«ՎԱՎԵՐԱՑՆՈՒՄ ԵՄ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀ Լ. ՏԵՐ-ՊԵՏՐՈՍՅԱՆ 15 հունվարի 1996 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 հունվարի 1996 թվականի N 8

քաղ. Երևան

«ՄԻԴԼԵՆԴ-ԱՐՄԵՆԻԱ ԲԱՆԿ» ԲԱԺՆԵՏԻՐԱԿԱՆ ԸՆԿԵՐՈՒԹՅԱՆԸ ՀԱՐԿԱՅԻՆ ԱՐՏՈՆՈՒԹՅՈՒՆՆԵՐ ՏԱԼՈՒ ՄԱՍԻՆ

Նկատի ունենալով «Միդլենդ-Արմենիա բանկ» բաժնետիրական ընկերության միջազգային ճանաչումը, նրա Հայաստանի Հանրապետությունում գործունեություն ծավալելու, այդ կապակցությամբ բացառության կարգով համապատասխան հարկային արտոնություններ տալու առաջարկությունները և հաշվի առնելով Հայաստանի Հանրապետության Ազգային ժողովի ֆինանսավարկային, բյուջետային և տնտեսական հարցերի մշտական հանձնաժողովի համաձայնությունը, Հայաստանի Հանրապետության կառավարությունը որոշում է.

1. «Միդլենդ-Արմենիա բանկ» բաժնետիրական ընկերությունը սույն որոշումն ուժի մեջ մտնելու պահից ազատել`

ա) շահութահարկի վճարումից` առաջիկա երկու տարում, իսկ երրորդ տարվանից մինչև տասներորդ տարին` Հայաստանի Հանրապետության օրենսդրությանը համապատասխան հաշվարկվող շահութահարկի գումարը նվազեցնել այդ գումարի 50 տոկոսի չափով.

բ) ընկերության օտարերկրյա բաժնետերերին վճարվող շահաբաժինների դիմաց գանձվող շահութահարկից (եկամտահարկից)` առաջիկա տասը տարում.

գ) ավելացված արժեքի հարկի վճարումից` առաջիկա տասը տարում:

2. «Միդլենդ-Արմենիա բանկ» բաժնետիրական ընկերության կողմից շահութահարկի հաշվարկման ժամանակ չի կիրառվում հաշվեկշռային շահույթի ավելացման նորմը` ինքնարժեքի կազմում ներառվող սպառմանն ուղղված միջոցների նորմավորվող մեծությունը գերազանցող գումարի մասով:

3. «Միդլենդ-Արմենիա բանկ» բաժնետիրական ընկերության աշխատակիցներ հանդիսացող օտարերկրյա քաղաքացիները և քաղաքացիություն չունեցող անձինք եկամտահարկն առաջիկա տասը տարվա ընթացքում վճարում են միայն Հայաստանի Հանրապետությունում գտնվող աղբյուրներից ստացվող եկամուտներից` հաստատուն 12 տոկոս դրույքաչափով:

4. «Միդլենդ Արմենիա բանկ» բաժնետիրական ընկերության կողմից բանկի օտարերկրյա քաղաքացիներ հանդիսացող աշխատակիցների նյութական և սոցիալական վիճակի բարելավման նպատակով կատարվող կոմունալ-կենցաղային ծառայությունների արժեքը, ինչպես նաև բնակարանով ապահովման, բուժման, երեխաների կրթության, տրանսպորտային ծախսերի փոխհատուցման գումարները չեն ներառվում հարկվող եկամուտների կազմի մեջ:

5. Սահմանել, որ «Միդլենդ-Արմենիա բանկ» բաժնետիրական ընկերության հաշվետու տարվա գործունեության արդյունքում ստացած վնասները 1995 թվականից սկսած ծածկվում են հաջորդ տարիների շահույթների հաշվին:

6. Սույն որոշումն ուժի մեջ է մտնում 1996 թվականի հունվարի 15-ից:

Հայաստանի Հանրապետության վարչապետ

Հ. ԲԱԳՐԱՏյան