ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 օգոստոսի 1992 թվականի N 450

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ԺԱՄԱՆԱԿ ՄԱՐՏԱԿԱՆ ԳՈՐԾՈՂՈՒԹՅՈՒՆՆԵՐԻ ՄԱՍՆԱԿՑԱԾ, ԱՅԴ ՊԱՏՃԱՌՈՎ ՀԱՇՄԱՆԴԱՄ ԴԱՐՁԱԾ ԶԻՆԾԱՌԱՅՈՂՆԵՐԻ ԵՎ ԱԶԱՏԱՄԱՐՏԻԿՆԵՐԻ, ԶՈՀՎԱԾՆԵՐԻ ԸՆՏԱՆԻՔՆԵՐԻ ՍՈՑԻԱԼԱԿԱՆ ՊԱՇՏՊԱՆՎԱԾՈՒԹՅԱՆ ԼՐԱՑՈՒՑԻՉ ՄԻՋՈՑԱՌՈՒՄՆԵՐԻ ՄԱՍԻՆ

Ի կատարումն Հայաստանի Հանրապետության նախագահի 1992 թվականի հունիսի 21-ի «Հայաստանի Հանրապետության պաշտպանության ժամանակ մարտական գործողությունների մասնակցած, այդ պատճառով հաշմանդամ դարձած զինծառայողների և ազատամարտիկների, ինչպես նաև զոհվածների ընտանիքների սոցիալական պաշտպանվածության լրացուցիչ միջոցառումների մասին» հրամանագրի, Հայաստանի Հանրապետության կառավարությունը որոշում է`

1. Հայաստանի Հանրապետության պաշտպանության նախարարությանը, Հայաստանի Հանրապետության ներքին գործերի նախարարությանը և Հայաստանի Հանրապետության ազգային անվտանգության պետական վարչությանը` մեկշաբաթյա ժամկետում ճշտել Հայաստանի Հանրապետության պաշտպանության ժամանակ մարտական գործողությունների մասնակցած և այդ պատճառով զոհված զինծառայողների և ազատամարտիկների ցուցակները` ըստ շրջանների ու քաղաքների, և համապատասխան փաստաթղթեր ներկայացնել Հայաստանի Հանրապետության ֆինանսների նախարարություն ու պատգամավորների համապատասխան շրջխորհրդի (քաղխորհրդի) գործկոմ` զոհված զինծառայողի կամ ազատամարտիկի ամուսնուն, ամուսին չունենալու դեպքում` չափահաս երեխաներին, երեխաների անչափահաս լինելու դեպքում` խնամակալին, երեխաներ չունենալու դեպքում` ծնողներից որևէ մեկին, իսկ վերջիններս չունենալու դեպքում` կերակրողը կորցրած ընտանիքի անդամ հանդիսացող այլ անձի միանվագ 100 հազար ռուբլի վճարելու համար:

2. Հայաստանի Հանրապետության աշխատանքի և սոցիալական ապահովության նախարարությանը`

ա) Հայաստանի Հանրապետության պաշտպանության նախարարության հետ համատեղ ճշտել հաշմանդամ դարձած զինծառայողների և ազատամարտիկների ցուցակները` ըստ շրջանների ու քաղաքների, և համապատասխան տեղեկանքներ ներկայացնել Հայաստանի Հանրապետության ֆինանսների նախարարություն ու պատգամավորների համապատասխան շրջանային (քաղաքային) խորհրդի գործկոմ.

բ) ապահովել հաշմանդամ դարձած զինծառայողներին և ազատամարտիկներին, ինչպես նաև զոհված զինծառայողների և ազատամարտիկների ընտանիքներին պրոթեզաօրթոպեդիկ պարագաների անվճար տրամադրումը և տարեկան մեկ անգամ` առողջարանային ուղեգրերի անվճար հատկացումը:

3. Հայաստանի Հանրապետության ֆինանսների նախարարությանը` Հայաստանի Հանրապետության պաշտպանության նախարարության, Հայաստանի Հանրապետության ներքին գործերի նախարարության, Հայաստանի Հանրապետության ազգային անվտանգության պետական վարչության ու Հայաստանի Հանրապետության աշխատանքի և սոցիալական ապահովության նախարարության ներկայացրած տեղեկանքների համաձայն համապատասխան ֆինանսական միջոցներ հատկացնել պատգամավորների շրջանային ու քաղաքային խորհուրդների գործադիր կոմիտեներին` Հայաստանի Հանրապետության նախագահի հրամանագրով սահմանված գումարների միանվագ վճարումներն իրականացնելու համար:

4. Պատգամավորների շրջանային և քաղաքային խորհուրդների գործադիր կոմիտեներին`

ա) համապատասխան տեղական բյուջեների միջոցների հաշվին ապահովել (զոհված զինծառայողների և ազատամարտիկների ընտանիքների 100 հազար ռուբլի, 1-ին խմբի հաշմանդամներին` 50 հազար ռուբլի, 2-րդ խմբի հաշմանդամներին` 40 հազար ռուբլի, 3-րդ խմբի հաշմանդամներին` 30 հազար ռուբլի) միանվագ վճարումները, հետագայում նշված գումարները հանրապետական բյուջեից վերականգնելու պայմանով.

բ) ապահովել Հայաստանի Հանրապետության պաշտպանության ժամանակ մարտական գործողությունների մասնակցած, այդ պատճառով հաշմանդամ դարձած զինծառայողների և ազատամարտիկների, ինչպես նաև զոհվածների ընտանիքների կողմից բնակարային և կոմունալ ծառայությունների վարձերի 50 տոկոս զեղչով վճարումը.

գ) ապահովել սույն կետի «բ» ենթակետով նշված կատեգորիաների անձանց բնակարանների անվճար սեփականաշնորհումը.

դ) ըստ ամենայնի օժանդակել կենտրոնական ջեռուցում չունեցող տներում բնակվող Հայաստանի Հանրապետության պաշտպանության ժամանակ զոհված զինծառայողների և ազատամարտիկների ընտանիքներին, ինչպես նաև մարտական գործողությունների պատճառով հաշմանդամ դարձած զինծառայողներին և ազատամարտիկներին վառելիքի հատկացման հարցում, փոխհատուցելով կատարվող ծախսերի 50 տոկոսը:

5. Հայաստանի Հանրապետության տրանսպորտի և հաղորդակցության նախարարությունը, Հայաստանի Հանրապետության կառավարությանն առընթեր ավիացիայի գլխավոր վարչությանը և Հայաստանի Հանրապետության երկաթգծին` ապահովել հանրապետության տարածքում տրանսպորտի բոլոր տեսակներից (բացառությամբ տաքսիի) հաշմանդամ դարձած զինծառայողների և ազատամարտիկների անվճար օգտվելը:

6. Հայաստանի Հանրապետության տրանսպորտի և հաղորդակցության նախարարությունը` ապահովել քաղաքային տրանսպորտից (բացառությամբ տաքսիի), ինչպես նաև գյուղական վայրերում վարչական շրջանի տարածքում ընդհանուր օգտագործման ավտոմոբիլային տրանսպորտից (բացառությամբ տաքսիի) մարտական գործողությունների մասնակցած զինծառայողների և ազատամարտիկների անվճար օգտվելը:

7. Հայաստանի Հանրապետության առողջապահության նախարարությանը` ապահովել Հայաստանի Հանրապետության պաշտպանության ժամանակ մարտական գործողությունների մասնակցած, այդ պատճառով հաշմանդամ դարձած զինծառայողների և ազատամարտիկների համար բժշկի դեղատոմսով դեղորայքի անվճար ձեռքբերումը, ինչպես նաև պետական բուժական հիմնարկներում նրանց արտահերթ և անվճար սպասարկումը:

8. Հայաստանի Հանրապետության կապի նախարարությանը` ապահովել սույն որոշման 4-րդ կետի «բ» ենթակետով նշված կատեգորիաների անձանց համար անվճար և արտահերթ հեռախոսների տեղադրումը, ինչպես նաև նրանց կողմից 50 տոկոս զեղչով հեռախոսային աբոնենտային վարձի վճարումը:

9. Հայաստանի Հանրապետության լուսավորության նախարարությանը, Հայաստանի Հանրապետության մշակույթի նախարարությանը և պատգամավորների շրջանային ու քաղաքային խորհուրդների գործկոմներին` ապահովել հաշմանդամ դարձած զինծառայողների և ազատամարտիկների, ինչպես նաև զոհված զինծառայողների ու ազատամարտիկների երեխաների համար դպրոցական և նախադպրոցական հիմնարկներում վարձի 50 տոկոս զեղչով վճարումը:

10. Հայաստանի Հանրապետության պաշտպանության նախարարությանը, Հայաստանի Հանրապետության ներքին գործերի նախարարությանը, Հայաստանի Հանրապետության ազգային անվտանգության պետական վարչությանը, Հայաստանի Հանրապետության աշխատանքի և սոցիալական ապահովության նախարարությանը, Հայաստանի Հանրապետության կառավարությանն առընթեր մամուլի վարչությանը` հաստատել և մինչև 1992 թվականի հոկտեմբերի 1-ը պատրաստել Հայաստանի Հանրապետության պաշտպանությանը մասնակցած, ինչպես նաև հաշմանդամ դարձած զինծառայողների և ազատամարտիկների արտոնությունների վկայականները:

11. Հայաստանի Հանրապետության ֆինանսների նախարարությանը` նախատեսել սույն որոշման 2-րդ կետի «բ» ենթակետով, 4-րդ կետի «ա», «բ» և «դ» ենթակետերով, 5, 6, 8, 9 և 10-րդ կետերով նախատեսված արտոնությունների հետ կապված ծախսերի կատարման համար Հայաստանի Հանրապետության համապատասխան նախարարությունների, գերատեսչությունների և պատգամավորների շրջանային ու քաղաքային խորհուրդների գործադիր կոմիտեների ֆինանսավորումը:

12. Սույն որոշման մեջ նշված նախարարություններին ու գերատեսչություններին, պատգամավորների շրջանային ու քաղաքային խորհուրդների գործադիր կոմիտեներին` որոշման տեղայնացման համար ընդունել համապատասխան հրամաններ և որոշումներ` մանրամասն նշելով հանձնարարականները, կատարողներին, ժամկետները, և կատարման մասին ինֆորմացիա ներկայացնել Հայաստանի Հանրապետության կառավարություն:

13. Սույն որոշման կատարման վերահսկողությունը դնել Հայաստանի Հանրապետության կառավարության տասներորդ բաժնի վրա:

Հայաստանի Հանրապետության վարչապետ

Խ. Հարությունյան

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ