անձանց համար վճարող կազմակերպության անվանումը և հարկային ծածկագիրը, ոչ ռեզիդենտ իրավաբանական անձանց համար վճարող կազմակերպության անվանումը և գրանցման վայրը):
Վերադաս պետական մարմինը Հայաստանի Հանրապետության ֆինանսների և էկոնոմիկայի նախարարություն է ներկայացնում ամփոփ հաշվետվություն իր ենթակայության հիմնարկների արտաբյուջետային միջոցների գոյացման և տնօրինման վերաբերյալ: Ներկայացվող հաշվետվության հաճախականությունը և ձևը սահմանում է Հայաստանի Հանրապետության ֆինանսների և էկոնոմիկայի նախարարությունը:
Վերադաս պետական մարմինը Հայաստանի Հանրապետության հարկային տեսչություն է ներկայացնում հաշվետվություն իր ենթակայության հիմնարկների արտաբյուջետային միջոցների գոյացման և տնօրինման վերաբերյալ յուրաքանչյուր հիմնարկի համար առանձին: Ներկայացվող հաշվետվության հաճախականությունը և ձևը սահմանում է Հայաստանի Հանրապետության հարկային տեսչությունը:
8. ՏԳԲ-ները Հայաստանի Հանրապետության ֆինանսների և էկոնոմիկայի նախարարություն են ներկայացնում ամփոփ հաշվետվություն յուրաքանչյուր ՏԳԲ-Ի արտաբյուջետային հաշվում միջոցների գոյացման և տնօրինման վերաբերյալ: Ներկայացվող հաշվետվության հաճախականությունը և ձևը սահմանում է Հայաստանի Հանրապետության ֆինանսների և էկոնոմիկայի նախարարությունը: