ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
2005 ԹՎԱԿԱՆԻ ԱՊՐԻԼԻ 7-ԻՆ ԵՐԵՎԱՆՈՒՄ ՍՏՈՐԱԳՐՎԱԾ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԳԵՐՄԱՆԻԱՅԻ ԴԱՇՆԱՅԻՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԿՈՎԿԱՍՅԱՆ ՆԱԽԱՁԵՌՆՈՒԹՅԱՆ ՇՐՋԱՆԱԿՆԵՐՈՒՄ ՖԻՆԱՆՍԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ (ՀԱՏԿԱՑՄԱՆ ՏԱՐԻՆ` 2004) ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
7 հունիսի 2005 թ. |
Հայաստանի Հանրապետության սահմանադրական դատարանը` կազմով. սահմանադրական դատարանի նախագահ Գ. Հարությունյանի, սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Կ. Բալայանի, Ֆ. Թոխյանի, Զ. Ղուկասյանի, Հ. Նազարյանի, Ռ. Պապայանի, Վ. Պողոսյանի (զեկուցող),
մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության ֆինանսների և էկոնոմիկայի նախարարի տեղակալ Դ. Ավետիսյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 21 հոդվածի, 25 հոդվածի 1 կետի, 56 և 67 հոդվածների,
դռնբաց նիստում քննեց «2005 թվականի ապրիլի 7-ին Երևանում ստորագրված` Հայաստանի Հանրապետության կառավարության և Գերմանիայի Դաշնային Հանրապետության կառավարության միջև Կովկասյան նախաձեռնության շրջանակներում ֆինանսական համագործակցության մասին (հատկացման տարին` 2004) համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հանրապետության Նախագահի դիմումն է ՀՀ սահմանադրական դատարան:
Լսելով սույն գործով զեկուցողի հաղորդումը, Հանրապետության Նախագահի ներկայացուցչի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Սույն համաձայնագիրն ստորագրվել է 2005 թ. ապրիլի 7-ին Երևանում` երկու երկրների միջև առկա բարեկամական հարաբերությունները գործընկերային ֆինանսական համագործակցության միջոցով ամրապնդելու, ինչպես նաև Հայաստանի սոցիալական և տնտեսական զարգացումը խթանելու նպատակով:
Մայնի Ֆրանկֆուրտի վերականգնման վարկերի բանկը ՀՀ կառավարությանը կամ երկու կառավարությունների համատեղ որոշմամբ ընտրված այլ վարկառուներին տրամադրում է 6 մլն եվրո վարկ և 1.5 մլն եվրո դրամական օժանդակություն:
2. Համաձայնագիրը նախատեսում է վարկային գումարների օգտագործման, դրանց հատկացման նախապայմանների, ինչպես նաև հանձնարարականների բաշխման կարգը, որոնք սահմանվում են հիշյալ Բանկի և վարկառուների միջև հետագայում կնքվելիք պայմանագրերով` ԳԴՀ-ի իրավական նորմերին համապատասխան:
3. Համաձայնագիրը նախատեսում է նաև, որ եթե Վերականգնվող էներգիայի աջակցության ծրագրի օժանդակման նպատակահարմարությունը չհաստատվի, ինչպես նաև տրամադրված միջոցները չօգտագործվեն համաձայնագրով նախատեսված նպատակով, ապա այդ միջոցները կարող են փոխակերպվել վարկի:
4. Համաձայնագրով Հայաստանի Հանրապետությունը պարտավորվում է, մասնավորապես.
- երաշխավորել Բանկի օգտին վճարումները եվրոյով, եթե վարկառուն Հայաստանի կառավարությունը չէ,
- Բանկին տալ երաշխիք, որ կկատարվեն պարտքի վերադարձման այն պահանջները, որոնք կարող են բխել ֆինանսական օժանդակություն ստացողի և Բանկի միջև կնքվելիք պայմանագրից, երբ այդ օժանդակություն ստացողը Հայաստանի կառավարությունը չէ,
- ազատել Բանկին բոլոր տեսակի հարկերից և պետական այլ տուրքերից,
- ԳԴՀ կառավարության միջոցներով ֆինանսավորվող ֆիրմաների և մասնագետների` առաքումների և ծառայությունների համար չսահմանել հարկեր և այլ տուրքեր, իսկ այդ ֆիրմաներին և մասնագետներին ազատել բոլոր տեսակի հարկերից, տուրքերից և մաքսատուրքերից ու այլ վճարումներից,
- ապահովել ԳԴՀ փոխադրող ձեռնարկությունների իրավահավասար մասնակցությունը վարկի կամ դրամական օժանդակության տրամադրումից բխող փոխադրումների իրականացմանը, ինչպես նաև այդ ձեռնարկություններին տալ անհրաժեշտ թույլտվություններ:
5. Սահմանադրական դատարանն արձանագրում է, որ, համաձայն ՀՀ Նախագահի պաշտոնական ներկայացուցչի պարզաբանումների` վարկային ռեսուրսները հատկացվում են 40 տարով, 10 տարի արտոնյալ ժամկետով, տարեկան 0.75 տոկոսադրույքով:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 2005 թվականի ապրիլի 7-ին Երևանում ստորագրված` Հայաստանի Հանրապետության կառավարության և Գերմանիայի Դաշնային Հանրապետության կառավարության միջև Կովկասյան նախաձեռնության շրջանակներում ֆինանսական համագործակցության մասին (հատկացման տարին` 2004) համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Նախագահող |
Գ. Հարությունյան |
|
|