ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 նոյեմբերի 1993 թվականի N 564

քաղ. Երևան

ՓԱԽՍՏԱԿԱՆՆԵՐԻ ԽՆԱՅՈՂՈՒԹՅՈՒՆՆԵՐԻ ԻՆԴԵՔՍԱՎՈՐՄԱՆ ԵՎ ՎՃԱՐՄԱՆ ՄԱՍԻՆ

Հայաստանի Հանրապետության կառավարությունը որոշում է`

1. Հայաստանի Հանրապետության փախստականների հարցերի պետական վարչությունում հաշվառման վերցված և 1993 թվականի օգոստոսի 1-ի դրությամբ ավանդներ ստանալու խնդրանքով դիմած Ադրբեջանից բռնագաղթված նախկին ԽՍՀՄ խնայբանկի ադրբեջանական հանրապետական բանկի ավանդատու հանդիսացող քաղաքացիների անվամբ, ըստ նրանց բնակության վայրի, Հայխնայբանկի հիմնարկություններում բացել ավանդային հաշիվներ` համաձայն նրանց կողմից ներկայացվող խնայողական գրքույկներում նշված պայմանների և դրանցում եղած մնացորդների չափի:

2. Սույն որոշման 1-ին կետում նշված փախստականների ավանդային հաշիվներում Հայխնայբանկում խնայողական գրքույկի բացման օրվա դրությամբ մնացորդներն ինդեքսավորվում են 180 տոկոսով` Հայխնայբանկի միջոցների հաշվին, մինչև պետական պարտքի կազմում այդ միջոցների ընդգրկումը:

Ինդեքսավորումն իրականացվում է Հայաստանի Հանրապետության ֆինանսների նախարարության և Հայխնայբանկի կողմից սահմանված կարգով:

3. Սահմանել, որ ավանդների ինդեքսավորման սույն որոշմամբ նախատեսված կարգի համաձայն Հայաստանի Հանրապետության տարածքում անվավեր են ճանաչվում և Հայխնայբանկի կողմից չեն ընդունվում նախկին ԽՍՀՄ խնայբանկի ադրբեջանական հանրապետության բանկի կողմից ավանդային հատուկ հաշիվներով տրված խնայողական գրքույկները (1991 թվականի ապրիլին հաշվարկված 40 տոկոսի փոխհատուցումը):

 4. Հայխնայբանկին` մինչև 1993 թվականի դեկտեմբերի 30-ը ի պահ ընդունել նախկին ԽՍՀՄ խնայբանկի ադրբեջանական հանրապետական բանկի կողմից տրված և Հայաստանի Հանրապետությունում բնակվող փախստականներին պատկանող նպատակային անտոկոս փոխառության պարտատոմսերը, հաշվարկային չեկերը, ակրեդիտիվները և սերտիֆիկատները, գանձապետական պարտավորությունները և 1982 թվականի ԽՍՀՄ ներքին շահող փոխառության պարտատոմսերը` դրանց քանակներն ու հանրագումարները պարզելու և ինդեքսավորման կամ վճարման մասին մինչև 1994 թվականի մարտի 1-ը Հայաստանի Հանրապետության կառավարություն առաջարկություններ ներկայացնելու նպատակով:

5. Սահմանել, որ Հայխնայբանկի հիմնարկներին ավանդային գրքույկները, նպատակային անտոկոս փոխառության պարտատոմսերը, հաշվարկային չեկերը, ակրեդիտիվները և սերտիֆիկատները, գանձապետական պարտավորությունները և 1982 թվականի ԽՍՀՄ ներքին շահող փոխառության պարտատոմսերը սույն որոշմամբ սահմանված ժամկետներում հարգելի պատճառներով (գործուղում, հիվանդություն և այլն) չհանձնած փախստականների դիմումները քննարկվում են Հայխնայբանկի վարչության կողմից:

6. Հայաստանի Հանրապետության հեռուստատեսության և ռադիոհաղորդումների պետական վարչությանը և զանգվածային լրատվության այլ միջոցներին` լայնորեն լուսաբանել փախստականների խնայողությունների ինդեքսավորման և վճարման մասին հարցը:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ