«Գրանցված է»

ՀՀ արդարադատության

նախարարության կողմից

4 փետրվարի 2013 թ.

Պետական գրանցման թիվ 11613029

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐ

21 դեկտեմբերի 2012 թ. ք. Երևան

N 740-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐԻ 2012 ԹՎԱԿԱՆԻ ՀՈԿՏԵՄԲԵՐԻ 30-Ի ԹԻՎ 604-Ն ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Ղեկավարվելով «Իրավական ակտերի մասին» Հայաստանի Հանրապետության օրենքի 70-րդ հոդվածի պահանջներով.

ՀՐԱՄԱՅՈՒՄ ԵՄ՝

Հայաստանի Հանրապետության տրանսպորտի և կապի նախարարի 2012 թվականի հոկտեմբերի 30-ի «Կապի և տեղեկատվական հեռահաղորդակցական տեխնոլոգիաների ոլորտի ցուցանիշների ձևաչափը հաստատելու մասին» թիվ 604-Ն հրամանում կատարել հետևյալ փոփոխությունները.

1. Հրամանի 1-ին հավելվածի 26-րդ կետի «Սահմանում» սյունակը շարադրել հետևյալ խմբագրությամբ՝

«Ինտերնետից օգտվողների թվի հաշվարկը կատարել հետևյալ հերթականությամբ.

1) Հաշվարկել 15-ից 74 տարեկան բնակչության քանակը, կիրառելով ՀՀ ազգային վիճակագրական ծառայության կողմից իրականացվող տնային տնտեսությունների հետազոտությամբ հաշվարկված հաշվետու տարվան նախորդող տարվա համար առկա բնակչության թվաքանակի գործակիցը (ՀԲԹ):

2) ՀՀ ազգային վիճակագրական ծառայության կողմից հրապարակված մշտական բնակչության թվաքանակի վերաբերյալ տվյալները (ԲԹ):

3) Հաշվարկել ֆիքսված (լարային) ինտերնետ կապի բաժանորդագրությունների ընդհանուր թիվը, որը ներառում է ընդհանուր ֆիքսված (լարային) լայնաշերտ և դայլ-ափ (dial-up) բաժանորդագրությունները (վերջին 3 ամիսներին ակտիվ բաժանորդագրությունները) (ՖԲԹ):

4) Հաշվարկել առանձնացված շարժական կապով տվյալների փոխանցման ընդհանուր թիվը, որը ներառում է որպես ՅուԷսԲի (ՍSB) մոդեմ (դոնգլ), նաև շարժական կապի ՎայՄաքս (WiMax) բաժանորդագրությունները (ԱՇԲԹ):

5) Հաշվարկել ստանդարտ շարժական կապի բաժանորդագրություններ` լայնաշերտ կապի 256 Մբ/վ և ավելի արագություններով տվյալների հաղորդման միջոցով (վերջին 3 ամսում օգտագործել են վերը նշված ծառայությունը) (ՇԲՔ):

6) Ինտերնետից օգտվողների թվի (ԻՕԹ) հաշվարկը կատարել հետևյալ բանաձևով.

ԻՕԹ= (ՖԲԹ+50% ԱՇԲԹ+10% ՇԲՔ)* ՀԲԹ+50% ԱՇԲԹ

7) Ինտերնետից օգտվող բաժանորդների մասնաբաժնի (ԻՕԹ) հաշվարկը կատարել հետևյալ բանաձևով.

ԻՕԹ= [(ՖԲԹ+50% ԱՇԲԹ+10% ՇԲՔ)* ՀԲԹ+50% ԱՇԲԹ]/ԲԹ*100»:

2. Հրամանի 2-րդ հավելվածի «Տրամադրման և հրապարակման պատասխանատու մարմին» սյունակի «ՀՀ ազգային վիճակագրական ծառայություն (համաձայնագիր)» բառերը փոխարինել «ՀՀ տրանսպորտի և կապի նախարարություն (ըստ՝ ՀՀ ազգային վիճակագրական ծառայության հետ կնքված համաձայնագրի» բառերով:

3. Հրամանի 2-րդ հավելվածի 98-րդ կետի 1-ին ենթակետի «Ցուցանիշ» սյունակի «Հիմնական հանրակրթական ուսումնական հաստատություններ» բառերը փոխարինել «Միջնակարգ հանրակրթական ուսումնական հաստատություններ» բառերով:

4. Հրամանի 2-րդ հավելվածի 121-րդ կետի «Ցուցանիշ» սյունակը շարադրել հետևյալ խմբագրությամբ. «Ինտերնետին միացված մասնագիտական ուսումնական հաստատությունների մասնաբաժինը Այդ թվում՝»:

5. Սույն հրամանն ուժի մեջ է մտնում պաշտոնական հրապարակմանը հաջորդող տասներորդ օրվանից:

ՀՀ տրանսպորտի և կապի նախարար`

Գ. Բեգլարյան