Հ Ա Մ Ա Ձ Ա Յ Ն Ա Գ Ի Ր

Անկախ Պետությունների Համագործակցությունում ցուցահանդես-տոնավաճառների գործունեության զարգացման մասին

Անկախ Պետությունների Համագործակցության մասնակից պետությունների Կառավարությունները, այսուհետ` Կողմեր,

ձգտելով ապահովելու պայմաններ ցուցահանդես-տոնավաճառների գործունեության աշխատանքների համակարգման համար,

Համագործակցությունում ինտեգրացիոն գործընթացների զարգացման և ընդհանուր տնտեսական ու տեղեկատվական տարածության ձևավորմանը օժանդակելու համար միջազգային շփումների ամրապնդման, արդյունաբերությունում, գյուղատնտեսության և տնտեսության այլ ճյուղերում, գիտության, տեխնիկայում և մշակույթում նվաճումների քարոզչության նպատակներով, ինչպես նաև Համագործակցության առևտրատնտեսական կապերի, սոցիալական ոլորտի զարգացմանն օժանդակելու համար,

համաձայնեցին ներքոհիշյալի մասին.

Հ ո դ վ ա ծ  1

Կողմերը ստեղծում են Անկախ Պետությունների Համագործակցության ցուցահանդես-տոնավաճառների գործունեության մշտապես գործող Միջպետական խորհուրդ, այսուհետ` Խորհուրդ:

Սույն Համաձայնագրի ստորագրումից հետո մեկամսյա ժամկետում Կողմերը Խորհուրդ են գործուղում իրենց լիազոր ներկայացուցիչներին:

Հ ո դ վ ա ծ  2

Խորհուրդը իր գործունեությունն իրականացնում է Անկախ Պետությունների Համագործակցության ցուցահանդես-տոնավաճառների գործունեության Միջպետական խորհրդի Կանոնադրության հիման վրա, որը հանդիսանում է սույն Համաձայնագրի անբաժանելի մասը:

Հ ո դ վ ա ծ  3

Կողմերը կօժանդակեն Խորհրդի կողմից կազմակերպվող և անցկացվող ցուցահանդեսներում և տոնավաճառներում մասնակցող ազգային ձեռնարկությունների և կազմակերպությունների համար բարենպաստ պայմանների ստեղծմանը:

Հ ո դ վ ա ծ  4

Խորհրդի նստավայրը Մոսկվա քաղաքն է:

Հ ո դ վ ա ծ  5

Սույն Համաձայնագիրը ժամանակավորապես կիրառվում է ստորագրման օրվանից և ուժի մեջ է մտնում դրա ուժի մեջ մտնելու համար անհրաժեշտ՝ պետությունների ներպետական ընթացակարգերի կատարման մասին երրորդ ծանուցումը ավանդապահին ի պահ հանձնելու օրվանից:

Հ ո դ վ ա ծ  6

Սույն Համաձայնագիրը բաց է դրա նպատակները և սկզբունքները կիսող այլ պետությունների կողմից միանալու համար` ավանդապահին միանալու մասին փաստաթղթերը փոխանցելու միջոցով:

Հ ո դ վ ա ծ  7

Ցանկացած Կողմ կարող է հայտարարել սույն Համաձայնագրից դուրս գալու իր մտադրության մասին` դուրս գալուց առնվազն վեց ամիս առաջ ավանդապահին գրավոր ծանուցելու միջոցով:

Կատարված է Մինսկ քաղաքում 1995 թվականի մայիսի 26-ին, մեկ բնօրինակով, ռուսերեն: Բնօրինակը պահվում է Անկախ Պետությունների Համագործակցության Գործադիր քարտուղարությունում, որը սույն Համաձայնագիրը ստորագրած յուրաքանչյուր պետությանը կուղարկի դրա հաստատված պատճենը:

Հավելված

Անկախ Պետությունների Համագործակցությունում

ցուցահանդես-տոնավաճառների գործունեության

 զարգացման մասին 1995 թվականի մայիսի 26-ի

Համաձայնագրին կից

Կ Ա Ն Ո Ն Ա Դ Ր ՈՒ Թ Յ ՈՒ Ն

Անկախ Պետությունների Համագործակցության ցուցահանդես-տոնավաճառների գործունեության Միջպետական խորհրդի մասին

1. Ընդհանուր դրույթներ

1. Անկախ Պետությունների Համագործակցության ցուցահանդես-տոնավաճառների գործունեության Միջպետական խորհուրդը, այսուհետ` Խորհուրդ, ստեղծվում է Համագործակցությունում ինտեգրացիոն գործընթացների զարգացման և ընդհանուր տնտեսական ու տեղեկատվական տարածության ձևավորմանը օժանդակելու համար միջազգային շփումների ամրապնդման, արդյունաբերությունում, գյուղատնտեսության և տնտեսության այլ ճյուղերում, գիտության, տեխնիկայում և մշակույթում նվաճումների քարոզչության, առաջավոր փորձի փոխանակման, սոցիալական ոլորտի զարգացման, Համագործակցության մասնակից պետությունների փոխշահավետ երկկողմ և բազմակողմ բնույթի առևտրատնտեսական կապերի համար պայմանների հաստատման նպատակներով ցուցահանդես-տոնավաճառների գործունեության բնագավառում աշխատանքների համակարգման ապահովման համար:

Խորհուրդը մշտապես գործող համակարգող-խորհրդակցական մարմին է:

Իր գործունեությունում Խորհուրդը հաշվետու է Տնտեսական միության Միջպետական տնտեսական կոմիտեին, ղեկավարվում է Համագործակցության պետությունների ղեկավարների Խորհրդի և Կառավարությունների ղեկավարների Խորհրդի, Տնտեսական միության Միջպետական տնտեսական կոմիտեի որոշումներով, Համագործակցության շրջանակներում կնքված միջպետական և միջկառավարական համաձայնագրերով, սույն Կանոնադրությամբ:

2. Գործունեության հիմնական ուղղությունները և գործառույթները

2. Խորհրդի գործունեության հիմնական ուղղություններն են.

Համագործակցությունում ցուցահանդես-տոնավաճառների գործունեության ժամանակակից գաղափարախոսության մշակում և իրականացում,

Անկախ Պետությունների Համագործակցության շրջանակներում ցուցահանդեսների և տոնավաճառների, միջոցառումների, որոնք ուղղված են Համագործակցությունում ինտեգրացիոն գործընթացների բանական զարգացմանը, փոխադարձ ներդրումների, միջազգային շփումների անցկացում, առաջավոր փորձի փոխանակում,

օժանդակություն Համագործակցության մասնակից պետությունների ապրանք արտադրողների և արտադրանք սպառողների միջև անմիջական կապերի հաստատմանը, նրանց միջև փոխադարձ հաշվարկների կատարելագործմանը, քլիրինգային հարաբերությունների զարգացմանը, աջակցություն ձեռներեցությանը,

օժանդակություն Համագործակցություն անշարժ գույքի և ֆոնդային ընդհանուր շուկաների ստեղծմանը,

ցուցահանդես-տոնավաճառների գործունեության բնագավառում Համագործակցության մասնակից պետությունների ազգային օրենսդրությունների մշակման և համաձայնեցման համար առաջարկությունների մշակում:

3. Խորհրդի հիմնական գործառույթներն են.

Համագործակցությունում ցուցահանդես-տոնավաճառների գործունեության զարգացմանն ուղղված միջոցների իրականացում,

օժանդակություն Համագործակցությունում ցուցահանդես-տոնավաճառների գործունեության իրականացման համար կազմակերպչատեխնիկական միջոցառումների անցկացմանը և ֆինանսական աջակցությանը,

օժանդակություն ցուցահանդեսներում, տոնավաճառներում գիտատեխնիկական մշակումների, «նոու-հաու»-ների, ապրանքային արտադրանքի դեպի միջազգային շուկա առաջխաղացմանը,

ցուցահանդեսների, տոնավաճառների կազմակերպման և անցկացման համար տեղեկությունների և մեթոդական հրատարակումների և Խորհրդի իրավասությանը վերաբերող այլ տեղեկությունների ապահովում և փոխանակում, Համագործակցության մասնակից պետությունների մասնակցությամբ ցուցահանդեսների և տոնավաճառների վերաբերյալ միասնական տեղեկատվական շտեմարանի ստեղծում, այդ թվում՝ օգտագործելով Համագործակցության տեղեկատվության փոխանակման ավտոմատացված համակարգը,

օժանդակություն միջազգային ցուցահանդեսներում, տոնավաճառներում Համագործակցության մասնակից պետությունների մասնակցությանը,

փոխգործակցության իրականացում Համագործակցության միջպետական (միջկառավարական) մարմինների, պետական, գիտական և հասարակական մարմինների ու կազմակերպությունների, Համագործակցության տնտեսվարող սուբյեկտների հետ,

Խորհրդի իրավասությանը վերաբերող արտաքին տնտեսական, հրատարակչական, գովազդային և գործունեության այլ տեսակների իրականացում,

ցուցահանդես-տոնավաճառների գործունեության մասնագետների որակավորման բարձրացման կազմակերպում:

4. Խորհուրդը, իր գործառույթների իրականացման համար, իրավունք ունի.

ցուցահանդես-տոնավաճառների գործունեության բնագավառում Համագործակցության մասնակից պետությունների համապատասխան մարմիններից տեղեկություններ ստանալ,

տեղեկացնել Համագործակցության մասնակից պետություններին Համագործակցությունում ցուցահանդես-տոնավաճառների գործունեության զարգացման մասին,

 առաջարկություններ մտցնել Համագործակցությունում ցուցահանդես-տոնավաճառների գործունեության կատարելագործման վերաբերյալ,

ցուցահանդես-տոնավաճառների գործունեության կազմակերպման համար ստեղծել աշխատանքային խմբեր,

միջազգային ցուցահանդեսներում և տոնավաճառներում մասնակցելու նպատակով երաշխավորություններ մշակել,

մշակել և առաջ քաշել երաշխավորություններ, վերլուծական և տեղեկատվական նյութեր, տեղեկանքներ, որոշումների նախագծեր,

ցուցահանդեսների և տոնավաճառների գործունեության հարցերով Համագործակցության մարմինների քննարկմանը ներկայացվող ակտերի նախագծերի փորձագիտական գնահատականի իրականացում,

հրատարակել համապատասխան նյութեր ցուցահանդեսների և տոնավաճառների գործունեության հարցերով,

Համագործակցության մասնակից պետությունների շրջանակներում անցկացնել ցուցահանդեսների և տոնավաճառների ատեստացիա:

3. Ղեկավարման մարմինները

5. Խորհուրդը ձևավորվում է Համաձայնագրի մասնակից պետությունների պետական գործադիր մարմինների լիազոր ներկայացուցիչներից, ցուցահանդես-տոնավաճառների համալիրների, հասարակական կազմակերպությունների և տնտեսվարող սուբյեկտների ղեկավարներից: Խորհրդի անդամներին գործուղում են Համաձայնագրի մասնակից պետությունները: Համաձայնագրի յուրաքանչյուր մասնակից պետություն, անկախ խորհուրդ գործուղած անդամների թվից, ունի մեկ որոշիչ ձայն:

Խորհրդի կազմի մեջ են մտնում նախագահը, նրա տեղակալները, Համաձայնագրի մասնակից պետությունների լիազոր ներկայացուցիչները` անդամները:

Խորհրդի նախագահին և նրա տեղակալներին ընտրում են Խորհրդի անդամները:

6. Խորհրդի նիստերը անց են կացվում ըստ անհրաժեշտության, սակայն առնվազն տարին երկու անգամ:

Խորհրդի նիստը իրավասու է որոշումներ ընդունել, եթե այդտեղ ներկա են Համաձայնագրի մասնակից պետությունների կեսից ավելին:

7. Խորհուրդը քննարկում է Համագործակցությունում ցուցահանդես-տոնավաճառների գործունեության կարևորագույն հարցեր, հաստատում է Համագործակցության շրջանակներում Խորհրդի կողմից կազմակերպվող ցուցահանդեսների և տոնավաճառների պլանը, ղեկավարում է Գործադիր տնօրինության աշխատանքը, լուծում է իր իրավասության մեջ մտնող այլ հարցեր:

8. Խորհուրդը գլխավորում է նախագահը, որը կազմակերպում է դրա աշխատանքը:

Նախագահը Խորհուրդը ներկայացնում է Տնտեսական միության Միջպետական տնտեսական կոմիտեի նիստերին, ինչպես նաև Խորհրդի գործունեության հետ կապված հարցերով Համագործակցության մասնակից պետությունների հետ հարաբերություններում:

9. Խորհրդի կողմից քննարկելու համար առաջարկությունների պատրաստման նախաձեռնությունը պատկանում է Համագործակցության միջպետական (միջկառավարական) մարմիններին, Գործադիր տնօրինությանը:

Առաջարկությունների պատրաստման և քննարկման ընթացակարգը սահմանում է Խորհուրդը:

10. Խորհրդի որոշումներն ընդունվում են ձայների պարզ մեծամասնությամբ:

Եթե Խորհրդի նիստում ընդունվող որոշումը հակասում է Համաձայնագրի որևէ մասնակից պետության շահերին և այդ պետության լիազոր ներկայացուցիչները դեմ են քվեարկում, ապա այդ որոշումը պարտադիր չի լինի նրա պետական կառույցների համար:

11. Խորհրդին կից գործում է Գործադիր տնօրինությունը, որը ղեկավարում է Գործադիր տնօրենը: Նա, ըստ պաշտոնի, Խորհրդի նախագահի տեղակալ է:

Գործադիր տնօրենին նշանակում և ազատում է Խորհուրդը:

Գործադիր տնօրինությունը իրավաբանական անձ է և գործում է ինքնահատուցման սկզբունքի վրա:

Գործադիր տնօրինությունը կյանքի է կոչում Խորհրդի որոշումները, ընդունում է ցուցահանդեսների և տոնավաճառների կազմակերպման և անցկացման համար օպերատիվ որոշումներ և միջոցներ, լուծում է իր իրավասության մեջ մտնող այլ հարցեր:

Գործադիր տնօրինության, նրա կառուցվածքի մասին Կանոնակարգը, նրա ծախսերի նախահաշվարկները և աշխատողների թվաքանակը հաստատում է Խորհուրդը:

Գործադիր տնօրինության և Խորհրդի գործունեության հետ կապված միջոցառումների ֆինանսավորումը իրականացվում է ցուցահանդես-տոնավաճառների գործունեության, ինչպես նաև Գործադիր տնօրինության տնտեսական գործունեության անցկացումից ստացված եկամուտների հաշվին:

4. Եզրափակիչ դրույթներ

12. Խորհրդի աշխատանքային լեզուն ռուսերենն է:

13. Խորհրդի և Գործադիր տնօրինության նստավայրը Մոսկվա քաղաքն է:

*Համաձայնագիրը Հայաստանի Հանրապետության համար ուժի մեջ է մտել 1996 թվականի ապրիլի 10-ից: