040.0539.27.11.97

«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ Լ. ՏԵՐ-ՊԵՏՐՈՍՅԱՆ

27 նՈՅԵՄԲԵՐԻ 1997 Թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 նոյեմբերի 1997 թվականի N 539

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՀԵՂՈՒԿ ԳԱԶԻ ԼՑԱՎՈՐՄԱՆ ՇԱՐԺԱԿԱՆ ԿԱՅԱՆՆԵՐԻ ԱՆՎՏԱՆԳ ՇԱՀԱԳՈՐԾՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության բնակավայրերում հեղուկ գազի լցավորման շարժական կայաններում անվտանգության տեխնիկայի և հրդեհային անվտանգության կանոնները պահպանելու, դրանց անվտանգ շահագործումն ապահովելու նպատակով Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության տարածքում հեղուկ գազի լցավորման շարժական կայանների անվտանգ շահագործման կարգը (կցվում է):

2. Սահմանել, որ հեղուկ գազի լցավորման շարժական կայաններ շահագործող ձեռնարկություններն ու անհատ ձեռներեցները պարտավոր են մինչև 1998 թվականի մարտի 1-ը իրենց գործունեությունը համապատասխանեցնել սույն որոշմամբ հաստատված կարգի պահանջներին:

3. Սահմանել, որ տեղադրված հեղուկ գազի լցավորման շարժական կայանների աշխատանքների նկատմամբ վերահսկողությունն իրենց իրավասությունների սահմաններում ապահովում են Հայաստանի Հանրապետության ներքին գործերի և ազգային անվտանգության նախարարության հրշեջ պահպանության տարածքային և Հայաստանի Հանրապետության կառավարությանն առընթեր արտակարգ իրավիճակների վարչության Հայլեռտեխհսկողություն վարչության համապատասխան ստորաբաժանումները (ճյուղային, մարզային, միջմարզային):

4. Հայաստանի Հանրապետության կառավարությանն առընթեր տեղեկատվության և գրահրատարակչության վարչությանը` ապահովել սույն որոշման լուսաբանումը մամուլում և զանգվածային լրատվության մյուս միջոցներով:

Հայաստանի Հանրապետության վարչապետ

Ռ. Քոչարյան

ՀԱՍՏԱՏՎԱԾ Է ՀՀ ԿԱՌԱՎԱՐՈՒԹՅԱՆ 1997 ԹՎԱԿԱՆԻ ՆՈՅԵՄԲԵՐԻ 27-Ի N 539 ՈՐՈՇՄԱՄԲ

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՀԵՂՈՒԿ ԳԱԶԻ ԼՑԱՎՈՐՄԱՆ ՇԱՐԺԱԿԱՆ ԿԱՅԱՆՆԵՐԻ ԱՆՎՏԱՆԳ ՇԱՀԱԳՈՐԾՄԱՆ

1. Հեղուկ գազի լցավորման շարժական կայաններ տեղադրելու և դրանք շահագործելու նպատակով ձեռնարկություններն ու անհատ ձեռներեցները դիմում են համապատասխան համայնքի ղեկավարին, իսկ Երևան քաղաքում` Երևանի քաղաքապետին:

Դիմումին կից ներկայացվում են`

ա) գազալցավորման ցիստեռնի տեխնիկական վիճակը և դրա շահագործման իրավունքը հաստատող փաստաթուղթ` տրված Հայաստանի Հանրապետության կառավարությանն առընթեր արտակարգ իրավիճակների վարչության Հայլեռտեխհսկողություն վարչության համապատասխան ստորաբաժանումների (ճյուղային, մարզային, միջմարզային) կողմից.

բ) գազալցավորման շարժական կայանը շահագործող անձի գազալցավորման աշխատանքներ կատարելու իրավունքի և նրա կողմից ստորագրված` գազալցավորման շարժական կայաններում աշխատանքների անվտանգության կանոնների վերաբերյալ հրահանգավորում ստանալու մասին վկայական` տրված Հայաստանի Հանրապետության էներգետիկայի նախարարության «Հայգազ» պետական ձեռնարկության կողմից:

Վկայական տալու կարգը հաստատում է Հայաստանի Հանրապետության էներգետիկայի նախարարությունը:

2. Համայնքի ղեկավարը (Երևան քաղաքում` Երևանի քաղաքապետը) դիմումն ստանալուց հետո 15-օրյա ժամկետում, Հայաստանի Հանրապետության ներքին գործերի և ազգային անվտանգության նախարարության հրշեջ պահպանության վարչության տարածքային և Հայաստանի Հանրապետության կառավարությանն առընթեր արտակարգ իրավիճակների վարչության Հայլեռտեխհսկողություն վարչության համապատասխան ստորաբաժանումների (ճյուղային, մարզային, միջմարզային) հետ համաձայնեցնելուց հետո, սահմանված կարգով հատկացնում է համապատասխան տարածք` հեղուկ գազի լցավորման շարժական կայանի տեղադրման համար: