«Գրանցված է»

ՀՀ արդարադատության

նախարարության կողմից

14 հուլիսի 2015 թ.

Պետական գրանցման թիվ 11415271

ՀԻՍՈՒՆ ԵՎ ԱՎԵԼԻ ՏՈԿՈՍ ՊԵՏԱԿԱՆ ՄԱՍՆԱԿՑՈՒԹՅԱՄԲ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲԱԺՆԵՏՈՄՍԵՐՈՎ ՀԱՎԱՍՏՎԱԾ ԻՐԱՎՈՒՆՔՆԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ ՄՐՑՈՒՅԹԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հրապարակային սակարկությունների մասին» Հայաստանի Հանրապետության օրենքի 21-րդ և 23-28-րդ հոդվածներով և հիմք ընդունելով Հայաստանի Հանրապետության կառավարության 2015 թվականի մայիսի 7-ի N 515-Ն որոշման 3-րդ կետը՝

Հրամայում եմ`

1. Հաստատել հիսուն և ավելի տոկոս պետական մասնակցությամբ առևտրային կազմակերպություններում Հայաստանի Հանրապետության սեփականությունը հանդիսացող բաժնետոմսերով հավաստված իրավունքները հավատարմագրային կառավարման հանձնելու մրցույթի կանոնակարգը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

 Ա. Սահակյան

Հավելված ՀՀ կառավարությանն առընթեր պետական գույքի կառավարման վարչության պետի 2015 թ. հունիսի 25-ի N 88-Ն հրամանի

Կ Ա Ն Ո Ն Ա Կ Ա Ր Գ

ՀԻՍՈՒՆ ԵՎ ԱՎԵԼԻ ՏՈԿՈՍ ՊԵՏԱԿԱՆ ՄԱՍՆԱԿՑՈՒԹՅԱՄԲ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲԱԺՆԵՏՈՄՍԵՐՈՎ ՀԱՎԱՍՏՎԱԾ ԻՐԱՎՈՒՆՔՆԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ ՄՐՑՈՒՅԹԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կանոնակարգով կարգավորվում են հիսուն և ավելի տոկոս պետական մասնակցությամբ առևտրային կազմակերպություններում (այսուհետ՝ կազմակերպություն) Հայաստանի Հանրապետության սեփականությունը հանդիսացող բաժնետոմսերով հավաստված իրավունքները (այսուհետ՝ բաժնետոմս) այլ առևտրային կազմակերպությունների և անհատ ձեռնարկատիրոջ (այսուհետ՝ անձ) հավատարմագրային կառավարման հանձնելու նպատակով իրականացվող մրցույթի անցկացման կանոնակարգը և պայմանները, մրցույթին մասնակցող անձանց ներկայացվող պահանջները, ինչպես նաև մրցույթի ընթացակարգի հետ առնչվող այլ հարաբերություններ:

2. Կազմակերպության բաժնետոմսերը հավատարմագրային կառավարման են հանձնվում Հայաստանի Հանրապետության կառավարության որոշման հիման վրա կազմակերպվող մրցույթի արդյունքում՝ տվյալ որոշմամբ ստեղծված մրցութային հանձնաժողովի (այսուհետ՝ Հանձնաժողով) որոշմամբ հաղթող ճանաչված անձին:

3. Սույն կանոնակարգով իրականացվող՝ կազմակերպության բաժնետոմսերը հավատարմագրային կառավարման հանձնելու մրցույթները (այսուհետ՝ մրցույթ) բաց են մրցույթի պայմանները բավարարող բոլոր անձանց համար:

II. ՄՐՑՈՒԹԱՅԻՆ ՀԱՆՁՆԱԺՈՂՈՎԸ

4. Մրցույթն անցկացվում է Հանձնաժողովի կողմից, որի անհատական կազմում ընդգրկված են՝

1) կազմակերպության հիմնադրի լիազորություններն իրականացնող պետական մարմնից՝ 2 ներկայացուցիչ,

2) Հայաստանի Հանրապետության ֆինանսների նախարարությունից՝ 2 ներկայացուցիչ,

3) Հայաստանի Հանրապետության էկոնոմիկայի նախարարությունից՝ 2 ներկայացուցիչ,

4) Հայաստանի Հանրապետության արդարադատության նախարարությունից՝ 2 ներկայացուցիչ,

5) Հայաստանի Հանրապետության կառավարությանն առընթեր պետական գույքի կառավարման վարչությունից՝ 2 ներկայացուցիչ,

6) պետական կառավարման այլ շահագրգիռ մարմիններից՝ 2-ական ներկայացուցիչ,

7) կազմակերպության գործադիր տնօրենը կամ այլ ներկայացուցիչ(ներ)ը՝ Հայաստանի Հանրապետության կառավարության որոշմամբ հանձնաժողովի կազմում ընդգրկված լինելու դեպքում:

5. Հանձնաժողովի նախագահ է հանդիսանում Հայաստանի Հանրապետության կառավարությանն առընթեր պետական գույքի կառավարման վարչության ներկայացուցիչը՝ եթե այլ բան նախատեսված չէ Հայաստանի Հանրապետության կառավարության որոշմամբ:

6. Հայաստանի Հանրապետության կառավարության որոշմամբ սահմանված լինելու դեպքում, Հանձնաժողովը կարող է իր աշխատանքներում ներգրավել մասնագիտացած խորհրդատուների և համապատասխան ոլորտի փորձագետների (համաձայնությամբ) (այսուհետ՝ փորձագետներ)՝ անվճար հիմունքներով, առանց ձայնի իրավունքի Հանձնաժողովի աշխատանքներին մասնակցելու համար:

7. Փորձագետները կարող են մասնակցել Հանձնաժողովի աշխատանքներին՝ խորհրդատվություն տրամադրելու համար մրցույթի մասնակիցների կողմից առաջարկված՝ հավատարմագրային կառավարման ծրագրերով նախատեսված հետևյալ հարցերի շուրջ՝

1) ներդրումների իրատեսական լինելու մասին,

2) հավատարմագրային կառավարման ծրագրերի ակնկալվող արդյունքների իրատեսական լինելու մասին,

3) մրցույթի մասնակիցների տեխնիկական և մասնագիտական ապահովվածության մասին ներկայացված փաստաթղթերի մասին,

4) հավատարմագրային կառավարումն ապահովող գրավի առարկայի մասին:

8. Փորձագետների կողմից ներկայացված խորհրդատվությունը Հանձնաժողովի կողմից ընդունվում է ի գիտություն, սակայն պարտադիր չէ մրցութային առաջարկները գնահատելու ընթացքում:

9. Մրցույթի նախապատրաստական, կազմակերպչական, ինչպես նաև մրցույթին հաջորդող աշխատանքներն իրականացվում են Հայաստանի Հանրապետության կառավարությանն առընթեր պետական գույքի կառավարման վարչության (այսուհետ՝ Վարչություն) աշխատակազմի համապատասխան ստորաբաժանման կողմից (այսուհետ՝ համապատասխան ստորաբաժանում):

10. Հանձնաժողովն իր աշխատանքներն իրականացնում է նիստերի միջոցով: Հանձնաժողովի նիստերը գումարվում են Հանձնաժողովի նախագահի կողմից:

11. Հանձնաժողովի նիստի մասին Հանձնաժողովի անդամների իրազեկումն իրականացնում է համապատասխան ստորաբաժանումը՝ նիստի գումարման մասին տեղեկատվությունը Հանձնաժողովի նախագահի կողմից ստանալուց հետո մեկ աշխատանքային օրվա ընթացքում: Հանձնաժողովի նիստն իրավազոր է, եթե դրան մասնակցում են Հանձնաժողովի անդամների ընդհանուր թվի կեսից ավելին:

12. Հանձնաժողովի նիստում որոշումներն ընդունվում են ձայների պարզ մեծամասնությամբ: Քվեարկության ժամանակ Հանձնաժողովի յուրաքանչյուր անդամ ունի մեկ ձայնի իրավունք: Ձայնի և քվեարկության իրավունքի փոխանցումը Հանձնաժողովի մեկ անդամից մյուսին չի թույլատրվում: Եթե քվեարկության արդյունքում Հանձնաժողովի անդամների ձայները բաշխվում են հավասարաչափ, ապա Հանձնաժողովի նախագահի ձայնը համարվում է որոշիչ:

13. Հանձնաժողովը, մինչև Մրցույթի մասին հրապարակային ծանուցման հրապարակումը, որոշում է կայացնում Մրցույթին մասնակցելու համար ներկայացված հայտերի գնահատման հետևյալ չափանիշների վերաբերյալ՝

1) Մրցույթին մասնակցելու համար ներկայացված հավատարմագրային կառավարման ծրագրերի յուրաքանչյուր բաղադրիչի գնահատման սկզբունքները,

2) տեխնիկական ու ֆինանսական ցուցանիշների գնահատման համար սահմանված կշռային գործակիցները:

III. ՄՐՑՈՒՅԹԻ ԱՆՑԿԱՑՄԱՆ ՄԱՍԻՆ ՀՐԱՊԱՐԱԿԱՅԻՆ ԾԱՆՈՒՑՈՒՄԸ

14. Մրցույթի մասին հրապարակային ծանուցումը մրցույթին մասնակցելու համար հայտերի ընդունման օրվանից ոչ ուշ, քան 60 օր առաջ պարտադիր տեղադրվում է Վարչության պաշտոնական ինտերնետային կայքում, հttp://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում, իսկ Հանձնաժողովի որոշմամբ՝ նաև օտարալեզու կայքերում:

15. Մրցույթի անցկացման մասին հրապարակային ծանուցման տեքստը հաստատում և հրապարակման է ներկայացնում Հանձնաժողովը՝ համապատասխան ստորաբաժանման միջոցով:

16. Մրցույթի անցկացման մասին հրապարակային ծանուցումը պարունակում է հետևյալ տեղեկությունները.

1) կազմակերպության անվանումը, գտնվելու վայրը, հիմնադրի լիազորություններն իրականացնող պետական մարմնի անվանումը,

2) հավատարմագրային կառավարման առաջարկվող ժամկետը,

3) կազմակերպության աշխատողների աշխատանքային և սոցիալական երաշխիքներին վերաբերող պահանջները՝ ըստ ուղղությունների և ծավալի,

4) կազմակերպության բաժնետոմսերը հավատարմագրային կառավարման հանձնելու դիմաց պահանջվող ներդրումների չափը, ուղղությունները և դրանց իրականացման ժամկետները, եթե նշված չափանիշները համարվում են մրցույթին մասնակցելու նախապայման,

5) սեփականատիրոջ այն լիազորությունները, որոնք նախատեսվում է փոխանցել հավատարմագրային կառավարչին,

6) հավատարմագրային կառավարման ծրագրին ներկայացվող պահանջները,

7) կազմակերպության ակտիվների և պարտավորությունների մեծության մասին տեղեկատվությունը՝ համաձայն հրապարակային ծանուցմանը նախորդող վերջին ժամանակահատվածի հաշվապահական հաշվառման հաշվետվության,

8) կազմակերպության գույքի նկատմամբ բռնագանձում տարածելու վերաբերյալ հայցերի առկայության կամ կազմակերպության՝ սնանկության վարույթում գտնվելու մասին տեղեկատվությունը,

9) կազմակերպության գույքի նկատմամբ դատական և այլ գերատեսչական արգելանքների առկայության վերաբերյալ տեղեկատվությունը,

10) Հանձնաժողովի գործունեության վայրը, մրցույթի կազմակերպման վայրը և օրը (նշելով ժամը),

11) մրցույթին մասնակցելու համար հայտերի ընդունման վայրը, ժամանակահատվածը (նշելով ժամերը՝ ըստ օրերի) և վերջնաժամկետը,

12) մրցույթի ձևը և անցկացման կարգը,

13) մրցույթին մասնակցելու համար ներկայացված հայտերի գնահատման չափանիշները՝ ներառյալ Հանձնաժողովի կողմից որոշված՝

ա. մրցույթին մասնակցելու համար ներկայացված հավատարմագրային կառավարման ծրագրերի յուրաքանչյուր բաղադրիչի գնահատման սկզբունքները,

բ. տեխնիկական ու ֆինանսական ցուցանիշների գնահատման համար սահմանված կշռային գործակիցները,

14) հավատարմագրային կառավարչի պարտավորությունների կատարումն ապահովող գրավի չափը,

15) մրցույթի հաղթողին որոշելու, ինչպես նաև առանց հաղթողին որոշելու մրցույթը դադարեցնելու կարգը,

16) մրցույթի մասնակցության վճարի և մրցույթի նախավճարի չափը, վճարելու կարգը և ժամկետները,

17) մրցույթին մասնակցելու համար անհրաժեշտ փաստաթղթերի ցանկը,

18) մրցույթի հայտերը բացելու, ինչպես նաև մրցույթի հայտերն ամփոփելու նիստերի օրը և ժամը,

19) մրցույթի մասին լրացուցիչ տեղեկություններ ստանալու կարգը, մրցույթի կանոնակարգին ծանոթանալու վայրը և կանոնակարգի պատճենը տրամադրելու կարգը,

20) Հայաստանի Հանրապետության կառավարության որոշմամբ սահմանված այլ պայմաններ:

17. Մրցույթի պայմանների փոփոխման դեպքում, մրցույթի մասին հրապարակային ծանուցման մեջ համապատասխան փոփոխություններն ու լրացումները մեկ աշխատանքային օրվա ընթացքում հրապարակվում են Վարչության պաշտոնական ինտերնետային կայքում, հttp://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում, իսկ Հանձնաժողովի որոշմամբ՝ նաև օտարալեզու կայքերում:

IV. ՄՐՑՈՒՅԹԻ ՀԱՅՏԻ ՆԵՐԿԱՅԱՑՈՒՄԸ

18. Մրցույթին մասնակցել ցանկացող հայտատուն (այսուհետ՝ Հայտատու), մրցույթի մասին հրապարակային ծանուցման պահանջներին համապատասխան, մրցույթին մասնակցելու համար հայտերը` սոսնձված, ստորագրված կամ կնքված (կնիքի առկայության դեպքում) ծրարով, ներկայացնում է համապատասխան ստորաբաժանում՝ առձեռն հանձնելու միջոցով կամ Վարչության աշխատակազմի քարտուղարություն` պատվիրված նամակով ուղարկելու միջոցով: Վարչության աշխատակազմի քարտուղարությունը հայտն ստանալուց անմիջապես հետո, առանց ծրարը բացելու, հանձնման մասին ստորագրությամբ, ներկայացված հայտը հանձնում է համապատասխան ստորաբաժանմանը:

19. Հայտատուի կողմից ներկայացված ծրարի վրա պետք է նշված լինի`

1) կազմակերպության անվանումը, որի բաժնետոմսերի մրցույթին մասնակցելու համար ներկայացվում է հայտը,

2) «Չբացել մինչև հայտերի բացման նիստը» բառերը,

3) հայտատու առևտրային կազմակերպության դեպքում՝ կազմակերպության անվանումը, գտնվելու վայրը և հեռախոսահամարը, իսկ անհատ ձեռնարկատիրոջ դեպքում՝ անձնագրի տվյալները (ազգանունը, անունը, հայրանունը, քաղաքացիությունն ու բնակության վայրը) և հեռախոսահամարը:

20. Մրցույթին մասնակցելու համար ներկայացված Հայտատուի հայտը պետք է ներառի՝

1) եթե Հայտատուն առևտրային կազմակերպություն է՝

ա. կազմակերպության պետական գրանցման համարը, տեղեկատվություն կազմակերպության մասնակիցների, փայատերերի, կազմակերպության գտնվելու և գործունեության իրականացման վայրի մասին: Եթե կազմակերպությունն օտարերկրյա առևտրային կազմակերպություն է, ապա պետք է նշվեն նաև այն պետությունը, որի օրենքների հիման վրա ստեղծվել և գործում է տվյալ կազմակերպությունը, այդ օտարերկրյա առևտրային կազմակերպության՝ օրենքին համապատասխան ստեղծման և գործունեության դադարման, վերակազմակերպման՝ ներառյալ իրավահաջորդության, իրավունակության բովանդակության, քաղաքացիական իրավունքներ ձեռք բերելու և քաղաքացիական պարտականություններ կրելու կարգը, կազմակերպության ներսում ծավալվող հարաբերությունների՝ ներառյալ առևտրային կազմակերպության հարաբերություններն իր մասնակիցների հետ, պատասխանատվության հարցերի մասին տեղեկությունները,

բ. մրցույթին մասնակցության վճարի և մրցույթի նախավճարի՝ մրցութային հանձնաժողովի կողմից նշված բանկային հաշվին կատարված վճարման անդորրագրերի պատճենները,

գ. ՀՀ կառավարության 2015 թվականի մայիսի 7-ի N 515-Ն որոշման պահանջներին համապատասխանող հավատարմագրային կառավարման ծրագիրը,

դ. կառավարման բնագավառում առևտրային կազմակերպության փորձի մասին վկայող փաստաթղթերը,

ե. մրցույթի մասին հրապարակային ծանուցման մեջ նշված մյուս փաստաթղթերը,

2) եթե Հայտատուն անհատ ձեռնարկատեր է՝

ա. անձնագրի տվյալները (ազգանունը, անունը, հայրանունը, քաղաքացիությունը և բնակության վայրը), անհատ ձեռնարկատիրոջ պետական հաշվառման համարը,

բ. մրցույթին մասնակցության վճարի և մրցույթի նախավճարի՝ մրցութային հանձնաժողովի կողմից նշված բանկային հաշվին կատարված վճարման անդորրագրերի պատճենները,

գ. ՀՀ կառավարության 2015 թվականի մայիսի 7-ի N 515-Ն որոշման պահանջներին համապատասխանող հավատարմագրային կառավարման ծրագիրը,

դ. կառավարման բնագավառում անհատ ձեռնարկատիրոջ փորձի մասին վկայող փաստաթղթերը,

ե. մրցույթի մասին հրապարակային ծանուցման մեջ նշված մյուս փաստաթղթերը:

21. Հայտատուի կողմից մրցույթին մասնակցելու համար ներկայացված հայտում հավատարմագրային կառավարման ծրագիրը պետք է ներառի՝

1) առաջարկություններ ներդրումներ կատարելու վերաբերյալ (այդ թվում՝ ներդրումների ուղղությունները և չափերը, ինչպես նաև ներդրումների իրականացման արդյունքում ակնկալվող արդյունքը (ներառյալ կազմակերպության սպասվելիք շահույթը)` տարիների կտրվածքով), եթե նշված տեղեկությունները ներկայացնելու պահանջը նախատեսված է հրապարակային ծանուցման մեջ,

2) հավատարմագրային կառավարման հանձնվող կազմակերպության զարգացման համար իրականացվելիք միջոցառումները, դրանց կատարման ժամկետները, ուղիները, պահանջվող ֆինանսական միջոցները և աղբյուրները,

3) տեղեկություններ և փաստաթղթեր անձի տեխնիկական և մասնագիտական ապահովվածության մասին,

4) հավատարմագրային կառավարումն ապահովող գրավի առարկան և չափը, որը չի կարող կազմակերպության ակտիվների 5 տոկոսից պակաս լինել,

5) հավատարմագրային կառավարչի վարձատրության չափի վերաբերյալ առաջարկություններ,

6) Հայաստանի Հանրապետության կառավարության որոշմամբ սահմանված` մրցույթի այլ պայմաններին վերաբերող առաջարկություններ:

22. Մրցույթին մասնակցելու համար ներկայացված յուրաքանչյուր հայտը պարունակող ծրարը՝ առանց բացելու, փակ վիճակում, այն ստանալուց անմիջապես հետո, հանձնման մասին ստորագրությամբ համապատասխան ստորաբաժանումը հանձնում է Հանձնաժողովի նախագահին, իսկ Հանձնաժողովի նախագահի բացակայության դեպքում՝ Հանձնաժողովի անդամներից մեկին:

23. Մրցույթին մասնակցելու համար ներկայացված հայտում ներառված փաստաթղթերի բնօրինակները և դրանց պատճենները մեկական օրինակից վավերացվում են մրցույթին մասնակցող իրավաբանական անձի կնիքով (կնիքի առկայության դեպքում) կամ գործադիր մարմնի ղեկավարի ստորագրությամբ: Փաստաթղթերի պատճենների վրա գրառվում է «կրկնօրինակ» բառը:

24. Մրցույթին մասնակցելու հայտ ներկայացրած մասնակիցները, մինչև մրցույթի հայտերը ներկայացնելու վերջնական ժամկետի ավարտը, կարող են փոփոխել կամ հետ վերցնել իրենց հայտերը: Մրցույթի հայտի փոփոխությունը կատարվում է սույն կանոնակարգով մրցույթի հայտ ներկայացնելու համար նախատեսված եղանակով` ծրարի վրա ավելացնելով «փոփոխում» բառը:

25. Այն հայտերը, որոնք ներկայացվել են մրցույթի անցկացման մասին հրապարակային ծանուցմամբ սահմանված հայտերի ընդունման ժամկետը լրանալուց հետո, առանց բացվելու մերժվում են և վերադարձվում համապատասխան հայտատուին:

V. ՄՐՑՈՒՅԹԻ ՀԱՅՏԵՐԻ ԲԱՑՈՒՄԸ ԵՎ ԱՐԴՅՈՒՆՔՆԵՐԻ ԱՄՓՈՓՈՒՄԸ

26. Մրցույթն անցկացվում է հայտերի ընդունման ժամկետը լրանալու օրը:

27. Մրցույթի օրը՝ մրցույթի մասին հրապարակային ծանուցման մեջ նշված օրը և ժամին Հանձնաժողովը բացում է բոլոր ներկայացված ծրարները, ստուգում ներկայացված պահանջներին հայտերի համապատասխանությունը և գնահատում առաջարկները:

28. Հանձնաժողովը` առնվազն երեք օրվա ընթացքում կայացնում է որոշում մրցույթի արդյունքում հաղթող ճանաչված Հայտատուի մասին:

29. Մրցույթի հաղթող է ճանաչվում այն Հայտատուն, որը, մրցութային հանձնաժողովի որոշմամբ, առաջարկել է լավագույն պայմանները: Լավագույն պայմաններ են համարվում մրցույթին մասնակցելու համար ներկայացված հայտերի գնահատման չափանիշներին համապատասխանող՝ առավելագույն միավորներով գնահատված ծրագրերը:

30. Մրցույթի արդյունքում մրցութային հանձնաժողովի կողմից մի քանի հայտատուների կողմից հավասար լավագույն պայմանների առաջարկման դեպքում նախապատվությունը տրվում է այն անձին, որի ներկայացրած հավատարմագրային կառավարման ծրագրով նախատեսվում է նվազագույն ծախսերով կազմակերպության առավելագույն զուտ շահույթի ապահովումը:

31. Մրցույթի հայտերն ամփոփելու օրը Հանձնաժողովը կազմում է մրցույթի արդյունքների մասին արձանագրություն, որտեղ նշվում են`

1) մրցույթի հայտերի բացման, ինչպես նաև մրցույթի հայտերի ամփոփման վայրը, օրը, ամիսը, տարին և ժամը,

2) հանձնաժողովի անդամների անունները, ազգանուններն ու պաշտոնները,

3) մրցույթին մասնակցող անձանց անուններն, ազգանունները կամ անվանումները և գտնվելու վայրը,

4) տեղեկություններ` մրցույթի հայտերի վերաբերյալ հարցումների և դրանց պատասխանների մասին,

5) մրցույթի արդյունքում ընտրված անձի անունը, ազգանունը կամ առևտրային կազմակերպության անվանումը,

6) Հանձնաժողովի որոշմամբ՝ այլ տեղեկություններ:

32. Մրցույթի արդյունքների մասին արձանագրությունը ստորագրվում է Հանձնաժողովի անդամների և Մրցույթում ընտրված անձի (առևտրային կազմակերպության համապատասխան լիազորություններով օժտված պաշտոնատար անձի) կողմից:

33. Այն դեպքում, երբ Հանձնաժողովի անդամներից որևէ մեկը մրցույթի արդյունքների վերաբերյալ ունենում է հատուկ կարծիք, ապա այն ներկայացվում է գրավոր: Հանձնաժողովի անդամի հատուկ կարծիքը կցվում է մրցույթի արդյունքների մասին արձանագրությանը և համարվում է դրա անբաժանելի մասը:

34. Այն դեպքում, երբ մրցույթի արդյունքում ընտրված անձը (առևտրային կազմակերպության ներկայացուցիչը) ներկա չի գտնվում մրցույթի հայտերի ամփոփմանը, ապա Հանձնաժողովը՝ մրցույթի արդյունքում ընտրված լինելու մասին մեկ աշխատանքային օրվա ընթացքում գրավոր տեղեկացնում է ընտրված անձին (առևտրային կազմակերպությանը):

35. Մրցույթի մասնակիցները (նրանց ներկայացուցիչները) կարող են ներկա գտնվել մրցույթի հայտերի բացման և գնահատման նիստին, այդ թվում՝ ծանոթանալ մրցույթի արդյունքների մասին արձանագրությանը: Մրցույթի արդյունքների մասին արձանագրությանը ծանոթանալու հնարավորությունը մրցույթի մասնակիցներին տրվում է համապատասխան գրավոր դիմումի առկայության դեպքում՝ ներկայացնելու օրվան հաջորդող երկու աշխատանքային օրվա ընթացքում:

36. Մրցույթի արդյունքների մասին ամփոփ տեղեկատվությունը մրցույթի արդյունքներն ամփոփելուց հետո ոչ ուշ, քան 5 աշխատանքային օրվա ընթացքում հրապարակվում է Վարչության պաշտոնական ինտերնետային կայքում, հttp://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում, իսկ անհրաժեշտության դեպքում՝ նաև այն օտարալեզու կայքերում, որի միջոցով մրցույթին մասնակցելու համար հայտ ներկայացրած անձը տեղեկացել է մրցույթի մասին:

37. Հանձնաժողովը մրցույթը համարում է չկայացած, եթե՝

1) մրցույթին մասնակցելու համար ոչ մի հայտ չի ներկայացվել,

2) ներկայացված հայտերից ոչ մեկը չի համապատասխանում Մրցույթի մասին հրապարակային ծանուցման մեջ նշված պահանջներին, կամ եթե հայտեր ներկայացնելու գործընթացը չի համապատասխանել սույն կանոնակարգի և մրցույթի մասին հրապարակային ծանուցման պահանջներին,

3) արտակարգ իրավիճակների պատճառով անհնար է դառնում Մրցույթով նախատեսված աշխատանքների կատարումը կամ կազմակերպության բաժնետոմսերը հավատարմագրային կառավարման հանձնելը:

38. Մրցույթը չկայանալու դեպքում տվյալ կազմակերպության բաժնետոմսերը հավատարմագրային կառավարման հանձնելու վերաբերյալ նոր մրցույթի կազմակերպման մասին որոշումն ընդունում է Հայաստանի Հանրապետության կառավարությունը:

39. Սույն կանոնակարգով նախատեսված պահանջների խախտմամբ կազմակերպված և անցկացված մրցույթը դատական կարգով կարող է ճանաչվել անվավեր:

40. Մրցույթն անվավեր ճանաչելը հանգեցնում է մրցույթի արդյունքների հիման վրա կնքված պայմանագրերի անվավերությանը:

41. Մրցույթի արդյունքները կարող են բողոքարկվել Հայաստանի Հանրապետության օրենքով սահմանված կարգով: