«Գրանցված է»
ՀՀ արդարադատության
նախարարության կողմից
1 հունիսի 2004 թ.
Պետական գրանցման թիվ 10204135

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

24 մայիսի 2004 թ. ք. Երևան

N 70-Ն

Հ Ր Ա Մ Ա Ն

ՀԱՐԿԱԴԻՐ ԿԱՏԱՐՄԱՆ ԾԱՌԱՅՈՒԹՅՈՒՆՈՒՄ ԱՌԱՋԻՆ ԱՆԳԱՄ ՈՐՊԵՍ ՀԱՐԿԱԴԻՐ ԿԱՏԱՐՈՂ ՊԱՇՏՈՆԻ ՆՇԱՆԱԿՎՈՂ ԱՆՁԱՆՑ ԵՐԴՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Հարկադիր կատարումն ապահովող ծառայության մասին» Հայաստանի Հանրապետության օրենքի 10-րդ հոդվածի 1-ին մասի,

(նախաբանը փոփ. 07.11.23 N 658-Ն)

ՀՐԱՄԱՅՈՒՄ ԵՄ`

Հաստատել հարկադիր կատարման ծառայությունում առաջին անգամ որպես հարկադիր կատարողի պաշտոնի նշանակվող անձանց երդման կարգը` համաձայն հավելվածի:

Դ. Հարությունյան

Կ Ա Ր Գ

ՀԱՐԿԱԴԻՐ ԿԱՏԱՐՄԱՆ ԾԱՌԱՅՈՒԹՅՈՒՆՈՒՄ ԱՌԱՋԻՆ ԱՆԳԱՄ ՈՐՊԵՍ ՀԱՐԿԱԴԻՐ ԿԱՏԱՐՈՂ ՊԱՇՏՈՆԻ ՆՇԱՆԱԿՎՈՂ ԱՆՁԱՆՑ ԵՐԴՄԱՆ

1. Սույն կարգը սահմանում է Հարկադիր կատարումն ապահովող ծառայությունում առաջին անգամ որպես հարկադիր կատարող պաշտոնի նշանակվող անձանց երդման ընթացակարգը:

(1-ին կետը փոփ. 07.11.23 N 658-Ն)

2. Հարկադիր կատարումն ապահովող ծառայությունում ծառայության անցնող յուրաքանչյուր անձ երդում է տալիս անհատապես և այն հաստատում անձնական ստորագրությամբ:

(2-րդ կետը փոփ. 07.11.23 N 658-Ն)

3. Հարկադիր կատարման ծառայությունում երդում տալիս են`

ա) հարկադիր կատարման ծառայությունում առաջին անգամ պաշտոնի նշանակվողը` ծառայության վայր ներկայանալուց 1 ամսվա ընթացքում,

բ) երդումը տրվում է մեկ անգամ, այն չի կրկնվում հետագայում (ծառայության վայրը փոխելիս, աշխատանքում վերականգնվելիս, կրկին անգամ Հարկադիր կատարումն ապահովող ծառայությունում պաշտոնի նշանակվելիս):

(3-րդ կետը փոփ. 07.11.23 N 658-Ն)

4. Հարկադիր կատարումն ապահովող ծառայությունում երդում տվողների հետ, մինչև երդման արարողության օրը, տարվում է բացատրական աշխատանք, որի ընթացքում պարզաբանվում են երդման նշանակությունը, հարկադիր կատարման ծառայության առանձնահատկություններն ու «Հարկադիր կատարումն ապահովող ծառայության մասին» Հայաստանի Հանրապետության օրենքով սահմանված երդման տեքստի բովանդակությունը և հայտարարվում է երդման արարողության ժամը:

(4-րդ կետը փոփ. 07.11.23 N 658-Ն)

5. Նշված ժամին ՀՀ գլխավոր հարկադիր կատարողը կամ նրա կողմից լիազորված պաշտոնատար անձը, հարկադիր կատարման ծառայության նշանակության, խնդիրների և պարտականությունների մասին ներածական խոսքից հետո հայտարարում է երդման արարողությունը սկսելու մասին:

6. Երդման արարողությունը սկսվում է հանդիսավոր պայմաններում, Հայաստանի Հանրապետության պետական դրոշի առջև, Հարկադիր կատարումն ապահովող ծառայության համապատասխան բաժնի ղեկավարության մասնակցությամբ:

(6-րդ կետը փոփ. 07.11.23 N 658-Ն)

7. Երդում տվողները հերթականությամբ հրավիրվում են, նրանցից յուրաքանչյուրը բարձրաձայն ընթերցում է օրենքով սահմանված երդման տեքստը և ստորագրում իր ազգանվան դիմաց: Այնուհետև Հարկադիր կատարումն ապահովող ծառայության ղեկավարը շնորհավորում է հարկադիր կատարողներին երդում տալու համար, որից հետո հնչեցվում է Հայաստանի Հանրապետության օրհներգը:

(7-րդ կետը փոփ. 07.11.23 N 658-Ն)

8. Հարկադիր կատարողի կողմից ստորագրված երդման ձևաթուղթը (ձևը կցվում է) հետագայում Հարկադիր կատարումն ապահովող ծառայության անձնակազմի կառավարման բաժնի կողմից կցվում է նրա անձնական գործին:

(8-րդ կետը փոփ. 07.11.23 N 658-Ն)

9. Երդման արարողությունն անցկացվում է ՀՀ գլխավոր հարկադիր կատարողի կողմից սահմանված վայրում:

Ձև

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ
Հարկադիր կատարումն ապահովող ծառայությՈՒՆ

Ե Ր Դ ՈՒ Մ

Ես	__________________	________________	_______________
	անուն	հայրանուն	ազգանուն

Հայաստանի Հանրապետության դատական ակտերի հարկադիր կատարման ծառայությունում պաշտոն ստանձնելով` երդվում եմ.

հավատարմորեն ծառայել Հայաստանի Հանրապետության ժողովրդին, խստագույնս պահպանել Հայաստանի Հանրապետության Սահմանադրությունը և օրենքները, մարդու և քաղաքացու իրավունքներն ու ազատությունները, աջակցել սահմանադրական կարգի պահպանմանը, անվերապահորեն և բարեխղճորեն կատարել իմ պարտականությունները:

	________________	____________________
	ստորագրություն	__________________
___ ___________ 200 թ.

(ձևը փոփ. 07.11.23 N 658-Ն)

(հավելվածը փոփ. 07.11.23 N 658-Ն)