«ՎԱՎԵՐԱՑՆՈՒՄ ԵՄ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀ Լ. ՏԵՐ-ՊԵՏՐՈՍՅԱՆ 29 օգոստոսի 1995 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

 Ո Ր Ո Շ ՈՒ Մ

29 օգոստոսի 1995 թվականի N 9

 ՍՆԱՆԿԱՑՄԱՆ ԴԵՊՔՈՒՄ ԻՐԱՎԱԲԱՆԱԿԱՆ ԱՆՁԻ ԿԱՐԳԱՎԻՃԱԿ ՉՈՒՆԵՑՈՂ ՁԵՌՆԱՐԿՈՒԹՅԱՆ ՍԵՓԱԿԱՆԱՏԻՐՈՋԸ (ՍԵՓԱԿԱՆԱՏԵՐԵՐԻՆ), ՄԱՍՆԱԿԻՑՆԵՐԻՆ ԵՎ ԱՆՀԱՏ ՁԵՌՆԵՐԵՑՆԵՐԻՆ ՊԱՏԿԱՆՈՂ ԲՌՆԱԳԱՆՁՄԱՆ ՈՉ ԵՆԹԱԿԱ ԳՈՒՅՔԻ ԿԱԶՄԸ ՀԱՍՏԱՏԵԼՈՒ ՄԱՍԻՆ

Ի կատարումն Հայաստանի Հանրապետության Գերագույն խորհրդի 1995 թվականի մայիսի 16-ի «Ձեռնարկությունների և անհատ ձեռներեցի սնանկացման մասին» Հայաստանի Հանրապետության օրենքի կիրարկման մասին» որոշման, Հայաստանի Հանրապետության կառավարությունը որոշում է`

1. Հաստատել սնանկացման դեպքում իրավաբանական անձի կարգավիճակ չունեցող ձեռնարկության սեփականատիրոջը (սեփականատերերին), մասնակիցներին և անհատ ձեռներեցներին պատկանող բռնագանձման ոչ ենթակա գույքի կազմը (կցվում է):

2. Սույն որոշումն ուժի մեջ է մտնում 1995 թվականի օգոստոսի 29-ից:

Հայաստանի Հանրապետության վարչապետ

Հաստատված է ՀՀ կառավարության 1995 թվականի օգոստոսի 29-ի թ N 9 որոշմամբ

ԿԱԶՄ

սնանկացման դեպքում իրավաբանական անձի կարգավիճակ չունեցող ձեռնարկության սեփականատիրոջը (սեփականատերերին), մասնակիցներին և անհատ ձեռներեցներին պատկանող բռնագանձման ոչ ենթակա գույքի

Սնանկացման դեպքում բռնագանձման ենթակա չէ իրավաբանական անձի կարգավիճակ չունեցող ձեռնարկության սեփականատիրոջ (սեփականատերերի), մասնակիցների, անհատ ձեռներեցների և նրանց խնամքի տակ գտնվող անձանց տնային գործածության համար անհրաժեշտ հետևյալ գույքը`

ա) հագուստեղեն, յուրաքանչյուր անձի համար` մեկ ամառային կամ աշնանային վերարկու, մեկ ձմեռային վերարկու, մեկ ձմեռային կոստյում (կանանց համար` երկու ձմեռային զգեստ), մեկ ամառային կոստյում (կանանց համար` երկու ամառային զգեստ), գլխարկներ` յուրաքանչյուր սեզոնի համար` մեկ հատ (կանանց համար դրանից բացի` երկու ամառային գլխաշոր և մեկ տաք գլխաշոր կամ շալ), այլ հագուստեղեն և գլխարկներ, որոնք երկար ժամանակ են գործածվել և արժեք չեն ներկայացնում.

բ) գործածության մեջ գտնվող կոշկեղենը, սպիտակեղենը, անկողնային պարագաները, խոհանոցի ու ճաշասենյակի կահկարասին (բացառությամբ թանկարժեք նյութերից պատրաստված առարկաների, նաև` այն առարկաների, որոնք գեղարվեստական արժեք ունեն).

գ) կահույք, յուրաքանչյուր անձի համար` մեկական մահճակալ և աթոռ, ընտանիքի համար` մեկ ճաշասեղան, մեկ պահարան.

դ) մանկական բոլոր պարագաները.

ե) մեկ խոշոր կամ երկու մանր եղջերավոր անասուն, մեկ զույգ ընտանի թռչուն.

զ) մինչև խոշոր անասնակերի հավաքելը կամ մինչև անասուններն արոտի դուրս բերելը անասունների համար անհրաժեշտ անասնակերը.

է) հերթական ցանքի համար անհրաժեշտ սերմացուն և տնկանյութը.

ը) ընտանիքի համար անհրաժեշտ սննդամթերքի երեք ամսվա պաշարը, ապրուստի միջոց և (կամ) սույն կազմի «ե», «զ», «է» կետերում նշված գույքը չունեցող յուրաքանչյուր անձի համար` Հայաստանի Հանրապետության օրենսդրությամբ սահմանված նվազագույն աշխատավարձի տասնապատիկի չափով դրամը.

թ) ընտանիքի համար կերակրի պատրաստման և ջեռուցման ամբողջ սեզոնում ընտանիքի բնակելի շենքի կամ բնակարանի ջեռուցման նպատակով անհրաժեշտ վառելիքը: