ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀՀ ԿԱՌԱՎԱՐՈՒԹՅԱՆՆ ԱՌԸՆԹԵՐ

ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅԱՆ ՊԵՏ

26 փետրվարի 2008 թ. ք. Երևան

N 2

                                                                                                    

Պ Ա Շ Տ Ո Ն Ա Կ Ա Ն  Պ Ա Ր Զ Ա Բ Ա Ն ՈՒ Մ

ՇԱՀՈՒԹԱՀԱՐԿՈՎ ՀԱՐԿՄԱՆ ՆՊԱՏԱԿՈՎ ԱՊԱՀՈՎԱԳՐԱԿԱՆ ԸՆԿԵՐՈՒԹՅՈՒՆՆԵՐԻ ԿՈՂՄԻՑ ՎԵՐԱԱՊԱՀՈՎԱԳՐՈՒԹՅԱՆԸ ՓՈԽԱՆՑՎԱԾ ՌԻՍԿԵՐԻ ԳԾՈՎ ՎԵՐԱԱՊԱՀՈՎԱԳՐԱՎՃԱՐՆԵՐԻ ՀԱՇՎԱՌՄԱՆ ՄԱՍԻՆ

«Շահութահարկի մասին» Հայաստանի Հանրապետության օրենքի (այսուհետ` Օրենք) 32-րդ հոդվածի «բ» կետի համաձայն հարկման նպատակով ապահովագրական ընկերությունների համախառն եկամուտը նվազեցվում է նաև վերաապահովագրության փոխանցված ապահովագրավճարների չափով:

«Շահութահարկի մասին» Հայաստանի Հանրապետության օրենքում փոփոխություններ և լրացումներ կատարելու մասին» Հայաստանի Հանրապետության օրենքի (9 ապրիլի 2007 թվականի, ՀՕ-189-Ն` ուժի մեջ է մտել 2007 թվականի սեպտեմբերի 30-ին) համաձայն հարկման նպատակով ապահովագրական ընկերությունների համախառն եկամուտը նվազեցվում է նաև վերաապահովագրությանը փոխանցված ռիսկերի գծով հաշվեգրված վերաապահովագրավճարների չափով:

Ստեղծված իրավիճակում տարաբնույթ է ընկալվում, թե այդ դեպքում շահութահարկով հարկման նպատակով ինչպես են հաշվառվելու մինչև 2007 թվականի սեպտեմբերի 30-ը հաշվարկված վերաապահովագրավճարների վճարված և չվճարված գումարները:

Ղեկավարվելով «Իրավական ակտերի մասին» Հայաստանի Հանրապետության օրենքով սահմանված իրավական ակտի մեկնաբանման և դրա վերաբերյալ պաշտոնական պարզաբանումներ տալու համար սահմանված նորմերով, պաշտոնապես պարզաբանում եմ.

ա) մինչև 2007 թվականի սեպտեմբերի 30-ը ընկած ժամանակահատվածներին վերաբերող` հաշվապահական օրենսդրությանը համապատասխան ծախսագրված (ծախս ճանաչված) վերաապահովագրավճարների գծով վճարումները 2007 թվականի սեպտեմբերի 30-ից հետո կատարելու դեպքում, շահութահարկով հարկման նպատակով ապահովագրական ընկերությունները այդ ծախսերը ճանաչում են վճարման հաշվետու ժամանակաշրջանում: Ընդ որում` «Շահութահարկի մասին» Հայաստանի Հանրապետության օրենքի 9-րդ հոդվածի համաձայն նվազեցումների միևնույն գումարը համախառն եկամտից կարող է հանվել միայն մեկ անգամ.

բ) մինչև 2007 թվականի սեպտեմբերի 30-ը ընկած ժամանակահատվածներին վերաբերող, սակայն հարկ վճարողի կողմից մինչ այդ հաշվապահական ձևակերպումների առումով չծախսագրված (ծախս չճանաչված) վերաապահովագրավճարները հարկվող շահույթը որոշելիս համախառն եկամտից նվազեցվում են համապատասխան հաշվապահական ձևակերպում և վճարում կատարելու հաշվետու ժամանակաշրջանում` հաշվապահական օրենսդրությանը համապատասխան դրանք ծախս ճանաչելուց հետո: Ընդ որում` հարկման նպատակով համախառն եկամուտը կարող է նվազեցվել հաշվետու տարում հայտնաբերված` դրան անմիջապես նախորդող 3 տարիներում պակաս ցույց տրված վերաապահովագրավճարների չափով:

ՀՀ կառավարությանն առընթեր հարկային պետական ծառայության պետի տեղակալ

Ա. Ալավերդյան