ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
2004 ԹՎԱԿԱՆԻ ՀՈՒՆԻՍԻ 18-ԻՆ ԱՍՏԱՆԱՅՈՒՄ ՍՏՈՐԱԳՐՎԱԾ` «ՀԱՎԱՔԱԿԱՆ ԱՆՎՏԱՆԳՈՒԹՅԱՆ ՄԱՍԻՆ» ՊԱՅՄԱՆԱԳՐԻ ԿԱԶՄԱԿԵՐՊՈՒԹՅԱՆ ԱՆԴԱՄ ՊԵՏՈՒԹՅՈՒՆՆԵՐԻ ՌԱԶՄԱԿԱՆ ԵՆԹԱԿԱՌՈՒՅՑԻ ՕԲՅԵԿՏՆԵՐԻ ՀԱՄԱՏԵՂ ՕԳՏԱԳՈՐԾՄԱՆ, ՏԱՐԱԾՔԻ ՕՊԵՐԱՏԻՎ ՍԱՐՔԱՎՈՐՄԱՆ ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
27 ապրիլի 2005 թ. |
Հայաստանի Հանրապետության սահմանադրական դատարանը` կազմով. սահմանադրական դատարանի նախագահ Գ. Հարությունյանի, սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Կ. Բալայանի, Ֆ. Թոխյանի (զեկուցող), Զ. Ղուկասյանի, Հ. Նազարյանի, Ռ. Պապայանի, Վ. Պողոսյանի,
մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության պաշտպանության նախարար Ս. Սարգսյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «2004 թվականի հունիսի 18-ին Աստանայում ստորագրված` «Հավաքական անվտանգության մասին» պայմանագրի կազմակերպության անդամ պետությունների ռազմական ենթակառույցի օբյեկտների համատեղ օգտագործման, տարածքի օպերատիվ սարքավորման մասին համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթ է հանդիսացել Հանրապետության Նախագահի դիմումը սահմանադրական դատարան:
Լսելով սույն գործով զեկուցողի հաղորդումը, Հանրապետության Նախագահի ներկայացուցչի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Համաձայնագիրը «Հավաքական անվտանգության մասին» պայմանագրի կազմակերպության անդամ պետությունների կողմից ստորագրվել է 2004 թ. հունիսի 18-ին Աստանայում` Կազմակերպության անդամ պետությունների ռազմական ենթակառույցի օբյեկտների համատեղ օգտագործման և տարածքի օպերատիվ սարքավորման կարգը սահմանելու նպատակով:
2. Համաձայնագրի դրույթների իրագործման նպատակով Կողմերի լիազորված մարմիններն են նրանց պաշտպանության նախարարությունները: Վերջիններս մշակում և Հավաքական անվտանգության խորհրդի հաստատմանն են ներկայացնում զորքերի կոալիցիոն խմբավորումների համատեղ օգտագործման ռազմական ենթակառույցի օբյեկտների ցանկը (այսուհետև` Ցանկ): Կողմերի լիազորված մարմինները մշակում են նաև համաձայնագրի 16 հոդվածով նախատեսված մեթոդիկաները, որոնք հաստատվում են Կողմերի կառավարությունների կողմից և կազմում են համաձայնագրի հավելված:
3. Կողմերը փոխանակում են համատեղ օգտագործման ռազմական ենթակառույցի օբյեկտների, դրանց ստեղծման և զարգացման տեխնիկատակտիկական տվյալների վերաբերյալ պետական գաղտնիք կազմող տեղեկատվություն և ապահովում են նման տեղեկատվության պահպանությունը` իրենց միջև առկա բազմակողմ ու երկկողմ համաձայնագրերին համապատասխան:
Կողմերը Ցանկում տեղ գտած` գոյություն ունեցող ռազմական ենթակառույցի օբյեկտները պահում են պատրաստի վիճակում և ձեռնարկում են դրանց զարգացման միջոցառումներ: Կողմերն այդ միջոցառումների հետ կապված ծախսերը ֆինանսավորում են մասնաբաժնային մասնակցության հիման վրա:
Կողմերն իրենց տարածքում խաղաղ ժամանակ հրամանատարաշտաբային և բանակային զորավարժությունների անցկացման դեպքում հոգում են Ցանկում ընդգրկված ռազմական ենթակառույցի օբյեկտների համատեղ օգտագործման հետ կապված ծախսերը: Զորավարժությունների ժամանակ ռազմական ենթակառույցի օբյեկտին վնաս պատճառելու դեպքում այդ վնասը փոխհատուցում է վնաս պատճառած Կողմը:
Կողմերը բոլոր տեսակի մաքսերից, հարկերից, տուրքերից ազատում են ռազմական ենթակառույցի օբյեկտների շինարարական միջոցառումների նպատակով փոխադրվող սարքավորումները, նյութերը, ռազմական նշանակության արտադրանքը և տրանսպորտային միջոցները:
Համաձայնագիրն ամրագրում է առանձին պարտավորություններ, որոնք գործում են համաձայնագրից որևէ Կողմի դուրս գալու դեպքում: Համաձայնագրից դուրս գալու դեպքում Կողմը պարտավոր է փոխհատուցել իր տարածքում իրականացված` համատեղ օգտագործման համար նախատեսված ռազմական ենթակառույցի օբյեկտների կապիտալ վերանորոգման, ընդլայնման, վերակազմավորման և նոր շինարարական միջոցառումների ծախսերը: Միաժամանակ, Կողմերը պարտավոր են համաձայնագրից դուրս եկող Կողմին փոխհատուցել վերջինիս կատարած այն ծախսերը, որը նա կատարել է Կողմերի տարածքում ռազմական ենթակառույցի օբյեկտների կապիտալ վերանորոգման, ընդլայնման, վերակազմավորման և նոր շինարարական միջոցառումների համար: Համաձայնագրից դուրս գալու դեպքում Կողմերը պարտավորվում են նաև չթույլատրել երրորդ Կողմին, այն է` Կազմակերպության անդամ և համաձայնագրի մասնակից չհանդիսացող պետությանը, մուտք գործել համատեղ օգտագործված ռազմական ենթակառույցի օբյեկտներ, ինչպես նաև նշված օբյեկտները չվաճառել և չփոխանցել երրորդ Կողմի` առանց այն Կողմերի համաձայնության, որոնք մասնակցել են 13 հոդվածի 3-րդ մասում նշված միջոցառումներին:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 2004 թվականի հունիսի 18-ին Աստանայում ստորագրված` «Հավաքական անվտանգության մասին» պայմանագրի կազմակերպության անդամ պետությունների ռազմական ենթակառույցի օբյեկտների համատեղ օգտագործման, տարածքի օպերատիվ սարքավորման մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Նախագահող |
Գ. Հարությունյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|