հայաստանի հանրապետության գերագույն խորհՈՒրդ
ո ր ո շ ու մ
Հայաստանի Հանրապետության հողային օրենսգիրքը կիրարկելու մասին
Հայաստանի Հանրապետության Գերագույն խորհուրդը որոշում է.
1. Հայաստանի Հանրապետության հողային օրենսգիրքը կիրարկել 1991 թ. մարտի 15-ից
2. Մինչև Հայաստանի Հանրապետության օրենսդրությունը Հայաստանի Հանրապետության հողային օրենսգրքին համապատասխանեցնելը Հայաստանի Հանրապետության օրենսդրության գործող ակտերը կիրառվում են այնքանով, որքանով դրանք չեն հակասում օրենսգրքին:
3. Հայաստանի Հանրապետության հողային օրենսգիրքը կիրառվում է այն իրավահարաբերությունների նկատմամբ, որոնք կառաջանան օրենսգիրքը կիրարկելուց հետո, այսինքն` 1991 թ. մարտի 15-ից:
4. Մինչև 1991 թ. մարտի 15-ը առաջացած հողային իրավահարաբերությունների նկատմամբ Հայաստանի Հանրապետության հողային օրենսգիրքը կիրառվում է այն իրավունքների և պարտականությունների հանդեպ, որոնք կառաջանան օրենսգիրքը կիրարկելուց հետո:
5. Սահմանել, որ հողամասեր տրամադրելու մասին այն որոշումները, որոնք համապատասխան մարմինների կողմից իրենց իրավասության սահմաններում ընդունվել են մինչև 1991 թ. մարտի 15-ը, բայց մինչև Հայաստանի Հանրապետության հողային օրենսգրքի կիրարկման պահը չեն կատարվել, ենթակա են կատարման օրենսգրքի պահանջներին համապատասխան:
6. Հանձնարարել Հայաստանի Հանրապետության Նախարարաց խորհրդին` մինչև 1991 թ. մարտի 15-ը.
Հայաստանի Հանրապետության Գերագույն խորհրդին առաջարկություններ ներկայացնել Հայաստանի Հանրապետության գործող օրենսդրական ակտերի մեջ Հայաստանի Հանրապետության հողային օրենսգրքից բխող փոփոխություններ և լրացումներ կատարելու մասին.
Հայաստանի Հանրապետության նախարարաց խորհրդի որոշումները համապատասխանեցնել Հայաստանի Հանրապետության հողային օրենսգրքին.
ապահովել Հայաստանի Հանրապետության նախարարությունների, պետական կոմիտեների և գերատեսչությունների կողմից Հայաստանի Հանրապետության հողային օրենսգրքին հակասող նորմատիվ ակտերի վերանայումն ու վերացումը.
իրականացնել Հայաստանի Հանրապետության հողային օրենսգրքի իրացմանը նպատակաուղղված միջոցառումների համալիրը, այդ թվում` հողի վճարի սկզբունքների սահմանումը, հողաշինարարության հիմնական դրույթների, հողային կադաստրի և հողերի համակարգված դիտարկման վարման կարգի հաստատումը, այնպիսի նոր պետական մարմինների ստեղծումը, որոնք կապահովեն հողերի համակարգված դիտարկման, հողային կադաստրի, հողաշինարարության վարումը, հողերի օգտագործման ու պահպանման պետական վերահսկողությունը:
7. 1991 թ. մարտի 15-ից ուժը կորցրած ճանաչել հայկական ՍՍՀ 1970 թ. դեկտեմբերի 18-ի օրենքով հաստատված հայկական ՍՍՀ հողային օրենսգիրքը` բոլոր փոփոխություններով և լրացումներով հանդերձ:
8. Հայաստանի Հանրապետության Գերագույն խորհրդի ագրարային և գյուղի զարգացման հարցերի, բնության պահպանության և բնական պաշարների հարցերի և իրավական հարցերի մշտական հանձնաժողովներին հանձնարարել ապահովել սույն որոշմամբ նախատեսված միջոցառումների իրացման ընթացքի վերահսկողությունը և անհրաժեշտության դեպքում համապատասխան առաջարկություններ մտցնել Հայաստանի Հանրապետության Գերագույն խորհուրդ:
| Հայաստանի Հանրապետության Գերագույն խորհրդի նախագահ |
|
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|