ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
2004 ԹՎԱԿԱՆԻ ՍԵՊՏԵՄԲԵՐԻ 6-ԻՆ ՎԱՐՇԱՎԱՅՈՒՄ ՍՏՈՐԱԳՐՎԱԾ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԼԵՀԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՊԱՇՏՊԱՆՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ
ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
23 դեկտեմբերի 2004 թ. |
Հայաստանի Հանրապետության սահմանադրական դատարանը` կազմով. սահմանադրական դատարանի նախագահ Գ. Հարությունյանի, սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Կ. Բալայանի, Ֆ. Թոխյանի, Զ. Ղուկասյանի (զեկուցող), Հ. Նազարյանի, Վ. Պողոսյանի, Մ. Սևյանի,
մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության պաշտպանության նախարար Ս. Սարգսյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «2004 թվականի սեպտեմբերի 6-ին Վարշավայում ստորագրված` Հայաստանի Հանրապետության կառավարության և Լեհաստանի Հանրապետության կառավարության միջև պաշտպանության բնագավառում համագործակցության մասին համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթ է հանդիսացել Հանրապետության Նախագահի դիմումը սահմանադրական դատարան:
Լսելով սույն գործով զեկուցողի հաղորդումը, Հանրապետության Նախագահի ներկայացուցչի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Քննության առարկա միջկառավարական համաձայնագիրը Հայաստանի Հանրապետության կառավարության և Լեհաստանի Հանրապետության կառավարության անունից ստորագրվել է 2004 թ. սեպտեմբերի 6-ին` Վարշավայում: ՀՀ կառավարությունը «ՀՀ միջազգային պայմանագրերի մասին» ՀՀ օրենքի 12 հոդվածի պահանջներին համապատասխան 2004 թ. օգոստոսի 2-ին թիվ 1037-Ա որոշմամբ համաձայնություն է տվել համաձայնագրի կնքման առաջարկությանը: Համաձայնագրի նպատակն է պաշտպանության բնագավառում Պայմանավորվող կողմերի համագործակցությանն առնչվող` հավասարության, գործընկերության և փոխշահավետության սկզբունքների վրա հիմնված ընդհանուր դրույթների սահմանումը:
2. Համաձայնագրի շրջանակներում Կողմերի միջև համագործակցությունը կիրականացվի նրանց ազգային օրենսդրությանը, միջազգային իրավունքի հանրաճանաչ սկզբունքներին ու նորմերին և Հայաստանի Հանրապետության ու Լեհաստանի Հանրապետության միջազգային պարտավորություններին համապատասխան:
Կողմերի միջև համագործակցությունը կիրականացվի հետևյալ ոլորտներում.
- փորձի փոխանակում Կողմերի պետությունների պաշտպանական ոլորտում, զինված ուժերի գործունեություն ժողովրդավարական հասարակությունում, ներառյալ զինված ուժերի և պաշտպանական կառույցների ժողովրդավարական վերահսկողությունը,
- մասնակցություն «Գործընկերություն հանուն խաղաղության» ծրագրի միջոցառումներին, խաղաղապահ և մարդասիրական օգնության առաքելություններին` կապված խաղաղությանն աջակցելու և ահաբեկչության դեմ պայքարի հետ,
- քաղաքական-ռազմական խորհրդակցություններ, կադրերի վերապատրաստում և այլն:
3. Համաձայնագրով սահմանված ոլորտներում համագործակցությանը և փոխադարձաբար համաձայնեցված այլ ոլորտներին վերաբերող հատուկ հարցերը ենթակա են կարգավորման, մի կողմից` Հայաստանի Հանրապետության պաշտպանության նախարարության, մյուս կողմից` Լեհաստանի Հանրապետության ազգային պաշտպանության նախարարի և էկոնոմիկայի ու աշխատանքի նախարարի միջև կնքվող առանձին համաձայնագրերի և արձանագրությունների միջոցով:
Համագործակցությունն իրականացվում է փոխադարձաբար ընդունված ամենամյա համագործակցության ծրագրերի հիման վրա:
4. Համաձայնագրի շրջանակներում իրականացվող միջոցառումներին մասնակցելու նպատակով Պայմանավորվող կողմերի զինվորական և քաղաքացիական անձնակազմի կարգավիճակը սահմանվում է կողմերի համար պարտադիր` միջազգային համաձայնագրերի դրույթներով:
5. Համաձայնագրով Պայմանավորվող կողմերը պարտավորվում են ձեռնարկել գաղտնի տեղեկատվության պաշտպանությանը նպատակաուղղված միջոցներ, ինչպես նաև համաձայնագրի դրույթների համաձայն փոխանակված գաղտնի տեղեկատվությունն օգտագործել բացառապես փոխանցման համար հիմք հանդիսացած նպատակով:
Գաղտնի տեղեկատվությունը ենթակա է պաշտպանության նաև համաձայնագրի գործողության դադարումից հետո:
6. Համաձայնագիրը սահմանում է համագործակցության միջոցառումների ֆինանսավորման սկզբունքները:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 2004 թ. սեպտեմբերի 6-ին Վարշավայում ստորագրված` Հայաստանի Հանրապետության կառավարության և Լեհաստանի Հանրապետության կառավարության միջև պաշտպանության բնագավառում համագործակցության մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Նախագահող |
Գ. Հարությունյան |
|
|