ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐԻ 2013 ԹՎԱԿԱՆԻ ՄԱՅԻՍԻ 15-Ի N 606-Ա/Ք ՀՐԱՄԱՆՈՎ «ՅՈՒ ԷՍ Ի ԷԼ ՀԱՄԱԼՍԱՐԱՆ» ՍՊԸ-ԻՆ ԲԱԿԱԼԱՎՐԻ ԿՐԹԱԿԱՆ ԾՐԱԳՐՈՎ /ԲԱՑԱՌՈՒԹՅԱՄԲ ԲԺՇԿԱԿԱՆ ԲԱՐՁՐԱԳՈՒՅՆ ՄԱՍՆԱԳԻՏԱԿԱՆ ԿՐԹԱԿԱՆ ԾՐԱԳՐԵՐԻ/ ՏՐՎԱԾ ՍԵՐԻԱ Ա N 0069 ԼԻՑԵՆԶԻԱՅԻ ԳՈՐԾՈՂՈՒԹՅՈՒՆԸ ԴԱԴԱՐԵՑՆԵԼՈՒ ՄԱՍԻՆ

Ղեկավարվելով «Բարձրագույն և հետբուհական մասնագիտական կրթության մասին» ՀՀ օրենքի 13.1 հոդվածի 5-րդ մասի 1-ին կետով և հիմք ընդունելով ՀՀ կրթության և գիտության նախարարի 2017 թ. հոկտեմբերի 13-ի N 1398-Ա հրամանով ուսումնասիրություն իրականացնելու նպատակով ստեղծված աշխատանքային խմբի ակտը և ՀՀ կրթության և գիտության նախարարության կրթական ծրագրերի իրականացման լիցենզավորման հանձնաժողովի N 100/1 եզրակացությունը`

1. Դադարեցնել «ՅՈՒ ԷՍ Ի ԷԼ ՀԱՄԱԼՍԱՐԱՆ» ՍՊԸ-ի բակալավրի կրթական ծրագրով լիցենզիայի գործողությունը լիցենզավորման կարգերով սահմանված լիցենզիայի պարտադիր պահանջների և պայմանների՝ հիմնական պրոֆեսորադասախոսական կազմի, ուսումնական տարածքի և լաբորատոր ապահովվածության, ուսումնամեթոդական ապահովվածության, այդ թվում՝ օտարերկրյա քաղաքացիների բարձրագույն ուսումնական հաստատություններում ընդունելության, դիպլոմների հաշվառման մատյանների որպես հատուկ հաշվառման փաստաթղթի վարման կարգերի, ուսումնաարտադրական պրակտիկայի բազայի պահանջների խախտման, լիցենզավորման ենթակա գործունեությունից բխող հաշվետվություն չներկայացնելու հիմքերով, և ուժը կորցրած ճանաչել ՀՀ կրթության և գիտության նախարարի 2013 թվականի մայիսի 15-ի N 606-Ա/Ք հրամանով տրված բակալավրի կրթական ծրագրով /բացառությամբ բժշկական բարձրագույն մասնագիտական կրթական ծրագրերի/ գործունեության սերիա Ա N 0069 լիցենզիան:

2. ՀՀ կրթության և գիտության նախարարության աշխատակազմի լիցենզավորման գործակալության պետ Մ. Մովսիսյանին և բարձրագույն և հետբուհական մասնագիտական կրթության վարչության պետ Ռ. Սուքիասյանին` ձեռնարկել համապատասխան միջոցառումներ «ՅՈՒ ԷՍ Ի ԷԼ ՀԱՄԱԼՍԱՐԱՆ» ՍՊԸ-ի բակալավրի կրթական ծրագրով սովորող ուսանողների հետագա ուսումնառությունը այլ ուսումնական հաստատություններում շարունակելու ուղղությամբ` նրանց շահերն ու իրավունքները պաշտպանելու նպատակով:

3. Սույն հրամանի կատարման կազմակերպումը հանձնարարել նախարարության աշխատակազմի լիցենզավորման գործակալության պետ Մ. Մովսիսյանին:

4. Հրամանի կատարման հսկողությունը հանձնարարել ՀՀ կրթության և գիտության նախարարի տեղակալ Մ. Մկրտչյանին:

Լ. Մկրտչյան