«Գրանցված է»
ՀՀ արդարադատության
նախարարության կողմից
16 նոյեմբերի 2009 թ.
Պետական գրանցման թիվ 33109394

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՏԱՐԱԾՔԱՅԻՆ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆ
ՋՐԱՅԻՆ ՏՆՏԵՍՈՒԹՅԱՆ ՊԵՏԱԿԱՆ ԿՈՄԻՏԵ

28 հոկտեմբերի 2009 թ. ք. Երևան

N 173-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆ ՋՐԱՅԻՆ ՏՆՏԵՍՈՒԹՅԱՆ ՊԵՏԱԿԱՆ ԿՈՄԻՏԵԻ ԳՈՐԾԱՎԱՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2002 թվականի հունիսի 20-ի «Հայաստանի Հանրապետության կառավարության գործավարության կարգը հաստատելու մասին» N 890-Ն որոշման 2-րդ կետի «բ» ենթակետը՝

Հրամայում եմ՝

1. Հաստատել Հայաստանի Հանրապետության տարածքային կառավարման նախարարության ջրային տնտեսության պետական կոմիտեի գործավարության կարգը՝ համաձայն հավելվածի:

2. Հայաստանի Հանրապետության տարածքային կառավարման նախարարության ջրային տնտեսության պետական կոմիտեի աշխատակազմի իրավաբանական վարչության պետ Ս. Մաճկալյանին՝ 5-օրյա ժամկետում սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն՝ պետական գրանցման:

3. Ուժը կորցրած ճանաչել Հայաստանի Հանրապետության կառավարությանն առընթեր ջրային տնտեսության պետական կոմիտեի նախագահի 2004 թվականի հունիսի 11-ի «Հայաստանի Հանրապետության կառավարությանն առընթեր ջրային տնտեսության պետական կոմիտեի գործավարության կարգը հաստատելու մասին» N 117-Ն հրամանը:

Կոմիտեի նախագահ`

Ա. Անդրեասյան

Հավելված ՀՀ տարածքային կառավարման նախարարության ջրային տնտեսության պետական կոմիտեի նախագահի 2009 թվականի հոկտեմբերի 28-ի N 173-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆ ՋՐԱՅԻՆ ՏՆՏԵՍՈՒԹՅԱՆ ՊԵՏԱԿԱՆ ԿՈՄԻՏԵԻ ԳՈՐԾԱՎԱՐՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետության տարածքային կառավարման նախարարության ջրային տնտեսության պետական կոմիտեի (այսուհետ՝ Կոմիտե) գործավարության կարգը:

2. Կոմիտեում գործավարության վերահսկողությունը և աշխատանքների կազմակերպման համակարգումը իրականացնում է Կոմիտեի աշխատակազմի (այսուհետ՝ Աշխատակազմ) ղեկավարը:

Կոմիտեում գործավարության միասնական կարգի պահպանման նկատմամբ հսկողությունն իրականացնում է Աշխատակազմի քարտուղարությունը (այսուհետ՝ Քարտուղարություն):

3. Աշխատակազմի կառուցվածքային ստորաբաժանումներում (Այսուհետ՝ Ստորաբաժանում) գործավարության կազմակերպման համար պատասխանատու է կառուցվածքային ստորաբաժանման ղեկավարը:

4. Կոմիտեում փաստաթղթաշրջանառությունը իրականացվում է հայերեն լեզվով: Օտար լեզվով ստացված բոլոր փաստաթղթերը թարգմանվում են Աշխատակազմի արտաքին կապերի բաժնի կողմից և բաժնի պետի նշագրով ներկայացվում Աշխատակազմի Քարտուղարությանը, որից հետո միայն ստացված փաստաթուղթը դրվում է շրջանառության մեջ:

5. Կոմիտեում գաղտնի գործավարության կազմակերպումը և վարումը իրականացնում է Կոմիտեի նախագահի հրամանով լիազորված անձը՝ «Պետական և ծառայողական գաղտնիքի մասին» Հայաստանի Հանրապետության օրենքի պահանջներին համապատասխան:

6. Սույն կարգը պարտադիր է Աշխատակազմի կառուցվածքային ստորաբաժանումների, ինչպես նաև Կոմիտեի այլ աշխատողների համար:

II. ԿՈՄԻՏԵՈՒՄ ՍՏԱՑՎԱԾ ԹՂԹԱԿՑՈՒԹՅԱՆ ԸՆԴՈՒՆՈՒՄԸ, ԳՐԱՆՑՈՒՄԸ ԵՎ ՇԱՐԺԸ

7. Աշխատակազմում ստացված ամբողջ թղթակցությունն ընդունվում և գրանցվում է կոմիտեի աշխատակազմի քարտուղարության կողմից համակարգչային ծրագրի միջոցով, զուգահեռ՝ նաև էջերը համարակալված և Քարտուղարության կնիքով կնքված մտից փաստաթղթերի մատյաններում (հավելված N 1), որտեղ արտացոլվում են փաստաթղթերի համառոտ բովանդակությունը, շարժը և կատարման ընթացքը:

8. Ստացված փաստաթղթի մտից գրանցման համարը բաղկացած է սույն կարգով սահմանված պայմանանիշից և հերթական համարից: Փաստաթղթի առաջին էջի ներքևի աջ անկյունում դրվում է մուտքագրման դրոշմակնիքը, գրանցման համարը և ամսաթիվը:

9. Հայաստանի Հանրապետության Նախագահից, Հայաստանի Հանրապետության Ազգային ժողովից, Հայաստանի Հանրապետության կառավարությունից, Հայաստանի Հանրապետության վարչապետից, Հայաստանի Հանրապետության տարածքային կառավարման նախարարից, Հայաստանի Հանրապետության գործադիր և պետական, ինչպես նաև տարածքային կառավարման և տեղական ինքնակառավարման մարմիններից ստացված «Շտապ» մակագրությամբ նյութերը անմիջապես գրանցվում և հանձնվում են Կոմիտեի նախագահին:

10. Քարտուղարությունում բացվում են ստացված բոլոր ծրարները, բացի «Անձամբ» և «Անձնական» մակագրությամբ ծրարներից: «Անձամբ» և «Անձնական» նշումներով ծրարները փակ վիճակում հանձնվում են հասցեատիրոջը:

11. Քարտուղարության աշխատակիցները պարտավոր են ծրարը բացելիս ստուգել փաստաթղթի ամբողջականությունը (առդիրները, էլեկտրոնային կրիչները և այլն), ուղարկված փաստաթղթի համարը համեմատել ծրարի վրա նշվածի հետ:

12. Փաստաթղթի ամբողջական չլինելու դեպքում այն առանց գրանցվելու կից գրությամբ հետ է ուղարկվում հասցեատիրոջը (կցվում են նաև ստացված ծրարները): Նշված եղանակով ետ են ուղարկվում նաև Կոմիտե սխալմամբ ուղարկված փաստաթղթերը:

13. Ստացված թղթակցության ծրարները պահպանվում և փաստաթղթին կցվում են այն դեպքում, երբ միայն ծրարի միջոցով կարելի է պարզել ուղարկողի հասցեն կամ եթե ծրարի վրա փոստային դրոշմակնիքի ամսաթիվը նշանակություն ունի տվյալ նյութի ուղարկման ժամկետը որոշելու համար:

14. Յուրաքանչյուր փաստաթուղթ պետք է ունենա իր էլեկտրոնային պատճենը (ֆայլը)՝ ստեղծված ապարատածրագրային միջոցներով, որն ապահովում է այն պատրաստող անձը կամ Ստորաբաժանումը: Փաստաթղթի կամ դրա էլեկտրոնային տարբերակի իսկությունն ապահովում է այն անձը կամ Ստորաբաժանումը, որը պատրաստել է տվյալ փաստաթուղթը՝ համապատասխան ստորագրություններով:

15. Քաղաքացիներից ստացված առաջարկությունների, դիմումների, բողոքների գրանցումը կատարվում է մնացած թղթակցությունից առանձին:

16. Կոմիտեում Ստորաբաժանումից Ստորաբաժանում վերահասցեագրված փաստաթղթերը հասցեատերերին հանձնվում են Քարտուղարության միջոցով՝ համապատասխան ձևակերպումից հետո միայն:

17. Կոմիտեի Ստորաբաժանումներում գործավարությունն իրականացնում են այն քաղաքացիական ծառայողները, որոնց պաշտոնի անձնագրերում գործառույթը ներառված է, ինչպես նաև նրանք, ովքեր փոխարինում են Ստորաբաժանման գործավարությունն իրականացնող քաղաքացիական ծառայողներին: Ստորաբաժանումներում գործավարությունն իրականացվում է մտից-ելից փաստաթղթերի մատյանների միջոցով (հավելված N 3): Ստորաբաժանման ղեկավարի որոշմամբ Ստորաբաժանումում գործավարությունը մատյաններին զուգահեռ կարող է իրականացվել նաև համակարգչի միջոցով:

18. Ստացված բոլոր փաստաթղթերը գործավարությունն իրականացնող անձի կողմից գրանցվում են Ստորաբաժանման մտից փաստաթղթերի համար նախատեսված գրանցամատյանում և անմիջապես հանձնվում Ստորաբաժանման ղեկավարին: Վերջինս ուսումնասիրում է մտից թղթակցությունը և համապատասխան մակագրությամբ փաստաթղթի կատարումը հանձնարարում կոնկրետ աշխատակցի կամ աշխատակիցների:

19. Ստորաբաժանման ներսում մի աշխատակցից մյուսին փաստաթուղթը փոխանցվում է այդ Ստորաբաժանման մտից փաստաթղթերի համար նախատեսված գրանցամատյանում նշելով փոխանցման ամսաթիվը, նոր կատարողի պաշտոնը և ազգանունը:

20. Եթե հանձնարարականը տրված է մի քանի Ստորաբաժանումների, ապա գլխավոր պատասխանատու է համարվում այն Ստորաբաժանումը, որն առաջինն է նշված մակագրությունների մեջ կամ որի դիմաց նշված է «հավաք» բառը: Նրան իրավունք է վերապահվում քննարկման հրավիրել այլ Ստորաբաժանումների աշխատակիցներին, որոնք հավասար չափով պատասխանատու են փաստաթղթի ժամանակին և պատշաճ կատարման համար:

21. Հանձնարարական ստացած մյուս կատարողները պարտավոր են գլխավոր պատասխանատուին փաստաթղթի վերաբերյալ իրենց առաջարկությունները և բոլոր անհրաժեշտ նյութերը ներկայացնել փաստաթղթի կատարման համար սահմանված ժամկետից երկու աշխատանքային օր առաջ և հանձնարարականը սահմանված ժամկետում կատարելու համար պատասխանատվություն են կրում միայն իրենց կողմից ներկայացված առաջարկությունների և փաստաթղթերի մասով:

Հանձնարարականների կատարման ընթացքում այլ ստորաբաժանումների մասնակցության անհրաժեշտություն առաջանալու դեպքում հարցը բարձրացվում է պատասխանատու կատարողի կողմից՝ գրավոր հիմնավորմամբ:

Հանձնարարականների կատարման ժամկետի կատարման համար պատասխանատվություն է կրում պատասխանատու կատարողը:

22. Աշխատակազմի աշխատակիցները պատասխանատու են իրենց մոտ գտնվող փաստաթղթերի պահպանության համար և պարտավոր են խնամքով վերաբերել դրանց: Չի թույլատրվում Աշխատակազմում ստացված փաստաթղթերի բնագրային տեքստում կամ դրա ֆայլում որևէ նշում կատարել:

23. Արձակուրդ, գործուղման, վերապատրաստման գնալիս կամ այլ պատճառներով բացակայելիս աշխատողը պարտավոր է իր մոտ եղած անավարտ գործերի փաստաթղթերը հանձնել իրեն փոխարինողին կամ անմիջական ղեկավարին:

24. ՀՀ պաշտոնական և գերատեսչական տեղեկագրերը, բացառությամբ ֆինանսական և հաշվապահական ուղղվածություն ունեցող տեղեկագրերի, հաշվառվում և պահվում են Աշխատակազմի իրավաբանական վարչությունում և գրանցելուց հետո տրամադրվում են միայն Կոմիտեի աշխատակիցներին:

25. Ֆինանսական և հաշվապահական ուղղվածություն ունեցող տեղեկագրերը հաշվառվում և պահվում են Աշխատակազմի Ֆինանսատնտեսագիտական վարչությունում:

26. Աշխատակազմի իրավաբանական վարչությունից վերցված իրավական ակտերը ենթակա են վերադարձման՝ 3-օրյա ժամկետում:

III. ԿՈՄԻՏԵԻ ՆԱԽԱԳԱՀԻ, ՆՐԱ ՏԵՂԱԿԱԼՆԵՐԻ ԵՎ ԱՇԽԱՏԱԿԱԶՄԻ ՂԵԿԱՎԱՐԻ ՄՈՏ ՀՐԱՎԻՐՎՈՂ ԽՈՐՀՐԴԱԿՑՈՒԹՅՈՒՆՆԵՐԻ ՆՅՈՒԹԵՐԻ ՆԱԽԱՊԱՏՐԱՍՏՈՒՄՆ ՈՒ ՏԵԽՆԻԿԱԿԱՆ ՍՊԱՍԱՐԿՈՒՄԸ

27. Գործակարգավարական խորհրդակցությունների արձանագրման և սպասարկման աշխատանքները իրականացվում է Քարտուղարության կողմից:

28. Կոմիտեի նախագահի, նրա տեղակալների և Աշխատակազմի ղեկավարի մոտ հրավիրվող խորհրդակցությունների քննարկման հարցերի նախապատրաստման, արձանագրման և սպասարկման աշխատանքները իրականացնում են Ստորաբաժանումները:

29. Արձանագրությունները ստորագրվում են նիստը վարողի և արձանագրողի կողմից, այնուհետև առաքման թերթիկի (հավելված 4) հետ միասին հանձնվում Քարտուղարությանը, որն էլ ապահովում է փաստաթղթի առաքումը: Առաքվող փաստաթղթի պատճենները կնքվում են Քարտուղարության կնիքով:

30. Անհրաժեշտության դեպքում խորհրդակցությունները կարող են նաև ձայնագրվել:

31. Բոլոր արձանագրությունների բնօրինակները պահվում եմ Քարտուղարությունում:

IV. ԿՈՄԻՏԵԻ ՆԱԽԱԳԱՀԻ ԵՎ ԱՇԽԱՏԱԿԱԶՄԻ ՂԵԿԱՎԱՐԻ ՀՐԱՄԱՆՆԵՐԻ ՁԵՎԱԿԵՐՊՈՒՄՆ ՈՒ ԱՌԱՔՈՒՄԸ

32. Կոմիտեի նախագահի և Աշխատակազմի ղեկավարի հրամանների համար, որոնք իրենց հերթին բաժանվում են ընթացիկ և անձնակազմի վերաբերյալ, սահմանվում է առանձին համարակալում՝ տարեսկզբից մինչև տարեվերջ: Հրամանները գրանցվում են համապատասխան գրանցամատյաններում, զուգահեռ՝ նաև համակարգչային ծրագրի միջոցով:

33. Կոմիտեի նախագահի հրամանները ստորագրության ներկայացնելուց առաջ նշագրվում են կոմիտեի նախագահի համապատասխան տեղակալի, աշխատակազմի ղեկավարի, աշխատակազմի ղեկավարի տեղակալի, ինչպես նաև համապատասխան կառուցվածքային ստորաբաժանման ղեկավարների կողմից:

34. Բոլոր հրամանները Կոմիտեի նախագահին (Աշխատակազմի ղեկավարին) ստորագրման ներկայացնելուց առաջ նշագրվում են իրավաբանական վարչության կողմից` հաստատելով հրամանի համապատասխանությունը ՀՀ օրենսդրությանը:

35. Աշխատակազմի ղեկավարի հրամանները ստորագրության ներկայացնելուց առաջ նշագրվում են համապատասխան կառուցվածքային ստորաբաժանման ղեկավարների և իրավաբանական վարչության կողմից:

36. Հրամանի հավելվածների առկայության դեպքում դրանք ստորագրվում են հրամանը պատրաստած համապատասխան Ստորաբաժանման ղեկավարի կողմից:

37. Հրամանների նախագծերը կազմում և շրջանառության մեջ են դնում համապատասխան Ստորաբաժանումները՝ ղեկավարության հանձնարարությամբ կամ սեփական նախաձեռնությամբ՝ իրենց իրավասությունների շրջանակի մեջ մտնող խնդիրների լուծման կամ իրենց տրված հանձնարարականների կատարման նպատակով:

38. Հրամանի նախագծի բովանդակությունը կազմված է երկու մասից՝ փաստագրական (ներածական) և կարգադրական:

39. Փաստագրական մասում հակիրճ շարադրվում են այն փաստերն ու հանգամանքները, որոնք հիմք են հանդիսացել հրամանի կազմման համար, իսկ կարգադրական մասում՝ տրվող հանձնարարականները:

40. Եթե հրամանն արձակվում է իրավական ակտի հիման վրա, ապա ներածական մասում պետք է նշվի այդ հանձնարարությունը բովանդակող փաստաթղթի լրիվ անվանումը, համարն ու ամսաթիվը:

41. Հրամանի կարգադրական մասը սկսվում է «ՀՐԱՄԱՅՈՒՄ ԵՄ» բառով, տպագրվում է մեծատառերով և գրվում առանձին տողի կենտրոնում: Կարգադրական մասը պետք է բովանդակի հանձնարարությունները և միջոցառումները՝ նշելով պատասխանատու անձանց և կատարման ժամկետները:

42. Կարգադրական մասի վերջին կետում նշվում են այն պաշտոնատար անձի կամ անձանց ազգանունները, որոնց վրա դրվում է տվյալ հրամանի կատարման հսկողությունը:

43. Հրամանի նախագծի տեքստը պետք է գրվի «Իրավական ակտերի մասին» ՀՀ օրենքի պահանջներին համապատասխան:

44. Հրամանները նշագրվում են հրամանի վերջին էջի հակառակ կողմում, որտեղ էջի վերին մասում ձախից նշվում է նշագրողի պաշտոնը, աջից անվան առաջին տառը և ազգանունը, իսկ էջի ստորին ձախ անկյունում նշվում է կատարողի ազգանունը և ստորաբաժանման անվանումը:

45. Եթե նշագրողը առաջարկություններ կամ առարկություններ ունի որևէ կետի (կետերի) կամ ամբողջ հրամանի վերաբերյալ, ապա պարտավոր է նշագրման հետ մեկտեղ շարադրել անհամաձայնության առարկայի շուրջ իր հատուկ կարծիքը: Եթե հատուկ կարծիքը ծավալուն է, այն կարող է ներկայացվել առանձին փաստաթղթով, որի մասին նշում է կատարվում նշագրման հետ մեկտեղ: Հատուկ կարծիքը պետք է կցվի հրամանին և պահվի բնօրինակի հետ:

46. Հրամանը ստորագրում է Կոմիտեի նախագահը կամ նրա լիազորությամբ կոմիտեի նախագահի տեղակալներից մեկը:

47. Հրամանին կից՝ պատրաստող Ստորաբաժանման կողմից ներկայացվում է հրամանի առաքման համար նախատեսված առաքման թերթիկը՝ նշագրված Ստորաբաժանման ղեկավարի կողմից (հավելված 4):

48. Հրամանների պատճենները առաքվում են պատրատող Ստորաբաժանման ղեկավարի կողմից առաքման թերթիկում նշված անձանց, Ստորաբաժանումներին և կազմակերպություններին: Հրամանի պատճենները առաքվում են Քարտուղարության պետի կողմից դրանց վրա «Իսկականի հետ ճիշտ է» գրառումը կատարելուց, ստորագրելուց և Քարտուղարության անվանումով կնիքը դնելուց հետո միայն:

49. Այլ պետական մարմինների հետ համատեղ պատրաստված հրամանները պատրաստվում են սովորական թղթի վրա՝ ղեկավարների ստորագրությունները դնելով նույն տողում:

50. Հրամաններում ուղղումներ կատարվում են բացառապես ակնհայտ տեխնիկական վրիպակների դեպքում՝ Աշխատակազմի ղեկավարի կամ նրա տեղակալի գրավոր ցուցումով և առաքվում՝ ըստ սկզբնական հասցեատերերի:

V. ԵԼԻՑ ԹՂԹԱԿՑՈՒԹՅԱՆ ՁԵՎԱԿԵՐՊՈՒՄԸ

51. Կոմիտեի ելից թղթակցությունը գրանցվում է Քարտուղարությունում համակարգչային ծրագրի միջոցով, զուգահեռ՝ նաև էջերը համարակալված և Քարտուղարության կնիքով կնքված ելից փաստաթղթերի մատյաններում (հավելված N 2):

52. Փաստաթղթի գրանցման ելից համարը բաղկացած է սույն կարգով սահմանված պայմանանիշից և հերթական համարից:

53. Աշխատակազմում ելից փաստաթղթերն ստորագրվում են Կոմիտեի նախագահի, նրա տեղակալների, Աշխատակազմի ղեկավարի և նրա տեղակալի կողմից՝ ըստ նրանց պաշտոնական լիազորությունների սահմանազատման ուղղությունների:

54. Տեսչական և ֆինանսական գործառույթների հետ կապված փաստաթղթեր կարող են ստորագրվել կոմիտեի աշխատակազմի ֆինանսատնտեսագիտական վարչության պետ-գլխավոր պետական տեսուչի տեղակալի կողմից:

55. Ապրանքանյութական և դրամական արժեքներ ստանալու կամ առաքելու հետ կապված փաստաթղթերը, ինչպես նաև երաշխիքային գրությունները ստորագրվում են Կոմիտեի նախագահի կամ նրա տեղակալների, Աշխատակազմի ֆինանսատնտեսագիտական վարչության պետ-գլխավոր պետական տեսուչի տեղակալի, իսկ Կոմիտեի Աշխատակազմին վերաբերող մասով՝ Աշխատակազմի ղեկավարի և Աշխատակազմի ֆինանսատնտեսագիտական վարչության պետ-գլխավոր պետական տեսուչի տեղակալի կամ հաշվապահական հաշվառման բաժնի պետի կողմից: Երաշխիքային գրություններում պարտադիր նշվում են Կոմիտեի Աշխատակազմի հաշվարկային հաշվի համարը և դրան սպասարկող բանկի անվանումը:

56. Ելից փաստաթղթերը Կոմիտեի նախագահին ստորագրման է հանձնվում, եթե փաստաթղթի վրա առկա են հանձնարարական ստացած բոլոր պաշտոնատար անձանց նշագրերը կամ նրանց կողմից ներկայացված կարծիքները:

57. Ելից փաստաթուղթը կազմվում է երեք օրինակից: Առաջինն ուղարկվում է հասցեատիրոջը, երկրորդը համապատասխան պաշտոնատար անձանց նշագրումներով մնում է Քարտուղարությունում, իսկ երրորդը՝ կատարման հիմքերով պահպանվում է համապատասխան Ստորաբաժանումում:

58. Առդիրների առկայության դեպքում դրանք ևս նշագրվում են համապատասխան պաշտոնատար անձանց կողմից և կցվում Քարտուղարությունում պահպանվող օրինակին:

59. Գրության տեքստից հետո նշվում են կցվող նյութի (առդիրի) անվանումը, ամսաթիվը, համարը և թերթերի թիվը:

60. Գրության վերջին էջի ներքևի ձախ մասում նշվում է կատարողի ազգանունը և հեռախոսահամարը:

61. Այն դեպքերում, երբ ելից գրությունը ուղարկվում է մտից գրությանը ի պատասխան, ապա ելից գրության մեջ պարտադիր նշվում է մտից գրության ամսաթիվը և համարը:

62. Նույն տվյալները պետք է պարունակի նաև փաստաթղթի էլեկտրոնային տարբերակը:

63. Հեռագրային հարցումների պատասխանները պետք է տրվեն 3 օրից ոչ ավելի ժամանակահատվածում, եթե այլ ժամկետ նախատեսված չէ:

64. Հեռագրերը կազմվում են հարցի լուծումն արագացնելու անհրաժեշտության դեպքում:

65. Արտասահմանյան երկրներ ուղարկվող հեռագրերը ստորագրվում են միայն Կոմիտեի նախագահի կողմից:

66. Կոմիտեի նախագահի տեղակալները և Աշխատակազմի ղեկավարը ստորագրում են միայն իրենց իրավասության հարցերին վերաբերող հեռագրերը:

67. Հեռագրերը կազմելիս մեծատառերով գրվում է «ՀԵՌԱԳԻՐ» բառը: Հեռագրի տեքստը պետք է լինի հակիրճ և չգերազանցի 30-35 բառը: Պետք է շարադրվի առանց շաղկապների և նախածանցների, եթե դրանով չի աղավաղվում բովանդակությունը, առանց բառերը տողադարձելու: Պատասխան հեռագրի տեքստը սկսվում է այն փաստաթղթի համարով, որին պատասխանվում է:

68. Հեռագրում նշվում են՝ հասցեատերը, ելքի համարը, հեռագիրը ստորագրող ղեկավարի պաշտոնը, ազգանունը, հեռագրի ստորին մասում գծից ներքև գրվում է Կոմիտեի հասցեն:

69. Հեռագրերը գրանցվում են Կոմիտեի Քարտուղարությունում, դրանց ելից համարները դրվում են ելից փաստաթղթի համարակալման՝ սույն կարգով սահմանված կարգով:

70. Հրատապ տեղեկատվություն հաղորդելու համար, մի շարք դեպքերում, ՀՀ սահմաններում կարող են օգտագործվել հեռախոսագրերը: Դրանք պետք է կազմված լինեն պարզ և համառոտ տեքստով:

71. Հեռախոսագրերը ստորագրվում են Կոմիտեի Նախագահի, նրա տեղակալների կամ Աշխատակազմի ղեկավարի, նրա տեղակալի կողմից: Հրատապ լուծում պահանջող խնդիրներ առաջանալու դեպքերում հեռախոսագրերը կարող են ստորագրվել նաև Ստորաբաժանման ղեկավարների կողմից:

72. Հեռախոսագրերի վրա դրվում է ելքի համար, նշվում են հաղորդող և ընդունող անձանց ազգանունները, հեռախոսների համարները, ինչպես նաև հաղորդման-ընդունման ամսաթիվն ու ժամը:

73. Հեռախոսագրերի հաղորդումը և ընդունումը կազմակերպում են Աշխատակազմի Ստորաբաժանումների ղեկավարները:

74. Թղթակցությունը Քարտուղարության կողմից հասցեատերերին ուղարկվում է փոստով կամ սուրհանդակային ծառայության միջոցով: Հասցեատիրոջ կամ նրա լիազորված անձի ներկայանալու դեպքում (անձը հաստատող փաստաթղթի առկայությամբ) ելից փաստաթուղթը հանձնվում է առձեռն, որը համապատասխան նշագրում է կատարում ելից փաստաթղթերի գրանցամատյանում:

75. Ելից փաստաթուղթը Քարտուղարության կողմից կարող է հանձնվել նաև փաստաթուղթը պատրաստած ստորաբաժանման ներկայացուցչին, որը համապատասխան նշագրում է կատարում ելից փաստաթղթերի գրանցամատյանում:

76. Առաքվող թղթակցությունը սահմանված կարգով պահվում է Քարտուղարությունում:

VI. ՔԱՂԱՔԱՑԻՆԵՐԻ ԱՌԱՋԱՐԿՈՒԹՅՈՒՆՆԵՐԻ, ԴԻՄՈՒՄՆԵՐԻ ԵՎ ԲՈՂՈՔՆԵՐԻ ՔՆՆԱՐԿՈՒՄԸ ԵՎ ԸՆԹԱՑՔԸ

77. Քաղաքացիներից ստացված առաջարկությունները, դիմումները և բողոքները ստացման օրը սահմանված կարգով գրանցվում են Քարտուղարությունում:

78. Քաղաքացիների՝ Կոմիտեի ղեկավարության կողմից անհատական ընդունելության ժամանակ գրավոր ներկայացրած կամ արձանագրված առաջարկությունները, դիմումները և բողոքները գրանցվում են սահմանված կարգով:

79. Քաղաքացու գրավոր դիմումը, բողոքն ու առաջարկությունը պետք է ստորագրված լինի՝ նշելով դիմումատուի ազգանունը, անունը, հայրանունը, բնակության, աշխատանքի կամ ուսումնական հաստատության հասցեն: Առանց հիշյալ տեղեկությունների՝ առաջարկությունը, դիմումը, բողոքը համարվում է անստորագիր, չի քննարկվում և սահմանված կարգով ոչնչացվում է:

80. Կոլեկտիվ առաջարկության, դիմումի և բողոքի ստացման դեպքում գրանցվում է առաջին ազգանունը և նշվում է «կոլ.» բառը:

81. Անհրաժեշտության դեպքում իրականացվում է վարչական վարույթ՝ ՀՀ օրենսդրությամբ սահմանված կարգով:

82. Քաղաքացիներից ստացված առաջարկությունների, դիմումների և բողոքների քննարկման արդյունքների մասին գրավոր կամ դիմողի համաձայնությանբ բանավոր տեղեկացվում է դրանց հեղինակներին:

83. Քաղաքացիներից ստացված առաջարկությունները, դիմումները և բողոքները քննարկվում և պատասխանվում են 15-օրյա ժամկետում, իսկ լրացուցիչ ուսումնասիրություն պահանջողները՝ 1 ամսվա ընթացքում: Նշված ժամկետները չեն տարածվում այն փաստաթղթերի վրա, որոնք ստացվել ՀՀ Նախագահի, ՀՀ Ազգային ժողովի, ՀՀ կառավարության, ՀՀ տարածքային կառավարման նախարարության աշխատակազմերից և որոնցում նշված է կատարման կոնկրետ ժամկետ:

VII. ՀԱՆՁՆԱՐԱՐԱԿԱՆՆԵՐԻ ԿԱՏԱՐՄԱՆ ԺԱՄԿԵՏՆԵՐԸ ԵՎ ԿԱՏԱՐՈՂԱԿԱՆ ԿԱՐԳԱՊԱՀՈՒԹՅԱՆ ՀՍԿՈՂՈՒԹՅՈՒՆԸ

84. Կոմիտեում ստացված բոլոր փաստաթղթերի, Կոմիտեի նախագահի և Աշխատակազմի ղեկավարի հրամանների, հանձնարարականների և քաղաքացիների դիմումների հետ կապված ժամկետների նկատմամբ սահմանվում է հսկողություն, որն իրականացվում է Քարտուղարության կողմից, իսկ կատարման հսկողությունը՝ Աշխատակազմի ղեկավարի կողմից: Յուրաքանչյուր երկուշաբթի Քարտուղարության կողմից Կոմիտեի նախագահի տեղակալներին, Կոմիտեի աշխատակազմի ղեկավարին, նրա տեղակալին, Ստորաբաժանման ղեկավարներին, համակարգի կազմակերպություններին տրամադրվում է նախորդ ուրբաթ օրվա դրությամբ ինչպես չկատարված, այնպես էլ կատարվելիք հանձնարարականների ցանկը: Յուրաքանչյուր Ստորաբաժանումում, կազմակերպությունում հանձնարարականի վերահսկողությունը իրականացնում է տվյալ Ստորաբաժանման, կազմակերպության ղեկավարը:

85. Հանձնարարականը համարվում է կատարված՝ առաջադրված հարցերի լուծումից և շահագրգիռ անձանց ու կազմակերպություններին պատշած ձևով պատասխանելուց հետո:

86. Միջանկյալ պատասխանը, ինչպես նաև հանձնարարականի կատարման համար անհրաժեշտ հարցումը հիմք չի հանդիսանում փաստաթուղթը կատարված համարելու համար:

87. Քարտուղարությունը փաստաթուղթը հսկողությունից հանում է այն դեպքում, երբ այն կատարվել է համապատասխան ելից գրությամբ, ինչպես նաև այն դեպքերում, երբ փաստաթղթի վրա Ստորաբաժանման ղեկավարի կողմից գրված համապատասխան հիմնավորման վրա առկա է Կոմիտեի նախագահի կամ նրա համապատասխան տեղակալի, Աշխատակազմի ղեկավարի կամ նրա տեղակալի «Գործին» մակագրությունը:

88. Աշխատակազմում փաստաթղթերի կատարման համար սահմանվում են հետևյալ ժամկետները.

88.1 Հայաստանի Հանրապետության նախարարությունների, այլ պետական մարմինների կողմից ՀՀ օրենքների, ՀՀ կառավարության և ՀՀ վարչապետի որոշումների նախագծերի, այդ թվում՝ լրացուցիչ ուսումնասիություններ, հիմնավորումներ, խորհրդակցության հրավիրում պահանջող նախագծերի (եթե այլ ժամկետներ նախատեսված չեն) քննարկման համար սահմանվում է 5-օրյա ժամկետ:

88.2 Հայաստանի Հանրապետության Նախագահի աշխատակազմից, Հայաստանի Հանրապետության Ազգային ժողովից, Հայաստանի Հանրապետության կառավարությունից ստացված հանձնարարականների կատարման համար (եթե այլ ժամկետներ նախատեսված չեն)՝ սահմանվում է 15-օրյա ժամկետ:

88.3 Հայաստանի Հանրապետության նախարարություններից, այլ պետական մարմիններից, ֆիզիկական և իրավաբանական անձանցից ստացված հարցումներին և այլ գրություններին պատասխանելու համար (եթե այլ ժամկետներ նախատեսված չեն) սահմանվում է.

ա) լրացուցիչ ուսումնասիրություններ չպահանջող հարցերի համար՝ մինչև 10 օր,

բ) լրացուցիչ ուսումնասիրություններ, քննարկումներ պահանջող հարցերի համար՝ մինչև 30 օր:

89. Եթե հանձնարարականի կատարման ընթացքում պարզվում է, որ նշված ժամկետում հանձնարարականի կատարումը հնարավոր չէ, ապա հանձնարարական ստացած պաշտոնատար անձը պարտավոր է ժամկետի երկարաձգման վերաբերյալ ներկայացնել առաջարկություն կատարման ժամկետի ավարտից առնվազն 2 օր առաջ:

VIII. ԷԼԵԿՏՐՈՆԱՅԻՆ ՓՈՍՏԻ ՍՊԱՍԱՐԿՈՒՄԸ

90. Կոմիտեում էլեկտրոնային փոստի սպասարկումը իրականացնում է Աշխատակազմի արտաքին կապերի բաժինը:

91. Էլեկտրոնային փոստով ուղարկված փաստաթղթերը ստացվում են Աշխատակազմի արտաքին կապերի բաժնի կողմից և ներկայացվում Քարտուղարություն:

92. Օտար լեզվով ստացված փաստաթղթին կցվում է հայերեն թարգմանությունը: Քարտուղարություն ներկայացվող բոլոր փաստաթղթերի թարգմանությունները նշագրվում են արտաքին կապերի բաժնի պետի կողմից:

IX. ԻՆՏԵՐՆԵՏԱՅԻՆ ԿԱՅՔԷՋԻ ՍՊԱՍԱՐԿՈՒՄԸ

93. Կոմիտեի ինտերնետային կայքէջի սպասարկումը իրականացվում է Աշխատակազմի ֆինանսատնտեսագիտական վարչության կողմից:

94. Կոմիտեի բոլոր պաշտոնատար անձինք և ստորաբաժանումները պարտավոր են իրենց կողմից պատրաստված և Կոմիտեի նախագահի կողմից ստորագրված ՀՀ օրենքների, ՀՀ կառավարության և վարչապետի որոշումների նախագծերը, ինչպես նաև այլ փաստաթղթերը՝ պատասխանատու անձանց համապատասխան նշագրերով և էլեկտրոնային կրիչներով, ինտերնետային կայքէջում ներդնելու համար տրամադրել (փաստաթղթերի ստորագրման օրը) Աշխատակազմի ֆինանսատնտեսագիտական վարչությանը:

X. ՓԱՍՏԱԹՂԹԵՐԻ ՊԱՀՊԱՆՈՒՄԸ

95. Աշխատակազմի արխիվում փաստաթղթերի համալրումը, հաշվառումը և պահպանումն իրականացվում են «Արխիվային գործի մասին» Հայաստանի Հանրապետության օրենքի պահանջներին համապատասխան:

96. Փաստաթղթերն Աշխատակազմի Արխիվ են հանձնվում դրանց՝ գործավարությամբ ավարտելու տարվան հաջորդող երկրորդ տարվա ընթացքում:

97. Աշխատակազմի արխիվի փաստաթղթերն օգտագործվում են Հայաստանի Հանրապետության արխիվային հավաքածուի՝ պետության սեփականությունը համալրող փաստաթղթերի օգտագործման կարգի պահանջների համապատասխան:

98. Աշխատակազմի արխիվը պահպանության համար փաստաթղթերն ընդունում է կարգավորված վիճակում՝ ըստ ցուցակների (2 օրինակ):

99. Աշխատակազմի համապատասխան մասնագետները (որոնց պաշտոնի անձնագրում, աշխատանքային պայմանագրում արխիվացման աշխատանքների գործառույթը ներառված է) աշխատակազմի ստորաբաժանումների գործերի ընդունման ժամանակ ստուգում է դրանց առկայությունը, ստորագրում է ցուցակների բոլոր օրինակների վրա, նշում գործերի ընդունման ամսաթիվը և քանակը:

Ցուցակի մեկ օրինակը տրվում է գործերը հանձնողին, մյուսները մնում են աշխատակազմի արխիվում:

100. Արխիվից փաստաթղթերը տրամադրվում են օգտագործման միայն համապատասխան մատյանում գրանցելով:

101. Հայաստանի Հանրապետության օրենսդրությամբ սահմանված ժամկետները լրանալուց հետո մշտական պահպանության գործերն աշխատակազմի արխիվից հանձնվում են պետական արխիվ:

XI. ԿՈՄԻՏԵԻ ՂԵԿԱՎԱՐՈՒԹՅԱՆ ԵՎ ԱՇԽԱՏԱԿԱԶՄԻ ԿԱՌՈՒՑՎԱԾՔԱՅԻՆ ՍՏՈՐԱԲԱԺԱՆՈՒՄՆԵՐԻ ՊԱՅՄԱՆԱՆԻՇԵՐԸ

102. Կոմիտեի ղեկավարության, Աշխատակազմի կառուցվածքային ստորաբաժանումներին տրվում են հետևյալ պայմանանիշերը.

● կոմիտեի նախագահ-01

● կոմիտեի նախագահի տեղակալ-02

● կոմիտեի աշխատակազմի ղեկավար-03

● կոմիտեի աշխատակազմի ղեկավարի տեղակալ-04

● կոմիտեի աշխատակազմի իրավաբանական վարչություն-05

● կոմիտեի աշխատակազմի ֆինանսատնտեսագիտական վարչություն -06

● կոմիտեի աշխատակազմի ոռոգման և կոլեկտորադրենաժային համակարգերի վարչություն-07

● կոմիտեի աշխատակազմի ջրամատակարարման և ջրահեռացման համակարգերի վարչություն- 08

● կոմիտեի աշխատակազմի քարտուղարություն-09

● կոմիտեի աշխատակազմի արտաքին կապերի բաժին-10

● կոմիտեի նախագահի խորհրդական, օգնական, մամլո քարտուղար, ռեֆերենտ-քարտուղար-11

● կոմիտեի աշխատակազմի գլխավոր աուդիտոր-12

● այլ-13

XII. ՏԱՐԲԵՐ ՄԱՐՄԻՆՆԵՐԻՑ ՍՏԱՑՎԱԾ ԵՎ ԱՅԴ ՄԱՐՄԻՆՆԵՐ ՈՒՂԱՐԿՎՈՂ ՓԱՍՏԱԹՂԹԵՐԻՆ ՏՐՎՈՂ ՊԱՅՄԱՆԱՆԻՇԵՐ

103. Տարբեր մարմիններից ստացված և այդ մարմիններ ուղարկվող փաստաթղթերին տրվում են հետևյալ պայմանանիշերը.

● ՀՀ Նախագահի աշխատակազմ-01

● ՀՀ Ազգային ժողով-02

● ՀՀ կառավարություն, ՀՀ տարածքային կառավարման նախարարություն-03

● ՀՀ դատախազություն, ՀՀ դատարաններ-04

● ՀՀ նախարարություններ-05

● ՀՀ գերատեսչություններ-06

● ՀՀ մարզեր, համայնքներ-07

● միջազգային կազմակերպություններ-08

● համակարգում ընդգրկված կազմակերպություններ-09

● այլ-10։

Մ Ա Տ Յ Ա Ն

մտից փաստաթղթերի

Մտից հ/հ ամսա-թիվը	Փաստա-թղթի համարը, ամսա-թիվը	Որտե-ղից է ստաց-վել	Համա-ռոտ բովան-դակու-թյունը	Ում է հաս-ցեա-գրված	Ում է մակա-գրված	Մակա-գրու-թյունը	Կատար-ման ժամ-կետը	Հիմք հանդի-սացող գրու-թյան համարը	Նշում կատար-ման մասին
1	2	3	4	5	6	7	8	9	10

Հավելված 2 ՀՀ տարածքային կառավարման նախարարության ջրային տնտեսության պետական կոմիտեի գործավարության կարգի

Մ Ա Տ Յ Ա Ն

ելից փաստաթղթերի

Հ/հ	Ելից համարը, ամսա-թիվը	Ում է հասցեագրված	Համառոտ բովանդակությունը	Կապված փաստաթղթի համարը	Ռեեստրի համարը	Կատարողի ազգանունը
1	2	3	4	5	6	7

Հավելված 3 ՀՀ տարածքային կառավարման նախարարության ջրային տնտեսության պետական կոմիտեի գործավարության կարգի

Մ Ա Տ Յ Ա Ն

մտից-ելից փաստաթղթերի

Հ/հ, ամսա-թիվը	Մտից համարը, ամսա-թիվը	Որտե-ղից է ստաց-վել	Համա-ռոտ բովան-դակու-թյունը	Ով է հանձ-նա-րարել	Ինչ է մակա-գրվել	Կատար-ման ժամ-կետը	Հիմք հանդի-սացող գրության համարը	Ում է մակա-գրվել	Ստորա-գրու-թյունը	Նշում կատար-ման մասին
1	2	3	4	5	6	8	9	10	11	12

Հավելված 4 ՀՀ տարածքային կառավարման նախարարության ջրային տնտեսության պետական կոմիտեի գործավարության կարգի

Առաքման թերթիկ

ՀՀ տարածքային կառավարման նախարարության ջրային տնտեսության պետական կոմիտեի հրամանների և արձանագրությունների

N ____

___ _____________200 թ.

Անվանունը	Քանակը
Կոմիտեի ղեկավարություն և աշխատակազմ
Կոմիտեի նախագահ
Կոմիտեի նախագահի տեղակալ
Կոմիտեի նախագահի տեղակալ
Կոմիտեի նախագահի տեղակալ
Կոմիտեի աշխատակազմի ղեկավար
Կոմիտեի աշխատակազմի ղեկավարի տեղակալ
Կոմիտեի աշխատակազմի ոռոգման և կոլեկտորադրենաժային համակարգերի վարչություն
Կոմիտեի աշխատակազմի ջրամատակարարման և ջրահեռացման համակարգերի վարչություն
Կոմիտեի աշխատակազմի ֆինանսատնտեսագիտական վարչություն
Կոմիտեի աշխատակազմի իրավաբանական վարչություն
Կոմիտեի աշխատակազմի քարտուղարություն
Կոմիտեի աշխատակազմի արտաքին կապերի բաժին
Կոմիտեի աշխատակազմի գլխավոր աուդիտոր
Կոմիտեի նախագահի խորհրդական
Կոմիտեի նախագահի օգնական
Կոմիտեի նախագահի մամուլի քարտուղար
Համակարգի կազմակերպություններ
«Ջրային տնտեսության զարգացման և բարեփոխումների ծրագրերի իրականացման գրասենյակ» ՊՀ
«Երևանջուր» ՓԲԸ
«Հայջրմուղկոյուղի» ՓԲԸ
«Ջրմուղկոյուղի» ՓԲԸ
«Մելիորացիա» ՓԲԸ
«Նոր-Ակունք» ՓԲԸ
«Լոռի-ջրմուղկոյուղի» ՓԲԸ
«Շիրակ-ջրմուղկոյուղի» ՓԲԸ
«Ախուրյան-Արաքս-ջրառ» ՓԲԸ
«Սևան-Հրազդանյան-ջրառ» ՓԲԸ
«Դեբեդ-Աղստև-ջրառ» ՓԲԸ
Ջրային համակարգերի օգտագործման և պահպանության տեխնիկական հանձնաժողով
Այլ

Պատասխանատու ստորաբաժանման	______________	______________
ղեկավար՝	ստորագրություն	անուն, ազգանուն