ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎ
Ո Ր Ո Շ ՈՒ Մ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ ՎԵՐԱՀՍԿԻՉ ՊԱԼԱՏԻ ԿԱՆՈՆԱԴՐՈՒԹՅԱՆ ՄԱՍԻՆ
Հայաստանի Հանրապետության Ազգային ժողովը որոշում է.
Հաստատել Հայաստանի Հանրապետության Ազգային ժողովի վերահսկիչ պալատի կանոնադրությունը:
|
Հայաստանի Հանրապետության Ազգային ժողովի նախագահ |
Բ. Արարքցյան |
|
|
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ ՎԵՐԱՀՍԿԻՉ ՊԱԼԱՏԻ ԿԱՆՈՆԱԴՐՈՒԹՅՈՒՆԸ
ՀՈԴՎԱԾ 1.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ ՎԵՐԱՀՍԿԻՉ ՊԱԼԱՏԻ ԿԱՆՈՆԱԴՐՈՒԹՅԱՄԲ ԿԱՐԳԱՎՈՐՎՈՂ ՀԱՐՑԵՐԸ
«Հայաստանի Հանրապետության Ազգային ժողովի վերահսկիչ պալատի (հետայսու` Վերահսկիչ պալատ) մասին» օրենքի 13 հոդվածի համաձայն, սույն կանոնադրությունը կանոնակարգում է Վերահսկիչ պալատի աշխատանքը, սահմանում է դրա կառուցվածքը, կազմը և աշխատակիցների իրավունքներն ու պարտականությունները:
Վերահսկիչ պալատը գործում է Հայաստանի Հանրապետության Սահմանադրության և «Հայաստանի Հանրապետության Ազգային ժողովի վերահսկիչ պալատի մասին» օրենքով իրեն վերապահված լիազորությունների շրջանակներում` այլ օրենքների, Ազգային ժողովի որոշումների և սույն կանոնադրության հիման վրա:
|
ՀՈԴՎԱԾ 2. |
ՎԵՐԱՀՍԿԻՉ ՊԱԼԱՏԻ ԱՇԽԱՏԱՆՔԻ ԿԱԶՄԱԿԵՐՊՈՒՄԸ |
Վերահսկիչ պալատն իր աշխատանքները կազմակերպում է տարեկան ծրագրի հիման վրա:
Պետական բյուջեի կատարման մասին և Կենտրոնական բանկի տարեկան հաշվետվությունները Վերահսկիչ պալատին են տրամադրվում Հայաստանի Հանրապետության Ազգային ժողով եզրակացություն ներկայացնելուց առնվազն 15 օր առաջ, այլ փաստաթղթերը` առնվազն 5 օր առաջ:
Վերահսկիչ պալատի աշխատանքների կազմակերպման, դրա կողմից իրականացվող աուդիտի մեթոդաբանական հարցերի քննարկման, կատարված ուսումնասիրությունների և վերլուծությունների արդյունքների, Հայաստանի Հանրապետության Ազգային ժողով ներկայացվող եզրակացությունների և հաշվետվությունների, տեղեկանքների, արձանագրությունների հաստատման նպատակով ստեղծվում է Վերահսկիչ պալատի խորհուրդ` կազմված Վերահսկիչ պալատի նախագահից, նրա տեղակալից և Վերահսկիչ պալատի բաժինների վարիչներից:
Վերահսկիչ պալատի կազմում գործում են 4 բաժիններ`
- պետական բյուջեի աուդիտի.
- սեփականաշնորհման և ապապետականացման աուդիտի.
- արտասահմանյան փոխառությունների և վարկերի աուդիտի.
- ամփոփ-վերլուծական և տեղեկատվական-մեթոդաբանական:
|
ՀՈԴՎԱԾ 3. |
ՎԵՐԱՀՍԿԻՉ ՊԱԼԱՏԻ ԽՈՐՀՈՒՐԴԸ |
Վերահսկիչ պալատի խորհուրդը`
- քննարկում և հավանություն է տալիս Վերահսկիչ պալատի գործունեության տարեկան ծրագրի, դրանում կատարվող փոփոխությունների և լրացումների նախագծերին, Վերահսկիչ պալատի տարեկան հաշվետվությանը.
- քննարկում և հաստատում է պետական բյուջեի կատարման մասին Հայաստանի Հանրապետության կառավարության տարեկան հաշվետվության, պետական ձեռնարկությունների և անավարտ շինարարության օբյեկտների սեփականաշնորհման և ապապետականացման տարեկան ծրագրի կատարման հաշվետվության, Կենտրոնական բանկի տարեկան հաշվետվության վերաբերյալ Վերահսկիչ պալատի եզրակացությունները.
- հաստատում է Վերահսկիչ պալատի բաժինների գործունեության ուղղությունները և դրանց միջև աշխատանքի բաժանումը.
- Վերահսկիչ պալատի գործունեության տարեկան ծրագրի շրջանակներում հաստատում է ընթացիկ գործունեության ծրագրեր.
- որոշումներ է ընդունում տարեկան ծրագրի շրջանակներում աուդիտ իրականացնելու կարգի և ժամկետների մասին.
- որոշումներ է ընդունում Վերահսկիչ պալատի կողմից արտածրագրային միջոցառումներ իրականացնելու մասին.
- յուրաքանչյուր եռամսյակ քննարկում է Վերահսկիչ պալատի գործունեության ընթացիկ ծրագրերի կատարումը և հաստատում Վերահսկիչ պալատի աուդիտորների հաշվետվությունները.
- քննարկում և հաստատում է ընթացիկ տարում պետական բյուջեի կատարման մասին տեղեկանքներ` յուրաքանչյուր կիսամյակ Ազգային ժողով դրանք ներկայացնելու համար.
- հաստատում է Վերահսկիչ պալատի գործունեության տարեկան հաշվետվությունը.
- իրականացնում է «Հայաստանի Հանրապետության Ազգային ժողովի վերահսկիչ պալատի մասին» օրենքով Վերահսկիչ պալատին վերապահված այլ լիազորություններ:
|
ՀՈԴՎԱԾ 4. |
ՎԵՐԱՀՍԿԻՉ ՊԱԼԱՏԻ ՆԱԽԱԳԱՀԸ և ՆԱԽԱԳԱՀԻ ՏԵՂԱԿԱԼԸ |
Վերահսկիչ պալատի նախագահը`
- իրականացնում է Վերահսկիչ պալատի գործունեության ընդհանուր ղեկավարումը և կազմակերպում դրա աշխատանքները.
- համակարգում է Վերահսկիչ պալատի բաժինների աշխատանքը և կազմակերպում դրանց գործունեությունը.
- Վերահսկիչ պալատի գործունեությունն ապահովելու նպատակով լուծում է կազմակերպական, տեղեկատվական, նյութատեխնիկական և այլ բնույթի հարցեր.
- կազմակերպում է Վերահսկիչ պալատի խորհրդի նիստերի նախապատրաստումը և հրավիրումը, նախագահում է այդ նիստերին, ստորագրում է Վերահսկիչ պալատի որոշումները, վերահսկում դրանց կատարումը.
- ներկայացնում է Վերահսկիչ պալատը պետական և ոչ պետական մարմիններում, այլ պետությունների վերահսկիչ պալատների, ինչպես նաև միջազգային կազմակերպությունների հետ հարաբերություններում.
- Վերահսկիչ պալատի անունից ստորագրում է աուդիտի մասին եզրակացություններ և տեղեկանքներ.
- Վերահսկիչ պալատի հաստատմանն է ներկայացնում Վերահսկիչ պալատի բաժինների գործունեության հիմնական ուղղությունները.
- Վերահսկիչ պալատի աշխատանքների մասին հաշվետվություններ է ներկայացնում Ազգային ժողով.
Վերահսկիչ պալատի նախագահի տեղակալը կատարում է նախագահի հանձնարարությունները, իսկ վերջինիս բացակայության դեպքում` փոխարինում նրան:
|
ՀՈԴՎԱԾ 5. |
ՎԵՐԱՀՍԿԻՉ ՊԱԼԱՏԻ ԲԱԺԻՆՆԵՐԻ ՎԱՐԻՉՆԵՐԸ |
Վերահսկիչ պալատի բաժինների վարիչները`
- կազմակերպում են բաժինների աշխատանքը.
- տարեկան և ընթացիկ գործունեության ծրագրերով սահմանված աուդիտի կատարման ընթացքի մասին զեկուցում են Վերահսկիչ պալատի նախագահին.
- աուդիտի արդյունքների մասին տեղեկանքներ են ներկայացնում Վերահսկիչ պալատի նախագահին.
- Վերահսկիչ պալատի նախագահին առաջարկություններ են ներկայացնում աշխատակիցներին խրախուսելու կամ նրանց նկատմամբ կարգապահական ներգործության միջոցներ կիրառելու մասին:
|
ՀՈԴՎԱԾ 6. |
ՎԵՐԱՀՍԿԻՉ ՊԱԼԱՏԻ ԱՇԽԱՏԱԿԻՑՆԵՐԻ ԻՐԱՎՈՒՆՔՆԵՐԸ և ՊԱՐՏԱԿԱՆՈՒԹՅՈՒՆՆԵՐՆ ԱՈՒԴԻՏ ԻՐԱԿԱՆԱՑՆԵԼԻՍ |
Աուդիտ իրականացնելու հիմքը Վերահսկիչ պալատի նախագահի հրամանն է, որում նշվում են ուսումնասիրության օբյեկտը, նպատակը, ժամկետը և այն իրականացնող լիազորված անձինք:
Վերահսկիչ պալատն իր կողմից իրականացվող միջոցառումներին իրավունք ունի ներգրավել պետական մարմինների ներկայացուցիչներին, ինչպես նաև, պայմանագրային հիմունքներով` մասնագիտացված աուդիտային կազմակերպություններին:
Աուդիտի ենթակա փաստաթղթերում օրենքների կամ այլ իրավական` նորմատիվ ակտերի պահանջների խախտումների, ինչպես նաև պետական միջոցների և պետական սեփականության այլ տարրերի ոչ արդյունավետ կամ ոչ նպատակային օգտագործման փաստեր հայտնաբերելու դեպքում աուդիտորն արձանագրություն է կազմում դրանց մասին:
Արձանագրության տիպային ձևերը հաստատում է Վերահսկիչ պալատը:
Աուդիտ իրականացնելու հանձնարարականը ներկայացնող աուդիտորին աուդիտի ենթակա օբյեկտում իր պարտականությունների կատարմանը խոչընդոտելու դեպքում, վերջինս պարտավոր է այդ մասին կազմել համապատասխան արձանագրություն` նշելով ամսաթիվը, ժամը, վայրը, անօրինական գործողություններ թույլ տված պաշտոնյայի կամ այլ աշխատակցի տվյալները:
Կազմված արձանագրությունը ներկայացնում է Վերահսկիչ պալատի համապատասխան բաժնի վարիչին, որն անհրաժեշտ միջոցներ է ձեռնարկում օրենքի պահանջների կատարումը ապահովելու համար և հայտնաբերված անօրինականության մասին զեկուցում է Վերահսկիչ պալատի նախագահին:
|
ՀՈԴՎԱԾ 7. |
ՎԵՐԱՀՍԿԻՉ ՊԱԼԱՏԻ ԱՇԽԱՏԱԿԻՑՆԵՐԻ ԻՐԱՎՈՒՆՔՆԵՐԸ և ՊԱՐՏԱԿԱՆՈՒԹՅՈՒՆՆԵՐԸ ԱՈՒԴԻՏԻ ԱՐԴՅՈՒՆՔՆԵՐԸ ՁևԱԿԵՐՊԵԼԻՍ |
Աուդիտ կատարելուց հետո կազմվում է աուդիտի արդյունքների մասին հաշվետվություն, որն ստորագրում է Վերահսկիչ պալատի համապատասխան բաժնի ղեկավարը: Հաշվետվության մեջ նշվում են`
- անհրաժեշտ ելակետային տվյալները (աուդիտի հիմքը, նպատակը, առարկան, օբյեկտը և աուդիտն իրականացնող անձինք).
- պահանջվող փաստաթղթերի ցանկը.
- պահանջված և չստացված փաստաթղթերի ցանկը` (նշելով մերժման պատճառները).
- ուսումնասիրված փաստաթղթերի ցանկը.
- ուսումնասիրված օբյեկտների ցանկը, որոնց տվյալները համեմատվել են փաստաթղթերի տվյալների հետ.
- աուդիտի ենթարկված պետական, տեղական ինքնակառավարման մարմնի, ձեռնարկության, հիմնարկի կամ կազմակերպության գործունեության մեջ պետական միջոցների օգտագործման մասին օրենքների և նորմատիվ ակտերի պահանջների խախտման հայտնաբերված փաստերը (նշելով օրենքների և նորմատիվ ակտերի կոնկրետ հոդվածները, որոնց պահանջները խախտված են), պետական բյուջեին, պետական գույքին և պետական սեփականության այլ տարրերին հասցված վնասի չափերը, եթե այդպիսիք առկա են.
- պետական միջոցների ոչ նպատակային և (կամ) ոչ արդյունավետ, օգտագործման փաստերը.
- աուդիտի համապատասխան բնագավառում վարչական և գերատեսչական վերահսկողությամբ հայտնաբերված թերությունները և բացթողումները.
- աուդիտի համապատասխան բնագավառում օրենսդրական և նորմատիվ կանոնակարգման մեջ հայտնաբերված թերությունները և բացթողումները.
- առաջարկություններ միջոցների վերադարձման և վնասի հատուցման վերաբերյալ.
- առաջարկություններ աուդիտի առարկայի գծով և աուդիտի բնագավառում օրենքների և նորմատիվ ակտերի մշակման կամ գործող օրենքներում և նորմատիվ ակտերում փոփոխություններ և լրացումներ կատարելու վերաբերյալ:
Հաշվետվության մեջ նշվում է նաև պետական, տեղական ինքնակառավարման մարմնի, ձեռնարկության, հիմնարկի և կազմակերպության ղեկավարին աուդիտի արձանագրությանը ծանոթացնելու մասին, իսկ վերջինիս կողմից այն չստորագրվելու դեպքում դրա պատճառները:
Հաշվետվության հավելվածում նշվում է այն բոլոր փաստաթղթերի ցանկը (ակտեր, տեղեկանքներ և այլն), որոնք ելակետային տեղեկություններ են պարունակում աուդիտի արդյունքների մասին:
Աուդիտի արդյունքների մասին հաշվետվությունն, արձանագրությունների և զեկուցագրերի հետ միասին Վերահսկիչ պալատ է ներկայացվում աուդիտի ավարտից ոչ ուշ, քան 10 օրվա ընթացքում:
Վերահսկիչ պալատն աուդիտի արդյունքների մասին հաշվետվությունը քննարկում է այն ստանալու օրվանից երկու շաբաթվա ընթացքում:
Պետական և տեղական ինքնակառավարման մարմիններում, ինչպես նաև ձեռնարկություններում, հիմնարկներում և կազմակերպություններում իրականացված աուդիտի նյութերի քննարկման ժամանակ դրանց ղեկավարները նախապես տեղյակ են պահվում քննարկման օրվա մասին և հրավիրվում են նիստին:
Աուդիտի գործընթացի ավարտը Վերահսկիչ պալատի կողմից աուդիտի արդյունքների մասին որոշում ընդունելու օրն է:
|
ՀՈԴՎԱԾ 8. |
ՎԵՐԱՀՍԿՈՂՈՒԹՅՈՒՆՆ ԱՈՒԴԻՏԻ ԱՐԴՅՈՒՆՔՆԵՐՈՎ ՎԵՐԱՀՍԿԻՉ ՊԱԼԱՏԻ ՊԱՀԱՆՋՆԵՐԻ ԿԱՏԱՐՄԱՆ ՆԿԱՏՄԱՄԲ |
Աուդիտի արդյունքներով Վերահսկիչ պալատի պահանջների կատարման նկատմամբ վերահսկողությունը դրվում է աուդիտ իրականացրած լիազորված անձի վրա, որը Վերահսկիչ պալատ տեղեկանք է ներկայացնում վերահսկողության տակ գտնվող փաստաթղթի կատարման կամ լրացուցիչ միջոցներ ձեռնարկելու անհրաժեշտության մասին: