«Գրանցված է»

ՀՀ արդարադատության

նախարարության կողմից

15 ապրիլի 2013 թ.

Պետական գրանցման թիվ 04013140

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆ ԱՇԽԱՏԱԿԱԶՄԻ ՂԵԿԱՎԱՐ

25 մարտի 2013 թ.

N 111-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՇԽԱՏԱԿԱԶՄԻ ՂԵԿԱՎԱՐ-ՆԱԽԱՐԱՐԻ 2005 ԹՎԱԿԱՆԻ ԴԵԿՏԵՄԲԵՐԻ 30-Ի N 132-Ն ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Ղեկավարվելով «Իրավական ակտերի մասին» Հայաստանի Հանրապետության օրենքի 70-րդ հոդվածի 5-րդ մասով և ի կատարումն Հայաստանի Հանրապետության կառավարության 2013 թվականի մարտի 7-ի N 201-Ն որոշման 3-րդ կետի`

ՀՐԱՄԱՅՈՒՄ ԵՄ՝

1. Հայաստանի Հանրապետության կառավարության աշխատակազմի ղեկավար-նախարարի 2005 թվականի դեկտեմբերի 30-ի «Հայաստանի Հանրապետության կառավարության աշխատակազմի պետական ոչ առևտրային կազմակերպությունների և հարյուր տոկոս` պետությանը սեփականության իրավունքով պատկանող բաժնեմաս ունեցող փակ բաժնետիրական ընկերությունների գործադիր մարմինների թափուր պաշտոն զբաղեցնելու համար մրցույթ և ատեստավորում անցկացնելու կարգերը հաստատելու մասին» N 132-Ն հրամանում կատարել հետևյալ փոփոխությունները և լրացումները`

1) հրամանի «ա» և «բ» կետերով հաստատված կարգերում «ղեկավար-նախարար» բառերը և դրանց համապատասխան հոլովաձևերը փոխարինել «ղեկավար» բառով և դրանց համապատասխան հոլովաձևերով.

2) հրամանի N 1 հավելվածում`

ա. 3-րդ կետի «գ» ենթակետում «Հայաստանի Հանրապետության Նախագահի 2002 թվականի մարտի 16-ի «Հայաստանի Հանրապետության կառավարության գործունեության կարգը սահմանելու մասին» ՆՀ-1064 հրամանագիր» բառերը փոխարինել «Հայաստանի Հանրապետության Նախագահի 2007 թվականի հուլիսի 18-ի «Հայաստանի Հանրապետության կառավարության և նրան ենթակա պետական կառավարման այլ մարմինների գործունեության կազմակերպման կարգը սահմանելու մասին» ՆՀ-174-Ն հրամանագիր» բառերով,

բ. լրացնել հետևյալ բովանդակությամբ նոր` 13.1-ին և 13.2-րդ կետերով.

«13.1. Եթե պետական ոչ առևտրային կազմակերպությունների գործադիր մարմնի թափուր պաշտոն զբաղեցնելու համար մրցույթին մասնակցելու համար ներկայացվել է մեկ դիմում, ապա մրցույթը համարվում է չկայացած, և հայտարարվում է նոր մրցույթ` ընդհանուր հիմունքներով:

13.2. Եթե մրցույթը սույն կարգի 13.1-ին կետով համարվում է չկայացած, ապա դիմող քաղաքացին դրա մասին տեղեկացվում է փաստաթղթերի հանձնման վերջնաժամկետի հաջորդ աշխատանքային օրը:»,

գ. 34-րդ կետը լրացնել հետևյալ բովանդակությամբ նոր` «զ» ենթակետով.

«զ) եթե պետական ոչ առևտրային կազմակերպությունների գործադիր մարմնի թափուր պաշտոն զբաղեցնելու համար մրցույթին մասնակցելու համար դիմել է մեկ քաղաքացի:»:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

Դ. Սարգսյան