ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 մայիսի 1992 թվականի N 286

քաղ. Երևան

ՆՇԱՆԱԿՎԱԾ ԿԵՆՍԱԹՈՇԱԿՆԵՐԸ ԱՅԼ ԵՐԿՐՆԵՐ ՓՈԽԱԴՐԵԼՈՒ, ՎՃԱՐԵԼՈՒ ԿԱՐԳԻ, ԱՐՏԱՍԱՀՄԱՆՈՒՄ ԱՇԽԱՏԱԾ ԺԱՄԱՆԱԿԱՇՐՋԱՆԻ ԵՎ ՎԱՍՏԱԿԻ ՀԱՇՎԱՐԿՄԱՆ ԿԱՐԳԻ ՄԱՍԻՆ

Հայաստանի Հանրապետության կառավարությունը որոշում է`

1. Հանձնարարել Հայաստանի Հանրապետության կենսաթոշակային և զբաղվածության ֆոնդին` մինչև համապատասխան կառուցվածքների ստեղծումը, հանրապետությունից արտասահման մշտական բնակության մեկնած անձանց օրենքով նախատեսված կենսաթոշակների գումարների փոխադրումն այլ երկրներ ժամանակավորապես իրականացնել անկախ պետությունների համագործակցության կենսաթոշակային (սոցիալական) ֆոնդերի ներկայացուցիչների ասոցիացիայի միջոցով:

2. Արտասահմանում աշխատած ժամանակաշրջանը, այդ թվում նաև արտոնյալ կենսաթոշակի իրավունք տվող ժամանակաշրջանը հաշվարկվում է ընդհանուր և արտոնյալ աշխատանքային ստաժում «Հայաստանի Հանրապետության քաղաքացիների պետական կենսաթոշակային ապահովության մասին» Հայաստանի Հանրապետության օրենքով սահմանված կարգով, եթե արտասահմանում աշխատած քաղաքացիները Հայաստանի Հանրապետության կենսաթոշակային և զբաղվածության ֆոնդին կատարել են պետական սոցիալական ապահովագրական մուծումներ:

Արտասահմանում աշխատած քաղաքացիների կենսաթոշակները հաշվարկվում են «Հայաստանի Հանրապետության քաղաքացիների պետական կենսաթոշակային ապահովության մասին» Հայաստանի Հանրապետության օրենքի 44 հոդվածին համապատասխան:

3. Հանձնարարել Հայաստանի Հանրապետության աշխատանքի և սոցիալական ապահովության նախարարությանը, Հայաստանի Հանրապետության արտաքին գործերի նախարարությանը և Հայաստանի Հանրապետության կենսաթոշակային և զբաղվածության ֆոնդին` եռամսյա ժամկետում Հայաստանի Հանրապետության կառավարություն ներկայացնել առաջարկություն արտասահմանում աշխատած ժամանակաշրջանում պետական սոցիալական ապահովագրական մուծումներ կատարելու կարգի մասին:

ՀԱՅԱՍՏԱՆի հանրապետության փոխնախագահ, վարչապետ

Գ. ՀԱՐՈՒԹՅՈՒՆՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ