ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 փետրվարի 1993 թվականի N 45

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԻՋԱԶԳԱՅԻՆ ՊԱՅՄԱՆԱԳՐԵՐՈՎ ՎԱՐԿԵՐԻ ՍՏԱՑՄԱՆ, ԲԱՇԽՄԱՆ ԵՎ ՍՊԱՍԱՐԿՄԱՆ ԿԱՐԳԻ ՄԱՍԻՆ

Հայաստանի Հանրապետության միջազգային պայմանագրերով վարկերի ստացման, բաշխման աշխատանքների կարգավորման և հստակեցման նպատակով Հայաստանի Հանրապետության կառավարությունը որոշում է`

1. Վարկեր ստանալու հարցերով միջազգային պայմանագրերի շուրջ վերջնական բանակցությունների վարման և դրանց կնքման վերաբերյալ որոշումը, ինչպես նաև այդպիսի պայմանագրերով փոխառնված վարկերի տնօրինման կամ իրացման համար իրավասու մարմինների ու կազմակերպությունների ցանկը հաստատում է Հայաստանի Հանրապետության կառավարությունը:

2. Սահմանել, որ Հայաստանի Հանրապետության միջազգային պայմանագրերով նախատեսվող վարկերի ստացման և դրանց նպատակային օգտագործման ընթացակարգային և կազմակերպական աշխատանքներն իրականացնում է Հայաստանի Հանրապետության էկոնոմիկայի նախարարությունը:

3. Նախատեսել, որ միջազգային պայմանագրերով նախատեսված վարկերի բաշխումը, անհրաժեշտության դեպքում, կարող է կատարվել մրցույթի (տենդերի) միջոցով:

Մրցույթի միջոցով վարկեր ստանալու համար շահագրգիռ մարմինները և կազմակերպություններն անհրաժեշտ տեխնիկատնտեսական հիմնավորումներով հայտերը ներկայացնում են Հայաստանի Հանրապետության էկոնոմիկայի նախարարություն և ֆինանսների նախարարություն: Հայաստանի Հանրապետության էկոնոմիկայի նախարարությունը և ֆինանսների նախարարությունը նշված հայտերի համատեղ քննարկման հիման վրա առաջարկություններ են ներկայացնում Հայաստանի Հանրապետության կառավարություն:

4. Սահմանել, որ Հայաստանի Հանրապետության միջազգային պայմանագրերով վարկերի սպասարկումը իրականացնում է Հայաստանի Հանրապետության ֆինանսների նախարարությունը` Հայաստանի Հանրապետության ֆինանսների նախարարության կողմից Հայաստանի Հանրապետության էկոնոմիկայի նախարարության և Հայաստանի Հանրապետության բանկի հետ համատեղ մշակված և հաստատված կարգի համաձայն:

(փոփ. 21.04.93 N 185 որոշում)

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ