ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 նոյեմբերի 1993 թվականի N 583

քաղ. Երևան

ԷԼԵԿՏՐԱԿԱՆ ՈՒ ՋԵՐՄԱՅԻՆ ԷՆԵՐԳԻԱՅԻ ԵՎ ԳԱԶԻ ՕԳՏԱԳՈՐԾՄԱՆ ԽԱԽՏՈՒՄՆԵՐԻ ՀԱՄԱՐ ՊԱՏԱՍԽԱՆԱՏՎՈՒԹՅՈՒՆՆ ՈՒԺԵՂԱՑՆԵԼՈՒ ՄԱՍԻՆ

Հանրապետությունում էներգետիկ ճգնաժամի հետևանքով ստեղծված արտակարգ պայմաններում բնակչության կենսագործունեությունը և տնտեսության կարևորագույն օբյեկտների գործունեությունն ապահովելու նպատակով Հայաստանի Հանրապետության կառավարությունը որոշում է`

1. Հայաստանի Հանրապետության շրջաններում, քաղաքներում, ինչպես նաև ձեռնարկություններում, հիմնարկներում և կազմակերպություններում (անկախ սեփականության ձևից) էլեկտրական ու ջերմային էներգիայի և գազի օգտագործման չափաքանակներն ու ռեժիմները սահմանում է օպերատիվ կառավարման հանրապետական շտաբը` ելնելով կոնկրետ վառելիքաէներգետիկ իրավիճակից:

2. Պատգամավորների շրջանային և քաղաքային խորհուրդների գործադիր կոմիտեներին`

ա) համապատասխան էլեկտրական ցանցերի ձեռնարկությունների հետ կազմել բնակչության էլեկտրամատակարարման գրաֆիկները` ըստ հատկացված էլեկտրաէներգիայի օրական սահմանաքանակի.

բ) ստեղծել հանձնախմբեր և սահմանել շուրջօրյա հերթապահություն` բնակչության և կենսաապահովման օբյեկտների էլեկտրամատակարարման գրաֆիկներն ապահովելու համար:

3. Սահմանել, որ ձեռնարկությունների, հիմնարկների և կազմակերպությունների (անկախ սեփականության ձևից) կողմից`

ա) էլեկտրական ու ջերմային էներգիայի օրական և ամսական սահմանաքանակների և սահմանված էլեկտրական հզորության 10 տոկոսից գերազանցումներն առաջացնում են տուգանքի նշանակում Հայաստանի Հանրապետության օրենսդրությամբ սահմանված նվազագույն աշխատավարձի 30-պատիկի չափով, իսկ սահմանված չափաքանակներից ավելի ծախսված էլեկտրական և ջերմային էներգիայի վճարը գանձվում է սահմանվածի 10-պատիկի չափով.

բ) էլեկտրական և ջերմային ցանցերին ու գազատարներին առանց թույլտվության միացնելը, իրենց օբյեկտներում ապօրինաբար երկրորդ սնուցում անցկացնելն առաջացնում է տուգանքի նշանակում Հայաստանի Հանրապետության օրենսդրությամբ սահմանված նվազագույն աշխատավարձի 50-պատիկի չափով:

Մինչև տուգանքի վճարումը և Հայաստանի Հանրապետության էներգետիկայի և վառելիքի նախարարության էներգապետհսկողության կողմից թույլտվություն ստանալը դադարեցվում են տվյալ օբյեկտի էլեկտրամատակարարումը, գազամատակարարումը և ջերմամատակարարումը:

Նշված խախտումները կրկնելն առաջացնում է տուգանքի նշանակում սույն կետի «ա» և «բ» ենթակետերով նախատեսված տուգանքների կրկնապատիկի չափով:

4. Հայաստանի Հանրապետության էներգետիկայի և վառելիքի նախարարության էներգապետհսկողության կողմից իրականացվող էլեկտրական և ջերմային էներգիայի ու գազի սպառման ռեժիմների ստուգումներին խոչընդոտելն առաջացնում է տուգանքի նշանակում ձեռնարկությունների, հիմնարկների ու կազմակերպությունների նկատմամբ` Հայաստանի Հանրապետության օրենսդրությամբ սահմանված նվազագույն աշխատավարձի 30-պատիկի չափով:

Մինչև տուգանքի վճարումը և էներգապետհսկողության կողմից թույլտվություն ստանալը դադարեցվում են տվյալ օբյեկտների էլեկտրամատակարարումը, գազամատակարարումը և ջերմամատակարարումը:

5. Էլեկտրական և ջերմային էներգիայի ու գազի սպառող ձեռնարկությունների, հիմնարկների ու կազմակերպությունների բաշխիչ սարքավորումներից, ինչպես նաև հերթապահ անձնակազմ ունեցող էներգահամակարգի օբյեկտների բաշխիչ սարքավորումներից այլ սպառողների ապօրինի միացումներն այդ ձեռնարկությունների, հիմնարկների ու կազմակերպությունների նկատմամբ առաջացնում է տուգանքի նշանակում սույն որոշման 3-րդ կետի «բ» ենթակետով սահմանված կարգով:

6. Սույն որոշման 3-րդ, 4-րդ և 5-րդ կետերով նախատեսված տուգանքները նշանակվում են Հայաստանի Հանրապետության էներգետիկայի և վառելիքի նախարարության էներգապետհսկողության տարածքային մարմինների կողմից:

Սահմանել, որ էներգապետհսկողության տեսուչների կողմից ներկայացված խախտումների արձանագրությունների հիման վրա, սույն որոշմամբ նշանակված տուգանքների գանձումը կատարվում է էներգապետհսկողության կողմից:

7. Հայաստանի Հանրապետության էներգետիկայի և վառելիքի նախարարությանը` Հայաստանի Հանրապետության օրենսդրությամբ սահմանված կարգով ձեռնարկել անհրաժեշտ միջոցներ գրաֆիկով չնախատեսված օբյեկտների ապօրինի միացումներ թույլ տված էլեկտրական ցանցերի ձեռնարկությունների աշխատողներին պատասխանատվության ենթարկելու համար:

8. Էներգամատակարարող ձեռնարկությունների ղեկավարները պատասխանատվություն են կրում ձեռնարկություններին պատկանող էլեկտրական և ջերմային ցանցերի ու գազատարների ապօրինի միացումների, ինչպես նաև օպերատիվ կառավարման հանրապետական շտաբի կողմից հաստատված էլեկտրական և ջերմային էներգիայի ու գազի սպառման չափաքանակների և սահմանված ռեժիմների խախտումների համար:

9. Սույն որոշմամբ նախատեսված տուգանքների գումարները գանձվում և փոխանցվում են Հայաստանի Հանրապետության էներգետիկայի և վառելիքի նախարարության կենտրոնացված ֆոնդ, որի մինչև 10 տոկոսը նախարարության կողմից հատկացվում է էներգապետհսկողության աշխատողների նյութական խրախուսման համար:

10. Պատգամավորների Արտաշատի, Արարատի, Աշտարակի և Արմավիրի քաղաքային խորհուրդների գործադիր կոմիտեներին` մինչև 1993 թվականի դեկտեմբերի 31-ը «Հայէներգոարդ» ՀՆՊՁ-ի ենթակայությանը հանձնել համապատասխան էլեկտրական ցանցերի ձեռնարկությունները և սահմանված կարգով ավարտել այդ ձեռնարկությունների գույքի հաշվեկշռից հաշվեկշիռ հանձնում-ընդունումը:

11. Պատգամավորների շրջանային և քաղաքային խորհուրդների գործադիր կոմիտեներին` հրատապ պահանջների և վթարների դեպքում առանձին օբյեկտների արտահերթ էլեկտրասնուցման ապահովման նպատակով իրենց տրամադրության տակ ունենալ շարժական էլեկտրակայաններ` համապատասխան սպասարկող անձնակազմով:

12. Թույլատրել հանրապետության կենցաղսպասարկման օբյեկտների և խանութների էլեկտրամատակարարումը կատարել բնակչության համար նախատեսված գրաֆիկով:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ