ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ

Ո Ր Ո Շ ՈՒ Մ Ը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԳԵՐՄԱՆԻԱՅԻ ԴԱՇՆԱՅԻՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՖԻՆԱՆՍԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ 2003 ԹՎԱԿԱՆԻ ՀՈՒՆՎԱՐԻ 14-ԻՆ ԲԵՌԼԻՆՈՒՄ ՍՏՈՐԱԳՐՎԱԾ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ

Քաղ. Երևան

1 ապրիլի 2003 թ.

Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի, Վ. Սահակյանի, Մ. Սևյանի,

մասնակցությամբ` Հանրապետության Նախագահի պաշտոնական ներկայացուցիչ` Հայաստանի Հանրապետության ֆինանսների և էկոնոմիկայի նախարարի տեղակալ Տիգրան Խաչատրյանի,

համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,

դռնբաց նիստում քննեց «Հայաստանի Հանրապետության կառավարության և Գերմանիայի Դաշնային Հանրապետության կառավարության միջև ֆինանսական համագործակցության մասին 2003 թվականի հունվարի 14-ին Բեռլինում ստորագրված համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:

Գործի քննության առիթը Հանրապետության Նախագահի դիմումն է սահմանադրական դատարան:

Լսելով սույն գործով զեկուցող` Հայաստանի Հանրապետության սահմանադրական դատարանի անդամ Ա. Գյուլումյանի հաղորդումը, Հանրապետության Նախագահի ներկայացուցիչ Տ. Խաչատրյանի բացատրությունները, հետազոտելով համաձայնագիրն ու գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.

1. Սույն համաձայնագիրն ստորագրվել է Կողմերի միջև բարեկամական հարաբերությունները ֆինանսական համագործակցության միջոցով ամրապնդելու, ինչպես նաև Հայաստանի Հանրապետության տնտեսական և սոցիալական զարգացմանը նպաստելու նպատակով:

2. Համաձայնագիրը հնարավորություն է ընձեռում Հայաստանի Հանրապետության կառավարությանը Մայնի Ֆրանկֆուրտի վերականգնման վարկերի բանկից ստանալ մինչև երեք միլիոն ութ հարյուր երեսունչորս հազար վեց հարյուր ութսունինը եվրո տասնմեկ ցենտ (3.834.689.11 եվրո) ընդհանուր գումարի դրամաշնորհ` «Հարավային Կովկաս-Հայաստան տարածաշրջանային վարկային երաշխիքների հիմնադրամ» ծրագրի իրականացման և մինչև հինգ հարյուր տասնմեկ հազար երկու հարյուր իննսունմեկ եվրո ութսունութ ցենտ (511.291.88 եվրո) ընդհանուր գումարի դրամաշնորհ` այդ ծրագրի իրականացման և սպասարկման համար անհրաժեշտ հարակից միջոցառումների իրականացման նպատակով:

3. «Հարավային Կովկաս-Հայաստան տարածաշրջանային վարկային երաշխիքների հիմնադրամ» ծրագրի նպատակն է երաշխիքային հիմնադրամի միջոցով տեղական բանկերի համար ներգրավել փոխատվական միջոցներ, որոնք փոքր և միջին ձեռնարկությունների համար կապահովեն փոխատվական միջոցների շուկայի երկարաժամկետ մատչելիությունը:

4. Համաձայնագիրը նշված ծրագրի և հարակից միջոցառումների իրականացման նպատակով դրամաշնորհ ստանալու հնարավորության իրացումը կախվածության մեջ է դնում նախնական ուսումնասիրությունների արդյունքում ծրագրի հավանության արժանանալու հանգամանքից: Այլապես, ըստ համաձայնագրի` Հայաստանի Հանրապետության կառավարությունը հնարավորություն կունենա ստանալ դրամաշնորհի չափին համարժեք վարկ:

Համաձայնագիրը նախատեսում է նաև Կողմերի փոխադարձ համաձայնությամբ` «Հարավային Կովկաս-Հայաստան տարածաշրջանային վարկային երաշխիքների հիմնադրամ» ծրագիրն այլ նախագծերով փոխարինելու հնարավորություն: Ընդ որում, համաձայնագրով նախատեսված ոլորտներին վերաբերող նախագծերի ֆինանսավորման դեպքում համաձայնագրով նախատեսված գումարը կտրամադրվի որպես դրամաշնորհ:

Համաձայնագրի 3-րդ հոդվածի համաձայն` Վերականգնման վարկերի բանկն ազատվում է այն բոլոր հարկերից և պետական այլ վճարումներից, որոնք առնչվում են Հայաստանի Հանրապետությունում համաձայնագրի 2-րդ հոդվածում նախատեսված վարկային պայմանագրերի կնքման և իրականացման հետ:

5. Հայաստանի Հանրապետության կառավարությունը պարտավորվում է ապահովել Գերմանիայի Դաշնային Հանրապետության փոխադրող ձեռնարկությունների իրավահավասար մասնակցությունը դրամաշնորհների կամ վարկերի տրամադրումից բխող փոխադրումների իրականացմանը, ինչպես նաև, անհրաժեշտության դեպքում, այդ ձեռնարկություններին տալ արտոնող թույլտվություններ:

Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.

1. Հայաստանի Հանրապետության կառավարության և Գերմանիայի Դաշնային Հանրապետության կառավարության միջև ֆինանսական համագործակցության մասին 2003 թ. հունվարի 14-ին Բեռլինում ստորագրված համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:

2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:

Հայաստանի Հանրապետության սահմանադրական դատարանի նախագահ	Գ. Հարությունյան
1 ապրիլի 2003 թվականի ՍԴՈ-410