«Գրանցված է»

ՀՀ արդարադատության

նախարարության կողմից

9 մարտի 2016 թ.

Պետական գրանցման թիվ 11416076

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ

ՊԵՏԱԿԱՆ ԳՈՒՅՔԻ ԿԱՌԱՎԱՐՄԱՆ ՎԱՐՉՈՒԹՅՈՒՆ

ՎԱՐՉՈՒԹՅԱՆ ՊԵՏ

1 մարտի 2016 թ. ք. Երևան

N 21-Ն

Հ Ր Ա Մ Ա Ն

ՍՊԱՍԱՐԿՄԱՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ԱՄՍԱԿԱՆ ՎՃԱՐԻ ԲԱԶԱՅԻՆ ՉԱՓԸ ԵՎ ԶԵՂՉԵՐԻ ԿԻՐԱՌՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2015 թվականի դեկտեմբերի 24-ի N 1515-Ն որոշման 3-րդ կետի պահանջը.

Հրամայում եմ`

1. Հաստատել սպասարկման ծառայությունների մատուցման ամսական վճարի բազային չափը` առանձին տարածքի յուրաքանչյուր մեկ քառակուսի մետրի համար 500 (հինգ հարյուր) ՀՀ դրամի չափով (ներառյալ ավելացված արժեքի հարկը):

2. Հաստատել սպասարկման ծառայությունների մատուցման ամսական վճարի նկատմամբ զեղչերի կիրառման կարգը` համաձայն հավելվածի:

3. Սահմանել, որ սույն հրամանի 1-ին և 2-րդ կետերով նշված դրույթները տարածվում են սույն հրամանն ուժի մեջ մտնելուց հետո կնքված` պետական գույքի ընդհանուր օգտագործման տարածքների սպասարկման պայմանագրերի վրա:

4. Սույն հրամանի կատարման հսկողությունը վերապահել Հայաստանի Հանրապետության կառավարությանն առընթեր պետական գույքի կառավարման վարչության աշխատակազմի ղեկավարին:

 Ա. Սահակյան

Հավելված Հայաստանի Հանրապետության կառավարությանն առընթեր պետական գույքի կառավարման վարչության պետի 2016 թ. մարտի 1-ի N 21-Ն հրամանի

Կ Ա Ր Գ

ՍՊԱՍԱՐԿՄԱՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ԱՄՍԱԿԱՆ ՎՃԱՐԻ ՆԿԱՏՄԱՄԲ ԶԵՂՉԵՐԻ ԿԻՐԱՌՄԱՆ

1. Սույն կարգով կանոնակարգվում են Հայաստանի Հանրապետության կառավարության 2015 թվականի դեկտեմբերի 24-ի N 1515-Ն որոշման 1-ին կետի 1-ին ենթակետով հաստատված կարգի 9-րդ կետով սահմանված` պետական սեփականություն հանդիսացող շենք-շինությունների (այսուհետ` պետական գույք) ընդհանուր օգտագործման տարածքների սպասարկման ծառայությունների մատուցման ամսական վճարի նկատմամբ կիրառվող զեղչերի հետ կապված հարաբերությունները:

2. Սպասարկման ծառայությունների մատուցման ամսական վճարի (այսուհետ` ամսական վճար) նկատմամբ կիրառվում են զեղչերի հետևյալ չափերը.

1) շենքում վերելակի բացակայության կամ պետական գույքի անհատույց օգտագործողի կողմից վերելակից չօգտվելու դեպքում` ամսական վճարի նկատմամբ կիրառվող զեղչը կազմում է ամսական վճարի 1.48 տոկոսը,

2) շենքում ընդհանուր սանիտարական հանգույցի բացակայության կամ պետական գույքի անհատույց օգտագործողի կողմից սանիտարական հանգույցից չօգտվելու դեպքում` ամսական վճարի նկատմամբ կիրառվող զեղչը կազմում է ամսական վճարի 3.9 տոկոսը:

3. Պետական գույքի ընդհանուր օգտագործման տարածքի սպասարկման պայմանագրի կողմ հանդիսացող իրավաբանական կամ ֆիզիկական անձինք (այսուհետ` դիմումատու) ամսական վճարի նկատմամբ զեղչերի կիրառման համար դիմում են ներկայացնում «Պետական գույքի գույքագրման և գնահատման գործակալություն» պետական ոչ առևտրային կազմակերպություն (այսուհետ` կազմակերպություն)` դրանում նշելով զեղչերից օգտվելու սույն կարգի 2-րդ կետի 1-ին և (կամ) 2-րդ ենթակետերով սահմանված հիմքերը:

4. Եթե դիմումի մեջ առկա են սխալներ, որոնք շտկման ենթակա են, ապա կազմակերպությունը դիմումը ստանալուց հետո 3 աշխատանքային օրվա ընթացքում այդ մասին գրավոր տեղեկացնում է դիմումատուին` հնարավորություն ընձեռելով տեղեկացումը ստանալուց հետո 5 աշխատանքային օրվա ընթացքում շտկելու այդ սխալները:

5. Դիմումը ստանալուց հետո կազմակերպությունը 7 աշխատանքային օրվա ընթացքում դիմումատուին գրավոր տեղեկացնում է դիմումում ներկայացված` զեղչեր կիրառելու պահանջը բավարարելու կամ այն մերժելու մասին:

6. Դիմումը մերժվում է, եթե փաստացի առկա չեն սույն կարգի 2-րդ կետում նշված հիմքերը (հիմքը):

7. Դիմումի մերժումը կամ բավարարումը պետք է հիմնավորված լինի կազմակերպության համապատասխան եզրակացությամբ: