ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

Հ Ր Ա Մ Ա Ն

«30» մայիսի 2024 թ.

N 46-Ն

Հիմք ընդունելով «Նախադպրոցական կրթության մասին» օրենքի 24-րդ հոդվածի 1-ին մասի 13-րդ կետի պահանջը՝

1. Հաստատել «Նախադպրոցական ուսումնական հաստատություններում կրթական գործընթացի կազմակերպման համար գործածության ենթակա փաստաթղթերի անվանացանկը և ձևերը»՝ համաձայն հավելված 1-ի:

2. Հաստատել «Նախադպրոցական ուսումնական հաստատություններում կրթական գործընթացի կազմակերպման համար գործածության ենթակա փաստաթղթերի վարելու կարգը»՝ համաձայն հավելված 2-ի:

3. Սահմանել, որ սույն հրամանի հավելված N 1-ի 5-ից 10-րդ կետերում նշված փաստաթղթերը 2024 թվականի սեպտեմբերի 1-ից պետք է վարվեն միայն էլեկտրոնային եղանակով:

4. Սույն հրամանն ուժի մեջ է մտնում 2024-2025 ուսումնական տարվանից:

5/30/2024

Ժ. ԱՆԴՐԵԱՍՅԱՆ

Հավելված 1  Կրթության, գիտության,  մշակույթի և սպորտի նախարարի 2024 թվականի մայիսի 30-ի N 46-Ն հրամանի

1. Նախադպրոցական ուսումնական հաստատություններում (այսուհետ՝ հաստատություն) կրթական գործընթացի կազմակերպման համար գործածության ենթակա փաստաթղթերն են՝

1) հաստատության տարեկան աշխատանքային պլան. (Ձև 1)

2) մեթոդիստի՝ հաստատության տնօրենի ուսումնական գծով տեղակալի տարեկան աշխատանքային պլան.

3) մանկավարժական աշխատողների ուսումնադաստիարակչական աշխատանքների պլան.

4) հաստատության մանկավարժական խորհրդի նիստի արձանագրություն.

5) սանի անձնական գործ

6) սաների շարժի մատյան.

7) սաների հաշվառման մատյան.

8) աշխատողի անձնական գործ

9) հաստիքացուցակ.

10) տարիֆիկացիոն մատյան՝ ոչ պետական ուսումնական հաստատությունների դեպքում` հիմնադրի որոշմամբ:

2. Սույն անվանացանկում նշված փաստաթղթերը (բացառությամբ տարիֆիկացիոն մատյանի) ենթակա են գործածության բոլոր հաստատություններում՝ անկախ դրանց կազմակերպական-իրավական ձևից և ենթակայությունից:

Հավելված 2  Կրթության, գիտության,  մշակույթի և սպորտի նախարարի 2024 թվականի մայիսի 30-ի N 46-Ն հրամանի

1. Սույն կարգով կարգավորվում են նախադպրոցական ուսումնական հաստատություններում (այսուհետ՝ հաստատություն) գործածվող փաստաթղթերի վարելու հետ կապված իրավահարաբերությունները։

1. Հաստատության տարեկան աշխատանքային պլան

2. Հաստատության տարեկան աշխատանքային պլանը (այսուետ՝ աշխատանքային պլան) քննարկվում է տվյալ ուսումնական տարվա մանկավարժական խորհրդի առաջին նիստում, հաստատվում է տնօրենի կողմից և հրապարակվում հաստատության պաշտոնական կայքում:

3. Աշխատանքային պլանը կազմվում է նախորդ ուստարվա ներքին գնահատման արդյունքների վերլուծության հիման վրա:

4. Աշխատանքային պլանում ըստ ամիսների ներկայացվում են ուսումնադաստիարակչական և ֆինանսատնտեսական աշխատանքները:

5. Աշխատանքային պլանը ներառում է տվյալ ուսումնական տարվա՝

1) առաջնահերթ խնդիրները.

2) պարապմունքների բաշխման ցանկը՝ ըստ տարիքային խմբերի.

3) օրվա կանոնակարգը՝ ըստ տարիքային խմբերի.

4) ծրագրամեթոդական գրականության ցանկը.

5) ծնողական կրթության թեմաները (ժամանակացույց).

6) ուսումնադաստիարակչական աշխատանքների, այդ թվում՝ պարապմունքների դիտարկման թերթիկները. (Ձև 2)

7) ուսումնադաստիարակչական աշխատանքների կատարողականի վերաբերյալ եռամսյակային հաշվետվությունը:

2. Մեթոդիստի՝ հաստատության տնօրենի ուսումնական գծով տեղակալի տարեկան աշխատանքային պլան

6. Մեթոդիստի տարեկան աշխատանքային պլանը կազմվում է հաստատության տարեկան աշխատանքային պլանի ուսումնադաստիարակչական աշխատանքներ բաժնի հիման վրա:

7. Մեթոդիստի տարեկան աշխատանքային պլանը հաստատվում է հաստատության տնօրենի կողմից՝ օգոստոսի 25-ից 30-ը:

8. Մեթոդիստի տարեկան աշխատանքային պլանում ի թիվս սույն կարգի 5-րդ կետում նշված փաստաթղթերի ներառվում են նաև՝

1) ուսումնադաստիարակչական աշխատանքների դիտարկումների ժամանակացույցը.

2) մեթոդական խորհրդատվությունների, դասընթացների ժամանակացույցը, արձանագրությունները:

3. Մանկավարժական աշխատողների ուսումնադաստիարակչական աշխատանքների պլան

9. Դաստիարակների, երաժշտության դաստիարակների, ֆիզհրահանգիչների կողմից իրականացվող ուսումնադաստիարակչական աշխատանքների պլանավորումը պետք է բխի հիմնական կամ այլընտրանքային ծրագրի պահանջներից:

10. Մանկավարժական աշխատողների կողմից իրականացվող ուսումնադաստիարակչական աշխատանքների պլանում ներառվում են՝

1) տվյալ տարիքային խմբի պարապմունքների բաշխման ցանկը, օրվա կանոնակարգը.

2) ծրագրամեթոդական գրականության ցանկը.

3) օրվա ընթացքում սաների գործունեության տարբեր ձևերի պլանավորումը.

4) սաների զարգացման ընթացքի դիտարկման և գնահատման թերթիկները.

5) ընտանիքի հետ համագործակցության գործիքակազմը (թեմաներ, ժամանակացույց, արձանագրություն).

6) եռամսյակային հաշվետվությունները:

11. Լրացուցիչ կրթական ծառայությունների մանկավարժների կողմից իրականացվող ուսումնադաստիարակչական աշխատանքների պլանավորումը պետք է իրականացվի լրացուցիչ կրթական ծրագրի բոլոր պահանջների հաշվառմամբ:

4. Հաստատության մանկավարժական խորհրդի նիստի արձանագրություն

12. Հաստատության մանկավարժական խորհրդի նիստի արձանագրությունը կազմվում է մանկավարժական խորհրդի քարտուղարի կողմից և եռօրյա ժամկետում վավերացվում է խորհրդի նախագահի կողմից:

13. Հաստատության մանկավարժական խորհրդի նիստի արձանագրությունը պարունակում է հետևյալ տեղեկատվությունը՝

1) արձանագրության հերթական համարը.

2) նիստի անցկացման օրը, ամիսը, տարեթիվը.

3) նիստին մասնակցողների թիվը.

4) նիստի օրակարգը.

5) քննարկված հարցերի ամփոփ բովանդակությունը.

6) քննարկված հարցերի վերաբերյալ մանկավարժական խորհրդի կողմից ընդունված որոշումները:

14. Տվյալ ուսումնական տարվա արձանագրությունները հավաքվում են առանձին թղթապանակում, ուսումնական տարվա ավարտից հետո կարվում են՝ ձևավորելով մանկավարժական խորհրդի արձանագրությունների մատյան:

5. Սանի անձնական գործ

15. Սանի անձնական էլեկտրոնային գործը (այսուհետ` անձնական գործ) սանի մասին ամփոփ տեղեկություններ պարունակող փաստաթղթերի և նյութերի ամբողջությունն է, որը ձևավորվում և պահպանվում է Կրթության, գիտության, մշակույթի և սպորտի նախարարության «Կրթական տեխնոլոգիաների ազգային կենտրոն» պետական ոչ առևտրային կազմակերպության կողմից վարվող «Նախադպրոցական կրթության կառավարման տեղեկատվական համակարգ՝ վարչական ռեգիստրում (այսուհետ` համակարգ) սանի անհատական տվյալները մուտքագրելու միջոցով՝ ինքնաշխատ եղանակով։

16. Սանի անձնական գործը լրացնում է տնօրենի հրամանով նշանակված աշխատողը։

17. Սանի տվյալները համակարգ մուտքագրվում են երեխային հաստատություն ընդունելու օրվան հաջորդող մեկ աշխատանքային օրվա ընթացքում։

18. Մուտքագրված տվյալների իսկության և ամբողջականության համար պատասխանատու է հաստատության տնօրենը։

19. Սանի անհատական տվյալներն են․

1) հանրային ծառայությունների համարանիշը կամ օրենքով սահմանված կարգով դրանից հրաժարվելու մասին տեղեկանքի համարը.

2) անունը, ազգանունը, հայրանունը.

3) ծննդյան օրը, ամիսը և տարեթիվը.

4) անձը հաստատող փաստաթղթի տեսակը և համարը.

5) ընդունվելու տարին, ամիսն ու ամսաթիվը (լրացվում է միայն երեխայի տվյալները առաջին անգամ մուտքագրելիս).

6) սեռը.

7) քաղաքացիությունը.

8) ազգությունը.

9) հաշվառման հասցեն.

10) փաստացի բնակության վայրը հաշվառման վայրի հետ համընկնելու մասին նշում.

11) կրթության և զարգացման առանձնահատուկ պայմանների կարիքի մասին նշում.

12) ծնողի կամ օրինական ներկայացուցչի անունը, ազգանունը, հայրանունը, հետադարձ կապի տվյալներ:

6. Սաների շարժի մատյան

20. Սաների շարժի մատյանը ձևավորվում և պահպանվում է համակարգում սանի անհատական տվյալները մուտքագրելու միջոցով՝ ինքնաշխատ եղանակով։

21. Շարժի մատյանում գրանցվում են սանի ընդունման, ազատման և տարիքային խմբից խումբ տեղափոխման մասին իրավական ակտերի համարը, տարին, ամիսն ու ամսաթիվը:

7. Սաների հաշվառման մատյան

22. Սաների հաշվառման մատյանը (այսուհետ՝ մատյան) ձևավորվում է համակարգում տվյալ խմբի կազմավորման հիման վրա՝ ինքնաշխատ եղանակով։

23. Մատյանում ցուցադրվում է՝

1) տարիքային խումբը.

2) խմբում ընդգրկված սաների ցանկը.

3) դաստիարակի անունը, ազգանունը, հայրանունը.

4) տվյալ տարիքային խմբի պարապմունքների բաշխման ցանկը.

5) ամսաթիվը, ամիսն ու տարին.

6) սաների հաճախումների արձանագրումը:

24. Մատյանը ցուցադրվում է ամսական բաժանումներով։

25. Մատյանի լրացումը (գործածումը) իրականացնում է տվյալ խմբի դաստիարակը։

8. Աշխատողի անձնական գործ

26. Աշխատողի անձնական էլեկտրոնային գործը (այսուհետ` գործ) աշխատողի աշխատանքային գործունեության մասին ամփոփ տեղեկություններ պարունակող փաստաթղթերի և նյութերի ամբողջությունն է, որը ձևավորվում և պահպանվում է համակարգում աշխատողի անհատական տվյալները մուտքագրելու միջոցով՝ ինքնաշխատ եղանակով։

27. Գործը վարում է հաստատության տնօրենը, կամ տնօրենի հրամանով նշանակված աշխատողը՝ աշխատողի կողմից անձամբ, բոլոր հարցերի վերաբերյալ սպառիչ պատասխանների հիման վրա, անձնական փաստաթղթերի ստույգ բովանդակությամբ։

28. Գործի վարումը սկսվում է աշխատողի` համապատասխան պաշտոնում նշանակվելու մասին իրավական ակտի ուժի մեջ մտնելուց հետո։

29. Աշխատողի անհատական տվյալներն են՝

1) հանրային ծառայությունների համարանիշը կամ օրենքով սահմանված կարգով դրանից հրաժարվելու մասին տեղեկանքի համարը.

2) անունը, ազգանունը, հայրանունը.

3) հաշվառման վայրը.

4) անձնագրի կամ նույնականացման քարտի սերիան և համարը.

5) անձնագրի կամ նույնականացման քարտի տրման տարին, ամիսն ու ամսաթիվը.

6) ում կողմից է տրվել անձնագիրը.

7) ծննդյան օրը, ամիսը և տարեթիվը.

8) սեռը.

9) քաղաքացիությունը.

10) ազգությունը.

11) հեռախոսի համարը.

30. Գործը ընդգրկում է աշխատողի անհատական տվյալները և՝

1) աշխատանքային պայմանագրի կամ աշխատանքի ընդունման մասին անհատական իրավական ակտի, պայմանագրում կամ աշխատանքի ընդունման մասին անհատական իրավական ակտում կատարված փոփոխությունների (համաձայնագրերի) էլեկտրոնային տարբերակը՝ PDF ձևաչափով.

2) աշխատանքային պայմանագրի կամ աշխատանքի ընդունման մասին անհատական իրավական ակտի, ազատման մասին անհատական իրավական ակտի համարը, տարին, ամիսն ու ամսաթիվը, աշխատողին աշխատանքից ազատելու հիմքը.

3) պաշտոնային դրույքաչափը (զբաղվածություն / ծանրաբեռնվածություն).

4) հիմնական պաշտոնը.

5) համատեղությամբ (նաև տվյալ հաստատությունում) պաշտոնը (աշխատանքը).

6) աշխատանքային ստաժը.

7) մանկավարժական ստաժը.

8) կրթությունը.

9) մասնագիտական ուսումնական հաստատությունը, ընդունվելու, ավարտելու տարին.

10) որակավորումը.

11) ավարտական փաստաթղթի համարը.

12) գիտական աստիճանը, կոչումը.

13) պարտադիր վերապատրաստում անցնելու տարին, ամիսն ու ամսաթիվը.

14) որակավորման տարակարգ ստանալու տարին, ամիսն ու ամսաթիվը, փաստաթղթի համարը, տարակարգի աստիճանը:

9. Հաստիքացուցակ

31. Հաստիքացուցակը ձևավորվում է համակարգում պաշտոնների անվանացանկը, հաստիքների թիվը և դրույքաչափերը լրացնելուց հետո՝ ինքնաշխատ եղանակով։

32. Պաշտոնների անվանացանկը, հաստիքների թիվը և դրույքաչափերը լրացնում է տնօրենը կամ տնօրենի կողմից հրամանով նշանակված հաստատության աշխատողը։

33. Էլեկտրոնային հաստիքացուցակում արտացոլվում են հետևյալ տվյալները՝

1) պաշտոնի անվանումը.

2) հաստիքների թիվը.

3) պաշտոնի բոլոր հաստիքների դրույքաչափը (դրամ)՝ մեկ ամսվա և մեկ տարվա համար:

34. Ձևավորված հաստիքացուցակը ներբեռնվում է համակարգից։

35. Տարիֆիկացիոն մատյանը ձևավորվում է համակարգում հաստատությունում տարիքային խմբերի ձևավորման և աշխատանքի բաշխման հիման վրա՝ ինքնաշխատ եղանակով։

36. Տարիֆիկացիոն մատյանում ցուցադրվում է՝

1) հաստատության աշխատողների անվանացանկը.

2) հաստատության մանկավարժական աշխատողների ուսումնական ծանրաբեռնվածության համապատասխան վարձատրության չափը.

3) հաստատության վարչատնտեսական պաշտոնները, համապատասխան պաշտոնային դրույքաչափերը.

4) հաստատության աշխատողների աշխատավարձը ամսական և տարեկան կտրվածքով.

5) հաստատության մանկավարժական աշխատողների հավելավճարի չափը:

Ձև 1

Քննարկված է

մանկավարժական խորհրդի

առաջին նիստում

Տնօրեն` ___________

 «____» ____________ 20   թ.

ՏԱՐԵԿԱՆ ԱՇԽԱՏԱՆՔԱՅԻՆ ՊԼԱՆ

------------------------------------- ուսումնական տարի

Ձև 2

Ուսումնադաստիարակչական աշխատանքների դիտարկման թերթիկ

Հաստատություն՝ ------------------------------------------------------------------------------------------------

Տարիքային խումբ՝ ------------------------------------------------------------------------------------------

Մանկավարժական աշխատող՝ ------------------------------------------------------------------------------

Տարի, ամիս, ամսաթիվ՝ -------------------------------------------------------------------------------

Լրացուցիչ դիտարկումներ՝

----------------------------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

-----------------------------------------------------------------------------------------------------------------------------

Եզրակացություն՝-------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

Պարապմունքի դիտարկման թերթիկ

Հաստատություն՝ -----------------------------------------------------------------------------------------------

Տարիքային խումբ՝ ----------------------------------------------------------------------------------------------

Ծրագրային բաղադրիչ՝ ----------------------------------------------------------------------------------------

Թեմա՝ ------------------------------------------------------------------------------------------------------------

Սաների թիվ (ցուցակային և ներկա)՝ ------------------------------------------------------------------------

Մանկավարժական աշխատող՝ -------------------------------------------------------------------------------

Տարի, ամիս, ամսաթիվ՝ ----------------------------------------------------------------------------------------

Լրացուցիչ դիտարկումներ՝

----------------------------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

Եզրակացություն՝

----------------------------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

----------------------------------------------------------------------------------------------------------------------------------

Պաշտոնական հրապարակման օրը՝ 3 հունիսի 2024 թվական: