310.0001.25.12.98

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՐԿԱՅԻՆ ՏԵՍՉՈՒԹՅՈՒՆ

Հ Ր Ա Մ Ա Ն

«ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԿԻՐԱՌՄԱՆ ՀԱՄԱՐ ԹՈՒՅԼԱՏՐՎՈՂ ՀՍԿԻՉ-ԴՐԱՄԱՐԿՂԱՅԻՆ ՄԵՔԵՆԱՆԵՐԻ ՏԵԽՆԻԿԱԿԱՆ ՍՊԱՍԱՐԿՄԱՆ ԵՎ ՆՈՐՈԳՄԱՆ ԾԱՌԱՅՈՒԹՅՈՒՆՆԵՐՈՎ ԶԲԱՂՎԵԼՈՒ ԼԻՑԵՆԶԱՎՈՐՄԱՆ» ԿԱՐԳԸ ՀԱՍՏԱՏԵԼՈՒ ՄԱՍԻՆ

Ի կատարումն ՀՀ կառավարության 1998 թ. դեկտեմբերի 22-ի «Հայաստանի Հանրապետությունում կիրառման համար թույլատրվող հսկիչ-դրամարկղային մեքենաների տեխնիկական սպասարկման և նորոգման կարգի հաստատման և Հայաստանի Հանրապետության նախարարների խորհրդի 1991 թ. մարտի 5-ի N 161 որոշման մեջ լրացում կատարելու մասին» N 815 որոշման 3-րդ կետի

Հրամայում եմ `

Հաստատել «Հայաստանի Հանրապետությունում կիրառման համար թույլատրվող հսկիչ-դրամարկղային մեքենաների տեխնիկական սպասարկման և նորոգման ծառայություններով զբաղվելու լիցենզավորման» կարգը (կցվում է):

Հարկային տեսչության պետ

Ս. Այվազյան

Հաստատված է ՀՀ հարկային տեսչության պետի 1998 թվականի դեկտեմբերի 25-ի  01/59 հրամանով

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԿԻՐԱՌՄԱՆ ՀԱՄԱՐ ԹՈՒՅԼԱՏՐՎՈՂ ՀՍԿԻՉ-ԴՐԱՄԱՐԿՂԱՅԻՆ ՄԵՔԵՆԱՆԵՐԻ ՏԵԽՆԻԿԱԿԱՆ ՍՊԱՍԱՐԿՄԱՆ ԵՎ ՆՈՐՈԳՄԱՆ ԾԱՌԱՅՈՒԹՅՈՒՆՆԵՐՈՎ ԶԲԱՂՎԵԼՈՒ ԼԻՑԵՆԶԱՎՈՐՄԱՆ

I. Ընդհանուր դրույթներ

1.1. Սույն կարգը մշակվել է Հայաստանի Հանրապետության կառավարության 1998 թ. դեկտեմբերի 22-ի «Հայաստանի Հանրապետությունում կիրառման համար թույլատրվող հսկիչ-դրամարկղային մեքենաների վաճառքի, տեխնիկական սպասարկման և նորոգման կարգի հաստատման և Հայաստանի Հանրապետության նախարարների խորհրդի 1991 թ. մարտի 5-ի N 161 որոշման մեջ լրացում կատարելու մասին» N 815 որոշման 3-րդ կետի պահանջի համաձայն և կանոնակարգում է Հայաստանի Հանրապետությունում կիրառման համար թույլատրվող հսկիչ-դրամարկղային մեքենաների (այսուհետև` ՀԴՄ) տեխնիկական սպասարկման և նորոգման ծառայություններով զբաղվելու լիցենզավորման գործընթացը:

1.2. Սույն կարգը տարածվում է այն իրավաբանական անձանց, և անհատ ձեռնարկատերերի վրա, որոնք ստեղծում են ՀԴՄ-ի տեխնիկական սպասարկման և նորոգման կենտրոններ (այսուհետև` կենտրոն), ՀՀ օրենսդրությամբ սահմանված կարգով կիրառման համար թույլատրված ՀԴՄ-ի տեխնիկական սպասարկման և նորոգման ծառայություններով զբաղվելու համար:

1.3. Լիցենզիա ստացած կենտրոնը պարտավոր է`

ա) պահպանել ՀԴՄ-ի տեխնիկական սպասարկման և նորոգման ՀՀ օրենսդրությամբ սահմանված նորմերը.

բ) կենտրոններ ստեղծել հիմնական կառույց հանդիսացող և կապով ապահովված շինություններում,

գ) հնարավորություն ընձեռնել լիցենզավորվող պետական կառավարման մարմնի լիազորված անձանց ստուգելու լիցենզիա ստանալու դիմումին կից փաստաթղթերում եղած տեղեկությունների համապատասխանությունը իրականությանը, կատարել ուսումնասիրություններ և կազմել եզրակացություններ օրենսդրությամբ սահմանված նորմերին կենտրոնի աշխատանքի համապատասխանության մասին.

1.4. Լիցենզիա տրվում է 3 տարի ժամկետով.

ա) լիցենզիա տալու համար գանձվում է պետական տուրք «Պետական տուրքի մասին» ՀՀ օրենքով սահմանված կարգով ու չափով.

բ) լիցենզիան անվանական փաստաթուղթ է, այն չի կարող փոխանցվել, տրամադրվել կամ վաճառվել.

գ) լիցենզիան տրվում է ՀՀ հարկային տեսչության կողմից հաստատված միասնական ձևով (կցվում է):

2. Լիցենզիայի տրման համար պահանջվող փաստաթղթերը

2.1. Լիցենզիա ստանալու համար կենտրոնը ՀՀ հարկային տեսչություն է ներկայացնում դիմում` նշելով իր կազմակերպական-իրավական տեսակը, լրիվ անվանումը, հարկ վճարողի հաշվառման համարը (այսուհետև` ՀՎՀՀ-ն), բանկային հաշվի համարը: Դիմումին կից ներկայացվում է նաև կենտրոնների համար նախատեսված տարածքների (շինությունների) հասցեները և նրանց նկատմամբ սեփականության իրավունքը հաստատող փաստաթղթերը (վարձակալած տարածքների համար վարձակալության պայմանագիրը):

2.2. Դիմումին կից ներկայացվում են`

ա) կենտրոնի հիմնադիր փաստաթղթերի պատճենները.

բ) այն ՀԴՄ-ի մոդելների ցանկը, որոնց տեխնիկական սպասարկումը և նորոգումը կատարվելու է տվյալ կենտրոնի կողմից, համաձայն արտադրողի հետ կնքված պայմանագրի,

գ) ՀԴՄ-ի սույն կետի «բ» ենթակետի ցանկում ընդգրկված մոդելների շահագործման փաստաթղթերի փաթեթի պատճենը` հայերեն լեզվով:

3. Լիցենզավորող մարմնի գործողությունները

3.1. Սույն կարգի 2.1 և 2.2 կետերում նշված փաստաթղթերը ստանալուց հետո ՀՀ հարկային տեսչությունում գործող լիցենզավորող հանձնաժողովը քննության է առնում կենտրոնի դիմումը և 15 օրվա ընթացքում որոշում է ընդունում լիցենզիայի տրման կամ դիմումի մերժման մասին:

Որոշման մեկ օրինակը տրվում է դիմողին:

3.2. Դիմումը մերժելու որոշման մեջ նշվում են մերժման պատճառները:

Աննպատակահարմարության շարժառիթով դիմումի մերժումն արգելվում է:

3.3. Լիցենզիա տալու դիմումի մերժումը կարող է գանգատարկվել ՀՀ օրենսդրությամբ սահմանված կարգով:

3.4. Հանձնաժողովի դրական որոշման դեպքում լիցենզիան տրվում է 5 օրվա ընթացքում:

4. Լիցենզիաների հաշվառումը

4.1. ՀՀ հարկային տեսչությունը վարում է լիցենզիաների գրանցման մատյան, որտեղ գրանցվում է լիցենզիա ստացած կենտրոնների`

ա) լրիվ անվանումը.

բ) լիցենզիայի հերթական համարը և տրման ամսաթիվը.

գ) կազմակերպական-իրավական տեսակը.

դ) ՀՎՀՀ-ն.

ե) այն ՀԴՄ-ի մոդելները, որոնց տեխնիկական սպասարկումն ու նորոգումը թույլատրվում է կատարել.

զ) կենտրոնների հասցեները և հեռախոսահամարները:

4.2. Լիցենզիաների գրանցման մատյանի բոլոր էջերը համարակալվում, կարվում և կնքվում են ՀՀ հարկային տեսչության կողմից:

5. Լիցենզիայի ուժը կորցրած ճանաչելը

5.1. Լիցենզիան ուժը կորցրած է ճանաչվում, եթե`

ա) սույն կարգի 2.1 և 2.2 կետերի համաձայն ներկայացված փաստաթղթերից որևէ մեկում հայտնաբերվել է կեղծ տեղեկատվություն.

բ) խախտվել են սույն կարգի 1.3 և 1.4 կետերում նշված պայմաններից որևէ մեկը.

գ) լիցենզիա ստացած կենտրոնը լուծարվել է.

դ) ՀՀ օրենսդրությամբ նախատեսված այլ դեպքերում:

5.2. Լիցենզիան ուժը կորցրած ճանաչելու մասին առաջարկությունը ներկայացնում է լիցենզավորող հանձնաժողովը:

Լիցենզիան ճանաչվում է ուժը կորցրած ՀՀ հարկային տեսչության պետի հրամանով, որը հրապարակվում է 2000-ից ոչ պակաս տպաքանակ ունեցող մամուլում:

Հրամանի մեկ օրինակը տրամադրվում է կենտրոնին:

5.3. Լիցենզիան ուժը կորցրած ճանաչելու մասին հրամանը ստանալուց հետո կենտրոնը պարտավոր է դադարեցնել ՀԴՄ-ի տեխնիկական սպասարկման և նորոգման գործունեությունը և այդ մասին տեղյակ պահել օգտագործողներին.

5.4. Լիցենզիան ուժը կորցրած ճանաչելու մասին որոշումը կարող է գանգատարկվել ՀՀ օրենսդրությամբ սահմանված կարգով:

5.5. Կենտրոնի մոտ լիցենզիայի կրկնօրինակի կարիք առաջանելու դեպքում` այդ մասին տեղյակ է պահվում ՀՀ հարկային տեսչությանը: Վերջինս դիմումն ստանալուց հետո 15 օրվա ընթացքում տալիս է նոր լիցենզիա` դրա վրա կատարելով «կրկնօրինակ» նշագրումը:

5.6. Կենտրոնի գործունեությունը իրականացնելու հասցեն (հասցեները, եթե գործունեությունն իրականացվում է տարբեր վայրերում) փոփոխվելու դեպքում լիցենզիան ենթակա է վերաձևակերպման ՀՀ օրենսդրությանը համաձայն:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՏԵՍՉՈՒԹՅՈՒՆ

Լ Ի Ց Ե Ն Զ Ի Ա  N __

Հսկիչ-դրամարկղային մեքենաների (ՀԴՄ) տեխնիկական սպասարկման եվ նորոգման գործունեության

Ձեռնարկությունը ____________________________________________________

(անվանումը, հարկ վճարողի հաշվառման համարը)

Տեխնիկական սպասարկման և նորոգման կենտրոնի հասցեն __________________

_______________________________________________________

Տվյալ ձեռնարկության կողմից տեխնիկական սպասարկման և նորոգման համար նախատեսվող

ՀԴՄ-ների մոդելները _______________________________________

____________________________________________________

____________________________________________________

Լիցենզիայի ուժի մեջ մտնելու օրը  ____ _______199  թ.

Լիցենզիան ուժի մեջ է մինչև  ____ _______ 200  թ.

Հայաստանի Հանրապետության

հարկային տեսչության պետ__________________

Կ. Տ.

Գրանցված է

Հայաստանի Հանրապետության

արդարադատության նախարարության կողմից

30 դեկտեմբերի 1998 թ.

պետական գրանցման թիվ 43980230