ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՖԻՆԱՆՍՆԵՐԻ ԵՎ ԷԿՈՆՈՄԻԿԱՅԻ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

19.06.1998թ. ք. Երևան

N 186

ԴԻԼԵՐԱՅԻՆ ԳՈՐԾՈՒՆԵՈՒԹՅԱՆ ՕՐԻՆԱԿԵԼԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Ելնելով Հայաստանի Հանրապետության Կառավարության 1998 թ. հունվարի 7-ի «Արժեթղթերի շուկայում իրականացվող գործունեության լիցենզավորման կարգը հաստատելու մասին» թիվ 3 որոշման պահանջներից`

ՀՐԱՄԱՅՈՒՄ ԵՄ

Հաստատել «Դիլերային գործունեության օրինակելի կանոնակարգը» (կցվում է):

Նախարար

Է. Սանդոյան

Հաստատված է (հայտատուի լրիվ անվանումը, ստորագրությունը և կամ կնիքը) ___ ______________199  թ.

Հաստատված է ՀՀ ֆինանսների և էկոնոմիկայի նախարարի 1998 թ-ի 19.06-ի թիվ 186 հրամանով

ՕՐԻՆԱԿԵԼԻ ԿԱՆՈՆԱԿԱՐԳ ԴԻԼԵՐԱՅԻՆ ԳՈՐԾՈՒՆԵՈՒԹՅԱՆ

I. Ընդհանուր դրույթներ

1. Սույնով սահմանվում է _______________________________________________

(կազմակերպության անվանումը կամ ֆիզիկական անձի Ա. Ա. Հ.)

(այսուհետև դիլեր) ՀՀ արժեթղթերի շուկայում դիլերային գործունեության կանոնակարգը:

2. Դիլերը գործում է ՀՀ օրենսդրության և սույն կանոնակարգի հիման վրա:

3. ՀՀ օրենսդրության և սույն կանոնակարգի դրույթները խախտելու համար դիլերը պատասխանատվություն է կրում ՀՀ օրենսդրությամբ սահմանված կարգով:

II. Դիլերային գործունեության ոլորտը ԵՎ կատարվող գործառնությունները

4. Դիլերն իրականացնում է արժեթղթերի առուծախ` իր անունից և իր հաշվին, արժեթղթերի գնման և (կամ վաճառքի գների հրապարակային հայտարարման միջոցով, այդ արժեթղթերը պարտադիր գնելու կամ վաճառելու պարտավորությամբ:

5. Հաճախորդի հետ կնքված պայմանագրով (այսուհետև` պայմանագիր) սահմանված պարտավորությունների կատարման ժամանակ, որը ներառում է նաև առևտրային գաղտնիքի պահպանման պայմանը, դիլերը ձեռնարկում է բոլոր միջոցառումները հաճախորդի անվանման, նրա վճարման վավերապայմանների, պայմանագրային պարտավորությունների կատարման հետ կապված այլ տեղեկատվության գաղտնիությունը ապահովելու համար, բացառությամբ, ՀՀ օրենսդրությամբ սահմանված լիազորված պետական կառավարման մարմնին ներկայացվող տեղեկությունների:

6. Դիլերը հաճախորդին պետք է փոխհատուցի այն վնասները, որոնք առաջանում են.

ա) պայմանագրով սահմանված պայմանները չկատարելու կամ ոչ պատշաճ կատարելու հետևանքով,

բ) հաճախորդի առևտրային գաղտնիք հանդիսացող տեղեկությունների հրապարակման դեպքում:

7. Սույն կանոնակարգի 4-րդ կետի գործառնությունները իրականացնելիս դիլերը բացում և վարում է գործարքների գրանցամատյան:

8. Գործարքների գրանցամատյանը ներառում է.

ա) գործարքի կնքման ամսաթիվը,

բ) գործարքի առարկա հանդիսացող արժեթղթերի քանակը, տեսակը, արժեքը,

գ) գործարքի ընդհանուր գումարը,

դ) գործարքի կատարման ամսաթիվը:

Գործարքների գրանցամատյանը կարվում և ստորագրվում է (կնքվում է) դիլերի կողմից:

III. Դիլերների իրավունքները ԵՎ պարտականությունները

9. Սույն կանոնակարգի 4-րդ կետում նշված գործառնություններն իրականացնելիս դիլերն իրավունք ունի`

ա) ՀՀ օրենսդրության պահանջներին համապատասխան կնքել արժեթղթերի առուծախի պայմանագրեր:

բ) արժեթղթերի փոխանակության գործարքներ իրականացնելիս կարող է փոխանակել մեկ արժեթուղթը մյուսով միայն սույն կարգի 4-րդ կետի հիմքերով,

գ) Իրականացնել գործող օրենսդրությանը համաձայն դիլերային գործունեությանը վերաբերող այլ ֆինանսական գործառնություններ:

10. Պայմանագիրը ներառում է`

ա) պայմանագրի առարկան և գինը,

բ) կողմերի պարտավորությունները և պատասխանատվությունը,

գ) վճարումների կարգը,

դ) արժեթղթերի հաշվարկման և փոխանցման կարգը, վեճերի լուծման կարգը, ինչպես նաև կողմերի համաձայնությամբ այլ պայմաններ,

ե) կողմերի միջև կապի իրականացման կարգը,

զ) պայմանագրի գործողության ժամկետը,

է) կողմերի վավերապայմանները,

ը) ՀՀ օրենսդրությամբ և կողմերի համաձայնությամբ այլ պայմաններ:

11. Սույն կարգի 4-րդ կետում նշված գործառնություններն իրականացնելիս, դիլերը բացի գնից իրավունք ունի հրապարակել արժեթղթերի առուծախի պայմանագրի այլ էական պայմաններ` գնվող և/կամ վաճառվող արժեթղթերի առավելագույն կամ նվազագույն քանակը, ինչպես նաև ժամկետը, որի ընթացքում գործում են հայտարարված գները: Հրապարակման մեջ այլ էական պայմանների մասին ցուցումների բացակայության դեպքում, դիլերը պարտավոր է պայմանագիր կնքել հաճախորդի կողմից առաջարկվող պայմաններով: Դիլերի կողմից վերոհիշյալ պայմանագրի կնքումից խուսափելու դեպքում դիլերի նկատմամբ կարող է ներկայացվել հայց վերոհիշյալ պայմանագրի պարտադիր կնքման համար և/կամ պարտադրել փոխհատուցել հաճախորդին հասցված վնասը:

12. Դիլերը պարտավոր է ապահովել`

ա) արժեթղթերի առուծախի պայմանագրով ստանձնած պարտավորությունների բարեխիղճ և ազնիվ կատարում,

բ) լիազորված մարմնին հաշվետվությունների ներկայացում` ՀՀ օրենսդրությամբ սահմանված կարգով:

IV. Սահմանափակումներ

13. ՀՀ օրենսդրությամբ, ինչպես նաև թողարկողի կողմից սահմանված կարգով արգելված կամ սահմանափակված արժեթղթերի առուծախ` դիլերը կարող է իրականացնել միայն ՀՀ օրենսդրությամբ սահմանված դեպքերում և կարգով:

14. Արժեթղթերի շուկայում դիլերն իր գործունեությունը բրոքերային գործունեության հետ համատեղելու դեպքում պարտավոր է բրոքերային գործունեությունն իրականացնել ֆոնդային բորսայում:

V. Եզրափակիչ դրույթներ

15. Դիլերային գործունեությամբ զբաղվող անձանց սեփական կապիտալի չափը պետք է համապատասխանի պետական լիազորված կառավարման մարմնի կողմից սահմանված պահանջներին` նրանց կողմից համապատասխան գործունեության իրականացման ամբողջ ժամանակահատվածում:

16. Դիլերը պարտավոր է իր գործունեությունը համապատասխանեցնել գործող օրենսդրության պահանջներին:

17. Դիլերի մոտ փաստաթղթաշրջանառությունը, հաշվապահական հաշվառումը, ինչպես նաև հաճախորդների առևտրային գաղտնիք հանդիսացող տեղեկությունների պահպանումը և տրամադրումը իրականացվում է ՀՀ օրենսդրությամբ սահմանված կարգով:

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
10.07.1998 Թ.
ՊԵՏԱԿԱՆ ԳՐԱՆՑՄԱՆ ԹԻՎ 209800149