Փ Ո Խ Ը Մ Բ Ռ Ն Մ Ա Ն  Հ ՈՒ Շ Ա Գ Ի Ր

ՍԵՎծովյան օղակաձԵՎ մայրուղու համակարգված Զարգացման մասին

Սևծովյան տնտեսական համագործակցության կազմակերպության (ՍԾՏՀ) անդամ պետությունների կառավարությունները, այսուհետ` Կողմեր,

ցանկանալով ամրապնդել ՍԾՏՀ անդամ պետությունների միջև համագործակցությունը` խթանելով ուղևորների և բեռների միջազգային ճանապարհային փոխադրումները, որը չափազանց կարևոր է նրանց տնտեսական զարգացման համար,

հավատացած լինելով, որ ճանապարհային շինարարությանն ու վերականգնմանն ուղղված համաձայնեցված ծրագիրն ունի կենսական նշանակություն Եվրոպական միության, Սևծովյան և Ասիական երկրների միջև կապեր հաստատելու և ընդլայնելու համար, որը կոչված է բավարարելու միջազգային երթևեկության պահանջներն ապագայում,

նշելով, որ ճանապարհային ենթակառուցվածքի համաձայնեցված զարգացման նպատակով ընդհանուր խնդիրների լուծումը պահանջում է նոր և նորարարական մոտեցումներ տարածաշրջանային համագործակցության շրջանակներում,

հաշվի առնելով, որ Սևծովյան օղակաձև մայրուղու, այսուհետ` ՍԾՕՄ, զարգացումը նույնպես կխթանի համագործակցությունը մուլտիմոդալ տրանսպորտային ենթակառուցվածքի զարգացման համար,

ցանկանալով ունենալ համապատասխան ճանապարհային կապ անդրեվրոպական, համաեվրոպական և եվրասիական տրանսպորտային ցանցի հետ,

հաշվի առնելով ՍԾՏՀ անդամ պետությունների տրանսպորտի նախարարների համատեղ հայտարարությունը Եվրասիական տրանսպորտային կապերի շրջանակներում Սև ծովի տրանսպորտային ցանցը անդրեվրոպական տրանսպորտային ցանցին միացնելու վերաբերյալ, որն ստորագրվել է 2005 թվականի հունվարի 28-ին` Սալոնիկում,

ցանկանալով, որ ՍԾՕՄ-ը կառուցվի` համաձայնեցնելով Եվրոպական միության հետ, նպատակ ունենալով միանալու «Անդրեվրոպական գլխավոր տրանսպորտային առանցքները դեպի հարևան երկրներ և տարածաշրջաններ ընդարձակելու ցանց»-ին,

նկատի ունենալով, որ տնտեսական համագործակցությունը պետք է բավարարի Կողմերի իրական պահանջներն ու շահերը,

գիտակցելով, որ ՍԾՕՄ-ի կառուցումն իրենից ներկայացնում է մեծ մարտահրավեր ՍԾՏՀ կազմակերպության համար, որի մարմինները կոչված են ակտիվորեն մասնակցելու և փոխգործակցելու` դրա հաջողությունն ապահովելու համար,

գիտակցելով այն փաստը, որ ենթակառուցվածքի զարգացումը երկարաժամկետ գործընթաց է,

համաձայնություն են ձեռք բերում հետևյալ Փոխըմբռնման հուշագրի շուրջ` որպես ընդհանուր նպատակին ուղղված քայլ Սևծովյան օղակաձև մայրուղու կառուցման համար:

Հոդված 1

Փոխըմբռնման հուշագրի նպատակները

1) Կողմերի միջև համագործակցության ամրապնդում Սևծովյան օղակաձև մայրուղու (ՍԾՕՄ) զարգացման համար, որը հանդիսանում է Սև ծովը շրջապատող միջազգային ճանապարհ` ուժի մեջ մտած համաձայնագրերին և համապատասխան կանոնակարգերին և չափանիշներին համապատասխան: Այսպիսի համագործակցությունում շեշտը հիմնականում դրվում է այնպիսի քաղաքականության մշակման վրա, այդ թվում` ընդհանուր սկզբունքների և գործողությունների, ինչպիսին է կազմակերպչական, օրենսդրական և տնտեսական քաղաքականությունը, ինչպես նաև դրա իրականացումը և հետևողական կատարումը.

2) ՍԾՕՄ-ի զարգացումը կարևոր քայլ է Սև ծովի օղակաձև միջանցքի ստեղծման, մուլտիմոդալ տրանսպորտային ցանցի համար և պետք է ընդգրկի հիմնական և հավելյալ ճանապարհային ենթակառուցվածքի պահպանումը, վերակառուցումը, վերականգնումը, զարգացումը և նոր շինարարությունը.

3) ՍԾՕՄ-ի նախագծման, կառուցման, տեխնիկական պահպանման, շահագործման և կառավարման հարցերում աջակցության ցուցաբերում Կողմերի տարածաշրջաններում Եվրոպական տրանսպորտային ընդգրկուն ենթակառուցվածքի շրջանակներում` այսպիսով թույլ տալով ստեղծել դեռևս գոյություն չունեցող օղակներ Սևծովյան տարածաշրջանի գործող մայրուղիների ցանցում.

4) նախադրյալների և պայմանների սահմանում միջոցների ամենաարդյունավետ օգտագործման և «նոու հաու»-ի (know-how) համար, որոնք ստացվել են հանրային և մասնավոր աղբյուրներից.

5) տարածաշրջանում գիտելիքի, փորձի, «նոու հաու»-ի հետագա տարածում, որոնք մինչև այս պահը ձեռք են բերվել ԵՄ-ի անդամ պետություններում:

Հոդված 2

ՍԾՕՄ-ի հիմնական առանձնահատկությունները

1) ՍԾՕՄ-ը մեծ թողունակությամբ մայրուղի է: Փոխըմբռնման հուշագրի 3-րդ հոդվածի համաձայն ստեղծված ՍԾՕՄ-ի Ղեկավար կոմիտեն կարող է ուսումնասիրել տվյալ մայրուղու հիմնական ճանապարհը, դրա հավելյալ օղակները, ինչպես նաև տեխնիկական պահանջները միջազգային կազմակերպությունների և ԵՄ-ի կողմից հաստատված առաջարկությունների և նորմերի, այդ թվում` «Միջազգային գլխավոր ավտոմայրուղիների մասին» եվրոպական համաձայնագրի (AGR) հիման վրա:

2) ՍԾՕՄ-ով նախատեսվում է տրամադրել համապատասխան որակի ծառայություններ` ապահովելով անվտանգություն, արագություն և հարմարավետություն` այսպիսով նպաստելով տնտեսական և սոցիալական զարգացմանը հօգուտ եվրոպական ամբողջ աշխարհամասի: Այս համատեքստում Կողմերը, հաշվի առնելով, որ ՍԾՕՄ-ի մասերը նաև անդրեվրոպական տրանսպորտային ցանցի մաս են կազմում, համաձայնում են առաջարկել իրավասու միջազգային իշխանություններին ՍԾՕՄ-ն ապագայում ներառել «Անդրեվրոպական գլխավոր տրանսպորտային առանցքները դեպի հարևան երկրներ և տարածաշրջաններ ընդարձակելու ցանց»-ում:

3) ՍԾՕՄ-ի երկարությունը մոտավորապես 7000 կմ է:

Հիմնական ճանապարհը և նրա հանգույցները կարող են ընդգրկել հետևյալ քաղաքները.

Ստամբուլ (Թուրքիա), Տրապիզոն (Թուրքիա), Բաթում (Վրաստան), Փոթի (Վրաստան), Երևան (Հայաստան), Բաքու (Ադրբեջան), Նովոռոսիյսկ (Ռուսաստան), Դոնի Ռոստով (Ռուսաստան), Տագանրոգ (Ռուսաստան), Մարիուպոլ (Ուկրաինա), Օդեսա (Ուկրաինա), Քիշնև (Մոլդովա), Բուխարեստ (Ռումինիա), Կոստանցա (Ռումինիա), Հասկովո ( Բուլղարիա), Սոֆիա ( Բուլղարիա), Նիշ (Սերբիա), Բելգրադ (Սերբիա), Տիրանա (Ալբանիա), Էդիրնե (Թուրքիա), Կոմոտինի (Հունաստան), Ալեքսանդրապոլիս (Հունաստան), Ստամբուլ (Թուրքիա):

4) ՍԾՕՄ-ի Ղեկավար կոմիտեն կմշակի հիմնական ճանապարհը և նրա հանգույցները ավելի ուշ փուլում:

Հոդված 3

ՍԾՕՄ-ի իրականացման կազմակերպչական միջոցները

1) ՍԾՕՄ-ի նախագիծն իրականացնելու համար Կողմերը համաձայնում են հիմնել ՍԾՕՄ-ի Ղեկավար կոմիտե, որն իր նիստերն անցկացնելու է առնվազն տարին մեկ անգամ` ՍԾՏՀ տրանսպորտի հարցերով աշխատանքային խմբի նիստից անմիջապես առաջ կամ հետո: ՍԾՕՄ-ի Ղեկավար կոմիտեն մշակում է ՍԾՕՄ-ի զարգացման քաղաքականությունը և որոշում կայացնում դրա իրականացման ապահովման համապատասխան բոլոր միջոցների վերաբերյալ:

2) Բոլոր Կողմերը և ՍԾՏՀ Միջազգային մշտական քարտուղարությունը պետք է ներկայացվեն ՍԾՕՄ-ի Ղեկավար կոմիտեում և նշանակեն մեկ ներկայացուցիչ` փոխարինողի հետ միասին: Այդպիսի ներկայացուցիչները կարող են նաև ՍԾՏՀ տրանսպորտի հարցերով աշխատանքային խմբի մասնակիցներ լինել: Կողմերը համաձայնում են հրավիրել Առևտրի և զարգացման սևծովյան բանկին (BSTDB)` լիիրավ մասնակցություն ունենալու ՍԾՕՄ-ի Ղեկավար կոմիտեի աշխատանքներին: Բոլոր Կողմերը ծանուցվում են այդպիսի նշանակումների մասին ՍԾՏՀ Միջազգային մշտական կոմիտեի միջոցով: ՍԾՕՄ-ի Ղեկավար կոմիտեն իր որոշումներն ընդունում է ընդհանուր համաձայնությամբ (consensus)` հաշվի առնելով իր կողմից հաստատվող ընթացակարգային կանոնները: ՍԾՕՄ-ի Ղեկավար կոմիտեի աշխատանքային լեզուն անգլերենն է: Կողմերը նախագահում են Ղեկավար կոմիտեում երկամյա ռոտացիայի սկզբունքով` I հավելվածում նշված հերթականության կարգով, որը Փոխըմբռնման հուշագրի անբաժանելի մասն է: Նախագահությունն իրականացվում է յուրաքանչյուր ՍԾՏՀ անդամ պետության կողմից` համաձայն հաստատված ժամանակացույցի: Փոխնախագահությունն իրականացնող անդամ պետությունն ստանձնում է նախագահության հաջորդ ժամանակահատվածը:

3) ՍԾՏՀ ներկայացուցչությունների դիտորդները, ՍԾՏՀ-ին առնչվող մարմինները, ՍԾՏՀ երկխոսության ոլորտային գործընկերները, այլ շահագրգիռ միջազգային կազմակերպություններն ու հաստատությունները անհրաժեշտության դեպքում կարող են հրավիրվել ՍԾՕՄ-ի Ղեկավար կոմիտեի նիստերին:

4) Կողմերը համաձայնում են նաև հիմնել Տեխնիկական հարցերով մշտական համատեղ քարտուղարություն, որի խնդիրն է ՍԾՕՄ-ի Ղեկավար կոմիտեի աշխատանքներին աջակցելը և այլ անհրաժեշտ աշխատանքների կատարումը ՍԾՕՄ-ի Ղեկավար կոմիտեի կողմից տրված ցուցումների հիման վրա` մայրուղու ծրագիրն իրականացնելու համար: Ավելի ստույգ` Տեխնիկական հարցերով մշտական համատեղ քարտուղարությունը ներկայացնում է առաջարկներ, գնահատում ուսումնասիրությունները և համագործակցում ՍԾՕՄ-ի Ղեկավար կոմիտեի հետ ֆինանսական միջոցները որոշելու հարցում:

5) Կողմ հանդիսացող յուրաքանչյուր երկրում ՍԾՕՄ-ի հարցերով ազգային համակարգողը նշանակվում է համապատասխան երկրի կառավարության կողմից: Այս համակարգողը իրավասու է ՍԾՕՄ-ին առնչվող` երկրում իրականացվող աշխատանքների համակարգման համար:

6) Վարչական, կազմակերպական և տեխնիկական միջոցների ֆինանսավորումն իրականացվում է ՍԾՕՄ-ի Նախագծային հատուկ համագործակցության հիմնադրամի միջոցով, որը Կողմերի միջև ստեղծվել է առանձին միջազգային համաձայնագրի համաձայն, և որով սահմանվել են Հիմնադրամի նպատակները, խնդիրները, միջոցները, ինչպես նաև կառավարման ընթացակարգը:

Հոդված 4

ՍԾՕՄ-ի ֆինանսավորումը

Տեխնիկական հարցերով մշտական համատեղ քարտուղարությունն ստեղծվում է Սալոնիկում, իսկ Հունաստանի Հանրապետությունը կատարում է նրա ընդհանուր պահպանման հետ կապված ծախսերը:

ՍԾՕՄ-ի կառուցման և վերակառուցման ֆինանսավորումը կարող է իրականացվել պետական և բյուջեի միջոցների հաշվին, ինչպես նաև մասնավոր հատվածի կողմից ստացվող տարբեր կապիտալների կողմից: Ֆինանսավորումը կարող է իրականացվել նաև ԵՄ-ի միջոցներով, ինչպես նաև Ներդրումների եվրոպական բանկի, Վերակառուցման և զարգացման եվրոպական բանկի, Համաշխարհային բանկի և այլ բանկերի ու հիմնադրամների կողմից տրամադրվող վարկերի միջոցով:

Հոդված 5

Փոխըմբռնման հուշագրում փոփոխություններ կատարելու ընթացակարգը

1) Փոխըմբռնման հուշագրում կարող են փոփոխություններ կատարվել ստորև ներկայացված ցանկացած ընթացակարգին համապատասխան.

ա) Յուրաքանչյուր Կողմի դիմելու դեպքում փոփոխություն կատարելու մասին նրա առաջարկը քննարկվում է ՍԾՏՀ տրանսպորտի հարցերով աշխատանքային խմբի կողմից:

բ) Եթե փոփոխությունը հաստատվում է քվեարկությանը ներկա գտնվող և քվեարկողների ձայների 2/3 մեծամասնությամբ, և եթե այդ մեծամասնությունը ներառում է քվեարկությանը ներկա գտնվող և քվեարկող Կողմերի ձայների 2/3-ը, ՍԾՏՀ Միջազգային մշտական քարտուղարության գլխավոր քարտուղարը այդ փոփոխությունները ներկայացնում է բոլոր Կողմերի հաստատմանը:

գ) Կողմերի 2/3 մեծամասնության կողմից այդ փոփոխություններն ընդունվելու դեպքում ՍԾՏՀ Միջազգային մշտական քարտուղարությունը բոլոր Կողմերին ծանուցում է այդ մասին, և փոփոխությունն ուժի մեջ է մտնում այդ ծանուցման օրվանից տասներկու ամիսը լրանալուց հետո:

2) Կողմերի առնվազն 1/3-ի դիմումի հիման վրա ՍԾՏՀ Միջազգային մշտական քարտուղարության գլխավոր քարտուղարը կարող է հրավիրել խորհրդաժողով, որին հրավիրվում են ՍԾՏՀ անդամ պետությունները: Սույն հոդվածի 1-ին պարբերության «ա» և «բ» ենթապարբերություններով սահմանված ընթացակարգը կիրառվում է այդպիսի խորհրդաժողովի կողմից քննարկման ներկայացված ցանկացած փոփոխության նկատմամբ:

Հոդված 6

Համապատասխան մարմնի հասցեի հաղորդումը

Յուրաքանչյուր Կողմ սույն Փոխըմբռնման հուշագիրն ստորագրելու, վավերացնելու, ընդունելու, հաստատելու կամ նրան միանալու պահին ՍԾՏՀ գլխավոր քարտուղարին հայտնում է իր համապատասխան մարմնի անվանումն ու հասցեն, ուր, սույն Փոխըմբռնման հուշագրի 5-րդ հոդվածին համապատասխան, ներկայացվելու են փոփոխության վերաբերյալ առաջարկները:

Հոդված 7

Փոխըմբռնման հուշագրի ուժի մեջ մտնելը

Սույն Փոխըմբռնման հուշագիրն ուժի մեջ կմտնի այն օրվան հաջորդող ամսվա առաջին օրվանից, երբ ութ Կողմերը կստորագրեն այն և կտեղեկացնեն ՍԾՏՀ Միջազգային մշտական քարտուղարությանը, որ իրենք կատարել են այս նպատակով անհրաժեշտ իրավական ընթացակարգերը:

Հոդված 8

Տևողությունը

Սույն Փոխըմբռնման հուշագիրն ուժի մեջ կլինի տասը տարի նախնական ժամկետով, իսկ դրանից հետո ինքնաբերաբար կերկարաձգվի հետագա հինգ տարի ժամանակահատվածով, եթե Կողմերի 2/3-ի ծանուցման հիման վրա չդադարեցվի: Կողմերի առարկությունները պետք է ներկայացվեն տասը տարվա ժամկետը լրանալուց ոչ ուշ, քան մեկ տարի առաջ:

Հոդված 9

Փոխըմբռնման հուշագիրը չեղյալ հայտարարելը ու դադարեցնելը

1) Սույն Փոխըմբռնման հուշագրի բնօրինակը` կազմված մեկ օրինակով, անգլերենով, ի պահ է հանձնվում Միջազգային մշտական քարտուղարությանը (PERMIS), որը յուրաքանչյուր Կողմին հանձնում է նրա հաստատված օրինակը և իրականացնում այն բոլոր պարտավորությունները, որոնք ծագում են ավանդապահի իր պարտականությունից:

2) ՍԾՏՀ անդամ պետությունների այն կառավարությունները, որոնք չեն ստորագրել սույն Փոխըմբռնման հուշագիրը, կարող են դառնալ նրա Կողմեր միայն նրա ուժի մեջ մտնելուց հետո:

3) Այն կառավարությունները, որոնք ստորագրել են սույն Փոխըմբռնման հուշագիրը նրա ուժի մեջ մտնելուց հետո, կարող են դառնալ Կողմեր` ավանդապահին փոխանցելով ներպետական բոլոր այն ընթացակարգերի կատարման վերաբերյալ ծանուցումը, որոնք կիրառվում են նախքան միջազգային համաձայնագրերի ուժի մեջ մտնելը:

4) Յուրաքանչյուր Կողմ կարող է չեղյալ հայտարարել սույն Փոխըմբռնման հուշագիրը ՍԾՏՀ գլխավոր քարտուղարին գրավոր ծանուցում ներկայացնելու միջոցով:

5) Սույն Փոխըմբռնման հուշագիրը ճանաչվում է ուժը կորցրած, եթե այն ստորագրած Կողմերի թիվը իրար հաջորդող տասներկու ամիսների ընթացքում լինում է չորսից պակաս:

Ստորագրված է Բելգրադում 2007 թվականի ապրիլի 19-ին, մեկ օրինակով` անգլերենով:

Ալբանիայի Հանրապետության Կառավարության կողմից`

Հայաստանի Հանրապետության Կառավարության կողմից`

Ադրբեջանի Հանրապետության Կառավարության կողմից`

Բուլղարիայի Հանրապետության Կառավարության կողմից`

Վրաստանի Կառավարության կողմից`

Հունաստանի Հանրապետության Կառավարության կողմից`

Մոլդովայի Հանրապետության Կառավարության կողմից`

Ռումինիայի Կառավարության կողմից`

Ռուսաստանի Դաշնության Կառավարության կողմից`

Սերբիայի Հանրապետության Կառավարության կողմից`

Թուրքիայի Հանրապետության Կառավարության կողմից`

Հուշագիրը ՀՀ-ի համար ուժի մեջ է մտել 2009թ. հունվարի 1-ից:

Հավելված 1

Ռոտացիայի առաջարկվող կառուցվածքը Ղեկավար կոմիտեում նախագահության և փոխնախագահության համար

Նախագահ	Փոխնախագահ
Ռուսաստանի Դաշնություն	Բուլղարիայի Հանրապետություն
Բուլղարիայի Հանրապետություն	Ուկրաինա
Ուկրաինա	Վրաստան
Վրաստան	Թուրքիայի Հանրապետություն
Թուրքիայի Հանրապետություն	Ադրբեջանի Հանրապետություն
Ադրբեջանի Հանրապետություն	Հունաստանի Հանրապետություն
Հունաստանի Հանրապետություն	Ալբանիայի Հանրապետություն
Ալբանիայի Հանրապետություն	Մոլդովայի Հանրապետություն
Մոլդովայի Հանրապետություն	Հայաստանի Հանրապետություն
Հայաստանի Հանրապետություն	Սերբիայի Հանրապետություն
Սերբիայի Հանրապետություն	Ռումինիա
Ռումինիա	Ռուսաստանի Դաշնություն

Ադրբեջանի Հանրապետության վերապահումը

«Սևծովյան օղակաձև մայրուղու համակարգված զարգացման մասին» Փոխըմբռնման հուշագրի վերաբերյալ

1. Ադրբեջանի Հանրապետությունը հայտարարում է, որ «Սևծովյան օղակաձև մայրուղու համաձայնեցված զարգացման մասին» Փոխըմբռնման հուշագրում ամրագրված ոչ մի իրավունք, պարտավորություն կամ դրույթ չի կիրառվում Ադրբեջանի Հանրապետության կողմից իր տարածքը հատող ճանապարհների կամ փոխադրամիջոցների նկատմամբ, որոնց համար Հայաստանի Հանրապետությունը մեկնման, տարանցման կամ նպատակակետ տարածք է:

Ադրբեջանի Հանրապետությունն իրեն իրավունք է վերապահում ցանկացած ժամանակ փոփոխություն կատարելու սույն վերապահման 1-ին պարբերության մեջ նշված դրույթներում կամ չեղյալ ճանաչելու դրանք. մյուս Կողմերը գրավոր կծանուցվեն այդպիսի փոփոխությունների կամ չեղյալ ճանաչման մասին:

2. «Պայմանագրերի իրավունքի մասին» Վիեննայի կոնվենցիայի 40-րդ հոդվածի համաձայն` Ադրբեջանի Հանրապետությունը «Սևծովյան օղակաձև մայրուղու համաձայնեցված զարգացման մասին» Փոխըմբռնման հուշագրի 5-րդ հոդվածի 1-ին պարբերության «գ» ենթապարբերությունն իր համար պարտադիր ճանաչելու համաձայնություն չի տալիս:

Ադրբեջանի Հանրապետության արտաքին գործերի նախարար`

Էլմար Մամեդյարով

Հայաստանի Հանրապետության առարկությունը

«Սևծովյան օղակաձև մայրուղու համակարգված զարգացման» Փոխըմբռնման Հուշագրի նկատմամբ Ադրբեջանի Հանրապետության կողմից կատարված վերապահման դեմ

Հայաստանի Հանրապետությունն առարկում է Ադրբեջանի Հանրապետության կողմից «Սևծովյան օղակաձև մայրուղու համակարգված զարգացման» Փոխըմբռնման Հուշագրի նկատմամբ կատարված վերապահման 1-ին կետի դեմ:

Ադրբեջանի Հանրապետության կողմից կատարված վերապահումը լինելով ընդհանուր բնույթի և անորոշ, չունենալով կիրառման հստակ սահմաններ և պայմաններ` անհնարին է դարձնում նշված Փոխըմբռնման հուշագրի` ոչ միայն Հայաստանի Հանրապետության և Ադրբեջանի Հանրապետության միջև կիրառումը, այլև նման բովանդակությամբ վերապահումն անհնար է դարձնում համագործակցությունը ՍԾՏՀ անդամ պետությունների միջև վերոնշյալ փոխըմբռնման հուշագրի շրջանակներում:

Հայաստանի Հանրապետությունը գտնում է, որ Ադրբեջանի Հանրապետության կողմից Փոխըմբռնման հուշագրի նկատմամբ կատարված վերապահումը հակասում է Փոխըմբռնման հուշագրի առարկային և նպատակին, որն անթույլատրելի է միջազգային իրավունքի տեսանկյունից:

Հայաստանի Հանրապետությունն ընդգծում է նաև, որ Ադրբեջանի Հանրապետության վերապահումը չի համապատասխանում 1969թ. Միջազգային պայմանագրերի իրավունքի մասին Վիեննայի կոնվենցիայով (այսուհետ` Կոնվենցիա) վերապահմանը ներկայացվող պահանջներին, հետևաբար հակասում է Կոնվենցիայի դրույթներին: Մասնավորապես, համաձայն Կոնվենցիայի, պետությունը վերապահում կատարելով կարող է բացառել կամ փոփոխել պայմանագրի որոշ դրույթների իրավական ուժը, եթե դրանք կիրառվում են այդ իսկ պետության նկատմամբ: Սակայն Ադրբեջանի Հանրապետությունը իր վերապահման մեջ չի նշում որևէ որոշակի դրույթ, որի իրավական կիրառումը կցանկանար բացառել կամ փոփոխել, ուստի Ադրբեջանի Հանրապետությունը, նման վերապահում կատարելով, խախտում է Կոնվենցիայի դրույթները:

Հայաստանի Հանրապետությունը ցանկանում է Փոխըմբռնման հուշագրի կողմ հանդիսացող բոլոր պետությունների ուշադրությունը հրավիրել վերը հիշատակված հանգամանքների վրա և առաջարկում է Փոխըմբռնման հուշագրի ավանդապահին` հորդորել Ադրբեջանի Հանրապետությանը վերանայել իր վերապահումը 2007թ. ապրիլի 19-ին Բելգրադում ստորագրված «Սևծովյան օղակաձև մայրուղու համակարգված զարգացման» Փոխըմբռնման Հուշագրի նկատմամբ: