«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ Լ.ՏԵՐ-ՊԵՏՐՈՍՅԱՆ

15 մայիսի 1996 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 մայիսի 1996 թվականի N 150

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՀԱՆՐԱԿՐԹԱԿԱՆ ՀԱՍՏԱՏՈՒԹՅԱՆ ՕՐԻՆԱԿԵԼԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության պետական հանրակրթական հաստատության օրինակելի կանոնադրությունը (կցվում է):

2. Սույն որոշումն ուժի մեջ է մտնում 1996 թվականի մայիսի 15-ից:

Հայաստանի Հանրապետության վարչապետ

Հ. ԲԱԳՐԱՏյան

ՀԱՍՏԱՏՎԱԾ Է ՀՀ կառավարության 1996 թվականի մայիսի 15-ի N 150 որոշմամբ

Օ Ր Ի Ն Ա Կ Ե Լ Ի  Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՀԱՆՐԱԿՐԹԱԿԱՆ ՀԱՍՏԱՏՈՒԹՅԱՆ

I. Ընդհանուր դրույթներ

1. Հայաստանի Հանրապետության պետական հանրակրթական հաստատությունը (այսուհետև` հաստատություն) անընդհատ կրթության համակարգի հիմնական օղակն է, որը Հայաստանի Հանրապետության բոլոր քաղաքացիներին հնարավորություն է ընձեռում իրականացնելու Հայաստանի Հանրապետության սահմանադրությամբ երաշխավորված իրենց կրթության իրավունքը:

Հաստատությունն իրականացնում է տարրական, հիմնական և միջնակարգ կրթության պետական հանրակրթական ծրագրեր (այսուհետև` հանրակրթական ծրագրեր):

2. Հաստատության հիմնական նպատակներն են հանրակրթական ծրագրերի բովանդակության պարտադիր նվազագույնի յուրացման հման վրա սովորողների անհատականության ձևավորումը, նրանց նախապատրաստումն ինքնուրույն կյանքի և աշխատանքի, հասարակական համակեցության, մասնագիտական կրթական ծրագրերի գիտակցական ընտրության և դրանց հետագա յուրացման հիմքերի ստեղծումը, քաղաքացիության և հայրենասիրության դաստիարակումը:

3. Հաստատությունն ուսուցումն ու դաստիարակությունն իրականացնում է ի շահ անհատի, հասարակության և պետության, ապահովում անհատի բազմակողմանի զարգացումը, նրա առողջության պահպանումը, պայմաններ ստեղծում ինքնակրթության և լրացուցիչ (նախասիրական, նախամասնագիտական) կրթության պահանջմունքների բավարարման համար:

4. Հաստատության գործունեությունը հիմնվում է ժողովրդավարության և մարդասիրության, հանրամատչելիության, համամարդկային և ազգային արժեքների զուգորդման, անհատի ազատ զարգացման, ինքնավարության և կրթության աշխարհիկ բնույթի սկզբունքների վրա:

5. Հաստատությունում չի թույլատրվում հասարակական-քաղաքական և կրոնական կազմակերպությունների, դրանց կազմակերպական կառույցների ստեղծումն ու գործունեությունը:

6. Հաստատությունը պատասխանատու է պետական չափորոշիչներին համապատասխան հանրակրթական պետական ծրագրերի իրագործման, սովորողների տարիքային-ֆիզիոլոգիական և սոցիալ-հոգեբանական զարգացման առանձնահատկություններին, հակումներին, ընդունակություններին, նրանց կյանքի և առողջության պահպանմանը, գիտական պահանջներին համապատասխան կրթական մեթոդների և ձևերի ընտրության համար:

Հաստատությունում երկու սեռի սովորողների ուսուցումը, որպես կանոն, տարվում է համատեղ:

7. Հաստատությունն իր գործունեության ընթացքում ղեկավարվում է Հայաստանի Հանրապետության գործող օրենսդրությամբ և սահմանված կարգով հաստատված իր կանոնադրությամբ:

Հաստատության կանոնադրությունը կազմվում է սույն օրինակելի կանոնադրության հիման վրա` հաշվի առնելով տվյալ հաստատության առանձնահատկությունները:

8. Հաստատությունը Հայաստանի Հանրապետության օրենսդրությամբ սահմանված կարգով համագործակցում է օտարերկրյա կրթական հաստատությունների, ձեռնարկությունների, հիմնարկների և կազմակերպությունների հետ:

9. Հաստատությունն իրավաբանական անձ է, ունի իր անվամբ կնիք ու դրոշմակնիք:

10. Հաստատությունը վկայագրվում և հավատարմագրվում է Հայաստանի Հանրապետության օրենսդրությամբ սահմանված կարգով:

11. Հաստատության ստեղծումը, վերակառուցումը, լուծարումը կատարվում են Հայաստանի Հանրապետության օրենսդրությամբ սահմանված կարգով:

Հաստատության լուծարումը կամ վերակառուցումն իրականացվում է բացառապես ուսումնական տարվա վերջում: Այդ դեպքում համապատասխան վերադաս պետական կառավարման մարմինը պարտավոր է սովորողներին տեղավորել այլ հաստատություններում` ծնողների համաձայնությամբ:

II. Հաստատության կառավարումը

12. Հաստատությունը Հայաստանի Հանրապետության գործող օրենսդրությանը և սույն կանոնադրությանը համապատասխան ղեկավարում է տնօրենը:

Հաստատության տնօրենը պաշտոնի է նշանակվում և պաշտոնից ազատվում Հայաստանի Հանրապետության օրենսդրությամբ սահմանված կարգով:

13. Հաստատության տնօրենը`

ա) կազմակերպում և ղեկավարում է հաստատության գործունեությունը.

բ) Հայաստանի Հանրապետության գործող օրենսդրությանը համապատասխան պաշտոնի է նշանակում և պաշտոնից ազատում հաստատության տնօրենի տեղակալներին, մանկավարժական և մյուս աշխատողներին, խրախուսում և կարգապահական պատասխանատվության է ենթարկում աշխատողներին ու սովորողներին.

գ) ապահովում է մանկավարժական կադրերի ճիշտ ընտրությունն ու տեղաբաշխումը, անհրաժեշտ պայմաններ ստեղծում նրանց մասնագիտական մակարդակի բարձրացման համար.

դ) վերահսկողություն է իրականացնում դասավանդման բովանդակության, սովորողների գիտելիքների յուրացման որակի, նրանց վարքի, արտադասարանական և արտադպրոցական աշխատանքների կազմակերպման նկատմամբ.

ե) Հայաստանի Հանրապետության օրենսդրությանը համապատասխան սահմանում է հաստատության աշխատողների պարտականությունները, ապահովում ներքին աշխատանքային կարգապահության կանոնների, սանիտարաառողջապահական ռեժիմի, աշխատանքի պաշտպանության և անվտանգության տեխնիկայի պահպանումը.

զ) իր իրավասության սահմաններում արձակում է հրամաններ, տալիս ցուցումներ, որոնց կատարումը պարտադիր է հաստատության սովորողների և աշխատողների համար.

է) ղեկավարում և կազմակերպում է հաստատության մանկավարժական, հոգաբարձուների, ծնողական խորհուրդների, կառուցվածքային ստորաբաժանումների աշխատանքը` ապահովելով դրանց ներդաշնակ գործունեությունը.

ը) Հայաստանի Հանրապետության օրենսդրությամբ սահմանված կարգով տնօրինում է հաստատության գույքը, հանդիսանում վարկի կարգադրիչ.

թ) կազմում և հաստատում է հաստատության հաստիքային ցուցակը և ծախսերի նախահաշիվը` ըստ գործող նորմացույցների և բյուջեից տրվող միջոցների սահմաններում.

ժ) ներկայացնում է հաստատությունը պետական մարմիններոմ, ձեռնարկություններում, հիմնարկներում, կազմակերպություններում, կնքում համապատասխան պայմանագրեր.

ի) իրականացնում է Հայաստանի Հանրապետության գործող օրենսդրությամբ և սույն կանոնադրությամբ սահմանված այլ լիազորություններ:

14. Տնօրենի բացակայության ժամանակ նրա պարտականությունները կատարում է տնօրենի տեղակալը` տնօրենի հրամանով:

15. Հաստատության ուսումնական աշխատանքի գծով տնօրենի տեղակալը`

ա) պատասխանատու է հաստատությունում ուսումնադաստիարակչական գործընթացի կազմակերպման, ուսումնական ծրագրերի կատարման, դասավանդման որակի և սովորողների գիտելիքների համար.

բ) վերահսկողություն է իրականացնում ուսումնադաստիարակչական աշխատանքի ընթացքի, սովորողների առաջադիմության և վարքի նկատմամբ, կանոնավորում սովորողների ուսումնական ծանրաբեռնվածությունը.

գ) հրահանգավորում է հաստատության մանկավարժական անձնակազմին, դասղեկներին, հաստատությունում կազմակերպում աշխատանք, կազմում ուսումնական պարապմունքների դասացուցակ և ուսումնադաստիարակչական աշխատանքի վիճակի մասին հաշվետվություններ.

դ) ղեկավարում է առարկայական մեթոդական միավորումների աշխատանքը, ընդհանրացնում և տարածում լավագույն ուսուցիչների ու դաստիարակների աշխատանքի դրական փորձը, ուսուցիչներին հաղորդակից դարձնում գիտության և մանկավարժության նորագույն նվաճումներին:

16. Հաստատության դաստիարակչական աշխատանքի գծով տնօրենի տեղակալը`

ա) կազմակերպում և ղեկավարում է սովորողների արտադասարանական, արտադպրոցական աշխատանքները.

բ) ապահովում է հաստատության և ընտանիքի սերտ կապն ու համագործակցությունը.

գ) կազմակերպում է սովորողների հանգիստը և ժամանցը, միջոցներ ձեռնարկում սոցիալապես անապահով երեխաներին օգնություն ցուցաբերելու ուղղությամբ:

17. Հաստատության տնտեսական աշխատանքի գծով տնօրենի տեղակալը`

ա) պատասխանատու է հաստատության շենքի և դրա գույքի պահպանման, ուսումնական գործընթացի նյութատեխնիկական ապահովման, հաստատության սանիտարահիգիենիկ ու բարեկարգ վիճակի, հաստատության ուսումնական պարապմունքներին ժամանակին նախապատրաստման, հակահրդեհային պաշտպանության և սպասարկող անձնակազմի աշխատանքի կազմակերպման համար.

բ) միջոցներ է ձեռնարկում հաստատության ուսումնանյութական բազան հարստացնելու և ամրապնդելու համար:

18. Հաստատության դասղեկը`

ա) դաստիարակչական աշխատանք է տանում իրեն հանձնված դասարանի սովորողների շրջանում` սերտորեն համագործակցելով մյուս ուսուցիչների հետ.

բ) ապահովում է սովորողների նկատմամբ դպրոցի և ընտանիքի մանկավարժական պահանջնրեի միասնությունը.

գ) անհրաժեշտության դեպքում սովորողների համար կազմակերպում է ուսումնական օգնություն.

դ) իրականացնում է դասարանի համար սահմանված գործավարությունը, հաստատության ղեկավարությանը ներկայացնում սովորողների առաջադիմության, հաճախումների և վարքի վերաբերյալ տեղեկություներ.

ե) կազմակերպում է սովորողների առողջության ամրապնդմանը և ֆիզիկական զարգացմանը նպաստող միջոցառումներ, մրցույթներ, նպատակային շրջագայություններ, կանոնավորում օրվա ռեժիմը, հետևում տնային հանձնարարությունների կատարմանը, ուսման և հանգստի նպատակային կազմակերպմանը.

զ) հաստատության մանկավարժական խորհրդի քննարկմանն է ներկայացնում վարքի կանոնները կոպտորեն խախտած սովորողի հարցը.

է) արգելում է սովորողների, ուսուցիչների և ծնողների այն ձեռնարկումները, որոնք կարող են սովորողի առողջության, կյանքի համար վտանգ պարունակել կամ խաթարել ուսումնադաստիարակչական աշխատանքների կենսագործումը:

19. Համայնքի, ծնողների հետ հաստատության արդյունավետ համագործակցության, դրա գործունեությանն աջակցելու նպատակով հաստատությանը կից կարող է ստեղծվել հոգաբարձուների, ծնողական և այլ խորհուրդներ:

Նշված խորհուրդների իրավասության շրջանակները սահմանվում են Հայաստանի Հանրապետության կրթության և գիտության նախարարության (այսուհետև` նախարարություն) հաստատած օրինակելի կանոնադրություններով:

20. Հաստատության ուսումնադաստիարակչական աշխատանքի արդյունավետ կազմակերպման նպատակով ստեղծվում են հաստատության մանկավարժական խորհուրդ, առարկայական մեթոդական միավորումներ, որոնց օրինակելի կանոնադրությունները հաստատում է նախարարությունը:

21. Հաստատության ղեկավար (տնօրեն, տնօրենի տեղակալ), ինչպես նաև մանկավարժական աշխատողներն ատեստավորվում են նախարարության սահմանած կարգով:

III. Հաստատության կառուցվածքը և տեսակները

22. Հաստատությունը հանրակրթական ծրագիրն իրականացնում է անընդհատ կրթության հարաբերականորեն ինքնուրույն 3 աստիճանով`

տարրական կրթության (յուրացման նորմատիվ ժամկետը` 4 տարի).

հիմնական կրթության (յուրացման նորմատիվ ժամկետը` 4 տարի).

միջնակարգ կրթության (յուրացման նորմատիվ ժամկետը` 2 տարի):

Առանձին սովորողների համար հանրակրթական ծրագրի յուրացման նորմատիվ ժամկետները կարող են փոփոխվել նախարարության սահմանած կարգով` պետական կրթական չափորոշիչներին համապատասխան գիտելիքների ստուգմամբ:

23. Հաստատությունը հանրակրթական ծրագրին համապատասխան ստորաբաժանվում է կրտսեր, միջին և ավագ դպրոցների, որոնք կարող են ունենալ ինքնուրույն կարգավիճակ կամ երկուսը-երեքը միասին` ընդգրկվել մեկ հաստատության մեջ:

24. Հաստատությունը կարող է ունենալ մասնաճյուղեր, այլ կառուցվածքային ստորաբաժանումներ, որոնք ստեղծվում են Հայաստանի Հանրապետության օրենսդրությամբ սահմանված կարգով:

25. Հաստատությունը կարող է գործել որպես կրթահամալիր` ներառելով տարբեր կրթական ծրագրեր իրականացնող լուսհաստատություններ: Կրթահամալիրի կանոնադրությունը հաստատում է նախարարությունը:

26. Կրթության և դաստիարակության, ինչպես նաև առողջության պահպանման առանձնահատուկ պայմանների կարիք ունեցող, ծնողազուրկ և ծնողական խնամքից զուրկ երեխաների համար ստեղծվում է հատուկ հտաստատություն (դասարան, խումբ), այդ թվում` երկարօրյա և գիշերօթիկ, որի կանոնադրությունը հաստատում է նախարարությունը` համաձայնեցնելով պետական կառավարման համապատասխան մարմնի հետ:

27. Կրտսեր դպրոցը տարրական կրթության ծրագրին համապատասխան երեխայի գործունեության ձևերի ընդլայնման միջոցով ապահովում է նրա ընդհանուր զարգացումը, կարդալու, գրելու, հաշվելու հմտությունների և կարողությունների, բարեկիրթ խոսքի և վարվելաձևի, ինքնավերահսկման պարզագույն հմտությունների, անձնական հիգիենայի և առողջ կենցաղի հիմունքների տիրապետումը:

28. Միջին դպրոցը տարրական կրթության հիման վրա ապահովում է հիմնական կրթության ծրագրերի յուրացումը, սովորողների անձի ձևավորումն ու կայացումը, բարենպաստ միջավայր ստեղծում սոցիալական ինքնահաստատմանը և ինքնադրսևորմանը նպաստող ընդունակությունների, նախասիրությունների և հակումների զարգացման համար:

Հիմնական կրթությունը պարտադիր է և ավարտվում է որակավորմամբ:

29. Ավագ դպրոցը հիմնական կրթության հիմքի վրա ապահովում է սովորողների միջնակարգ կրթության ծրագրերի յուրացումը, ճանաչողական հետաքրքրությունների զարգացումն ու ստեղծագործական ունակությունների ձևավորումը, տարբերակված ուսուցման հիման վրա` նախամասնագիտական ծրագրի յուրացումը:

Ավագ դպրոցն ավարտվում է պետական քննություններով:

Ավագ դպրոցի տեսակները սահմանում է նախարարությունը:

30. Նախասիրական կրթական ծրագրերն իրականացվում են ինչպես տարբեր աստիճանների հանրակրթական դպրոցներում, այնպես էլ նախասիրական կրթական հաստատություններում:

31. Տեղական ինքնակառավարման մարմնի կողմից հաստատությանը կարող է ամրակցվել համայնքի որոշակի բնակելի տեղամաս: Հաստատությունը միջոցներ է ձեռնարկում այդ տեղամասում ապրող` պարտադիր ուսուցման ենթակա բոլոր երեխաներին ուսման մեջ ընդգրկելու համար:

IV. Հաստատության ուսումնադաստիարակչական գործունեության կազմակերպումը

32. Հաստատության ուսուցման լեզուն գրական հայերենն է:

Ազգային փոքրամասնությունների համար բացված դպրոցներում (դասարաններում) ուսուցումն իրականացվում է մայրենի լեզվով` հայերենի պարտադիր ուսուցմամբ:

33. Հաստատության ընդունելության կարգը, ինչպես նաև դպրոցական արձակուրդների ժամկետները սահմանում է նախարարությունը:

34. Հաստատության բուժսպասարկումն ապահովում է առողջապահական մարմինների կողմից ամրակցված բուժանձնակազմը, որը տնօրինության և մանկավարժական անձնակազմի հետ միասին պատասխանատվություն է կրում բուժկանխարգելիչ միջոցառումների անցկացման, սանիտարահիգիենիկ նորմերի պահպանման համար:

35. Հաստատության դասարանի միջին խտությունը սահմանվում է 25-30 սովորող` կրտսեր և միջին դպրոցի համար 20-25 սովորող` ավագ դպրոցի համար` սանիտարական նորմերի պահպանմամբ: Ավելի պակաս խտությամբ դասարան կարող է բացվել նախարարության թույլտվությամբ:

36. Առանձին առարկաների պարապմունքների անցկացման ընթացքում դասարանը կարող է կիսվել երկու խմբի` նախարարության սահմանած կարգով, համաձայնեցված Հայաստանի հանրապետության ֆինանսների նախարարության հետ:

37. Հաստատությունում ուսումնական տարին, որպես կանոն, սկսվում է սեպտեմբերի 1-ին: Ուսումնական տարվա տևողությունը պետք է լինի ոչ պակաս, քան 34 շաբաթ, իսկ կրտսեր դպրոցի 1-ին դասարանում` 30 շաբաթ:

Հաստատությունում ուսումնական տարին բաժանվում է կիսամյակների կամ քառորդների:

38. Հաստատությունում ուսումնադաստիարակչական աշխատանքի կազմակերպման հիմնական ձևը դասն է: Դասի տևողությունը 45 րոպե է, բացառիկ դեպքերում այն կարող է փոփոխվել նախարարության կողմից:

39. Հաստատության տարեկան ուսումնական օրացուցային ժամկետացանկը (գրաֆիկը), սովորողների գիտելիքների գնահատման համակարգը, առաջադիմության և հաճախումների գրանցման, դասարանից դասարան փոխադրման և պետական ավարտական քննությունների անցկացման կարգը սահմանում է նախարարությունը:

40. Ուսուցման կազմակերպման ձևերն են`

ցերեկային

երեկոյան

հեռակա (անհատական, ընտանեկան և այլն):

41. Հաստատությունում ուսումնադաստիարակչական աշխատանքները կազմակերպվում են նախարարության հաստատած օրինակելի ուսումնական պլանների և ուսումնական ծրագրերի հիման վրա:

42. Հաստատության ուսումնական պլաններում առանձին առարկաներին հատկացվող ժամերի քանակը չպետք է պակաս լինի պետական օրինակելի ուսումնական պլանով նախատեսված ժամերի քանակից:

43. Ավագ դպրոցում ուսումնառության մեջ բացառիկ հաջողությունների հասած շրջանավարտները պարգևատրվում են ոսկե կամ արծաթե մեդալներով` նախարարության սահմանած կարգով:

Տարեկան գերազանց առաջադիմություն և օրինակելի վարք, ինչպես նաև առանձին ուսումնական առարկաներից գերազանց առաջադիմություն ունեցող սովորողները նախարարության սահմանած կարգով պարգևատրվում են գովասանագրերով:

44. Հաստատության ուսումնադաստիարակչական աշխատանքի տեսչավորումն իրականացնում է նախարարության տարածքային տեսչությունը` նախարարության սահմանած կարգով:

45. Հաստատությունում գործավարությունը տարվում է Հայաստանի Հանրապետության օրենսդրության պահանջների և նախարարության հաստատած հրահանգի համաձայն:

V. Հաստատության սովորողը, մանկավարժը և ծնողը

46. Սովորողն իրավունք ունի`

անվճար ստանալու տարրական, հիմնական և միջնակարգ կրթություն.

անկախ բնակության վայրից, սահմանված կարգով ընտրելու հաստատությունը և ուսուցման ձևը.

անվճար օգտվելու հաստատության գրադարանից.

հաստատությունում յուրացնելու նախասիրական, այդ թվում` վճարովի կրթական ծրագրեր, ստանալու վճարովի ծառայություններ.

ազատ արտահայտելու սեփական հայացքներն ու համոզմունքները:

47. Հաստատությանն արգելվում է առանց ծնողների և սովորողների համաձայնության սովորողներին ընդգրկել այնպիսի աշխատանքներում, որոնք նախատեսված չեն հանրակրթական ծրագրերով և հաստատության կանոնադրությամբ:

48. Հաստատությունում արգելվում է սովորողների նկատմամբ հոգեկան և ֆիզիկական բռնության գործադրումը:

49. Սովորողը պարտավոր է`

բարեխղճորեն սովորել.

խնամքով վերաբերվել հաստատության գույքին.

հարգել հաստատության սովորողների և աշխատողների իրավունքներն ու արժանապատվությունը.

պահպանել հաստատության ներքին կարգապահական կանոնները:

50. Հաստատության ներքին կարգապահական կանոնները խախտելու համար թույլատրվում է, որպես ծայրահեղ միջոց, Հայաստանի Հանրապետության օրենսդրությամբ սահմանված կարգով սովորողին հեռացնել հաստատությունից:

51. Ծնողն իրավունք ունի`

պաշտպանելու երեխայի օրինական շահերն ու իրավունքները.

մասնակցելու հաստատության կառավարմանը:

52. Ծնողը պարտավոր է`

կատարել հաստատության կանոնադրությամբ` սահմանված իր պարտականությունները.

ապահովել երեխայի կրթության համար անհրաժեշտ պայմաններ:

53. Հաստատությունում մանկավարժական աշխատանքի կարող է ընդունվել մանկավարժի որակավորում ունեցող մասնագետը: Ոչ մանկավարժական կրթությամբ մասնագետի` հաստատությունում աշխատելու կարգը և պայմանները սահմանում է նախարարությունը:

54. Հաստատության մանկավարժական և մյուս աշխատողների իրավունքներն ու պարտականությունները սահմանվում են Հայաստանի Հանրապետության գործող օրենսդրությանը համապատասխան:

55. Հաստատության մանկավարժական աշխատողները կարող են ընտրել և կիրառել նախարարության երաշխավորած ուսուցման և դաստիարակության ձևերից ու մեթոդներից, ուսումնական նյութերից ու ձեռնարկներից որևէ մեկը:

56. Հաստատության մանկավարժական աշխատողները պարտավոր են ապահովել կրթական ծրագրերի կատարումը, հանրակրթական պետական չափորոշիչներով որոշվող ծրագրերի նվազագույնի յուրացումը սովորողների կողմից:

57. Հաստատության աշխատողները պետք է համապատասխանեն սահմանված տարիֆաորակավորման բնութագրին և անընդհատ բարձրացնեն իրենց որակավորումը:

VI. Հաստատության ֆինանսական գործունեությունը և գույքը

58. Հաստատության ֆինանսական միջոցները գոյանում են բյուջետային և արտաբյուջետային միջոցներից:

Հաստատությունը բյուջետային միջոցներն ստանում և օգտագործում է Հայաստանի Հանրապետության գործող օրենսդրությամբ սահմանված կարգով:

59. Հաստատության բյուջետային ֆինանսավորման նորմացույցները սահմանում է նախարարությունը` համաձայնեցնելով Հայաստանի Հանրապետության ֆինանսների նախարարության հետ:

60. Հաստատության արտաբյուջետային միջոցներն են`

ա) հաստատության գույքը, տարածքը սահմանված կարգով` միայն պետական կառավարման վերադաս մարմնի թույլտվությամբ վարձակալության հանձնելուց ստացված միջոցները.

բ) նախարարության սահմանած կարգով լրացուցիչ կրթական, մշակութային, լուսավորչական և մարզական ծառայությունների մատուցումից ստացված միջոցները.

գ) բարեգործական, նպատակային ներդրումները, Հայաստանի Հանրապետության և օտարերկրյա ձեռնարկությունների, հիիմնարկների, կազմակերպությունների ու քաղաքացիների նվիրատվությունները.

դ) Հայաստանի Հանրապետության գործող օրենսդրությամբ սահմանված` հաստատության սովորողների ուսմանը և դաստիարակությանն օժանդակող այլ գործունեությունից ստացված միջոցները:

Նշված աղբյուրներից ստացված ֆինանսական միջոցները չեն կարող հիմք հանդիսանալ բյուջետային հատկացումների նվազեցման համար:

61. Հաստատության արտաբյուջետային միջոցները պահվում են բանկային հատուկ հաշվում և ծախսվում են հաստատության տնօրենի հաստատած նախահաշվի հիման վրա:

62. Նպատակային գիտափորձ և մանկավարժական ծրագիր իրականացնող հաստատությունը լրացուցիչ կարող է ֆինանսավորվել նախարարության և տեղական բյուջեի ազատ ու ներգրավված այլ միջոցների հաշվին:

63. Հաստատությունը Հայաստանի Հանրապետության օրենսդրությամբ սահմանված կարգով ինքնուրույնաբար տնօրինում է իր ֆինանսական միջոցները:

64. Վճարովի ծառայությունները չպետք է իրականացվեն բյուջեից ֆինանսավորվող գործունեության փոխարեն և դրա որակի հաշվին:

65. Հաստատությունում, հոգաբարձուների խորհրդի որոշմամբ, լրացուցիչ միջոցների հաշվին աշխատողների դրույքաչափերի ու աշխատավարձի նկատմամբ կարող են կիրառվել տարբերակված հավելումներ` մասնագիտական վարպետության, որակյալ աշխատանքի, մասնագիտությունների համատեղության և այլնի համար:

66. Հաստատությունը սահմանված կարգով ֆինանսական գործունեության մասին հաշվետվություն է ներկայացնում համապատասխան վերադաս պետական կառավարման մարմնին:

67. Հաստատությունը Հայաստանի Հանրապետության օրենսդրությամբ սահմանված կարգով բանկում կարող է ունենալ տարադրամային հաշիվ:

68. Հաստատությունը վարկային գործառնություններ կարող է կատարել միայն նախարարության գրավոր համաձայնությամբ և Հայաստանի Հանրապետության ֆինանսների նախարարության երաշխավորությամբ: