«Գրանցված է»

ՀՀ արդարադատության

նախարարության կողմից

16 մարտի 2011 թ.

Պետական գրանցման թիվ 11011131

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐ

24 փետրվարի 2011 թ.

N 124-Ն

Հ Ր Ա Մ Ա Ն

ՆԱԽՆԱԿԱՆ ՄԱՍՆԱԳԻՏԱԿԱՆ (ԱՐՀԵՍՏԱԳՈՐԾԱԿԱՆ) ԵՎ ՄԻՋԻՆ ՄԱՍՆԱԳԻՏԱԿԱՆ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ԽՈՐՀՐԴԻ ՁԵՎԱՎՈՐՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐԻ 2006 ԹՎԱԿԱՆԻ ՀՈՒՆԻՍԻ 23-Ի N 527-Ն ԵՎ 2008 ԹՎԱԿԱՆԻ ՕԳՈՍՏՈՍԻ 7-Ի N 646-Ն ՀՐԱՄԱՆՆԵՐՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Ղեկավարվելով «Նախնական մասնագիտական (արհեստագործական) և միջին մասնագիտական կրթության մասին» Հայաստանի Հանրապետության օրենքի 18-րդ հոդվածի 3-րդ մասով և «Իրավական ակտերի մասին» Հայաստանի Հանրապետության օրենքի 72-րդ հոդվածով`

 ՀՐԱՄԱՅՈՒՄ ԵՄ՝

1. Հաստատել «Նախնական մասնագիտական (արհեստագործական) և միջին մասնագիտական պետական ուսումնական հաստատության խորհրդի ձևավորման կարգը»` համաձայն հավելվածի:

2. Հայաստանի Հանրապետության կրթության և գիտության նախարարության աշխատակազմի նախնական (արհեստագործական) և միջին մասնագիտական կրթության վարչությանը (պետ` Ռ. Աբրահամյանին) և իրավաբանական վարչությանը (պետ` Մ. Գրիգորյանին). սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական գրանցման:

3. Ուժը կորցրած ճանաչել Հայաստանի Հանրապետության կրթության և գիտության նախարարի 2006 թվականի հունիսի 23-ի «Միջին մասնագիտական պետական ուսումնական հաստատության խորհրդի ձևավորման կարգը հաստատելու մասին» N 527-Ն և 2008 թվականի օգոստոսի 7-ի «Նախնական մասնագիտական (արհեստագործական) պետական ուսումնական հաստատության խորհրդի ձևավորման կարգը հաստատելու մասին» N 646-Ն հրամանները:

4. Սույն հրամանի կատարման վերահսկողությունը հանձնարարել նախարարի տեղակալ Ա. Ավետիսյանին:

Նախարար`

Ա. Աշոտյան

Հավելված ՀՀ կրթության և գիտության նախարարի 2011 թվականի փետրվարի 24-ի թիվ 124-Ն հրամանի

Կ Ա Ր Գ

ՆԱԽՆԱԿԱՆ ՄԱՍՆԱԳԻՏԱԿԱՆ (ԱՐՀԵՍՏԱԳՈՐԾԱԿԱՆ) ԵՎ ՄԻՋԻՆ ՄԱՍՆԱԳԻՏԱԿԱՆ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ԽՈՐՀՐԴԻ ՁԵՎԱՎՈՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույնով սահմանվում է նախնական մասնագիտական (արհեստագործական) և միջին մասնագիտական պետական ուսումնական հաստատության (այսուհետ` Հաստատություն) կոլեգիալ կառավարման մարմնի` խորհրդի ձևավորման կարգը:

2. Հաստատության կոլեգիալ կառավարման մարմինը խորհուրդն է (այսուհետ` Խորհուրդ), որի լիազորությունների ժամկետը 5 տարի է:

II. ԽՈՐՀՐԴԻ ՁԵՎԱՎՈՐՈՒՄԸ

3. Խորհուրդը ձևավորվում է Հաստատության մանկավարժական կազմի, ուսանողության, հիմնադրի, կրթության պետական կառավարման լիազորված մարմնի կողմից առաջադրված ներկայացուցիչներից:

4. Խորհրդի անդամների թիվը (ոչ ավելի, քան 20) սահմանվում է Հաստատության կանոնադրությամբ:

5. Հաստատության մանկավարժական կազմից Խորհրդի անդամության թեկնածուներ է առաջարկում Հաստատության մանկավարժական կազմի ընդհանուր ժողովը.

1) Հաստատության մանկավարժական կազմի ընդհանուր ժողովի կողմից առաջադրված անձանց թեկնածությունները ներկայացվում են պետական կառավարման լիազորված մարմին (այսուհետ` Լիազորված մարմին),

2) Հաստատության տնօրենը չի կարող լինել նույն Հաստատության Խորհրդի անդամ,

3) Հաստատության մանկավարժական կազմից ընտրված Խորհրդի անդամները կազմում են Խորհրդի անդամների 20 տոկոսը:

6. Հաստատության ուսանողության ներկայացուցիչներից Խորհրդի անդամության թեկնածություններ է առաջարկում Հաստատության ուսանողական խորհուրդը.

1) Հաստատության ուսանողական խորհուրդն ընտրում է Հաստատության ուսանողներից առաջադրված թեկնածությունները և ներկայացնում Լիազորված մարմին,

2) ուսանողության կողմից ընտրված Խորհրդի անդամները կազմում են Խորհրդի անդամների 25 տոկոսը:

7. Հիմնադիրը կամ հիմնադրի լիազորմամբ` տարածքային կառավարման պետական մարմինն առաջադրում է Խորհրդի անդամների 10 տոկոսը:

8. Կրթության պետական կառավարման լիազորված մարմնի ներկայացուցիչներ կարող են առաջադրվել.

1) պետական պաշտոն զբաղեցնող, գիտության, մշակույթի և տնտեսության տարբեր ոլորտների ներկայացուցիչներ` 10 տոկոս,

2) սոցիալական գործընկերներ` 25 տոկոս,

3) տարածքային զբաղվածության ծառայության ներկայացուցիչներ` 10 տոկոս:

9. Լիազորված մարմինն առաջադրված անձանց թեկնածությունների հիման վրա հաստատում է Խորհրդի անվանական կազմը:

10. Խորհուրդն իր կազմից /բացառությամբ ուսանողության ներկայացուցիչներից/, փակ քվեարկությամբ ընտրում է Խորհրդի նախագահ` քվեարկությանը մասնակցած անդամների ընդհանուր թվի ձայների մեծամասնությամբ:

11. Խորհրդի անդամի լիազորությունները, լիազորությունների դադարեցման հիմքերը, պարտավորությունները սահմանվում են Հաստատության կանոնադրությամբ:

12. Խորհրդի անդամի լիազորությունների դադարեցման դեպքում նրան առաջադրող մարմինը 15-օրյա ժամկետում առաջադրում է նոր թեկնածու` համաձայն սույն կարգի:

13. Խորհրդի նիստերը գումարվում են Հաստատության կանոնադրությամբ նախատեսված ժամկետներում և դեպքերում` Խորհրդի նախագահի կողմից` սեփական նախաձեռնությամբ, ինչպես նաև լիազորված մարմնի, Հաստատության տնօրենի կամ Խորհրդի անդամների 1/3-ի նախաձեռնությամբ:

14. Լիազորված մարմինը կարող է վաղաժամկետ դադարեցնել Խորհրդի լիազորությունները կամ լուծարել Խորհուրդը.

1) Հաստատության կանոնադրությամբ Խորհրդին վերապահված լիազորությունները չկատարելու դեպքում,

2) Հաստատությունը լուծարվելու կամ վերակազմակերպվելու դեպքում: