ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
2002 ԹՎԱԿԱՆԻ ԱՊՐԻԼԻ 4-ԻՆ ԲԻՇԿԵԿՈՒՄ ՍՏՈՐԱԳՐՎԱԾ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ՂՐՂԶՍՏԱՆԻ ՀԱՆՐԱՊԵՏՈՒԹՅԱՆ ՄԻՋԵՎ ԲԱՐԵԿԱՄՈՒԹՅԱՆ ԵՎ ՀԱՄԱԳՈՐԾԱԿՑՈՒԹՅԱՆ ՄԱՍԻՆ ՊԱՅՄԱՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
10 սեպտեմբերի 2002 թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Ա. Գյուլումյանի, Ֆ. Թոխյանի Հ. Նազարյանի, Ռ. Պապայանի, Վ. Պողոսյանի, Վ. Սահակյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության արտաքին գործերի նախարարի տեղակալ Ա. Մարտիրոսյանի,
համաձայն Հայաստանի Հանրապետության Սահմանադրության 100 հոդվածի 2 կետի և 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «2002 թվականի ապրիլի 4-ին Բիշկեկում ստորագրված` Հայաստանի Հանրապետության և Ղրղզստանի Հանրապետության միջև բարեկամության և համագործակցության մասին պայմանագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթ է հանդիսացել Հայաստանի Հանրապետության Նախագահի դիմումը սահմանադրական դատարան:
Լսելով սույն գործով զեկուցող` Հայաստանի Հանրապետության սահմանադրական դատարանի նախագահի տեղակալ Վ. Հովհաննիսյանի հաղորդումը, Հայաստանի Հանրապետության Նախագահի ներկայացուցիչ Ա. Մարտիրոսյանի բացատրությունը, հետազոտելով պայմանագիրն ու գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
Պայմանագիրն ստորագրվել է 2002 թ. ապրիլի 4-ին Բիշկեկում` Հայաստանի Հանրապետության և Ղրղզստանի Հանրապետության միջև բարեկամական հարաբերությունների և փոխշահավետ համագործակցության հետագա ամրապնդման նպատակով:
Պայմանագրով Կողմերը պարտավորվում են.
- միջազգային իրավունքի հանրաճանաչ սկզբունքներին և նորմերին համապատասխան նպաստել միջազգային խաղաղության և անվտանգության պահպանմանը,
- զարգացնել համագործակցությունն առևտրատնտեսական, կրթության, գիտության ու տեխնիկայի, մշակույթի, շրջակա միջավայրի պահպանության ու բարելավման, առողջապահության, սոցիալական պաշտպանության և սոցիալական ապահովման, աշխատանքային հարաբերությունների և այլ բնագավառներում,
- համագործակցել կազմակերպված հանցավորության, կաշառակերության, միջազգային ահաբեկչության, ապօրինի ֆինանսական գործառնությունների, թմրամիջոցների, ռադիոակտիվ, պայթուցիկ նյութերի, զենքի և ռազմամթերքի անօրինական շրջանառության և այլ իրավախախտումների դեմ պայքարում,
- նպաստել էներգետիկայի, ռեսուրսներ խնայող տեխնոլոգիաների կիրառման, տրանսպորտի, ինֆորմատիկայի ու կապի, հեռուստահաղորդակցությունների և ռադիոհաղորդակցությունների բնագավառում համագործակցության զարգացմանը,
- համագործակցել մաքսային գործի, ռազմական ու երկակի նշանակության նյութերի և տեխնոլոգիաների արտահանման ու ներմուծման նկատմամբ հսկողության բնագավառում Կողմերի համար հետաքրքրություն ներկայացնող հարցերով,
- նպաստել տարանցիկ գործառնությունների իրականացմանը` առանձին միջազգային պայմանագրերով սահմանվող պայմաններին համապատասխան,
- իրենց տարածքներում համապատասխան միջոցներ ձեռնարկել, ներառյալ օրենսդրական ակտերի ընդունումը, ազգային փոքրամասնությունների նկատմամբ ազգային, ռասայական, էթնիկական, մշակութային կամ կրոնական անհանդուրժողականության, թշնամանքի, ատելության կամ խտրականության վրա հիմնված ցանկացած գործողությունների կանխման և խափանման համար,
- պայմանագրի դրույթների իրագործումն ապահովելու նպատակով, ինչպես նաև փոխադարձ հետաքրքրություն ներկայացնող այլ հարցերով անցկացնել խորհրդակցություններ և կնքել առանձին երկկողմ միջազգային պայմանագրեր:
Պայմանագրով սահմանվում է, որ Կողմերի քաղաքացիների իրավական կարգավիճակը որոշվում է պայմանագրի մասնակից պետությունների միջև կնքվող առանձին միջազգային պայմանագրով:
Պայմանագրով նաև նախատեսվում է, որ պայմանագրի մասնակից պետություններից մեկի տարածքում գտնվող մյուս մասնակից պետության պետական գույքի, իրավաբանական անձանց և քաղաքացիների գույքի իրավական ռեժիմը կարգավորվում է գույքի գտնվելու վայրի պետության օրենսդրությամբ, եթե այլ բան նախատեսված չէ մասնակից պետությունների միջև կնքված միջազգային պայմանագրով:
Պայմանագրի համաձայն, այն ուժի մեջ մտնելուց հետո Հայաստանի Հանրապետության և Ղրղզստանի Հանրապետության միջև հարաբերություններում ուժը կորցնում է 1993 թ. մարտի 19-ին ստորագրված` Հայաստանի Հանրապետության և Ղրղզստանի Հանրապետության միջև միջպետական հարաբերությունների հիմունքների մասին պայմանագիրը:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 2002 թ. ապրիլի 4-ին Բիշկեկում ստորագրված` Հայաստանի Հանրապետության և Ղրղզստանի Հանրապետության միջև բարեկամության և համագործակցության մասին պայմանագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Հայաստանի Հանրապետության |
Գ. Հարությունյան |
|
|